Bobby Sands Rawlulh nuarnak le Ireland Khrihfabuu

Bobby Sands Rawlulh nuarnak le Ireland Khrihfabuu

Salai Tenglam

Tuzan cu Northern Ireland zalonnak caah thazaang a chuah i a nunnak tiang a pe i Ireland tefa hna caah tuanbia dawh a tialtu konglam hi kan mah Lai miphun hna nih hin theihngal ve hna usih law ti ka duh. Bobby Sands timi pa hi Ireland ram hruaitu minthang zong a si lo i, Northern Ireland zalonnak ding caah a tuan mi mi pakhat a si ve ko.

I954 ah John le Rosaleen Sands hna karlak ah a chuak i. an fa ngeih mi pali hna lakah an  hmuh hmasak bik zong a si, Hi lio hrawngah hin Northern Ireland cu Catholic Khirhfabuu le Protestant khrihfabuu tiin an i then i, an i ral ngai ngai fawn , i thahnak le i tukvellhnak nih khua le ram a nuamh ter lo ngai, Northern Ireland cu British uknak tang i a um mi a si tikah Protestant pawl cu British cozah nih an tam deuh ca zongah thazaang a pek ngai ngai hna i Catholic khrihfaa pawl cu namneh le thah an tong theu tawn. 

Cu a si caah Booby le a chungkhar hna zong an veng le khua ah an um ngam ti lo i Protestant an tam deuhnak hmun ah an i thial, Northern Ireland hi Ireland ram nih zalonnak an sual lio ah Ireland timi min in zalonnak hmuh a duh lo mi le British cozah kuttang i um a duh mi an si caah Ireland nih zalonnak a hmuh tik zongah an nih cu Northern Ireland timi min pu in British uknak tangah an um thai. Catholic an tam deuhnak Ireland cu British kut in zalonnak an hmu i, Ireland ram kan ti mi hi an hong si i, Protestant an tam deuhnak Northern Ireland cu an unau le sinah i fonh lo in British sal ah an tang thai.

June 1972 ah Bobby te inn cu Protestant pawl nih an tuk i an thah dih dengmang hna, an in cu luah tlak ti lo in an tuah piak hna, hi hnu ah hin Bobby zong Northern Ireland hi British kut in kan chuah awk a si i, Ireland ah kan i fonh ding a si ti a duh mi phu Irish Republican Army ah tel hram a von i thawk. Irish pawl cu a tam deuh Catholic Khrihfabuu an si tikah  le England ram cu Roman Catholic a duh lo mi le Protestant an si caah an zumhnak le an khuaruah pinah an Miphun le thisen ai khat mi zong an si lo, England ram Protestant i an i leh nak a ruang bik pakhat cu Henry VIII nih Catherine of Aragon thitumhnak tuah a duh nain Roman Pope nih a cohlan piak duh lo caah Pope he an i pehtlaihnak a chah i Church of England timi a rak dirh thawkin a si. 

Bobby Sands cu Provisional IRA ah ai tel tum hnu ah Police nih an tlaih i thawngah an thlak i kumhnih chung a tang nain an chuah than, a chuah hnu zongah cun a lung ah ram dawtnak le British huatnak a thi hlei lo i IRA thiam thiam ah cun a tuan than. British Furniture company pakhat hrawh tim in an tuk lio ah Ralkap he fak ngai in an i kap i, cu ah cun an zamnak ah an tlaih hna i an cuannak car ah pistol an hmuh caah kum 14 chung tang ding in dan an tat hna. 

Cu thawngin an tan lio ah cun British cozah nih Poltical prisioner bantukin a zoh duh hna loh i, Ralhrang zoh in a zoh hna caah an lung a tling loh i Jail chungah cun an duhlonak langhter in an nuar theu tawn, a sinain British cozah nih zeihmanh ah a ruah piak hna lo. Kum 1980 ah cun Maze Prison i IRA a tang mi vialte hna lakah Cammanding Officer dingin an ruat i, cu hnu ah cun British cozah nih hlan i an covo a rak pek tawn mi hna Political Prisoner (Politics ruang i a tang mi) sinak cu an hmuh than khoh nak hnga rawl a ulh i a nuar, Blanket Protest an ti i, Jail tang kawr hruk duh lo in an mah thilri te hruk an duhnak an langhter i taklawng bakin ni tamtuk chung an um, cu cu a hlawhtling lo i, Dirty Protest an ti than i, Takkhawlh le an tanin thenh an duh lo in hnawm pengpung le rimchia ngai in an um than, cu zongah cun British cozah nih zei ah a rel piak than hna lo. cu lio i British Prime Minister cu  Margaret Thatcher a si.

1 March 1981 ah cun Rawlulhnak hram an thawk i Bobby Sands cu an commander a si bantukin a hmasa bikah rawl a ulh i a nau le nih an hon zulh ve duahmah. ni tam tuk rawl a ulh hnu ah cun a taksa zong a ba i a thi ding dirhmun ah a dir cang caah Mipi nih a thawngpang an hun theih i Miphun dawtnak thinlung he Bobby Sands le a hawile nih an duh mi cu tuah piak dingin Irish mipi nih cun  British cozah sinah an nawl i lamhrawnnak hna an ngei i nitin an aupi. 

Cu rawlulh nak an ngeih lio ah cun le sau deuh rawl an ulh nolh ah cun a thi ding an si cang lio ah cun Frank Maguire timi pa Fermanagh le South Tyrone, Bial i  Independent Republican MP  cu lungphucawl in a thi, i cu Bial ah cun MP Seat a lawng i thimnak tuah than colh ding a hong si, cu le cangka cun Bobby Sands le a hawi le a tanhtu mipi tampi nih Bobby Sands cu MP i kan thim ah cun a rawlulh hnawh chan mi hi an tuah piak ko lai dah timi an i ruahchan caah cu MP Bial a lawng mi ai ah cun Bobby Sands cu Common Candidate dingah an aupi i, cu lio I Irish Phuntanh Party Pahnih Social Democratic le Labour Party hna zong nih Mipi duhnak cu an cohlan piak hna lawng si lo in an miphun zahawmnak le an unau hna nunnak chanh nak dingah tiin Candidate an tuah duh loh i, cu Mipi Candidate cu an i hrawm i thazaang an pek. 

Bobby Sands cu Thawnginn ah rawlulh in a nuar rih ko i ni 30 leng a nuar cang, nain Mipi nih a nunnnak chanh an duh i Kan ram hrangah nunnak thapin a tuantu hi bawmh a herh tikah kan bawmh ve awk a si anti i, MP i a tlin khoh ah cun rawl a ulh hnawh chan mi hi a hlawhtling lai i a thi lai lo timi ruahchannak he Campainge hram an thawk, hi lio ah hin Northern Ireland pumpi ah Catholic khirhfabuu hi 30% lawng lawng an si i, British kuttang ah um a duh mi Protestant le Catholic a hua ngai ngai tu hi 70% an si. Thimnak cu an hun tuah tak tak i, 9 April 1981  ah result an hun phuan tikah cun Bobby Sands nih , Vote 30,493 a hmuh i a mah a hun naih bik tu Ulster Unionist Party Candidate nih Vite 29,046 a hmuh ve tikah Bobby Sands cu MP ah thim a hung si ko ai. Unionist Party hi British kuttangah um a duh mi le Protetstan nih an dirpi mi Party zong an si. Bobby cu British tuanbi ah a ngakchia bik MP  asi i kum 27 lawng a si, a sinain MP i an thim hnu thlakhat ah le a thutnak zong a luah manh hlanah Rawlulhnak in 5 May 1981 ah a thi , hi hi ni 66 chung rawl a ulh caah le zeihmanh a ei lo caah a si. hi hnu ah hin a hawi le pakua zong an nunnak a liam ve i, a dang cun hi a thil tuah mi le MP a tlin ruangah hin chanh manh an si i, Rawlulh ruang i a thi mi an um ti lo, i an duhnak zong cu British cozah nih a tuah piak hnuhnawh hna. 

Bobby Sands a thihnak kong cu vawlei pumpi nih an hon theih tikah Ramkip in Bristish cozah sawisel le thangchiatnak nih a hun zulh colh i, ramkip parliament cio zongah a min cu chimchuah a hong si, cu lawng zong si lo in, Celtic FC le Rangers FC Football an i khelh lio ah Rangers Fans pawl cu Protestant deuh an si hna caah Bobby thangchiat nak hla an sa i, Celtic Fans pawl cu Romancatholic deuh le Nationalist tanh deuh pawl cu si ve hna kaw, IRA hla le Bobby sunnak hla an sa ve, Bristish Home Championship cu Northern Ireland ah hngah a si caah le England le Walse ram i Football club pawl cu an kal duh lo caah hi championship hi cancel phah a rak si. a ruang cu Bobby Sands thihnak hih Irish mipi nih a tuar nak tuarnak an hngalhthiampi tuk timi an i fian caah a si. 

Bobby Sands a thi timi an theih le cangka Northern Ireland khuapi Belfast ah cun Hmar le Catholic le Nationalis tamnak deuh lei ah cun buainak  fak ngai a chuak i Police le mipi tam ngai zong nih an thih phah. 

Hi tuanbia tawite ka hun chim duhnak a ruang hi tampi  a um, zeitlukin dah khrihfabuu nih miphun a dirkamh i a tunmer khoh timi le zeitlukin dah Irish pawl an miphun le an unau dirhkamh nak dingah an i lungrual khoh i, Political Party tiang nih an candidate an cancel khoh ti hi lanhter ka duhnak a si. Irish miphun cio cio zong Protestant le Catholic tiin an i then ve, Ireland ram ro ro ah cun Catholic an tam deuh caah le an ram a uk tu England cu Protestant an si fawn caah Protestant nih cun English nunphung le English holh lawng an dirpi, a sinain Catholic khrihfabuu nih cun Irish holh le Irish nunphung hna an dirpi ve tikah, Irish miphun a si ko nain Protestan Khirhfabuu ah a um mi Norhern Ireland i a um mi Irish pawl nih cun an miphun dawtnak ngai ngai an ngei lo i, Irish holh le bia zong an sunhsak kho lo i, English ah an fek chin chin i, zalonnak hmu kho dirhmun i an ir tik zongah an unau hna sinah i fonh duh loin England sal ah um an duh thiam thiam rih.

Cuticun Ireland cu hmunhnih ah then a si i, Republic of Ireland le Northern Ireland ah then a si i, Northern Ireland cu British uknak tangah a hung um thai, asinain Catholic Khirhfabuu ah a um mi Irish holh le Irish nunphung a nun pi i a tanh mi hna zong Nothern Ireland ah cun an um ve thiam thiam i, 100 ah 30%  hrawng lawng asn si ko nain, an thinlung tak tak in Bristish kuttangah an um kho lo, a ruang cu a Holh le an ca pinah an nunphung ai khat lo timi cu an i fiang a ruang cu an khrihfabuu ah Irish holh in thla an cam i, irish holh in Bible an ngei i an i Sunday School ah Irish holh in an i cawnpiak, a sinain Irish a si ve thiam thiam mi Protestant pawl cu English in thla an cam i, English Bible an hmang i English hla an sa i, Sunday School ah English in an i cawnpiak.

cutikah buainak a chuah tik zongah le Political Party an dirh tik zongah Catholic Party le Protestant Party tiin then khoh lengmang a si. cun zalonnak a duh mi pawl cu Nationalist anti hna i hihi an umnak khrihfabuu zoh tikah Catholic lawngte an si hna, cun British kuttangah a um duh rih mi Party pawl cu cu Unionist an ti hna i, an hruaitu le hun zoh tik hna ah Protestant lawng an si ve hna. cu caah Irish le irish kha an zumhnak le an khrihfabuu ai khah lo caah ral ah an cang i an mah le an mah an i that thluah mah i, British Northern Ireland a uknak hriamnam tha bik cu Bomb a si lo, Ralkap tampi zong a si lo, Khrihfabuu a si i, Khrihfabuu hmangin a uk hna i, an holh le an ca le an nunphung tiang a fir piak hna i English ah a leh dih hna. Catholic Pawl nih cun Protestant an sawisel hna nak bik cu nan thawhlawm le nan cheuhra cheukhat vialte London ah a lut dih i, Ireland ram ah thanchohnak rian nan tuan lo an ti hna, Protestant pawl ve zong nih nan nih Catholic pawl hi Jesuh Thisen nak hmanh in Irish thisen nan tanh deuh anti ve hna. 

Northern Ireland ramah Catholic le Protestant Karlak buainak i tam tuk a um i, i thahnak le i nawn nak zong a tam lengluang i, tu tiangin an i rem kho hlei lo, kum 1872 hrawng i an buainak tete hi tulio ah Movie hna in an thlak i, Documentary zongin tampi an tuah, England le Prtestant deuh nih an tuah mi Movies ah cun Protestant khirhfabuu tuarnak le Catholic pawl nunrawn zia langhternak deuh hna an si hn i, Nationalish le Catholic pawl tuah mi deuh ah cun Catholic pawl an tuarnak le Protestant ho sualnak deuh a si ve.