SIANLO LUNG MITTHLI

SIANLO LUNG MITTHLI

Nuva tangthen a fah zia hi a tong ve lo mi hna hrangah cun theihthiam pi thlu khoh ding a si lo, cu lio ah cheukhat cu pawm lio mi a ngei ko bu in an rak i uire tak ve hawi hna, cheukhat hawi cu zeidah an hmailei ah an ton te lai ti hngal lo in nupi Pasal ah ai thi-um ka zong an um ve. Hi hna nupa zong hi zeidah an ton te lai hngal lo in thitumhnak cu an tuah, Uirenak, Nuva tangthen ti bantuk hna hi cu ho hmanh nih an duh cia mi le timhcia mi cu a si lai lo sining le caan nih a chuahpi mi thil hna an si.

Hi hna pahnih an i thitumh timh lio an i helh lio ah hin nungak lei nih Tlangval lei hi an duh hna lo, Tlangvalpa cu zu ding sa ei a si caah an fanu upa an fa hmuh hmasak bik zu ding sa ei sin a nunkhua a rel ding an ruah piak ngam lo, Tlangvalpa nih le dawtmi co lai nak ah zuu ka thlah a hau timi lungput nih ngei ve fawn hlah, a nu le pa nih nupi tal ngei sehlaw a zudin a thinh deuh lai tiin nupi thit an fial hmanh ah lungkhong ve tuk kaw "Ka nupi thitumhnak ding tangka hman dingin zuu man dingah ka pe deuh uh" ti si tawn kaw tah lak nihchhuak hna a si.

Nikhua a hung liam i an kumkhua zong nih a hlam ve tuk cang hnu le kumsau ngai an i zulh hnu ah Tlangval lei nih Palai an hei thlah, Nungak nu le pa nih le an fa hmasa bik Zu ding sa ei inn ah a lawi ding cu an ruat ngam ve bak lo, nain nungak nih cun "Cuticun nan ti ding si loh ka nu le ka pa, keimah lawng pei a ka ngeih ve cu, a duh bik ka si lo hmanh ah a ngeihchun pei ka si cu, keimah a ka umh lo ah cun a nunnak nih tuan tuk ah a liam lai, Missionary timi cu rammui i va kal le thawngtha va phuan lawng khi a si tung lo, kan minung hawi kan pawngkam a um mi hna lak zongah an nun a mui i Jesuh a ngei rih lo mi hna sinah Missionary tuan khoh zong a si ve ko, ka missionary nak ti ding cun ai dawhcah lo ngai nain keimah lawng a ngeihchun ka si ve caah keimah nih ka hrial than hawi ah cun a thlarau lawng silo in a nunnak zong a liam ko lai" tiin a nawl ve hna caah lungtling lo ngai in thitumhnak an tuahter hna.

Iangku le Paluai an i thitumh hnu kum sau zong a liam lai lo dah, Paluai a nun aa thlen khoh ning hi khuaruahhar a si, an chungchuak fa hmasa bik an hmuh hnu le bang ah cun Paluai nih hin zu din cu chim lo, a min hmanh a philh caan a tam deuh cang, Iangku nih Pathian dawtnak le zaangfahnak sunlawi zia a lang in a hmuh caah an fanu hmasa bik min zongah Dawt Hlei Sung tiin a sak, a chungchuak fa hmasa bik a hmuh hnu cun a dang ngei rih lo in kum 3 fai an hung i din, Sianginn  kai a cu ve deng ko lai cang ti ah khin a changtu ding a vun pawi than, Iangku le Paluai zong Sungsungnu le Sungsungpa tiin koh le auh an hung si ve cang i mino te an si nain khuatlang ah veng le sang nih upat le zohsan mi an si. 

Fur ruah a tlak salin lio te, a chel ah to a hran lio hrawngah Iangku cu a ngan a fak ai, Sangau Sii Inn ah cun chungkhat cingla an tling "Nu te maw a si hnga, Pate dah tiin" an hngahhlang hringhran cu zaan nih cun zeidah a chuahpi te lai ti a hngal cia mi bel hohmanh an um lo, lenglei ah cun mimthla a lek tek a tla, Ruahpi nih a tuk hringhran, Nau ngeihnak khaan chungah cun Iangku a nganfah a cel te a celh lo, zeiti hun bawmh le hun san pi awk cu tha fawn hlah kaw, Paluai cu lungsivang in a um ko, a dawtmi a thaisung Iangku nganfah a hmuh ah a celh te a celh lo, hibantukin ka dawt nih ngahfah a tuar than dingah cun, hi hi a donghnak si ko seh" ti tiang hna in khua a ruat.

Naute lu a mang cang nain Iangku a tha a zawr ziahmah, a nu nih Lai Arti a vun tuh duak, thazaang thar chuah in a vun san than a lu cu put tiah a hung chuak, "Tang rih tang rih, nusal na si lo maw" tiah an hun forh pah, Iangku nih Paluai kut a reh nakah Paluai kut zong a fak dih cang, Paluai nih Iangkua hna hram te ah "Ka dawt, chikhat te hung i sang ta rih law" tiah thazaang a hei pek. Iangku nih a thazaang dihlak a hun chuah hnu cun Nausem ttah thawng le ttek tlak thawng nih hmunhma an hun lak, nain an duh a tling rih lo.

Nurse nih a hlam a tang tiah thawng a hung thanh hna, a hlam a tang mi cu chuah tim in hmathar an hung domh than, nain fawi bai ah an chuah kho ti lo, Iangku Thazaang a zor chin thluahmah ve, Hawikawm cingla zong ruahsur le vanttek lakah Sangau Sii-Inn lei panh cio a si cang, Iangku thazaang a um ti lo, Sangau ah le hlai ngam a si fawn lo, Khualkhua hung chuahpi ding ah le lampi ah cansual um kho a si fawn, an lung a dong cikcek cang, thlacamnak hna zong zeimaw zat an ngeih hnu ah pumpak cio in an lungchung te in an ngei cio cang hna. 

Iangku duhsahin a mit ai chim a thazaang a dih cikcek cang, Paluai nih "Iangku, Iangku na mit chim hlah, thazaang i lak rih ko, a chuak deng cang" tiah a hun forh. Iangku duhsah in a mit a hun i au, Mimthla lekah ah cun Iangkua biang cung mitthli fiang tukin a lang, a mitau piang rilrel te cu mawng nawn in a hun zoh i, "U luai, zeipaoh cang sehlaw zuu cu rak ding hrim hrim ti hlah mu"  a hun ti, Paluai a thin a phang pah ve, "Iangku bantuk hna chim ding a si lo, Nangmah thawngin Jesuh ka ngei cang, Jesuh le nangmah kaltakin Zuu lei cu ka hoi hrim hrim ti lai lo ti pei na hngalh cikcek ko kha, thazaang la law hun i hrim deuh rih ko, a chuak deng cang" a hun ti than, nain Iangku thazaang a zoh ah ruahchannak a tlawm zia a hmuh.

In the twilight glow I see them

Blue eyes cryin' in the rain

Nurse nu nih "lenglei ah rak kan chuahtak ta rih ulaw" tiah a hun nawl hna hnu in hawi dang cu lenglei ah an chuak i, Paluai le sibawi le tiin an um, Iangku nih cun Paluai kut cu fektein a tlaih ko rih, Sibawii nih a thiamnak vialte in khamh ai zuam, cun lenglei ah thlacam an dai fawn lo. Iangku cu a hung i hrim i, "Uluai, kan fa minah Khamh Bawi tiin na sak lai mu, kan kal tak hna a si zongah ka fale an puitlin hnu lawngah nupi dang cu na rak thit lai, ka fale a daw ding te na rak i thim lai, cun hi kale pinah Jesuh dah tilo rosung chiah ding kan ngei lo, zeithil a can paoh ah na nunnak nih zeipaoh tong hmanhseh, hi kan rohta mi thil hna hi na nunnak umek in na rak i chiah hna lai" tiah a hung chim than, Iangku nih ruahchannak pakhat hmanh a ngei ti lo. Paluai nih a celh ve lo, a biangcung mitthli dor khat hnu dor khat nain Iangku nih a hmuh lai a phang khatlei ai mer i a hnawh hna.

Paluai cu lungcan ai pe i, "Iangku ka dawt, kha bantukin kan nih Jesuh ngeitu chungkhar nih cun bia kan chim ding a si tung lo, Pathian nih sibawi hmangin an damh lai i, thluachuah fanu zong kan ngei than lai, an puitlin tiang kan pahnih in kan zohkhenh hna lai, tar tiang in nunu papa kan si ti lai" a hei ti ve. Iangku a kutkhat lawng si tilo in a kutthnih in Paluai kut ai tlaih, an nungak tlanval lio an i koh ning in "U luai, Ka tta, zaangfahnak in na ka hnamh than kho lai maw?" a hung ti, Paluai nih cun a hmur ah dinte in a hnamh, cu lio ah Iangku nih a biangki a donh than, a biangki ah cun lungcimte in Paluai nih a hnamh than. Iangku nih Paluai kut a tlaihnak cu duhsah in a thlah, Iangku zong a tha a bat tuk caah a holh kho ti lo,  doctor nih a hun tongh i, "Ka pu, a pawi hringhran e, kan i chanh manh lo" tiah.

When we kissed goodbye and parted

I knew we'd never meet again

Vawlei cu a mui i ruahchannak vialte hna cu an tlau, nain cu a mui mi lamthluan zongah cun Jesuh cu mei inn bang ai tlaih i, zeitlukin a lunglen le  thlavaikiang in a um zongah zuu hrim din than ai tim ti lo, Iangku nih a thihtak mi Dawt Hlei Sung le Khamh Bawi te unau cu rianpi ah ai chiah hna i, Jesuh nih a um pi ko hna ti hngal peng bu in lungdong ngaihchia in a um lo. Sungsung zong nih a pah a bawmh khoh ve pah cang caah le a nini le nih an umpi hna caah changche berh tuk cun an um fawn lo.

Iangku a liam hnu cun Paluai cu a lung a leng kho ngai ngai i, hi vawlei thlahlelnak hrim a ngei kho ti lo, Vanram kong lawng khi a ruat tawn i nifatin Office a kai lo ah cun Bible ca a rel tawn i, a caan lawng ngei mi cu Bible thiang hmangin Pathian komhnak ah caan a hmang tawn.

A caan ah cun a khuahar tukah Iangku thlan ah a va leng ta tawn, hramh tete thlawh pah in biaruah awk cu tha ti hlah law, thlacamnak a ngeih ta hnu in inn lei ah a lawi than tawn. Iangku a dam lio an nungak tlanval i an i helh tawn lio hna a ruat than tawn zeitluk zuu a rak rit hnawh a rak buai hnawh caan hmanh ah toidornak le zawnruahnak he a zohkhenh an fimtawl, mi nih an soisel an thangchiat caan hmanh ah a au kanh, khawlak i a zuri a it mi a va lak caan ko ah hin Iangku dawtnak kha minung dawtnak silo in vanmi dawtnak a si ko lai dah tiin a ruat than tawn, zeitlukin dah Iangku nih Jesuh nun a rak i nunpi ve i a rak dawt kha a hung i fiang chin chin. 

Nain Minung cu a kal dih ding kan si caah a kal hmasa le a kal hnuhnung kan um lawng kha a rak si, Iangku a liam lai zaan i a biang cung mitthli kha a mitthlam ah an cuang theu tawn zeitlukin kum tam a liam hnu zongah an cam lan cang ko, hawi bantukin mi rumfa le mi lianngan a si lo bu in Iangku nih a upat thiam ning le a zohkhenh ning a ruah ah Iangku kha vanmi a si ko hlah maw a ti caan a tlawm lo. 

Love is like a dyin' ember

Only memories remain

Through the ages I'll remember

Blue eyes cryin' in the rain