MIN AN AUH TIKAH KA UM VE LAI

 MIN AN AUH TIKAH KA UM VE LAI

MIN AN AUH TIKAH KA UM VE LAI

Hi hla, “Min an auh tikah ka um ve lai (When the roll in call up yonder)’  timi hla hi aphuahtu cu James Milton Black si in, a chuahkehnak cu New York khuapi sihmanhseh a rian atuan piak mi Pathian nih a chiahnak hmun cu WilliamSport, Pennsylvania a si, cuka hmun ah cun zumhtlak le pumpek in Jesuh rian a tuan i, Young People`s Society timi thawngtha phuangtu bu an dirh i  cu ah cun President rian a tlaih pinah an Khrihfabuu Pine Street Me­thod­ist Epis­co­pal Church ah 1904 thokin a thih tiang chungtel a si.  Hi lio hrawng hi 1893 kum  hrawng a si i, James Milton Black nih hin an khuachung ah zei khuaruat lem lo in a tlawng mi Mino pawl le Zarhpini zongah Biak Inn panh zai a rel lo mi Mino tam ngai a hmuh hna tikah Young People`s Society timi a rak thawknak zong cu a si i, Zarhpini zanlei tin te Mino pawl kha khomhsuatin Sunday School a thawkpi hna i Pathian bia cawnpiaknak in caan an hmang tawn. Hla zong tampi a phuah pinah Hla cauk tuahnak ah Ringawn thiam a si bantukin a tel ve lengmang mi zong a si fawn. 

Nikhat cu Post Office ah Cakuat thla dingin a kal lei ah anai deuh lai tiin voidang i a pal bal lemlonak lam lei in a kal, Williamsport khua cu khua ngan ngai a si ve caah James Milton Smith zong nih hin hi a kal nak lam lei ah hin zei bantuk minung dah khua sa hna i, zei dah an dirhmun a si timi zong a thei tuk lem lo, nain minak pawl an i  but nak hmun deuh a si timi bel a rak theih ve tawn.

Cuka hmun a phak ah cun sau hmanh cuka lamthlur a kal manh hlanah Inn chiahru lei a panh cang mi pakhat hmai ah Minak (Black) Tleirawl kum 14 hrawng a si mi nu pakhat khi a hei hmuh, Inn chung lei thawngpang theih le a hrukpuan hmuh ah Zuding fanu a si le sifak chungkharfa a si kha hngalh khoh a si, cu tleirawl nu te cu a sam zong hriah lo thur bimbem tein a um i, a cawlcangh hrimhrim zong thazaang a ngei lo, thazaang ngei ding zongin eitha a ei loh ti hmuh khoh a si. James nih cun cu nu te cu Biak Inn chungah a hmuh bal lo mi a si kha fiang tein a hngalh a kal ning kel in a kal ko i  duhsah in Tleirawl nu te umnak lei cu a naih ziahmah a ke nih kaltak a timh nain a ruahnak nih a kaltak kho lo chawnhbiak ta lo le an Biak Inn a pumh sawm ta lo in kaltak kha a siarem kho hrimhrim lo. 

James nih Tleirawl nute a umnak zawn a phak cun “Nute, ho dah na min a si? tiah a hei hal, Nute nih cun “Bessie, ka si ka pu” tiah a hei leh ve ko. “kan Biak Inn ah kan hmu bal lem loh i, Sunday School hna na kal maw, a pumh teh nai pum tawn maw?” tiin a hei hal chap tikah, “Kai pum bal lem lo, Sunday School zong ka kal lo, Thilri hruk ding thitha zong ka ngeih lo pinah pumh sawmtu zong ka ngei bal loh i” tiah a hei leh ve. James nih cun an Khrihfabu kong le Mino pawl he Sunday School ah Pathian bia cawnnak an ngeih tawnnak kong kna a chimh hnu ah  Zarhpini fatinte an sinah i  tel ve lengmang dingin a sawm. 

Bessie, Pumh le Sunday School kai sawmtu a ngeih hmasakbik nak a si ruang zongah a si men lai, a tha a tho ngaingai. James cu inn a tin hnu ah a nupi sinah cu ni ah a ton mi Bessie kong le thil sining cu tling tein a chimh, James le a nupi pinah a khrihfabu nu pawl nih Bessie hrangah hrukpuan cheukhat zong a va thenh. 

Bessie caah cun vawlei hi vahvaihnak le firnak chumtual a si i, Sifahnak Ni tangah a emh fah pawl si dingah a chiakha mi vawlei a hun lamh ve i sifahnak in hram aithok i, sifakin a nung i, sifak chin dingin a dirhmun nih hnuh. A pa cu zu ngawlvei a si i, a nu zong cu zei hlei lo a si hringtu asinak dah lo, Nu sinak ah santlaihnak dang zeihmanh a ngei lo. Inn lak uico hmanh nih ttittawt char ding an ngeih lio ah Bessie caah cun firchom hmanh in a paw ai khimh cawk lo. A tleirawl tir mitau dawh tuk hna zong cu a thil hmuh nih a pek tuk caah an khawlo dih cang, asinain a khuaruah bel a vaivuan thlu dih lo a lungthli tein Pathian duhnak le biadik tlaihchannak bel a ngei rih. Zu le ritkhawhthil lakah cubantuk ruahnak nung a ngeih khoh rih mi cu khuaruahhar hrim hrim zong a si. 

Sunday a hong chuak than i, James Milton Black te Biak Inn ah cun voiding i an hmuh ballo mi Bessie muihmel zong a hong lang kho ve, Sunday School zongah Bessie cu a kai kho ve i, a hnu bik ai tel mi a si bantukin a hnu bikah a min zong an tial.  Cuticun zarhkhat hnu zarhkhat Bessie cu pel lo tein Sunday School i  a min an auh tik paoh ah “Ka um” a rak ti ve tawn. Pathian bia zong a duh i tha tein cawnpiaknak a ngai tawn. 

Zarhpini voikhat cu Sunday School an kai than, James Milton Black nih cun Sunday School a kai mi min cu a hun auh than hna i “Ka um ko” tiin an hun leh ziahmah nain a hnu bik Bessie min a auh tikah lettu a um ti lo, khuaruahhar ngai in James cu a hoi i Bessie mui cu a ngiat len nain a hmu lo, cu chun hnu cu ruahrem lo le lung siaherh ngai in a um  i Sunday School an dih hnu ah cun lamdang pial lo in Bessie te inn lei cu a panh i Bessie konglam cu a hei hlat colh. Inn chung a luh cun fak ngai in a zaw mi Bessie ihkhun cungah a ih kha a hei hmuh, Bessie cu Pneumonia zawtnak ruangah fak ngai in a rak zaw i a muihmai zoh ah thisen a ngeih lo tuk cang kha hmuh khoh a si. Bessie tak a hun tongh i a sat tukah a lin in a lin, thihtha hmanh i zohkhenh loin a zaw mi Bessie cu a zawtnak nih Thlankhur lei ah a hnuh ko kha hngalh khoh a si. 

James Milton Black nih cun a ihkhun pawngte ah a hei thuthnawh i duhsahin bia an i  ruah, ruahchannak in thazaang an i pe, asinain cu nih cun sullam a ngeih tuk ti lo ding kong bel an hngal lo. James nih cun “Bessie Sunday School i na min kan auh tikah na aw theih ding a um ti loh i, na rak zawt ruangah a si mu?” tiah nemte in a hei chonh. Bessie nih cun “ Ka pu, hi vawlei ah hin ka min an auh tikah um ti lo hmanh ning law, Vancung i ka min an auh tikah cun ‘Ka um ko’ tiin ka aw an theih ve cang lai” tiin dintein a hun leh ve.   Bia an i  ruah lio ah cun Bessie nih Sunday School a kai chungah a lung a la tuk mi Bible cang cu Biathlam 20:12 “Cun Mithi mi kha a ngan he a hme he, Bawi thutdanh hmai i an thut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i  aa tial ning khan an bia an ceih hna” timi a si nak kong kha bia pehzulh ah a hei chim. 

James Milton Black cu a ttin hnu, Inn a phanh ah khua fakpi in a ruat Bessie nih a chim mi bia nih cun a lungthin namte chunh bangin a chunh, a hun ruah nolh than ah ngaihchia in a tap i  a mitthli kur kur in a tla than lengmang. A ringawn hmai ah cun a thu i Vanram ngaihnak hla, Bessie biachim he ai rem kho ding hla kha sak a hun i tim tawn i cubantuk hla cu sak ding hrim a hngal kho lo, a um zongin a hngal lo. Cuticun a ruahnak ah Bessie nih a chim mi bia he ai rem kho ding hla phuah dingin ruahnak a hung um i, Hla cu tial hram ai thok. 

When the trumpet of the Lord shall sound,

and time shall be no more,

and the morning breaks, eternal, bright and fair;

When the saved of earth shall gather

over on the other shore,

and the roll is called up yonder,

I’ll be there.

Bawi Jesuh a tum than tikah vancung muko kan theih lai,

 Zungzal in ceunak ni bang in a tlang lai, 

Khamhnak a hmumi vialte he vancung ah kan i tong lai, 

Min an au tikah kei zong ka um ve lai.

 Cungnungbik bawi a rat than tikah cun vancungah khin Muko tum thawng a thang lai i, cun harnak nikhua caan hna zong hi a dih ve lai, cuticun lawmhnak nikhua thiang a dei cang lai i, hnangamnak nikhua a ceu cang lai, thihnak varal kan phak tik ah cun khamhcia mi hna kan i tong than hna lai i cuticun khamh mi hna min an auh tikah kei zong ka um vel ai. 

On that bright and cloudless morning

when the dead in Christ shall rise,

and the glory of His resurrection share;

When His chosen ones shall gather

to their home beyond the skies,

And the roll is called up yonder,

I’ll be there. 

A ceu bikmi zingka ah a thimi an tho than lai i, 

Jesuh thawhthan sunparnak chung an lut lai, 

Vancung Amah sinah a khamh ciami vialte an um lai, 

Min an au tikah kei zong ka um ve lai.

Cu a thiang bik mi zingkhua ceu ah cun Khrih ah a thi mi hna cu an tho than lai i, Jesuh thawhthan sunparnak chungah cun an lut ve lai, cu vancung khua akhamh cia mi amithiang hna lennak i min an auh tikah cun kei zong ka um ve lai.

Let us labor for the Master

from the dawn till setting sun;

let us talk of all His wondrous love and care.

Then when all of life is over,

and our work on earth is done,

and the roll is called up yonder,

I’ll be there.

Zingka in nitlak tiang Bawipa Jesuh ca tuan cio tuah u,

 A zaangfahnak sung bikmi chim cio tuah u, 

Cun kan nunnak a dongh i kan rian zong kha a dih tikah,

 Min an au tikah kei zong ka um ve lai.

Kan bawipa Jesuh caah hin zingka thokin nitlak tiang a rian thiang tuan hna usih, a velngeihnak le sunparnak le dawtnak le zawnruahnak kha chim in phuang tuah hna usih, cuticun kan hringnun khua a dih tik le hi vawlei i kan caan hna hi a dongh i Vancung khua i min auh tikah kei zong ka um vel ai. 

When the roll is called up yonder,

When the roll is called up yonder,

When the roll is called up yonder,

When the roll is called up yonder, I’ll be there.

Vancung ah an kan auh tikah, 

Vancung ah an kan auh tikah, 

Vancung ah an kan auh tikah, 

Min an au tikah kei zong ka um ve lai.

Bessie cu Pneumonia zawtnak ruangah James Milton Black nih a va vehvat hnu ni 10 a ti ah a nunnak a liam i hi vawlei min an auhnak ah si tilo in Vancung khua i  min an auh tikah “Ka um ko” ti ve cang dingin hi vawlei harnak le sifah tuarnak vialte hi a kal tak. 

Hi hla, “Min an auh tikah ka um vel ai (When the roll in call up yonder)’  timi hla hi Kum 1894 ah khan ‘Songs of the Soul’ timi hla cauk ah a hmasabik an chuah a si i, vawleicung holh phun kip in leh le sak a hung si, Mi nih Vanram an ngaih caan ah sak bik mi hla pakhat a hung cang i, Kan nih Laimi zong nih Mithi\Ruak inn le Khawhar thutpinak ah sak bik mi hla a si. 

Dated 06/08/2020 1:30 AM