A va nuam lai dah - Pu Buonglienkung

A va nuam lai dah - Pu Buonglienkung

Pu Boung Lien Kung hi Independent Church of India (ICI) Central Choir ah Conductor rian caan saupi a tlai mi a rak si i, Pathian riantuannak le Pathian thangthatnak hla phuah lei ah ai pumpe ngai mi zong a rak si, Pathian riantuan cu a duh tuk i Pathian le Khrihfabuu nih an fialnak paoh ah chungkhar le pumpak thil hna zong ruat manh lo in a kal tawn. Cubantukin Pathian riantuanin a chuah lengmang hnu hmanh ah cun Jesuh hnuzultu tha ngai si in ai ruat kho tawn lo, "Ka tuah khoh mi hi a tlawm tuk e" tiin Pathian hmai ah ai phuhrung deuh tawn. Chungkhar pa bik si fawm kaw cubantukin Pathian riantuan in a khualtlawn kar ah cun a chungkhar nih ei ding an rak ngeih lo caan hna a um tawn Pathian riantuan cu  har a ti ve caan hna a um tawn. 

Voikhat cu Pathian fialnak in khuapi lei ah Pathian riantuan in caan sau tuk te khual an tlawng, a hon kir than nolh tikah cun a nupi nih an inn kawtka in a rak don i, eiding tirawl an ngeih tilo nak kong le mi do cawichom in an rak umnak kong kha a rak chimh, a chungkhar hna kong a hun theih ah cun Buong Lien Kung nih cun rawl a fun ter zawk zawk hna i, a kal hlanah Meihawl a rak rawh cia cang mi cu va lak i rawlei ding le a khualtlawn karah mi do an rak cawi cang mi chamnak dingah Meihawl zuar ding lak tim in a meihawl rawhnak a panh colh. A meihawl rawhnak hmun a phak ah cun Khuapi lei ah Pathian riantuan in a um lio dirhmun le Mehawl rawh mi la dingin a kal lio dirhmun cu a ruah ah a hna a tling lo ngai, cutikah a meihawl rawhnak pawngah cun thla a cam "Bawipa ka Pathian na riantuan dingin na ka duh fawn tungah cun ziah hen hitluk harsa in na ka chiah" tiah thla a cam. Cutikah a thinlungah "Hi vawlei ah harnak tamtuk tuarin nan um tawn, sihmanhsehlaw hnangam lungdai tein um uh, keimah nih vawlei cu ka tei cang " timi bia te hi a hung um. cutikah a hna a ngam tuk hringhran.

A meihawl rawhnak khur cu a von kau i a cung lei a hun hmuh ah a meihawl rawh mi cu a tha lo ngai bantukin a hmuh, cuticun khua a ruat i, Pathian riantuan in kan chuah kar hna hin cun ka meihawl rawh mi tal hna hi cu rak that ve ding a si nain tiah a thin a har pah, Cuticun a tanglei cu a hun kau deuh deuh i a meihawl rawh mi cu a rak chuak tha ngai ngai hna i man tam ngai chuak kho ding an rak si, cutikah ai lawm ngai ngai i a Pathian cu a thangthat i Meihawl rawhnak khur pawngah cun "Halleluiah..." tiin a au. cuticun a meihawl  a lak hna i a meihawlnak laknak ah cun a kut hna cu a vun an kang i a fak ngai ngai cu lio ah cun, Khawpi ah a um ning le Meihawl rawhnak ah a um lio hna cu a ruat pah ai dang ngai ngai in a hmuh fawn, cu lio ah cun Baibal thiang ca "Pathian pennak chung luh awkah hin harnak tampi kan ton a hau" Lamkaltu 14:22. kha a lungchungah a hung lut. 

Cubantukin a um lio ah cun Hivawlei harnak hna hi a ruat i, Hi vawlei hi cu chiatserh mi a si nak hna kha fiang chin in Pathian nih a hun hmuhsak, cutikah Pathian sin a phak ve tikah cun hibantuk harnak hna hi an um ti lai lo ti kha a hung i fiang, a meihawl rawhnak pawngah cun Thingkung pakhat a um i cu thingkung cu thli nih a hung chem tikah thli nih a chem mi thawng cu Buong Lien Kung hnathlam ah ringawn bantukin an lut i D Key, S Key, M Key hna in a theih i hla ah an hung cang.

"Aw a va nuam lai dah, cu hmun dawh ka phak tik cun

Hi vawlei hi ngai lo in, Van dawtnak partlanh in ka leng ve cang lai"

 tiin a hnathlam ah an hung thang, cuticun vanmi thawng tampi nih an hung zulh colh i, a lai ah an dirter, "Aw.. a va nuam lai dah" ti a sak lio ah cun an cawi i, Vanmi thawng tampi nih cun an cawi pah in "Aw a va nuam lai dah, cu hmun dawh cu ka phan lai" tiin an hung zulh ve, cuticun Buong Lien Kung cu ai nuam tuk hringhran i, Bawipa sin ka phak tikah cun, Hi vawlei ngeih le chiah thilti hna ka zoh ah lawmhnak ding hrim a um lo ka ngeih mi thil ah, sihmanhsehlaw Vanram i ka ro co ding Bawipa nih a ka hmuhsak mi ah cun lawmhnak dongh ni um tilo in ka leng ve cang lai, ti a ka hmuhsak tikah cun kai lawm ngai ngai i, cuticun Van mipi thawng tam ngai he cun cu hla cu kan sak" a ti. 

Hngahhlang tukin ka cuanh tawn ka zungzal ram cu

Zeitik hen cu hmun dawh cu ka phak ve te lai

Hi ka khualtlawnnak vawlei ka chuahtak tik cun

Pathian thangthat le nuam in ka leng ve cang lai

Pathian rian kan tuan ning hi ai khat cio hna lo, cheukhat cu Tangka le ngeihchia chawva chambau lo in le chungkhar khuasak tintuk ruah hau lem lo in Pathian rian a tuan mi zong an um ko lai, nain Buong Lien Kung hi cu kum 1992 ah khan Pathian rian a tuan cuahmah lio zongah a chungkhar nih zingzan ei ding an ngeih ve nak hnga Meihawl rawhin eikawl a hau rih ko, Khuapi chungah Pathian nih a fial bantukin a rian cu a tuan cuahmah lio ah a chungkhar, a nupi fanau hna cu eiding chambau in an rak um, a hung tlun tikah eiding an ngeih lo kha a hmuh tikah hahdam hmanh chim lo in rawl ai funh i Meihawl rut dingin a kal colh.

Buong Lien Kung nih hi vawlei ah harsat retheihnak a ton mi vialte a ruah than tikah hi vawlei ah hin hnangamnak tling a um lo nak kha fiang tuk in a hmuh, hi vawlei hi cu chikhat ca lawng men ah kan khualtlawnnak a si i, harnak le sunghzatlaknak hna hi kan ton ding mi thil an si ko ti kha fiang tukin a hmuh, cutikah a rian a tuanpiak mi Pathian sin a phak tikah cun hibantuk harnak hna hi an um ti lai lo tiah lungcan ai pe, a zungzal ram ding cu hngahhlang ngai in a cuanh tawn.

Hi vawlei ah chaw le va ngeihchiah ka zoh cun

Lawmhnak ding hrim a um kho lo ka rothil hi cu

Vanram ah ka covo ding ka ruah bel hin cun

Lawmhnak dong kho lo cu co in ka leng ve cang lai

Buong Lien Kung hi mirum a si lo, rum duh in Pathian rian a tuan mi zong a si lo, rethei harsa bu tein Pathian nih a fialnak paoh ah a kal mi, a thinlung dihlakiin Jesuh hnuzulh a duh mi pa a si, an inn le lo  hna zong nih vawlei thil a kawl mi hna inn le lo a phan naisai lo, Tangka tampi kawl nak cun Thalrau tlau tam deuh hmuh kha ai zuam deuh, Chungkhar kaltakin Pathian riantuan ah a chuak theu kan ti cu, chambau caan hna zong an ngei theu, hawi ngeih an ngeih lo, hawi ei an ei khoh lo caan hna zong a tam.

Hi vawlei a khuasak ning vialte a ruah than tikah hi vawlei ah hin a chungkhar nih mi ngeih mi ngei ve lo in, mi ei mi bantuk ei kho ve tawn lo hna hmanhseh Jesuh an ngeih ah cun a za ko, timi kha fiang tukin a hngalh, Pathian rian a tuannak ah hin Eiding tirawl ngeih lo ruangah an chungkhar pakhat hmanh an nunnak a liam hraw ve fawn lo, nain a caan ah cun Pathian riantuan cu a har tukin a hmuh ve tawn, a hawikawm le innpa hna dirhmun a zoh i Pathian rian an tuan lo, nain Pathian rian a tuan mi amah nakin an rum in an khuasak a sang deuh hna, cu cu a ruah ah mihmaikhah lo a fak a ti tawn.

Buong Lien Kung nih hin hi vawlei hi cu a rawk zau ding le zungzal ram ding a si lo zia kha fiang tukin a hmuh, a rumnak le a ngeihchiah hna cu hi vawlei ah hin a khong in ai chiah lo, a ngeihchiah le a rothil hna cu a rawk zau ding vawlei ah hin si loin a hmun ding mi zungzal vankhua ah khin tamtuk an rak khon piak in an rak chiahpiak cang timi kha fiang tukin a hun hmuh. 

Sunglawi ngai in Jesuh a rat than tik cun

Zuumlotu hna cu tihphang in an tha a ther lai i

Cutikah zuumtu hna nu sersiamnak thar he

Mubang in thla ngei in kan zuang len te lai

Buong Lien Kung lunglennak hi mitampi nih cun kan theihtiampi lo, hi vawlei ah hin thla a cam ballo hna zong ngandamin an um tawn ko, zuumlotu hna zong ngeihchhiah chawva tampi hi vawlei ah hin khua an sa ko, ziah kan nih Pathian zuumtu hna cu a ruum deuh ding le ai nuam deuh tuk ding pei kan si cu kan ti tawn lai nain, hi vawlei mi nih rumnak kan ti mi hi Jesuh nih rumnak a timi he ai khat lo, hi vawlei ah minthatnak le damnak kanti hna zong hi Jesuh nih damnak a timi he ai khat lo.

Hi vawlei mi hna nih cun tangka tampi ngeih le ngeihchiah tampi ngeih hi an i nuamhnak le an sunparnak a si ko nain Jesuh khrih a rat tikah cun hi zuumlotu hna le a deu le sawsawh in zuumtu hna hi an thin a phang lai i, tihnak in an khat te lai i, an tha ther lengmang bu in an um te lai, a sinain Jesuh a zuumtu le a riantuantu hna cu hi vawlei ah hin a riantuan ruangah hi vawlei rumnak hi kawl manh lo in le ngeihchiah tampi i chiah manh in um lo hna hmanhseh, Jesuh a rat tikah cun Mubang vanah khin an zuang lai i, Jesuh he zungzal ramnuam ah damnak tling le tahaihramnak a um ti lo nak ah an leng ve te lai

Thawng tampi nih a kan cuanh ko zungzal ramnuam in

Cuhmun ka phak cun lawmin ka leng ve lai i

Hawikawm tha cu hmun phak lai nai manh cang maw

Nifatin auh dawtnak awnem in

Jesuh hnu zuultu le Pathian riantuantu hna cu hi vawlei ah hin harnak tampi tongin rethei harsa in um tawn ko hna hmanseh, sunghzatlaknak le chambaunak nih phan tawn ko hna hmanhseh, hawikawm ngei lo in tuar tawn hna hmanhseh, tukvelh le thawldawi hna zong in um tawn ko hna hmanhselaw cung vansang zungzal hmun in mi thawng tampi nih an hun zoh ko hna i lairelnak ni ah theihpitu an si te lai, cu hmun an phak tikah cun hi vawlei ah tahaihramnak le harnak an ton mi vialte hna hi an philh lai i hlim le lawm in an leng ve lai.

Buang Lien Kung nih hin sau a dam lai lo ti ai hngalh ruang maw si hnga zeidek, maw Pathian nih sau tuk harnak tuar a sian lo maw si hnga dek, tuan tukah a kan kal tak, a nunchungah hin Pathian thangthatnak le Vanram ngaihnak hla tamtuk a kan phuah piak, hi hla hmangin a kalnak dingah kal ve dingin timhcia kan si cang maw tiah a kan hal, Nifatin in Jesuh in dawtnak he a kan sawm i a kan auhnak zong kha a kan chimh chih.


Chorus:
Aw a va nuam lai dah, cu hmun ka phak tik cun
Dawtnakin Bawipa nih a rak ka kuh lai i
Hi ka khualtlawnnak ram hi ngai ti lo in
Vah dawtnak partlanh in ka leng cang lai

Hi vawlei ah hin minung pakhat cio nih hin harnak le sungzatlaknak hna hi kan hrial khoh mi a si lo, voikhat tal cu harnak le sungzatlaknak hi kan ton theu tawn, nain kan ton ning bel ai khat cio lo, cu harnak khur chung in Zungzal a hmun ding mi ram khi ruahchannak he a cuanh mi hna hrangah cun zeitlukin dah Vanram khi ai dawh hnga i an hei hngahhlang hnga, mah le ton ning cio in chim khoh a si hnga.

Cu hmunah Jesuh ruang i harnak a tong mi hna le Jesuh ngai le lileng in an hna a ngam kho lo mi hna nih cun Vanram phak tikah Jesuh nih a kuh hna tik i a hnemh hna tik ding "Zeizong vialte a tha dih cang ka fa" tiah thlamuannak aw in a chonbiak hna ni ding khi hngahhlang bik ding cu a si hrim ko, hi vawlei hi cu a hmun ding mi a si loh i, harnak kan ton mi hna le pumsa ngandamlonak hna zong an hmun lai lo, hi kan khualtlawnnak ram hi kal tak in Van inn nuam kan phak tikah cun Vancung khua ah Jesuh dawtnak partlanh in len a si cang lai.

Buong Lien Kung hi Chin miphun chung ah miphun pakhat a si ve mi Hmar phun chung mi a si i, Hmar miphun hi Manipur, Assam, Tripura le Mizoram hna ah an um, milu 60000 hrawng an si lai tiah ruahdamh a si, Independent Church of India (ICI) Khrihfabuu pinah kan mah Laimi bantukin khrihfabuu tam ngai an um ve. Buong Lien Kung hi Pu. Lal Zui le Pi Rin Pui hna nih an ngeihmi fanau hna lakah a hniang bik a si i, kum 1970 , Zing thla, ni 10 ah khan Muolvaiphei, Manipur, India ah a chuak, kum 1990 ah khan Lal Tling Zo he Pathian le khrihfabuu hna hmai ah thitumhnak thiang ngei in chungkhar an dirh i Fanau 5 an ngei, hi hla "A va nuam lai dah" timi hi an nu he an thit kum hnih nak kum 1992, November ni 23 ah a meihawl rawhnak hmun ah Pathian nih a pek mi hla a si. 

Pu Boun Lien Kung cu Pathian riantuan in a chuak than lengmang, ndependent Church of India (ICI) Central Choir ah Conductor dingin khrihfabuu nih an ruat pinah Pathian thawngtha phuang in an chuahter lengmang mi a si, Hmar miphun chung lawngah si lo, Chin Miphun  dang hna, Zomi, Mizo, Kuki hna sinah Pathian thawngtha cu phuang dingin an sawm lengmang tawn i Manipur, Assam le Mizoram hna ah peh thliahmah in Pathian rian a tuan tawn, a chan lio ah cun Mizoram, Assam le Manipur Chin Miphun (Chinlung chuak) hna cu Pathian lei ah a hninh in a hninh hna i Pathian nih a pek mi hla hna cu ICI Central Choir/ Blessed Choir nih an sak i an zulh peng fawn caah a min zong a thang ngai ngai mi a hung si. Hla tam ngai a phuah i a hla phuah mi hna hi Hmar holh in a phuah ko hna nian, Kuki, Zomi le Mizo holh hna in leh le sak ngai ngai mi hla hna an hung si. 

Cubantukin Pathian riantuan in khual a tlawn tuk caah ih caan a ngeih lo caan, thitha in rawl a ei lo caan hna zong an hong tam chin lengmang, a remnak paoh ah riah caan le hngilh lo in Pathian thawngtha a chim caan hna an um theu, cubantukin a um caan a tam hrat cu a ngandamnak zong nih a rak celh cawk ve ti lo, a pumsa nih niam lei a hung panh caah Sii-Inn ah chiah hau in a hung um, Malaria PF zawtnak cu rak ngei kaw, November ni 3 kum 2018 zinglei suimilam 1:50 hrawngah a nunnak thaw hnuhnung bik cu a chuah i, "A va nuam lai dah" a timi ram ah cun "A va nuam hringhran dah" ti cang dingin kum 38 lawng a si rih lio ah a rian a tuan piak mi Jesuh nih a lak. 

Salai C. Vanramdinmawi

(Tenglam)

15. Thlazing, 2019

01:42 am

Lawngtlai, Lairam