Vanmi nih an um pi ko (Angels in the Room )

Vanmi nih an um pi ko (Angels in the Room )

Ngakchia pariat hna hrangah vawleicung i Nu sunglawi bik a si mi Nu Thlia cu a zawtnak ihkun cung i a ihnak caan a sau pah cang, ngandamnak lei ah soiselnak tete a ngeih hnu ah a pumsa nih ngandam ni a hmu bal ti lo, cuticun ngandamnak duh in khuapi lei an panh, nain an caah khua a rak tlai sual tuk cang ngandamnak duhin khuapi panh na lakah ah a zawtnak cu zawtnak hmetuai si lo in a cancer cu a rak sang tuk sual cang kaw, minung khuaruahnak lei in cun pumsa ngandamnak hmu than kho ding a si ti lo, pumsa damnak lei ah vawlei mithiam hna cungah ruahchannak an ngeih mi vialte cu zeihmanh lo ah a can hnu cun, an khua lei ah thih bawh in an kir than.

Khua an phak hnu cun Nu Thlia  te inn mileng an thing bal ti lo, khuanu khuapa hna nih an rian kaltak in an va leng hna, thazaang an va pek hna nain Cancer sin in a nunnak a khamh kho tu le a damh khotu an um lo, hawikawm cingla le Pathian rian a tuanpi hawi tete hnemhnak le thlacampinak in thazaang a la, a pumsa cu zawfak hmanhseh a thinlung cu a thawng peng, a zaang a der lo. Hi vawlei harnak vialte hna kal tak ding le a rian a tuan piak mi Jesuh a hmuh ve cang lai ding a ruah ah a thinlung cu lawmhnak in a khat deuh tawn.

Nain a chungchuak fale Jesuh sin a kal hnu hawi hngar le thlavaikiang tukin an um lai ding a ruah caan bel ah a celh ve tawn lo, a damthat lio caan ah nunzia tha le Pathian bia in a cawnpiak tawn hna, a cawnpiak hna ning tein a fale zong khuatlang le khrihfabuu ah bochantlak le zohchuntlak mino an si, nain a hun kal lai tak tak ah cun cucu a tawkza lo tukin a hngalh. kaltak phu a si rih lo mi a fahniang a zoh caan ah a ngaihchiat a zual khun hnukthlei ka te ko nu lo in a thang ding a ruah ah a fahniang a zaangfah tuk. zeitiawk tha nih si fawn lo cu Pathian nih a rak zohkhenhpiak lengmang cang bantukin a kal tak hnu hna zongah a zohkhenh than ko hna lai timi ruahchannak nung a ngei.

Nu Thlia a hung zualhma chin thluahmah, cat dawk nung dawk in a um caan hna a hong phan cang, an khua lo ngei cheukhat hna zong a riak in lo an kal ngam ti lo, zeimaw ton sual ah i auh a har anti, a cah cu an hngak cang. an khrihfabuu nu le pa hna nih zanfatin an inn ah thlacampiaknak an ngei, Pathian sinah damnak an hal piak, nain a pumsa nih that lei nakin chiat lei a panh thluahmah, Nu Thlia a zumhnak a thawng tuk, chikhat a hung i hliphlau a hawi le sinah cun bia a cah hna, "Ka pumsa ngandamnak caah thla ka campiak ti hlah uh, kei cu Jesuh nih a sinah kal dingin a ka duh cang, hnangam lungdai tein ka kal khoh nak hnga le, ka tan tak ding mi ka chungkhar hna nih an theihthiam i Jesuh sin in a chuak mi hnangamnak an ngeih khoh nak hnga tu deuh ah thla ka cam piak kho ulaw kai lawm ko hnga" tiin.

Nikhat cu a hung i hlaphlau ngai, zing arkhuan te in ai thang, nidang thlakhat hrawng cu a thut zong a thut khoh ti lo mi kha, "Ih lawng in ih cu ka pumsa a fak tuk, rak ka thutter ko tuah uh" a ti hna, a fale nih cun an thutter i, a hawikawm le he bia hna an i ruah an hna a hung ngam deuh ngai, kal dingin an ruah cang mi zong chikhat cu ruahchannak thar an hung ngei, khual khua chuak kho a si ah cun khuapi lei panh pi than ding a si ko anti an lungthli in, cu zing cu zingdang lo bang rawl tuh hramhram a herh tawn mi kha, "ka rawltam ngai, anthur tihang te ka hlam tuk" a ti, a fa le nih an chuan piak i, tam a bar kho lo nain nidang nak cun a hung ei khoh deuh ngai, cu thawngpang an theih tikah khrihfabuu le khuami an i lawm, Pathian nih a dawt tuk i hi tiang a damter cang i a dam thai te ko lai anti, lo rian a ngei mi hna zong an ngaih a hung tha deuh i, lo lei ah rianhma domh dingin an kal cio hna.

Cheukhat cu lo hma an domh lio, chuncaw dingah mai-an tihang  chuan pahin Kaw-awm a raw lio mi zong an um, cheukhat lo taw ah Sabbath ni pumh tik i thawhlawm ding maite le mai-an a sik lio mi zong an mah le an rian cio ah teiman an thlu hna. Cu lio ah Nu Thlia te inn chung cu ngaihchiatnak minmei zaam nih a zelh "Kanu, ziah hen ti hin na um, tuzing nai hliphlau tuk kan i lawmh thla thlak he, nihin ah cun kan kal tak rih hlah mu, na fa le kan cu za rih lo, kan duhlung hmanh in dawtzia kan in thiam rih lo, a dawt hmanh kan in dawt ve manh lo kanu" tiin a fanu upa a tap, an tapa upa bik cu chim awk hngal lo lungchir in a thu ko a nu pawngah, cu lio ah an inthlang nu nih, "Nute, ziah hen na tah, na nu nih an kan kal tak rih tung lo, hei au ko, dong lo in au rih koh, a hna hram te ah khan hei au ko, a phusa zong a um ko, a thih tung lo, tap hlah a ngaih lam na chiatter lai" tiin hnemh le thazaang pek a rak i zuam ve.

Nu Thlia nun hun zoh ah, a ngakchiat lio in ngaktah dirhmun bantuk in a dir, ngeihchiah chawva thilri ah hawi a tluk lo nain nunzia that le mah nak upa nawl ngaih ah fak lengmang mi a si, ngaktah nun har lonh in a hung nungak hnu zongah khuatlang le khrihfabuu nih an chorchem mi mifel a hung si, Pasal a hung ngeih i nausem a pawm hnu le changchia ngai in a um hnu zongah a retheih pi hawi le a nak sifak le mihar bomh khoh peng ai zuam, an rum tuk lo nain innpa chakthlang nih an upat an hmaizah, Pathian ai bochan peng mi nih chuancham in a chia bal hna lo, midang bawmchan kho dingin an um peng, bawmhchantu zong a si lengmang.

Cu ni cu Nu Thlia caah hi vawlei ah hin a ni hnuhnung bik ding a si cang, zungzal nunnak co ve dingin thihnak hram a dir lio a si, nain thihnak lamhrawng in a pumsa kal tak cu a tih lo, hnangam lungdai tein a hngah ko, a zawtnak ihkhun pawngah cun vanmi hna zong an bawi Jesuh nawlpek tik hngak in hruai zawk zawk an duh an ngan ko. Nain cu vanmi hna cu midang nih an hmu kho hna lo, Nu Thlia lawng nih a hmuh khoh hna, a ihkun pawngah minung pawng i an dir i an hngah ko cu dawh tukin a hmuh hna, cuticun hi vawlei harnak vialte hna hi hnulei chit in a thaw hnuhnung bik cu a chuah i, a dawtu le a dawtmi hna cu kaltak in Vanmi hna sinah a kal ve.

Nu Thlia a hnuk a cah i a thlarau nih a pumsa a chuahtak cang ti an hun theih fian ah cun Nu Thlia te inn cu mithli he tahnak inn ah a cang, mi kong caih a huam ngai mi Nu Hlawn hmanh, Nu Thlia a hung liam tak tak cang cun a thlavai a kiang ve i, "Nu Thlia, ziah hen na kan kal tak e, sihmanhselaw zeiti awk tha Vanram kutka in rak kan dong te mu" tiin mitthli hnapduk he a tap len ve.

She's close to death , but she is not afraid
Angels waiting for the order, to carry her away
They're gathered around her bed side
She's the only one who sees
She will draw her final breath , and away with them she'll leave

Lo lu lei in tlangval pahnih khulrang ngai in thlam lei ah ah hun tum lio kha chunchaw ei in ai din mi nih Tappi hram in an hei hmuh hna, "Pheikalh zong an i ken lo, kan dawng zong an si fawn lo, hi ka lei ah an hon kan hmuh bal mi zong an si fawn lo, tu tik ah zeihen tuah an van timh" tiin, an pa bik khua a ruah lio a si, an nu nih cun lau nawn khin, "Zualko hna an si sual hnga maw, lo hma ka um lio ah khan Nu Thlia kong lawng ka ruat, a nih hi tuzing ai hliphlau ngai nain a kan kal tak lai a si ruangah maw a si hnga, ka ruahnak a tha lo ngai nihin cu" tiin a chim thlu deuh ka te ah tlangval hna cu thlam an hung phan, an thawngpang theih mi nih cun a ngaih a chiat ter lawng hmanh a si lo, pawi an ti tuk. "Chuncaw ei ta ve ulaw, kan kai ti hna lai" an ti nain, tlangval hna nih cun,"Kan hei lan ko lai, midang zong kan hei thanh ve hna ah a tha lai" an ti i, lo pa lei ah an lan.

A hnuk a cah cu zanlei ni niam hnu deuh a si caah cu zaan cu zanriah pi ding a si cang, khualkhua um chungkhat cingla rualchan tete hna zong a hung tlung ding an um fawn, nungak tlangval nih an hun chuahhnawh cio i an veng(Sang) YLA President chinchiah ningah cun an khua ruak zanvarpi ah cun nungak tlangval an chuah tam bik tan a si a ti, Sianginn khar caan nih cun si fawn kaw, an khua nungak tlangval an tam salin lio te nih a si fawn, innkhat in an thut hnu ah innpa chakthlang inn ah an khat dih i, tuallai ah meiphu kau in a thu mi hna zong an tor, cu lio ah cun an khirhfaa upa a hung dir i "Hla sak ngawt cu kan mit hna a ku sual lai, Khrihfa lei ai awh deuh zong si lo in Pathian rian ka tuanpi hawi a si nak in bia tlawmte hun chim ta ve ka duh, tu chan mino hi biasau chim nan rem tuk lo i, kei zong nih sau ka chim ve lai lo" tiin hram a hun awt.

"Nu Thlia nak hin ka chuah a tuan deuh i ka tlanval zong a tuan ve, a ngakchiat tein ka theihhngalh mi, Veng pakhat khrihfabbu pakhat ah a thang mi kan si caah a konglam le a nunzia hi chim ding tampi ka hngalh ve, nain ka hmai mi nih tam an chim ko cang caah kei nih cun ka hun nolh than ti lai lo, a nunchung caan vialte tuzan i ka hun ruah than zawn ah hin le a zawt lio an inn thla kan cam ah a chim mi bia hna ka ruah than ah hin, ka hna a ngam tuk, pumsa ngandam in kan umpi kho ti lo hmanhseh zungzal ram ah damnak tling he khua a sa cang timi hi fiang tukin kei nih cun ka zumh"

"Nihin ah khan ka mit nih cun a hmu hna lo nain, Nu Thlia hnukcah lai mui ka hun zoh le a ihnak khaan chung ka hun luh ah nidang khom a lo lo, thlarau in a khat, ritlam le holhtheih lo thlarau a si lo, hnangamnak, daihnak, remnak, lawmhnak le lungdaihnak thlarau a si, a hnukcah lai ah khan a  pawngah Vanmi nih an hnukcah lai an hngah i a ihkun pawngah an dir ko rua, a nunchung ah toidornak le mi zawnruahnak relcawklo he Pathian rian a tuanpiak mi lawmman hmu dingin Vanmi nih an hun lak, Vanmi hna nih cun hi vawlei a um chungah Jesuh nih a kan cawnpiak bantuk in nuhmei sifak a rak bawmh tawn nak vialte hna, Ngaktah hna caah nu can a can nak vialte hna kha philh piak a si loh i, a lawmman la dingin Vanmi hna nih cun a hun don"

"Cu caah kei nih cun tuzan ah hin, cun thai zongah si seh, a kan kal tak mi hi ngaihchiat ding a um in ka ruat lo, kei cu ka hna a ngam tuk, minung lei ruahnak in cun thaizing a chuak lai i kan hawi tha nunchung hun hmuh than ti lai lo ding ruah ah cun lung a fak ko, nain a kal nak ding hmun le a hmuh ding mi ka ruah ah hin ka hna a ngam i ka hngar tuk lehlam deuh, cucaah tuzan ah hin Pathian hi thangthat deuh hna u sih, hi vawlei harnak le fahnak vialte sin in kan nu, kan hawi, kan farnu, kan pi le kan unaunu a lak hnu ah zungzal nunnak lawmman a pek ding mi hi kei cu ka hna a ngam tuk" a ti. An khirhfabuu upa bia a ngai mi tappi hram coka lei deuh ah a thu mi khuanu khuapa hna zong an lung a tling ve tuk i Amen an rak pek, cheukhat thang ngai in, Halleluiah!

Angels in the room , she's run her final race
They come to carry her to heaven
there to see her savior's face
Angels in the room, to take her to a great reward
No need for sadness or gloom, there are angels in the room

Hi vawlei ah ni tam a ngei ve ti lo mi, Thang Thang-pu hi an khua thangthar mino hna zong nih an hngalh bik nak cu "Thlacamtu" ti hi a si, Mizaw le pum ngandamlo hna nih thlacam an auh i an auh an herhnak ah kalhnawh in thlacamnak cu Pathian rawngbawl nak ah a hmang mi a nunchungah Jesuh rian a tuan tluan ve mi a si, Polititian a si lo, mi rum mi lian zong a si lo, Di inn fate in rangva inn an um hnu tiangah mizaw le ngandamlo mi hna nih an fuhpanh i a inn ah thla tam an cam hnawh an riah hnawh tawn mi a si. Vawlei lei i minung thiamnak nih a phak ti lo hnu thlarau hnangamnak lawng a kawl cang i thih a hngak cang mi hna nih an panh ngai tawn.

Pathian cu a cohlan i Jesuh khamnak cu lungtak tein a a nun pi, Thang Thang-pu khuaruahhar a si mi cu tar cak lo ngai a si hnu zongah a hmu mi paoh nih hmaipanh tein an hmuh khoh peng, mithmai chia in an hmu bal lo, mi a thangchiat an hngal bal loh i, mi nunsiang le mi nuntha a si, sifak harsa tein khua a sa ve ko nain a nun ah aa nuam Jesuh dawtnak san zia le sunlawi zia kha ai fiang tuk,  Sabbath ni ah cun Pathian Biakinn thiang phak khoh ve peng a duh a zuam fawn, damlo zawfak in a ih caan hmanh ah a chung le pumh kal dingin a fial tawn hna.

Tar cak lo cu si fawn cang kaw, rianhma nih le a domh kho ti lo, a tuah khoh chun mi tlah tham le tah hmanh a si kho ti lo, a damthat ikpak ah cun mahlawng inn um a khuahar i innpa chakthlang a lengkai tawn hna, nain a kumkhua a hung upa i a pumsa nih a zo ve ti lo, a chan a chunhnu ve ruangmang cang. Hi vawlei ah hin caan tam tuk a ngei ti lo, a cawlcangh ning zoh ah ni tam a ngei ti lo ti a fiang ko, kar a hlan ah vawlei hna cu an i hnin dih bantuk in an um cang i, ramking ramlak hmawngchung a vah nak le thlacam ah vengdang khuadang a vah nak ke hna nih cun lam hla an phanh pi kho ve ti lo, Biakinn phanh a duh tuk caan hmanh ah hruai chom lo in cun a phan kho ve ti lo, hruaichom hmanh in a phanh khoh lo caan a tam cang.

Midang hrangah thlacampiak tawntu Jesuh Pasaltha nih cun thlamcampiak in lenkai a hau ve cang i, midang bawmtu le hnangamnak petu, nun khuaharin a um mi hna thazaang pe in ruahchannak petu kha, umhar le lileng in leng a chuak kho ve ti lo, lenkai le vehvat, thazaang pek a hau ve cang. A caan hlun hna a ruah than Pathian riantuan in a rak vahvaihpi mi a hawikawm cheukhat hna zong nih an dinh tak dih ngawt cang, cun anih zong hi vawlei ah hin caan sau a ngei ti lo i, rau lo te ah an sin a phan ve te lai ti kha ai hngalh ko.

A zawtnak cu a zualhma chin lengmang i thlacampiak in a vah lengmang an hmuh tawn mi kha chuak kho lo in khuanu khuapa le khrihfabuu chungtel hna nih an i pumh caan i thla an cam piak pinah a inn ah kal hnawh in thla cu an va cam tawn, caan sau a ngei ve ti lo ti kha an hngalh ko a kumkhua zong nih a upa cang, zun le ek hmanh amah in ai fimtawl khoh tilo hnu fimtawl le rawltuh lengmang a herh hnu hawi hna ah cun a thih lai cu bawh a si ko cang, amah zong nih ai hngalh ko nain a tih lo.

Hi vawlei harnak ramah hin ni tam a ngei ti lo ti cu fiang tukin hngal ko hmanhseh, hinak hmun nuam ah a kal lai ding le ramnuam nih a rak hnga ko ti ka hngalh, Pathian rian a tuanpi hawi vialte hna he khan hmunkhat i an lenti than i khamhtu an thangthat ti than lai nak ni ding cu thlarau mit in a cuanh tawn i a hngahhlang tuk tawn, cu hmun ah cun Pa le Fapa he ton nak a um lai. Nikhat cu a zualhma ngai ngai "a tu le fa vialte hmuh dih ta lo cu tiin a auh ter dih hna, a ihkhun hram ah cun zei hun tuah awk hngal lo in an thu ko hna, a fale nih cun a pa cu riantuan kho lo fimtawl hau mi, si cang ko hmanhseh zei a tuah khoh lo zongah hung kan dampi ve peng ko rih seh ti an duh a kal tak tak ding cu an siang lo.

A hung i hrim i thazaang um ek in a chuah, an hun thutter i khua a hawi a tu le fa hna pakhat hnu pakhat a zoh hna, Pathian rian a tuannak nih thluachuah a pek i a fa le zong hawi hngar in an um lo, a tu le tete zong ngandam in an um, Pathian a thangthat hnu ah, a thawh hna i, "Ka fale hna nan hmu maw, kan sinah vanmi hna an um kan kiang ah an dir ko khi, ka kumkhua nih a upa cang i ka dam kum hna zong Bible nih a kan chimh zat cu a si ve cang, kei cu kapa sinah ka kal cang lai, ka caan a phan cang" a ti. Thennak bia an theih ah a fale an mitthli an hnawt cawk lo, zei a thei lo mi a tu le tete zong an tap dih.

He's not long for this world, there's a better one to come
He's think'in about that great reunion , with the father and the son
His family by his bedside, he says children can't you see
Angels standing all around us, it's time for me to leave

Zankhua a hung muih hnu thinthi in an ih kar ah cun an pa nih a rak kaltak cang hna, zeithla a lawh ti in an hun zoh ah cun a pumsa ah nunnak a um ti lo, a thlarau cu Jesuh sinah Vanmi nih an kalpi cang. Hi vawlei a caam chungah a si khoh tawkin Pathian rian a rak tuannak lamthluan cu felte in a hrawn i Jesuh lung a tlin caah a lawmman zungzal nunnak co dingin vanmi hna nih an hung lak. Thlacamtu Jesuh Pasaltha cu Vanmi hna nih an don i a rian a tuan piak mi Jesuh sinah a kal.

Minung lei in ruah ah thennak le mangtha timi hi a fak tuk tawn i, celh a si tawn lo nain a nunchung caan hna ruah ah hna angam lung a dai, cheukhat caah an pu, an pa, an unau, an hawikawm le an tta a si mi cu a thi nain, Vanmi hna caah cun an hawitha, an Pasaltha, an unau , an fapa nih a va fonh hna ni sunglawi ah a cang ve. Mi rokual hna thih ni ah ar hmanh an khuang lo an ti, Hulianpu zong hi vawlei lei mit in zoh ah a rokualnak chim ding a tam lai lo nain, a thihni ah uifir hmanh thang in an bauh ngam lo, an sianlo tuk ah leh a um lo an hna a ngam lo ca maw si hnga?, nain vanram ah cun khuang le dar he ringawn phuntling in an tum i an lam Jesuh Pasaltha a tlun caah.

Angels in the room, he's run his final race
They come to carry him to heaven
There to see his savior's face
Angels in the room, to take him to his great reward
No need for sadness or gloom, there are angels in the room

Nifatin nunnak a kan pe i thluachuah a kan petu le lam a kan hruaitu hi Jesuh a si ti cu kan nih Khrihfa mi nih cun kan zumh dih i harnak kan ton i kan zawtfah caan hmanh ah Jesuh nih damnak a kan pek than lai i harnak in a kan chuah than te lai timi ruahchannak kan ngei tawn, nain a caan ah cun cu harnak sin cun a kan chuah loh i damnak zong a kan pe tawn lo. Thla a cam ballo mi zong an dam zawtfahnak ngei lo le nun khuasau in an um ko. Vansan chimpit kan ton caan ah siseh minung ruahnak ah zawtfahnak a dam kho tilo mi nih a kan tlun hnawh caan ah khin Pathian sinah lungtak tein thlacamnak kan ngei tawn nain kan halnak cu kan i ruahchan tlukin leh kan si tawn lo, cheukhat cu damni hmu lo in an liam lan.

Cubantukin vawlei thiamnak nih a damh khoh tilo ding zawtnak ihkhun i a it lio mi hna hrangah ngaihchiat lungsivannak ding a rak um lo, Jesuh zuumtu hna kalnak ding lamthluan cu a fiang ko, an i dinhnak ding hmun cu hi vawlei nak hin a nuam tuk deuh, hi a dam kho tilo ding mi zawtnak hna hi Jesuh nih a sin i a kan hruainak lam an si.

Hi hla nih hin. Cu ni na phak tikah cun ka hawi, kal caan na phak ve tik hi vawlei ah na caan hnuhnung bik le thihnak hram na dir tikah cun phan ding zeihmanh a um lo, lungthat lo nak ding zong a um fawn lo, na pah ding mi lam cu pah law hnukhirh lo in kal koh nangmah lawng nasi lai lo, a ni na phak tikah cun Vanmi hna nih na ihkhun pawng in an in hngah lai i an in don lai, thlavai kiang umhar in nangmah lawng na kal lai lo, an in don lai.

When it comes a time for leaven
And you see the fights are long
You won't have to worry friend
You won't be alone