THO LAW KAL TUAH"

"THO LAW KAL TUAH"

Jerusalem khuapi cu zanlei ninem chialmal ah khin Jesuh zultu Simon Peter le Johan kha Biakinn ah thlacam dingin an kal, cu zanlei cu zanriah rawl chuan a cut ka hrawng khi a si cang. Jerusalem nutung le nungak pawl cu tappi hram ah rawl chuangin mei an vil len lio a si cang. Judah ngakchia hna zong an hawikawm hna he lentecelh dingin tual lai ah an hung chuak cang hna.

Peter le Johan cu Biakinn ah khan thlacamdingin an kal ve lio a si, cu Biakinn luhnak 'Kutka dawh' timi ah khan a chuah kate in a ke a bei mi pakhat kha a rak um, Biakinn a kal mi hna nih khan an sian tawk te kha an pek ve tawn caah cuka hmunah cun nifatinte an hei puak i an va chiah tawn. Cu Jerusalem zanlei ninem ah Peter le Johan nih Biakinn an vun panh lio kha, cu ke bei pa nih cun a rak hmuh ko hna i Tangka an ka pe ve te hnga maw ti ah ruahchannak he deng teo in a rak zoh ko hna. A pawng a van phak tikah ke bei pa nih cun "thil zeimaw dek pe ve dingin a rak hal hna" cutikah Peter nih "Hun ka zoh" a ti i, cutikah Ke bei pa nih cun zeidek an ka pek ve rua lai tiah ruahchannak he mitthep lo in a zoh hna. Peter nih cun ai thawh i "Sui le ngun tangka zeihmanh pek ding kan ngei lo, sihmanhsehlaw ka ngeih mi cu kan pek lai; Nazareth khuami Jesuh min in 'Tho law kal' kanti" tiah a ti. Cun Peter nih a orhlei kut in a hei thawh i chikhatte ah ke bei pa ke le fengbeo hna cu an hung thawng i duak a hung dir i ai chawk colh. Biakinn chungah a lut i a tur a zuang i Pathian kha a thangthat ve. Jesuh nih a damter mi hna cu lunglomhnak in an khat i an hna a ngam tawn.

Cun cu mipa ai chawh luahmah ko kha mi nih an hmuh tikah an khuaruah a har ngaingai, "mah pa hi kawtka dawh i a thu tawn mi awkhlawhpa ( kutdawh) kha a si lo mei, an ti i nain a kal cuahmah ko an hmuh tikah an khuaruah a har ngaingai i an lung a ar dih.

Ke bei an damter mi pa cu Peter le Johan pawng lawng i ai zelh lengmang ko kha an hmuh tikah an khuaruah a har i Solomon innleng timi an khan an va kal hnawh hna, Peter cu mipi hna hmai ah cun bia a chim i "Unau hna hipa a kal khohnak a ruang cu a hlan ah nan rak hlawt i nan rak thah mi Jesuh ruangah a si, kebeipa damnak petu hi Jesuh a si, ka u le ka nau hna Jesuh cung i nan mah le nan hotu hna nih nan rak tuah mi kha zei a si ti awk nan rak hngalh lo ruangah a si ti kha fiang tein ka hngalh, cucaah nan sualnak cu an hnawnpiak khoh hna nak hnga nan sual kha i ngaihchih ulaw Pathian lei ah khan i mer tuah uh. Cun Bawipa nih Thlarau thazaang thar hmuh nak caantha an pek hna lai" a ti.

Jesuh zuumtu vialte kan dihlakin kan nunhlun cu kaltakin Jesuh nun dawh bantuk kha kan nun ah ceu ve cang seh.

Hi kan harnak le Sunghzatlaknak kan ton cuahmah mi chungin lungsivang beidong ngai in kan um lio ah le hi vawlei harnak i khual kan tlawn lio ah hin Jesuh nih cun hi Vawlei sui ngun le chawva si lo in zungzal nunnak tu kha pek a kan duh. Hi vawlei ah Jesuh hnu zulin diknak le rinumnak ruangah rehtheih harsat huam in a nung mi zumtu cheukhat hna cu hawi hngar le haw neih nei lovin um tawn hmanh hna seh Jesuh nih Vawlei rumnak hi si lo in damnak tu kha a pek hna lai.

Zei maw thil pakhat ruangah lungrethei beidong ngai kan um lio a si ah cun "Tho law kal tuah" na hmai ah Jesuh a um i a lam na zulh ah cun lomhnak tling le hnangamnak tling kha na hmuh lai.