Ayla : Raldohnak hmun Fanu sung.

Ayla : Raldohnak hmun Fanu sung.

Ayla timi biafang hi Turkish holh biafang si in, Lai holh in "Thlapa" tinak asi.

Korea War timi raktuk fak ngai a chuah lio, Chak Korea ( North Korea) China nih hnulei in a bomh mi Communist phunglam a zul mi le Thlang Korea ( South Korea) USA le a hawikom ram hna nih Democracy phunglam a zul mi hna fak ngai in an rak i tuk lio caan ah khan thil a cang mi tuanbia a si. Miphun khat thisa khat an si ko nain Political Ideology ai khat lo ruang lawngah an karlak ah raldohnak fak ngai a chuah ter phah. Chaklei um Korea pawl nih cun Korea ram pumpi cu Communist zulhphung in uk siseh ti an duh lio ah, Thlang Korea pawl bel nih cun Korea ram pumpi cu Democracy zulhphung in uk siseh ti an duh ve, cucaah miphun khat a si mi Thisa khat a si ko tung i holh zong pakhat a hmang ko kha an ruahnak ai khat lo ruangah an karlak ah raldohnak fak ngai a chuak i minung nunnak tampi a liam lawng hmanh si lo in ngahtah tampi a chuahter phah.

Hi Korean War lio ah hin Chak Korea cu China nih hriamnam in siseh ralkap thazaang in siseh a rak bomh lawng hmanh si lo in ralhruangah ral a kah piak. Cu ve bantukin Thlang Korea zong cu US le a hawikawm ram hna nih chawva le ralhriam lawng si lo in Ralkap thazaang in an rak bawmh ve. Cu hna lakah cun Turkish Ralkap Battalion tlawmte an rak i tel ve i, Korea ramah raldo dingin an rak kal um ve.

Cu Turkish ralkap hna lakah cun Mechanic lei a thiam mi Suleyman timi Tlangval chuakka te pakhat a rak um ve, Turkey cozah nih Korea ram i kal dingin an fial lio ah hin darling muidawh ngai Maria timi nu a rak ngei. An tian lai zaan cu an i siang lo tuk a hlei in a darling Maria nih kal lai a siang lo, sianlonak mitthli le aan nem he biaroling zaza he a kal kham ai sek "Ka ngakchiatte in ka nu le pa nih an ka thihtak cang, ka pate sinah ka um, hi vawleicungah hin nang lo ho dah midang ka ngeih, na ka kaltak hawi chinchin ah cun keimah lawng ka si cang lai, na ka dawt tak tak a si ah cun kal hngin hlah ngat" tiah. Ankara khuapi dai dup in a um hnu tiang an i thlauh, nain ralkap cu si tung kaw thlauh khoh a si lo, Suleyman nih cun dawtnak ann nem le sianlonak he a dawt Maria cu thlauh ai zuam ve ngawt ko nain sih ti thiang bang Maria mitthli a biangah hul zai a rel kho lo "Pathian nih a kan kilven lai i, tin than caan a chuak chim ve ko lai kumkhat fai lawng a um ding ka si ko caah nangmah le kan hmailei hrangah dam kai zuam lai, nang zong rak i hne law lunglen cu tuar rih ko usih, ka hon kir le cangka thitumhnak kan tuah lai i, nang cu ka ta na si bantukin kei zong na ta ka si zungzal ve cang lai, ka dawt kan caah khuazing nih thachin rel hram sehlaw" tiin, sianlo bu in ttian zai an rel.

Suleyman le Turkey ralkap hna cu caan sau ngai Tilawng in khual an tlawn hnu ah Korea ram vawlei cu an lamh, ca kuat khoh a si le cangka in, Maria le Suleyman cu thawng an i thanh ca an i kua lengmang, thawngpang hal an dai ballo.

Nikhat cu Suleyman a umnak Comapny cu ramtangah Patrolling in an kal cu an kal nak hmun ah cun Chak Korea Communist ralkap he an i tong i i kahdohnak fak ngai a chuak, cu i kahdohnak hmunah cun a nu le pa nih an thih tak mi nu ngakchia pakhatte kha a nu le pa ruang pawng i a rak ttah ko kha an va hmuh. Cu ngakchianute cu an char i an i tlun pi. Hi ngakchianute a chartu hi Suleyman a si i, an camp tiang ai puak, camp an phak cun cawhnuk le changreu an pek i, zeitin hun tuahto awk an theih lo caah an i um pi. Suleyman cu an charnak hmun in an Camp tiang a pua tu a si caah khan amah zohkhenh dingah a tla. Ngakchianute nih cu Korea holh an thiam lo caah khan a min zong an hal kho lo, auh an duh ve fawn tung caah khan a min bunh an duh fak ngai in a min ding an i phuah sek nain ai rem deuh lo ti in an thlen than lengmang hnu ah Suleyman nih cun "A muihmel te hi thlapa bantukin a bial caah 'Ayla' tiin kan auh ah a tha lai" a ti i cuticun cu Korea ngakchianute cu Turkey ralkap pawl nih cun Ayla tiin an auh.

Cu Korea ngakchianute Turkey ralkap pawl nih Ayla tiah an auh mi nute cu ho sin hmanh ah a um duh lo amah a char tu Suleyman pawngkam lawngah ai zel, Turkey ralkap pawl nih cun an dawt ngai ngai i, ai hrukaih ding thilri siseh a eidin ding tirawl tiang in an hmuh le phak tawk cio in an damh piak i rawltam tihal lo te in le khuakik tuarlo te in an chiah.

Ayla cu an khualtlawnnak le an i thialkamnak paoh ah an i kal pi, a nu le pa nih an hun hlam hlan lo le a chungkhat le kan hmuh hlan chung cu kan kalnak kip ah i kalpi ve ko hna usih tiah an lung a tling. Voikhat cu an um nak hmun an i thialkam dingin khua karlak an tlik lio ah an Motor ai rawk, Motor ai rawk mi le mi tlawmte cu an chiahta hna i a dang cu an umnak ding hmunhma panh in sau ngai an kal cang ti ah khin Chak Korea pawl nih an kal takmi ralkap tlawmte cu lam chak in an rak bawh ziar ko hna kha a rak si. Cuticun ralkap tam deuh thui nawn an kal cang maw ti ah khin an Turkey ralkap tlawmte cu an hun nam hna, cu Turkey ralkap tlawmte lakah cun Suleyman le Korea ngakchianu Ayla zong cu an i tel ve. Meithal puah thawng an theih le cangka in Suleyman nih Ayla cu motor tangah a thuh i ral dohnak lei ah cun a hawi le a va bawmh ve hna. Cu raltuknak ah cun Suleyman cu raltha ngai in a cawlcang i Turkey ralkap tam tuk a thi ding kha a khamh khoh hna, Sau ngai a kal cang mi Turkey ralkap pawl nih Suleyman nih a serchom mi Petrol bomb puah thawng an theih hnu in hnu an hung i khirh than i an hawi le cu an hung chanh manh hna caah tamtuk thi lo in an khamh manh hna, Ayla zong hliamhma tuar lo te in a him ve. Cu raltuknak ruangah cun Suleyman zong nih Thlang Korea nih a pek mi ralkap raltha conglomhnak medal a don phah.

Cunglei ralkap lutlai pawl nih ralkap sin i ngakchia a um ve lengmang cu ngakchia hrang i a him lo pinah ralkap hna a hnawh hna anti caah Ayla cu Turkey cozah nih Korea ngaktah zohkhenhnak an tuah mi Ankara ah chia dingin Suleyman cu an chimh. Nain Ayla nih cun a duh loh i Suleyman cu ttah bu te in a kut ah a tlaih peng. Suleyman nih cun chikhatte lawng kan kal tak ta lai i ka rak kir than lai Medal la dingin ka hei kal ta lai" a ti nain. Hmundang an kal kar ah Ayla cu Suleyman cuannak ding motor hnu ah a rak i thup i. Medal a lak nak ding hmun tiang a rak cuang ve hawi. Medal la ding ram kip ralkap hna lakah cun Suleyman zong a dir ve, Thlang Korea ralkap bawi pawl nih cun Pasaltha medal cu an hun pek diahmah hna i Suleyman an hun pek lai te ah cun Ayla cu a hung chuak i Suleyman pawngah cun a va dir i a kut a va tlaih. Korea ralbawi pawl le Turkey ralbawi pawl nih cu thil a cang mi an hmuh tikah ngakchianu Ayla cu Turkey ralkap sinah a chungkhat le nih an hun hlam lo cu an pawngah um kho dingin siannak an pek hna.

Nikhua caan a hung liam lengmang hi kumpi kumkhat zong caan tawite bantuk a liam thlu ve deng cang, Turkey ralkap kum khat chung a um ding mi hna zong Korea ram an um chung ding caan cu a dong dengmang cang i mithar nih an hun thlen hna caan a phan cang. Cu caan chungah cun Ayla nih cun Turkey holh cu a thiam manh ve i, Turkey ralkap vialte nih cun fanu zoh in an zoh i an dawt ngai ngai fawn. A hlei in Suleyman nih cun a kurit i holh a cawnter ca a cawnter ngakchia nih a pa sin in a cohlan ding dawtnak vialte cu a pek dih. A caan ah cun a thlite in Ayla cu zaan ah Suleyman sinah a va it tawn. A kut ai tlaih peng tawn i a kalnak paoh ah a zulh. Suleyman cu "Ka pa" tiin a auh i, a tlaihchan ngaingai. Suleyman zong nih cun fanu zoh in a zoh i a dawt ngai ngai i ai ruah ning leng in a rak tlaihchan manh Korea ram a chuahtak lai a van naih tak tak ah cun Ayla cu a kaltak kho ding dirhmhun ah a dir ti lo. Korea ram a chuahtak ding a si zongah Ayla he lo cun chuahtak a duh ti lo l. A sinain phunglam nih Ayla cu Korea ram chuahpi a si lo caah le Nu pi a ngei rih lo mi caah fa lak khoh a si fawn lo caah Ayla cu Korea ram in a chuahpi kho lo. Cu a si caah cun Suleyman cu Volunteer in kum khat chung um than dingin ai pumpe.

Cu thawngpang Turkey ram i a um mi a darling Maria nih a rak theih tikah a lung a rawk tuk. Nain dawtnak ruangah kumkhat chung cu rak hngak than rih dingin ai zuam. Ca zong a hlan bantukin an i kua than lengmang rih ko, Suleyman le Ayla thawngoang nih cun Turkey ram Thawngthanh ca vialte a cul dih Turkey ram mipi nih an uar tuk hringhran hna.

Asinain nikhua cu ruahlo kar ah a hung liam than lengmang i kumkhat cu caan tawite bantuk men ah a hung cang than. Cu hnu zongah cun Ayla nih a thlah khoh lo caah le Turkey ram i kalpi khoh a si rih fawn lo caah khan Suleyman nih cun kum 1 dang umpi rih dingin ai pumpe than rih. Cu Thawng Maria nih a theih tikah ai tuar cawk ve ti lo, a lunglen umhar a celh lo, Maria nih cun a mah kong ruat tilo bantukin a ruah cang. A mawh ve lo kumkhat lawng um dingin biakhiahnak an tuah cang mi kum 3 deng rilmal mui hmuh loin an um ding a ruah ah a celh lo. Cuticun cakuat zong cu a dong ve i Suleyman nih ca a kuat lengmang tawn nain a lehnak cakuat bel a kir than ti lo.

Suleyman le Ayla caah cun kumpi kumkhat vu a toi tuk ngamsam, cu chim lo kumpi kum 3 hmanh a toi tuk, a liam a fawi tuk. Suleyman cu ralkap lutlai nih an sik voi 2 ngaihthiamnak he na nawl kan ngaih cang tu ah cun kan nawl na ngaih hrimhrim a hau Korea vawlei hi chuahtak in kan ram Turkey ah na kir than awk a si, hi nawl hi na el a si ah cun kan in tlaih lai, hi Korea ngakchianute hi cu Korea ngaktah hna caah Turkey ralkap nih kan tuah mi ngaktah cawmnak Ankara ah na chiahta ah a tha lai" anti caah. Suleyman caah cu lungrethei ngai in a um. Cu lio ah cun an Company Commander nih cun ruahnak a cheuh i "Ayla hi kaltak lo awk na tha ti lo, Kalpi kho dirhmun zong i na dir fawn lo caah, rianrang in Turkey ramah kir law na phanh le cangka nupi va tthi law, nupi na ngeih hnu in Ayla hi fa ah na van lak ah a tha deuh lai, cu lawng cu na caah lam a um mi cu a si" tiah a ti.

A sinain Sergeant Suleyman caah a fanu Ayla kaltak cu a fawi lo, Korea ram a chuahtak lai ah cun a cung ralbawi hna ruahnak pek bantukin Turkey cozah nih Korea ngaktah hna caah an tuah mi Ankara ngaktah cawmnak ah a va chiah cu hmunah cun Turkey ram le miphun hla hna cawnpiak an si pinah fimcawnnak le eidin tirawl tha tein pek an si. A va chiah ni ah cun sianlonak he an vai i chia ve phawt, an i thlem an i lem len ve ko nain an hon i lawi tak lai le an ttian lai tak tak ah cun an i kal tak kho than lo, nain a thaizing cu Sergeant Suleyman kal ni ding a si cang fawn caah khan an caah vawlei hi a palh hringhran cang. An pafa in then lai an ruah ah an celh lo.

Suleyman nih Korea vawlei a chuahtak ni ding cu a hung phan Tilawng dinh hmun ah cun Turkey ram ralkap pawl cu an kum khat um chung caan dih in tlun an ai thawh mi hna lakah ah kum 3 a um cang mi Suleyman zong a min an auh hlan hngak in a dir ve ko. Suleyman min cu an hung auh i a thilri he a min an zoh fel nak lei cu a panh. Cuticun kum 3 leng khua a rak sak nak Korea ram cu sianglo ngai in a chuaktak cang lai. Cu lio ah cun Ankara ngaktah cawmnak inn ah Korea ngakchianute Ayla a bau ruangmang ai. Nawlngeitu nih an hun hlat an hun kawl ruangmang cang. Sergeant Suleyman Tilawng cung a kai lai te ah an hun auh than, a thilri an hung zoh tikah a thingrem chungah Ayla a rak thuh i Korea ram in chuah pi a rak i timh ko kha an hmuh. Cuticun Suleyman cu an tlaih i dan an tat. An pafa i dawtnak cu harnak minmei zam nih a hun chilh khuh than.

Suleyman cu hram hram in Turkey ramah kir ter a si i, a fanu Ayla cu Ankara Ngaktah cawmnak inn ah chiah a si fawn. Suleyman cu Turkey vawlei a lamh le cangka nupi thit colh ai tim, a dawtmi Maria sin va phak colh dingin timhtuahnak a ngei, nain ai ruahchan tlukin a thinlung nih khaukhih bang dawtnak a rak i tlaih tlukin Maria dawtnak rak fek ve hlah kaw. A dawt sung khun Maria nih cun val dang tang rak pawm in thlangkhun a rak dum cang. Tuarnak le harnak lakah Suleyman cu lungcan ai pe, dawtnak nih a chuahpi mi harnak le tuarnak cu lungcan i pe in pah ai zuam. A fany Ayla cu a pawngkam um ter zawk a duh caah a a nu le pa sinah nupi kawl piak dingin a fial hna. Cuticun nupi cu an kawl piak i an thitter. Nupi a ngeih hnu cun Ayla cu fa lak in lak khoh a si cang lai caah Ayla lak ding lawng kha ai zuam.

Nupi a thit hnu a thaizing bakin Korea Embassy ah Ayla lak khohnak ding lam a kawl i ai zuam. Rawlei chung pil lo le zan it merem loin Ayla a kawlnak ah a pumsa nih a celh ti lo tiang in a um. A nupi nih cun a theihthiam i a bia el le dohkalh hoih in um cu chim lo in a si khoh tawkin a pasal cu bomh khoh ai zuam. A nupi zong cu Ralkap bawi hlun fanu a si caah upattu le zawnruat tu tampi a rak ngeih caah ruantuan zong a fawi deuh ngai ngai. A sinain ni le thla tampi a liam hnu zongah Ayla timi min cu khawika ngaktah cawmkennak hmanh ah an hmu kho ti lo.

Cuticun hnakkar ah tenh peng bu in ni le caan hna cu an hung liam ve ziah mah. Suleyman cu a kumkhua zong a hung upa ngai ngai cang. A nupi he cun fanau hna an hung ngei i. Kum 2002 world cup ah khan Turkey le S. Korea cu an i khel, cu Turkey lr S. Korea world cup an i cuh lio cu Suleyman nih mitthep lo bakin a zoh i Camera nih S. Korea mipi lei a hoih caan paoh ah "Ka fanu Ayla kha ai tel ve hnga maw" tiin a rak ngiat peng. Cu Turkey le S. Korea nih world cup an i cuhnak cu ai chiah i chun zaan peh bakin a zoh than lengmang tawn, a caan ah a pause i a play than tawn. Cuticun a fanu Ayla cu Kawl hram ai thawk than.

Kum 2007 Turkey ram lihnin ah khan, Kokek rawhnak nih Turkey ram cu fak ngai ngai in a den i inn le lo rawk tamlengah minung nunnak zong tampi a liam, cu lio ah cun S. Korea ram in bawmhnak tampi an hun kuat hna lawng hmanh si lo in S. Korea in Volunteer tamtuk an hun thlah hna i Lihnin nih a hrawh mi Turkey ram serthannak rian an hung bomh hna. Mah cu tan zongah cun Suleyman nih hin a fanu Ayla kha a rak hong ve hnga maw tiin ruahchannak nganpi he a rak cuanh peng i Thawng an thanh mi Video paoh cu hrelh loin a rak zoh tawn i, a hlei in S. Korea volunteers pawl an langh caan ah cun a mit a tthep kho tawn lo, nain a fanu Ayla muisam a leng ve lo.

Kum tamtuk a liam cang, Ayla cu a dam maw a thi hmanh hngal lo in kumpi kum tam nih a hun phuat hna i an kumkhua zong a upa ngai cang i tarlei an hung si cang. Suleyman nunnak zong a hung chun hnu ruangmang cang.

Kum khat cu S. Korea in Journalist le buu cheukhat nih a hlan Korean War lio ah Turkish ralkap pawl Korea ram ah raltukin a rak phan mi pawl hna tonbiaruahnak le upat peknak ngei dingin Turkey ram an hung phan. Cuticun Suleyman zong cu an hung fuhpanh i a konglam kha an hung hak tikah Korea ram ah fanu a ngeihnak kong kha an hung theih i Suleyman le a fanu Ayla tuanbia nih cun Turkey le S. Korea ram Thawngthannak ca le media vialte a hung luah colh. Mi tampi lungthin a suk ngai ngai i i tong than hna seh ti an duh piak cio hna, nain Ayla muisam cu hmuh ding a um thiam thiam lo. S. Korea le Turkish Journalist hna nih cun S. Korea ramah Ayla kawl hram cu an i thawk. Cu lio ah Suleyman cu pum ngan dam lo nak tete nih a hun tlak hnawh pah lengmang cang, a fanh Ayla kong a ruah ah le zaan hngilh khoh lo le rawl ei lo in a um caan a tlawm lo, cutikah a um ning cu a ngandamnak ca i a that lo caah a fa le nih an sik cak caan zong a tlawm ti lo.

Kum 65 fai a liam cang. Suleyman le a nupi cu South Korea ram Airport pakhat ah an ttum, an lung a tho hringhran, Cu nih Korea ram an phak nak a ruang cu an fanu Ayla kha Journalist pawl nih an hmuh i an i ton khoh nak hnga khua an khan piak hna ruangah a si. Kum 65 fai hnu ah Korea thisen kai Ayla le Turkish miphunna si mi Suleyman te pafa cu an hung i tong than.

An hong i tong i an hun i kuo cu "Ka hong kir zau lai na ti tung, ziah hi caan chung hi na rauh" tiin a Pa cu a kuh i a ttap thluahmah. Kum 65 hnu ah kum 2010 ah khan Ayla le Suleyman te pafa cu an i tong than. Tuan te ah Ayla an hmuh khoh lonak a ruang hi, Korean War a dih hnu ah khan Ayla timi Turkish min cu thlengin Korean min an rak bunh piak caah khan Ayla tiin an kawl i an hmuh khoh lo caah a rak si.

Sergeant Suleyman cu kum 91 mi si in kum 2017 Dec ni 7 ah khan a nunnak a liam.

Jesuh nih hi vawlei ah hin ka rak kir zau lai tiin khrihfami hna cu a kan kamh nain Jesuh mui hmai a leng ti lo, hi kan Jesuh kan hngah chungah hin harnak a phun phun tongin hi vawlei harnak ram ah hin kan tuar tawn. Nain Jesuh nih a kan kamh bangin a rak kir than hrim hrim lai, Ayla le Suleyman te pafa hmanh an i ton ah cun khamhtu Bawi Jesuh biakam cu a hmun hrim hrim lai.

Salai C. Vanramdinmawi

( Tenglam)