Zohchuntlak Carpathia Tilawng, Mi 705 nunnak a khamhtu

 

Zohchuntlak Carpathia Tilawng, Mi 705 nunnak a khamhtu

Titanic Lawng minung 2208 phortu tiah an chim mi cu April 15, 1912 zingka khuadei hlan hrawngah North Atlantic Rilipi ah a pil i. Lawng ai cit mi 2208 hna lakah mi 705 lawng himdam tein an chuak kho. Midang vial cu Rilipi tawne tiang an pil i an thi dih tiah theih a si. Hibantukin Rilipi i an pil cuahmah lio ah hin an pawngkam naihte ah Lawng lian pathum an rak um ve.

Titanic Lawng :

Kha lio caan ah khan vawleicung tilawng ngan bik ti ah chim mi a si.

Pound Million 7.5 man hrawng ti ah ruah a si i.

Titanic tuahnak ah khan mi 15000 hrawng nih rian an tuan ti ah an chim.

Khamhnak lawngte 64 um kho dingin timhtuah a si i, ton sual an ton a si zongah a him ding mi ah ruahdamh cia a si, asinain hibantukin khual an tlawn lio ah hin khamhnak Lawng hi 20 lawng an i chiah.

Hi Titanic lawng ai cit mi 2208 hna lakah mi 705 lawng nungdam in a chuak kho mi a si. A minung phurh zat le a thi zat hi an chim ning ai dang cio ve hna.

Hi Lawng hi kha lio caan ah khan cun a tha tuk hringhran ti in chim le phai a rak si tawn. Titanic konglam tialtu cheukhat nih an tial ningah cun Lawng ai cit ve mi nu pakhat nih "Kan i cit mi Lawng hi a pil kho tak tak loh maw?" ti ah Lawng Captain a hei hal i, Lawng captian Edward John Smith nih cun "Pathian hmanh nih a pil ter kho lai lo" ti ah a rak leh e anti. Asina te in a voikhat khualtlawnnak bakah khual a tlawng bal ti lo dingin le hi vawlei hi hmu bal ti lo dingin minung nunnak tampi he Rili tawne ah a pil zuahmah ko khah. Titanic Lawng konglam hi lam kip in a tialtu an tam i. Rili tawne i a pil lio ah khan a pawngkam ah Lawng pathum an rak um ve i. A sinain an rak zohkhenh hna ning bel ai dang cio hna.

Sampson Lawng: Titanic lawng nih ton sual a ton lio ah khan lawng pakhat Samson an ti mi cu mel 7 hrawng lawng in a hla mi ah a rak um i, Titanic lawng in Flare (Flare = van lei ah mei ceu an kah chuah mi hi chiatnak le tonsual an ton caan ah midang nih an vun theihhngalh hna nak dingin le bawmhchannak le bawmchantu ding auh koh nak ding ah an hman tawn mi a si) Sihmanhsehlaw, an nih Lawng kha cu phunglam nih a sian lo mi, Seals ( Nga phunkhat) tlai ding in a thlithup in a vak mi an si caah Titanic Lawng nih harnak a ton mi cu chanh ngam lo in an zamtak diam hna.

Thil tha lo le thil dik lo a tuahtu nih cun an sinak le an tuahser mi hna an thinlung thli te in an i zahpi i, mi dang nih an theihhngalh ding kha an ttih caah bawmhchan a hau mi hna zong bawmchan ngam loin, bawmhchanh a hau mi le kutchanh a hau mi an hmuh ko hna zongah va panh le va fuh ngam loin i thuhnak ding an kawl tawn. Pathian ram le kan minung hawi hna hrangah kan rawngbawlnak dawn tu ding Satan thilri kan si nak lo ding hnga um i zuam hna usih.

Californian Lawng : Hi lawng hi Titanic umnak in Mel 14 a hlat nak ah a um mi a si i. Titanic lawng in Flare (Mei ceu) an kah chuah mi cu Lawng Captain nih a hei hmuh ve ko nain an lawng cu vur tlang lian pipi nih a vel( kulh) dih ngawt caah zan thil ah cun va fuhpanh hna nak phun si in an hngalh lo caah le khua a muih tuk fawn caah zing khawdei tik hngak ko ne ning tiin cu zaan ah cun an ih tak diam hna.

Hi lawng nih hin cun, tu kan dirhmun ah hin cun riantuan dan ding a um loh midang bawmchan kho kan si loh kan dirhmun nih a tlinh deuh rih loh tuah khoh mi zong kan ngei ve lo. Kan dirhmun nih a si lo tuk caah caan tha le remcang dang i kawl ko ne usih, tiin Missionary suport ding zongin kan chungkhat le kan khrihfabuu dirhmun nih a tlinh loh hih, ti in mi harnak a tong lio mi hna le kan mah ah ai bochan ve tuk mi hna zong bawm lo in le hi Lawng hi kan i khat ngai. Mah le dirhmun remcang tik hngak in rawngbawl le midang bawmh ai tim mi hna le krihfabuu pawl dirhmun he ai khat ngai in a lang.

Carpathia: hi Lawng hi Titanic lawng umnak in mel 58 ai hlat mi ah a um lio a si, Lawng pahnih hna nak in a hla mi ah a um mi zong a si fawn. Titanic lawng he ai hlatnak lei ah a tli cuahmah lio mi a si i, an lawng Radio nih bawmhnak a beisei mi, beidong thlalau au thawng (distress call) an theih le cangka cun. Lawng Captain cu khukbil in thla a cam hnu ah hnawhhnam ngai in a lawng cu a mer colh i, cak nawn in Titanic lawng umnak lei panh cun lawng cu a khalh. A hmun a va phak cun thihnak rili tawne nih a lemh cuahmah lio mi hna minung 705 nunnak cu a va chanh manh hna. An nih pawl hi Titanic lawng ai cit mi hna lakah nungdam in a chuak kho mi an si.

Zing khua a hung dei i, Lawng captain nih cun an vun ratnak lam cu a hun zoh than i a khuaruah a har tuk hringhran. Zan i an van tliknak lam cu Hawhra( vur) tlang ngan pipi karah cun zeitin an lawng nih cun hi hmun hi a von phak khoh timi cu a ruah awk bak a hngal lo. Ho nih dah ka lawng hi a ka khalh pi ti ah a khuaruah a har ngai ngai.

Hi lawng nih hin Titanic lawng umnak hmun a va phak ah hin thihnak tlangpar ah a dir lio mi 705 an va chanh manh hna.

Hi nih hin midang nih harsatnak an ton lio ah Pathien sinah thlacamnak he bawmchan colh tu mah nunak zawn lawng ruat lo in midang chanhtu le midang thatnak dingah a nun a siang mi hna, midang zawnruattu le mi dang caah nunnak thap ngam mi hna nun cu hi lawng nih hin a hmuhsak fawn.

Mah tlin lo nak le chuanlam nak in Pathian felnak le thatnak ai bochan mi rawngbawltu, mah le remcan lio, rumtik le thanchoh tik hnga lo i Pathian ruahnak ai hrawm mi hna cu Pathian nih a zamtak lo zia hna cu hi lawng nih hin a kan hmuhsak fawn.

Kan nih zumtu hna zong, hi Sampson le California lawng bantuk hi kan si sual lai maw? Midang nih harsatnak an ton lio ah a zamtak tu si lo in le midang zawnruahnak ngei lo i mah himbawmnak lawng a kawl tu si lo in Carpathia lawng bantukin Bawipa Pathian i bochan in midang hna zawnruatin bawmchantu si dingin Pathian nih a rak kan duh.

Salai C. Vanramdinmawi

(Tenglam)