Grave of the Fireflies'

 

Grave of the Fireflies'

Khuaruah a tam ter tuk mi hmanthlak a tangah ka hun tar mi te hi, Ralpi pahnihnak lio ah a cang mi thil a si i, US nih Japan ram Nagasaki khualipi ah kum 1945 i Atom bomb a rak thlak hnu ah a cang mi thil a si.

Hi ngakchiapa te nih hin a nau ruak cu ai puak i ruak an khanghnak hmun khuapi in a hlat ngai nak hmun ah a va kal pi. Mi ruak an khangnak hmun cu an umnak hmun in a hla ngai ngai, hmanthlak i kan hmuh bantuk khin ngakchiapa nih khi kedanh zong ai bunh loh i a naupa ruak cu puakpuan thitha hmanh si lo in hri phek pakhat in a puak mi a si.

Japan nunphung ah cun minung hi a phum in phum si lo in a duah deuh in an duah hna i cubantukin a naupa ruak cu duah a si ve khohnak kha lam hla pi tiang ruak puak bu in ke in a kal hi a si.

Hi hmanthlak a thla tu Joe O'Donnell nih a chim ningah cun "Kum 10 vuapvap a si mi ngakchiapa te khi lam kai chawhpah in ka hei hmuh. A hnu lei ah nau ai puak i, Hi lio hrawng ah hin Japan ram ah cun an nau le an puak hna i an i dai pah tawn mi ngakchia hi an um len nain hi pa te hi cu ai phundang ngai ngai. A muihmel zoh ah hi ka hmun ah hin thil biapi ngai pakhat a um ruangah a hong mi a si ti khi hmuh khoh a si. Kedanh zong ai bunh loh i a muihmai a chia tuk fawn.a naupuak mi cu a hnu lei a lu ai thlai i thu hluahmah tein ai hngilh me ko khi a lo, cu ngakchiapate cu minute 5 in minutes 10 hrawng deng teu in a dir hnu ah khin, hmai huh nak a rang mi in a hmur ai huh mi pa pakhat a hong i a naupuak hna hri cu a phoih piak i a naupuakmi cu a hlan piak i a cawi i mei cungah cun a va chiah. Cu ngakchiapate cu dengteu in mei hmai ah cun a dir i mei nih a kangh cuahmah mi a naupa ruak te cu a zoh ko. Ttah len a duh nain a ttap kho maw ai sum dek a si hnga a mitthli hna an luang nain a hmur tanglei cu fak tukin a seh nak ah a thihrim hna an chuak viar. A naupa an duahnak mei cu a Nitlak lai te bang a hong ziam ziahmah i ngakchiapa te zong nih cun hnulei chit in le daite in a kal ziahmah ve than"

Hi hmanthlak le tuanbia chirhchan hin 'Grave of the Fireflies' timi Animation Muicawl an thlak i, vuleicung Animation muicawl vialte i zoh bik mi pakhat ah ai tel. Cu muicawl le hi tuanbia nih hin mi thinlung a suk tuk hringhran anti cio. Cu 'Grave of the Fireflies' muicawl cu kan mah Laiholh te zongin an leh ve i zoh khoh in a um ve.

Ralpi nih zeitlukin dah minung cungah harnak a chuahter le a tlunter timi hi kan nih a tong ve lo mi caah cun a ruah zia thiam a har tuk lai nain hibantuk tuanbia a chimtu hmanthlak pawl thawng hin remnak nih zeibantuk thatnak dah a chuahpi i raldohnak nih zeibantuk harnak dah a chuahpi ve khoh timi bel kan i fian ve ko hnga.

Salai C Vanramdinmawi

( Tenglam)