Bhodhidharma Buddhist Puithiam khuaruahhar.

Bhodhidharma Buddhist Puithiam khuaruahhar.

Bhodhidarma cu Budhhist puithiam a si i, China ram ah Chan Buddhist zulhphung a luhpi tu a rak si, Historian pawl nih an chim ningah cun Bodhidarma hi India ram Siangpahrang fapa pathum hna lakah pakhat a si ve, nain Siangpahrang chungkhar si nak cu kal takin Buddhist puithiam ah a lut, a ngakchiat tein nidang bantukin a um lo, Siangpahrang fapa a si nain thil mansung le nuamhnak lei ah a lung a chia bal lo, mirethei le mi sifak hna cung zongah zaangfahnak le zawnruahnak a ngei, a hung tlangval i Siangpahrang fapa a si caah raltuk ning le hriamnam hman ning zong a hawi le lakah a thiam bik le a raltha bik a si. Voikhat cu mang a ngei i a mangah cun Buddhist Puithiam pakhat hi a rak hmuh cu putar nih cun, keimah hi hodang si lo in nangmah ka si, hmailei ah hibantuin na um la a rak ti. 

Siangpahrang fapa a si i nungak dawh dawh le mirum fanu nih ngeih tim in an helh len tawn Nain a nun ah cun khuaharnak le lunglennak hi a um peng, nungak ngaih lunglen le hawikawmh ding le nuamhnak a ngeih lo ruang i khuahar lunglen a si lo, a nun nih cun chiamfian khoh lo mi cahambau a ngei i, hlam mi a ngei i hlamtu a ngei ve si zongin ai ruat tawn. cuticun sau ngai a um hnu ah nikhat cu Buddhist Puithiam he an i tong i, a khuaharnak hna le lunglennak hna cu Buddhist Puithiam nih cun fiang tukin a chimh dih, cu hnu ah cun a hna a ngam i, a tuah ding mi zong a hngalh. 

Buddhist Puithiam sinah Buddhist phunglam cawng dingin a kal , a pa nih a siang lo tuk, Ka siangpahrang thutdanh hi nangmah co ding a si a ti ko bu zongah ai let duh lo, "Vawlei nuamhnak le rothil hna nih ka lung an len loh e kapa, zeihmanh ngeih lo zongah daite le nun nuam in um khoh a si ve ko" tiin a leh, cuticun Buddhist puithiam nih cun Buddhist phunglam na zulh ve ding a si ah cun na thlacamnak ding inn pakhat in vai sak a ti, a kal i a thlacamnak ding in cun sak hram a thawk, inn a sak pah cun zei hidah Buddhist duhnak cu a si ti hi ai hal pah lengmang nain ai fiang kho hlei tawn lo. 

Inn sak cu a lim i, Buddhist puithiam nih cun "Tikhan Buddhist sinak cu na theithiam cang maw" a ti, a hung i fiang i a sak mi inn cu a hrawh dih tthan, Buddhist puithiam cu ai lawm tuk, Bodhidarma nih cun "Puithiam kai fiang cang, Buddhist temple le zumhnak cu inn le hmundang maw thingkung tangah maw a um lo, keimah ah hin a um ko, keimah hi kasi ko" a ti i a ttap. cuticun Buddhist zumhnak ah a luhpi i Temple ah cun Budhhist zulhphung a cawng. 

Kum zeimawzat Puithiam rian india ram i a ttuan hnu ah China ramah tlawng dingin a hna a tla, Siangpahrang fa a si lio ah Bodhidarma hi ram tampi ah khual a tlawng cang hi holh tam ngai zong a thiam mi a si, tutan zongah hin hlan ah a rak tlawn cang nak China ram ah va kal i nun hi zeitak dah a si ti cawnpiak ding kal a duh.  cu lio cu 5TH - 6TH Century lio hrawngah a rak si. 

China ram um mi Buddhist pawl nih India ram in a kan cawnpiak tu ding Puithiam a hong ti an hngalh tikah an i lawm ngai ngai i, rokual ngai in don an i tim, cu lio hna ah cun Chinese Buddhist pawl nih hin India ram buddhist pawl cu an rak uar ngai ngai hna pinah a fim deuh le Pathian kong a hngal deuh dingah an rak ruah hna. China ram cu a phan i, Buddhist puithiam vialte nih an rak don, nain an hmuh tikah an khuaruah a har, India puithiam dang bantuk a si lo pinah ah Kedanh ai danh lo, kelawng in a kal. Biachim dingin khatthup an tthu i a holh lai ding cu daite in an rak ngaih, nain bia ka khat te hmanh a chim lo, ti lawng a din i lo diam a kal tak hna. 

Bodhidarma cu ramtangah a kal i tlang pakhat lungkua ah a va thu, cu lungkua ah cun kum kua chung a tthu i, cu kum sarih chungah cun a cawlcang lo pinah zeihmanh a ei ding lo, Culio ah cun Dazu Huike timi pa hi a rak um ve, Dazu Huike cu China Siangpahrang General raltha ngai a rak si, nain ral an dawhnak ah tamtuk a rak thah hna i an lu a rak tan hna hnu ah a pawngah a dir mi a hawipa cu a vih ve sual i, cu hnu hrim hrimah cun hriamnam tlaih ai tim ti lo, Buddhist ah lut i Puithiam si dingin ai tim, nain a lungngamnak a hmu kho lo, a mah cawnpiaktu puithiam hna nih an hrilhfiah kho lo, zaankhat cu mang a manh i a mangah nungak dawh ngai pakhat nih hin "Va kal law thlang lei ah Saveh (Rabbit) na hmuh lai, cu hnu lawngah hnangamnak tling na ngeih lai" a rak ti , cu kong cu amah cawnpiaktu Puithiam a chimh tikah "Na kal hrim hrim awk a si" an rak ti i an kal ter. 

Sau ngai a kal hnu ah mipi biaruah hi a theih "Lungkua ah kum tamtuk zeihmanh ei lo in a tthu cang mi India puithiam a um timi kong an chim kha a theih, cu cu hmuh ve a duh caah cu ramtang tlang pakhat i lungkua umnak cu a kawl, a va hmuh lio cu zaan thlapa en saling lio a si, lenglei ttang in cun lungkua cu a hei bih i, Thlapa ceu nih Bodhidandarma hlimthla cu Saveh (Rabbit) lem bantukin lungpang vam ah cun a kah. cu thawk cun Dazu Huike zong cu Lungkua lengah a tthu ve, cu cu Bodhidharma lungkua a thut kum 6 le cheu nak hrawng a si cang. Dazu Huike zong cu lengah a thu i zeihmanh ei lo le ding loin a tthu ve, a kum kuanak ah cun Bodhidarma cu a hung tho i lengah a hung chuak, Dazu Huike a rak thut ko cu a hmuh, Dazu Huike nih cun nangmah hi zulh kan duh nangmah nih hong ka cawnpiak a ti, culio cu vur a tlak lio a si i, Dazu Huike cu a khong dih dengmang cang i a kut lebang cu a khong i a cawl kho ti lo, Dazu Huike nih cun Bodhidarma sin i zumhtlak a si ding zia langhternak ah a kut cu a tan phah. cuticun a zultu a hung si. 

Hi bantukin kumkua leng Lungkua i a tthutnak a ruang hi Historian cheukhat nih an chim ningah nikhat cu Shaolin Temple ah a kal i cu hmunah cun an rak cohlang lo, Daite in na thut i Dharma na hmuh hlan cu kan sinah na lut kho lai lo an rak ti caah a si an ti. Shaolin Temple a um hnu lawngah hin kedanh pum zong ai denh ve, Bodhidharma nih hin thiangthunh pakhat hi ai thunh peng , cu tthiangtthunh cu thingtuai a hram in a phawi mi a si. 

Culio hrawngah cun Buddhist puithiam cu mi der tete an si i, hriamnam an hman khoh ve lo ruangah mifir le damiah nih an tangka an chuh pah lengmang tawn hna voikhat lebang cu an temple ah an luh hnawh hna i an tangka an fir piak dih, Lungkua in Temple ah Bodhidarma a kir zaan le mifir nih temple an luhhnawh zaan cu ai khat ngelcel, suamhmang pawl cu Budhidan dharma nih a thlauh hna i an duh lo caah a vuak len hna, nain namte in an sawh i a tluk hnu ah mei in an duah chih, nain an kaltak i Temple i an luh hnu ah cun a chungah Bodhidarma cu nungdam in a rak tthu ko, Misual pawl zong nih an khuaruah a har tuk caah Bhodidarma zultu ah an i cang dih.

Cu Buddhist Temple cu a min ah Shaolin tiin an auh i, China ram Buddhist temple lakah a ngan bik le a headquarter a si ve. cu hnu cun Bodhidharma nih cun Taksa tthawnter nak le mah le mah i vennak ding ah zingfatin taksa a sawizawi pi hna, Kungfu a cawnpiak hna, cucu Shaolin Kungfu a hram ai thawknak a hung si, Bodhidharma nih hin Kungfu lawng si lo in Sii siamnak lei zongah tampi a cawnpiak hna i an umnak pawngkam ram i rai a tlun lio zongah hin Bodhidharma nih hin Thinghnah le hram in Sii tuahto ning kha a chim in a cawnpiak dih hna i Buddhist Puithiam cu Thlarau lei lawng si loin vawlei lei Doctor zongah a chuah dih hna i, Mi tampi nih Buddhist zumhnak ah an hung luh phah. 

Bodhidharma cu Sii lei thiam, Kungfu cawnpiaktu, Thlarau lei mithiam, a si pinah cawlcang lo in a mit in mi a control khoh fawn hna, Thli zong a hman khoh i, a cawlcangh pahin thli hna zong an cawlcang kho. Chinese movie a zoh i Shaolin Kungfu an hman caan ah an taksa tong lo in a kut an tuai i fakpi in mi an tengh hna bantuk khi a si. 

Bodhidarma cu kum 180 a dam, cheukhat Historian nih cun Kum 150 deuh a si anti. A thih hnu ah hin Ambassador Sòngyún of northern Wei nih voikhat cu a hmuh tthan, Ambassador Sòngyún of northern Wei cu Shaolin Temple vehvat dingin a tlawng a kal pah ah cun Bodhidharma cu a hmuh a thih le thih lo a hngal lo, Puithiam khawika lei ah na kal lai, nan Temple hong zoh dingin ka ra a ti, Bodhidharma nih cun kan umnak ka tlung cang lai e a ti, Ambassador Sòngyún of northern Wei nih a hmuh lio ah hin a thiangthun parah a kedanh kawp khat lawng ai thlai i kelawngin a kal. 

Ambassador Sòngyún of northern Wei nih Shaolin Temple a va phak ah cun an hotupa Bodhidharma he lam ah an i tonnak kong cu a chimh hna, nain an khuaruah a har hringhran Bodhidharma cu a thihnak kum 3 a si cang e, an rak ti. Ambassador Sòngyún of northern Wei nih ka hmuh tak tak ko a ti ve caah a ruak kuang cu a awn tthan i, a ruak kuang chungah cun a kedanh kawp khat lawng a rak um. An khuaruah a har hringhran i a thih tak tak le tak tak lo hi History ah hmuh ding a um lo. 

India ram ah a kir tthan le than lo hngalh a si lo i, a dam maw a thi timi zong hngalh a si lo, Buddhist zumhnak ah cun minung hi thilnungah ah kan chhuak tthan an ti i, Bodhidharma zong hi minung a si hlan a nunnak hmasa ah cun Saveh (Rabbit) a si ko rua tiah an ruah. Minung a si chungah biafim tampi a cawnpiak hna i Buddhist cawnpiaknak ah hngalh thai ding tam ngai cu a bia le a nunning hna hi an si, China ram i Chan Buddhist cawnpaiknak chuahpitu a si i, a thih lai ah khan a mah hung changtu a aiawhtu dingah Dazu Huike  a chiah ta.

Tu hnu zongah India le China Film a tuahtu tampi nih Bodhidarma tuanbia amah he pehpar Movie tam ngai an chuah i zoh duh bik le uar bikbik an si tawn.