I Can't Quit Drinking (Zu ka thlah kho ti lo)

I Can't Quit Drinking (Zu ka thlah kho ti lo)

Ka dawng le zong ka cungah an hnabei a dong cang, Kanu le Pa nih "Ka fa zu cu ding ti hlah, na thi la cang hih, na fanu ngeihchun zawn tal hi ruat hme, a vawlei pumpi na si ve hi, na chung chuak fa hmanh nih dawh an ttih cang hi, a hlan ah cun hibantukin na um bal lo kha, na nu le pa kan i uanthlar nak kan in zothla ve tuk mi pei na si tawn kha, lungcan i pe law liamcia caan hna cu philh cang ko law, na fanu hrang tal ah hin na nun hi thleng cang tuah" tiah an ka nawl caan zong a tam cang.

Si e, Fanu fangkhat te ka ngei ve, zu lawng din tak in zohkhenh lo le ngakttah buangro te bang tlawnter hrat cu, keimah a ka tlaihchannak pakhat hmanh a um lo, a pi le pu cu "Ka nu le ka pa" tiin a auh hna i, inn ka hlam caan hmanh ah a ka ttih i a ka zaam tak, a nini le nih an dawt i an mah chungchuak fa bang an zohkhenh. Sawn lengmang in inn ka hlam caan ah hin cun ihnak khaan lei i a luh diam caan a tlawm lo, Siang ka kai tak caan le khual ka um a tam deuh caah khua ka tlun caan hmanh ah khin midang pi bantukin a ka zoh i, a ka hngal ballo ko mi khi a lo, cu chinchap ah zuu ka hei din hnu ka rit pah caan lebang ah cun a naih te a ka naih ngam tawn lo. A pu le A pi nih Sianginn an kai ter ve i, Tangkhat a kai ve cuahmah lio a si. 

Ka zuu rit thaizing zingka ka lu a fah tuk pah i khua ka hun ruah tungmang caan ah hin cun ka nu le pa bia cu ka ruahnak ah a um peng tawn, Ka fanu hi a zawn ka ruah tak tak a hau, rian fakpi in ka ttuan i catang sang pi tiang ka kai ter a hau, keimah ka thih chinchap lengbang ah cun Pasal a ngeih tik Sianghleiruun a kai ve tik zongah hawi hngar tukin a um sual lai ti tiang hna zong ka ruah phanh ve ko, Ka fanu ka ruah hin keimah nakin a tthawng deuh le a tuarchel deuh tukin ka hmuh, kan ton mi ai khat veve cio ko, keimah nak hmanh in a can a chia deuh nain a nih cu tuarzia a thiam i keimah bantukin a um lo, nain hibantuk lengmang in ka um tak lan a si ah cun a nih zong nungak a hung theih tikah lam a pial ve sual kho zong a si ve. 

Khua hun ruah tungmang ah hin cun ka tthat caan le ka fel caan zuuding sa ei lo in YLA khuatlang caah rian ka rak ttuan ve tawn caan hna kha ka ngai tawn, nain lam ka pial nak cu a sauh tuk cang caah keimah in cun kir tthan kho ding kasi tilo, Zuu cu ka ding a si sawh tilo i zuu nih cun a ka din cang i, ka pumsa pakhat bantuk a si cang. A hlanah cun cathiam mifim si ka duh i kan Lairam le Laimiphun caah thil tha pakhat tal tuah kai tim zungzal kan ram dirhmun thleng tu le siamttha tu si kai tim tawn i, ka tum zong a rak ruh ve ngai ko, Zuu ngawlvei kasi ding le mihrut bantukin khawlak ka vah lai ding hi ka mang hmanh ah ka manh bal lo pinah a timh hrim ka rak i tim lo, nain Nu pakhat nih ka nun cu a hrawh kan ti lai maw, Nu pakhat ruangah ka nun cu ka hrawh kanti lai dek.

YLA hruaitu hna ka rak si ve lio ah cun Zuu siamnak hmun hna kan rak kawl i kan rak hrawh tawn, zuu nih hin kan khuatlangah buainak a chuahter i nunau hnangam in an um ngam lo, Kan Lai Miphun hi zuu nih a hrawh sual lai ka rak phang tawn, kan mino hawi hna zuu nih cathiam lo le mihrut ah a chuah hna lai kan rak ttih tawn, zanttim khuamawt tiang kan duty i zuu kan rak dap tawn, kan tlaih i kan thlet i zuu zuar hna zong kan khuachungin kan rak tthawl dawi ve tawn tak ko hna khah.

Zuu tuahnak sivai hna kan hrawh i kan tlaih tawn ko, kan khuachung zuuri buainak tuah mi hna zong kan rak tuk len ve cang ko hna, Zuu tuahnak cu hrawh khoh a si i, zuu zong thlet khoh a si i, zuu zuar zong chuahter khoh an si ko, nain cu thil vialte hna cu keimah bantuk mihrut minga Nu pakhat ruangah a kekkuai dih cang mi caah cun thil si kho lo mi bantuk ah an cang dih cang, Zuu ka huatnak vialte hna cu Thlarau thianghilm tello in thlen a si i, zuu a duh bikah a chuak. 

They could quit making whiskey

They could stop stomping grapes

It wasn't for fools like me

With hearts that break

Beer tuahnak hmunhma hna zong khar piak khoh an si i, zuu din nak Bar hna zong khar piak khoh an si ko, Lairam zongah zuu khap a si i, Zuu zuar hna zong nih a thlithup in an zuar i a thlite in an tuah ve hi mu, Kan Lai Khuatlang nunah zuu cu kan ral a si bantukin Zuu a umnak hmun paoh cu kan caah hell ram a si i, kan doh zungzal bantukin kan hmuh i kan hngalh ah cun hrawh lengmang a si ko, khua cheukhat lebang ah cun zuu um lonak khua ah phuan an si i, Zuu cu an hlauh dih ko, Nain kha Nu nih ka thinlung ah hmape a chiah mi hi cu hlauh khoh le thlau khoh a si lo, cu Thinlung hmape cu a caam lan i, hrawh khoh lo le philh khoh tilo ding mi Hmape ah an cang lan. 

They could close all the breweries

And they could look up the bars

If it wasn't for women like you

Who leaves loving scars

Kei cu hawi theih le khuatlang mithmuh ah zuu ngawlvei ka si cang ko, zuu a pe kho mi paoh nih an lawmhter khoh mi pa ah ka cang i, ka rak doh zungzal mi zuu nih cun dai te in a ka ei ral cuahmah, zuu doh cu chim lo zuu lo cun ka nung kho ti ne loh, Ka Nu le Pa ka ruah khiarmar caan le kanu kong ka ruah caan ah hin cun zuu hi ding ti lo a hlan ah ka nun mi nih an upat i hruaitu tha tiin an zulh tawn mi le a nawl an ngaih tawn mi nun tthingah khan kir tthan ka duh caan a tam ve ko, Pathian sin zong ah a thli in ttap hluahmah bu he zuu ka thlah khoh nak hnga thla ka caam caan hi a tlawm ve lo pei ti, Zuu thlah ka duh zia cu Pathian zong nih khin a hngalh ko.

Mah lawngin hi ka pil thuk tuk cang nak khur chung hin ka chuak kho ti lo, kai timh nak a fah paoh ah ka tei khoh lo nak a fak ve, cu caah hi nun hi keimah hmanh nih nuam kati lo i a ka simh cang, a hlan ah khan cun lunglen hnem le nuam saphul duh ah ka rak din tawn nain tu ah cun kha bantuk kha a si kho ti lo, Hi nunnak hremhmun hi chuahtak law law ka duh caah ka din caan a tam deuh cang, zuu cu din law law i ka khuaruahnak hna nih hi ka pumsa hi an chuahtak ka duh deuh cang. Hi Vawlei ah hin zuu he i ciah lengmang nak cun zuu din law law i chuahtak tuan law law khi pei ka duh cang cu. 

And I can't quit drinking

Lord knows I've tried

I'm gonna wear this whiskey glass stare

Till my memories go blind

Zuu cu ka ding thluahmah ko i, mah hngal lo tiang in khawlakah ka farle nih an ka lak caan zong a tlawm ti lo, cerhcet le leicar hmanh ka thleidan thiam lo hnu, caw ek le hramh hring hmanh ka thliahran khoh lo hnu ah khin cun zeitlukin dah ka thinlung nih a duh nain ka taksa nih a kal tak khoh lo khi cu a fiang ko, a ka dawtu ka hawikawm cheukhat le ka chungle nih cun "Na thi la cang hih na taksa der kingkiang te in na ruh lawng a tang cang hih" tiin duhsaknak bia an ka chimh caan zong a tam. 

Ka vawlei nun cu ka taksa a thih hlan pi ah khan kha Nu nih a kan kaltak lio ah khan pei a rak thih diam cang cu, Vanram ah khin ka hrangah hmun a um ve i, ka hnangamnak ding varal ram ah khin kai dinh ve nak ding rilikam dawh ngai hna a um ve ah cun cu hmun cu phak ve ka duh tawn ko, Vanram luhnak kawtka hi pakhat lawng hna a um lo, Mifel le mi ttha hna lawng luhnak pakhat lawng si lo in, Vanram kutka pahnih kan mih misual le mittha lo hna luhnak ding hna pakhat dang a um ve a si ah cun nikhat khat ah cun cu hmun cu ka phan ve te ko lai.

Now I can't quit drinking

And it will kill me they say

And if Heaven's sweet shores

Has swinging doors

I'll find it someday

Ka nunkhua hi ka ruat tthan tawn, ka caan liamcia vialte hna kha ka ruah than zawn hrim zongah ah hin ka theithiam kho tawn lo, Vawlei cung Nu nuai zatel lakah kha Nu fangkhat te nih khan hitlukhin ka nun ah sullam a ngeih khoh i, zeitlukin dah ka nun hi a lehthal khawh hnga? Ka nunah Vawlei thar a ser i ka nun i a um bal mi hlimnak le lawmnak hna a ka hmuhter in a ka teh ter, chikhat cu ka nun hi vawlei vanram ah a ser i, kai ruahchan bal lo mi fanu dawhte amah bantukin a mitau ai dawh mi a ka hrin piak, kan fanu chuah zan, ka chung chuak hmasa bik a ka hrin piak zaan, ka Nu le Ka Pa caah tu hmasa bik a chuah zaan i kan chungkhar kan i nuam zia le chim len kan cim lo zia hna kha.

Cu bantukin hlimnak le lawmhnak a tlunh tu a si bantukin a um lo hnu le a kan kal tak hnu ah cun kan chungkhar ah ttahnak tlunhtu le a kan pek mi hlimnak le lawmhnak vialte voikhat hmanh hmu nolh than kho ti lo dingin a kan tuahtu zong a si kho than thiamthiam. Zuu doh tu kha Zuu dingtu ah a hung cang i, fapa fel le fapa zothla ding a gei tu Nu le Pa kha Fapa ngawlvei ngeitu ah an cang kho. a kan kal tak hnu ah voikhat hmanh chungkua buaibai lo in kan um bal tilo.

Nu le zuu hi i khah nak zawn te an ngei ve na duh bik le na hlam bik an si i na herh bik mi thil i an i can cang hnu ah cun na thlah kho ti hna lai lo, na ri peng hna lai i dong lo cat lo in na hlam tthan lengmang cang hna lai, an um tilo hnu zongah na kawl tthan lengmang hna lai i ningzah le thlachiat hmanh kan ruat kho tawn lai lo. Na herh bik mi na nunnak tlukin na duh cang hna ah cun zeitlukin fahnak pe tu le na thih phah nak ding an si na hngalh ko zongah kan hlam than thiamthiam ko hna. 

You know I thought it all over

And I still don't understand

With millions of women

How could one mean so much to a man

Women and whiskey they're so much alike

'Cause just when you need 'em the most

You're left high and dry

Cu hmunah cun tthennak a um ti lo i, cu hmun cu kan lungduh zamual liamcia mi hna lennak hmun a si ti hi Sabbath School i a kan cawnpiaktu hna nih an rak kan chimh bal. Vanram ah khin ka hrangah hmun a um ve i, ka hnangamnak ding varal ram ah khin kai dinh ve nak ding rilikam dawh ngai hna a um ve ah cun cu hmun cu phak ve ka duh tawn ko, Vanram luhnak kawtka hi pakhat lawng hna a um lo, Mifel le mi ttha hna lawng luhnak pakhat lawng si lo in, Vanram kutka pahnih kan mih misual le mittha lo hna luhnak ding hna pakhat dang a um ve a si ah cun nikhat khat ah cun cu hmun cu ka phan ve te ko lai. Cu hmun ah cun kan i tong than lai ka lunglennak le ngaihnak vialte hi vawlei ah zuu hmangin kai hnemh tawnnak hna hi ka philh khoh lai i cu hmun ah cun amah nih a bianem te le a mitau dawh rilrel te khan a ka hnemh cang lai. cu hmun ah cun kan i tong tthan lai. ka hngahhlang ko cang.

Yes if Heaven's sweet shores

Has swinging doors

I'll find it someday

Salai C. Vanramdinmawi

(Tenglam)