Ei sian lo mi thei kan ei zaan ah : Thlakhat chung lawng kha Zungzal caah

Ei sian lo mi thei kan ei zaan ah : Thlakhat chung lawng kha Zungzal caah

( Love is hurt and it last)

Tuzan cu rian a tlawm i awidang ka bat deuh fawn caah muihka in ka mit a ku tuante in ihkhun ka panh i ka zau Earphone in hla ka ngai i ka hngalh manh hlan ah ka rak I hngilh ka mangah langhnak ka hmuh lai te ah khin ka Phone Ringtone nih a hun ka thang i hmawhcarau in ka Phone ka dah ka mit tak tak hmanh kai au huam lo, ka kut nih Phone a tongh in a hun Call tu number cu ka zoh i ka amin ka khumh lo mi Number in a si, ka lak i “Hello” kati ah khin, Nu awnem chialmal te ai phurhung ngai aw mi bantuk aw in “Ziah hen Inbox na zoh khawh lo, na inboz rak kau ta a hung kati” zeidang chim ve lo cun “Elawh” ka hei ti ka chiah colh.

Ka ih nak cu kai remh i WhatsApp Inbox cu ka pakhat hnu pakhat ka zoh hna, a hmasabikah Phongpi.com ca pawl ka rel hnu khin “Tuzan cu  a zai mi le ai elhnial mi an um lem loh hih” tiin a dang cakuat ah kai thial, a hnu bik a pahnihnak ah a min ka khmuh lo mi number te cu ka kau, cu chungah cun hitin “Na chuahcam kan lawmhpi, na dam lio hna a si maw, caan hi a zuan bakin an zuang” tiah muika Suimilam 6:23 pm ah khan cakuat a rak lut, “Kai lawm tuk ngamsam, Ka hawi le tak tak hmanh nih an hngalh lo lio ah ka chuahcam na ka lawmhpi caah kai lawm, ka dam lio zong a si ko e, Nang the na damlio a si maw” tiah ho a si ka hngal lo nain a hngal mi bantukin a cakuat cu ka leh.

“Caan tawite lawng na sin ah ka um I, tlawmte lawng kan hngalh nain, caan saupi na nguh i zungzal in kan cinken peng rih ko, ni fatin hin, a damtha hnga maw, nihin zei thla a tuah ve hnga, a mah nih khan teh a ka hngal peng ve rih hnga maw” tiin ka ruat tawn, na konglam ka hngalh mi chun cu pakhat hmanh philh loin kai cinken peng ko rih hna, Philh cu na fawi ve lo” tiah a hnu cakuat nih a hun zulh than. Ho hen a si hnga ti cu ka ruat colh, Ka ngaihzong hlun pakhat khat cu a si ko lai hih, a si lo ah ka hawittha ngai pakhat cu a si lai. A van ka chonh nak aw cu ka hnathlam chungin ka ngai than nain a hmawcarau in ka chonh mi a si caah fiangtukin ka hngal kho tilo. A WhatsApp DP hna cu ka zoh, nain Animation a hman caah ho a si ka hngal kho lo, nain a hngallo mi bantukin um cu ka ngamh ve lo.

“Sireng tih, caan hi kan ngakchiat lio cun a sau tuk kan rak ti nain kan hun upa deuh deuh tikah caan a rak tawi tuk ning hi kan i fiang deuh deuh, kei zong nih kan hlam ve tawn” ka hei ti top.  “Ka Inbox na ka leh tlai nak hi na hawile he nan umtti lio hna a rak si sual la, awi dang hna ah kan I chon than te lai caan nih a kan pek ah cun mu, nuamtein hmang, Chuahcam lawmhpinak ah a hnuhnung bik kan I thlak ti mi hmanthlak hi kan kuat, a liamcia mi caan hna thar than she ti duhnak silo in, Hi hmanthlak hi na ngei ve lo in ka hngal ca tu ah a si” tiah a bia a donghter, cun hmanthlak cu a hong lut.

A cakuat ka rel dih le cangka in hmanthlak cu ka download colh ve, Ka download thlu hnu in fiang deuh in ka hun zoh than tikah ka lau, kan mui cu a lang lo veve nain Leithuan kam ah ka liang ai hngauh i nelrawn pinlei tlangkam ah a liam ding ninutleu kan cuanh lio te a si, ka khuaruah tiang khin a har lei a si i, kumtam zaanmang hmanh ah ka manh tilo mi le chikhat ka philh tawn theu mi, caan tawite tak tak ka rak hruh pimi, nain nun sullam taktak ka rak the pi ve mi a si.

 

Kum 2013 khan a si, Dipa thla Khuasik rim nih tlangkip le mual kip a cul cuahmah cang Veng cheukhat ah cun Christmas hla hmanh an sa cang hna, Aizawl pawngkam tlangthluan ah Phaizawng par le Tlangsam par tete nih Jesuh chuahcam cu an rak don ve cio hhna, Kan nih zong Sianghleiruun khar a naih cang caah mah khua cio i tlun kan I ngaih tuk cio hna, Nain kan hawipa te an khua ah Christmas dong ding an si caah a nu le pa nih “Na hawi le von tlunpi hna an sti fawn caah kan nih Roommates cu kan hawipa le te khua ah Christmas hmang ding kan si cang, Kan room ah hin Pathum kan um i ka hawi le pahnih hi Serchhip le Champhai khuami an si, Tu Christmas kan hman nak ding hi Champhai khua ah a si.

Kan hawi pathum cun Champhai panh cun kan kal hna, Champhai khuami kan hawipa a chim tam bik mi cu, Kan khua ah cun Vai Sumdawng an um rei kho lo ti hna, Leithuan kau tak tak a um i Khuasik thla ah cun Hawhra/Vur a tla tawn hei ti deuh hna khi an si, Nungak muidawh the an um maw ti kan hal ah cun  “An tor” ti cu a kan lehnak aw dawh a si. An ttawk le an hnuk the a ngan maw ti kan halnak cu, “Nanmah nih nan fianh te lai” ti in a kan leh.

Champhai khua kan phak ah cun a nu le pa le a pi le pu hna zong mittha an si caah an fapa bantukin an kan zoh an kan dawt chuachuah kanmah zong mah inn tlun in kan tlung i kan hna ngam in kan tlei ve ngai ko, Leithuan kaupi an ngei i a pawngah Ngakhan (Dil) nganpi an ngei rih Ngatlaih ko cu nuam kan ti nain Khuasik ah cun a kih ning hi a ving tak tak ve. Gypsy a hlun ngai cang mi le rawhnak a ngei lem rih lo mi hi an ngei i cu cu tlawnlennak bikah kan hman, a caan ah Pumpulh kan chuih, a caan i nuamhnak ah kan kal. Champhai kan caan cu a nuam ve ko kan mah te cun. Kan hawipa cu mi kawmh thiam le mi nunfel a si caah hawikawm zong an tam in kan nih ca zongah kan hawikawm an si colh ve hna.

Ka hawipa le inn pawngte ah hin Unau pathum an um i an dihlakin Nu an si, an lak a upa bik cu Champhai College ah a kal lio mi a si ve i, Amii tiah an auh. Ka voikhat hmuhnak in ka mit a lak colh “A ttok le a hnuk “ nih si lo, a mitau le a cawlcangh nih ka lung a tei,  kan I hung thei fiang deuh deuh hna i cheukhat nih cun Pathian Thluachuahnak hmanh an ti men ko hnga, a hna ka rak tlak ve caah Champhai khuakik ah keimah lawngin cun ka hmang ve lo, a phusa lum nih a ka lumh ve lai. A mitau piang rilrel tein a ka zoh i hmaisen buin a lu a suk zaan ah khan cun kai lawmhnak ah a zuang kho cu si ning law Thlapa tiang talk hi cu ka zuang hnga. “Ka vai lawm da” kati lio ah, a hun ka zoh i a mirh simsiam pah i a ha tian rem hna a hun langh than lebang ah cun chikhat kha cun Vawlei cungah Champhai nungak ai dawh bik, cu hmanh cu keimah ta kati ve ko rua.

Biakinn ah pumh caan tilo ah cun Innchung pumh ah cun kan nih hawi rual cu kan I puum tuk lem lo,  Inn lei ah rianttuan ding cu mah rian ttuan in kan ttuan i, rian ttuan kan lim paoh ah kan leng tawn, kan len lo hmanh ah innpa hna inn nih a ka hip nak a fak tuk tawn. A nu le pa zong an ruahnak a kau i Lushai nih Zozia an ti mi tak tak khi a si i an mi cohlan le zoh ning khi a kau ngai.

Christmas urlawk zaan ah cun zaikhawmhnak ah kan i puum ve hna nain, zikhawm a dih in Nu le pa deuh lawng an tang hna,  kan nih hawirual zong Ar kang in kan tlau diam cang, Coka lei ah an buai lulh lio ah cheukhat cu Mileng khan ah biasawng an tlorh hna, Kanu nih Phone in a hong ka chonh i an hnacheh deuh caah  inncung lei ah ka kai tak hna i Varanda thutnak ah ka thu  i Kanu he cun kan in chawn, “Nai nuam maw, na tlam a tling maw, tangka hna na chambau maw,” ti hna a ka hal hnu ah, “Na nau le nih an in ngai tuk le hi, kan nih zong innpa hna he chang kan kang ve le kan I nuam ve ngai” ti hna sau el kan I chonh hnu khin, Mi khualkhua ah a um mi hna kan si caah zuu hna ding lo ding le midang he buaibainak tuah lo dingin a hung ka chimh hnu ah Phone cu kan chiah.

Phone ka chonh thlu hnu ah cun inntangah ttum loin ka tthu rih, thlithiang ka dawp a kik ngai mi thlizil tete nih an hung hrang i Phongtlang thlithiang hna a ka hlam ter, Sangau ka hawi le hi zeitin an hman ve hnga ti hna ka ruat, Laiholh chonh ding hohmanh an um lo caah Laiholh hna ka ngai, chikhat cu ka thlavai a hung kiang ta. Cubantukin keimah lawng ka thut lio ah cun Amii cu a hong hi “Thil tha lo a um mawzei, nangmah telawng cun na thut, na hong kir bal ti loh le”tiah Kawtka hram in a hong ka chonh, “Zeihmang si lo, Kanu he kan I chon le si, hun ttum kai timh lio te a si “ ka hei ti ve. Ka pawngah a hung thu i, “a kih kih he na kut hna a kik viar cang hi” tiin a puan a hung ka zonh pah khin, ka kut cu a hum i a thaw lum in ka kut cu a chem.. cu khawh cun ka kuh i ka ttangah a bek.

“Nangmah lawng daitein na thut lio ah khan zeidah na ruah” a kati, ka ni i , “Zeihmanh ka ruat lo, ka thu sawsawh i siko” ka heiti ve. “Ka chim ve ko, nakhuaruah mi tiangin theih ka duh, theihfian chin chin kan duh, ka duhning lebang cun na thinlung khi kau i bih ka duh” a ti, ka nii than, hi nu te hi cu ka theihfian deuh deuh duh a nung deuh deuh ve, “Cuti hna cun na ka thah hmasak pei a hau cu, theih chap ding ka um lo, hiti hi ka si ko. Mi bik si nak maw zeihmanh keimah ah midang he kan I dan nak a um lo, Minung pakhat sawsawh ka si ve ko” ka hei ti ve.

Piang tein a ka zoh, a mitau hna cu Champhai khuasik zaan ah Crystal lung bantukin an pau, Nelrawn thlikik nih a chem a chem mi a hmur te cu Nippon theite a hmin mi bantukin a sen, zeihmanh dawntu um lo hrat cu ka dawp, rial bang zop kho sisehlaw Second pakhat hmanh tling lo ah ka dawp thlu hnga nain, a ral khoh lo caah ka dawp than lengmang, Kan lei le lei cu um sawsawh loin an i sawlh, Fuurpi tialian lio ah Tio le Bawinu Tipi an i ton lio bantukin a cung deuh si an i cuh. Kha caan lio te kha cu zei he hmanh thlen kan siang hnga lo ve in.

Cu zaan ah cun Eden dum ah Pathian nih lawh a sian lo mi Eden dum laifang ah a um mi thei ka lawh zaan a si, Adam nih Pathian sinah “ Duum chung i nai chawh thawng ka theih i taklawng kasi caah ka thin a phang, cucaah kai thup” a ti lio bantukin. Mi nih an kan theih lai ti phang lengmang bu in ei sian lo mi thei kan ei zaan, kan voikhatnak a si veve caah fahnak le nuamhnak ai cawh, phannak le lawmhnak he. Dawtnak hawrkuang chungah kan tla pakhat hmanh hrelh loin kan i dap, Vun le vun an i nawt i tisa le tisa cu.

Cu zaan thawk lebang cun minute pakhat kan i hmuh lo hmanh ah kan i ngai, kan  i hmuh caan ah le kan i phuhrung kan ning a zak kan mitah kan i zoh ngam lo, nihnih thum hrawng kah cu. Kan ipehtlaihnak cu a fek chin chin i kan I duhnak nih van khi a phanh. Champhai khua cu Amii thawngin a hlan nakin ai dawh chin in ka hmuh i caan hna a voikhatnak si dingin a tawi tuk ka ti ve. Christmas hi kumkhat ah voikhat lawng um loin Kumkhat ah a nip eh thluahmah in Voi 10 deuh hna um sehlaw ka duh.  

Cuticun kan I ruah lo kar le kan thinlung ai manh hlan ah Sianghleiruun kai zong a hung cu tthan cang, ton caan a chuah bangin tthennak caan zong a hung chuak, Sianghleiruun kainak khat lo hrat cu thenlo nih le a tha fawn lo, kan pahnih caah fimcawnnak kan cawn i eikawlnak kan dap  ahau, Sianlonak nih tampi um hmanh she kan sining le caan nih a kan pe ve fawm lo cuteh, zeiti awk tha ton than caan nih chuak than hram sehlaw ti saduhthahnak nganpi he the a si ne ko lo ah.

Champhai kan chuahtak lai zaan cu Furr caan a si lo nain khuakhi dur ngang sehlaw a lo, van ah Arfi le ninu hna an lang nain Amii muihmai ah a pau kho hngin lo, cubantukin kei zong, chim ding hngal loin an inn Varanda ah kan thu ko, zeihmanh chim loin kan tthutnak a sau cang, a nu le pa hna zong an it cang hawikawm dang hna zong an mah le an inn cio ah an ttin cang hna, “Kei cu har ka ti tuk, hibantukin tthennnak caan a chuak lai i a har tuk te lai ti rak hngal cia ning law, kan duhnak kha ka rak thuh hnga” tiah thir lengmang in Amii a holh mi nih ka ruahnak a hninh, Pa tukin le lungkhong tukin kai ruah ve nak vialte hna kha zeihmanh lo ah a chuah, Ka kuh i ka reh a cal ah fakpi in ka hnamh. “Kan thisa cu i then hmanhseh kan thinlung cu hmunkhat ah um lai nai fiang maw, Tu kan i tthennak hi a hnu kan i ton tthan khohnak ding caah a si lai, Chaklei in ni a chuah than bantuk khin ton tthan caan zong a chuak than lai. Cu tikah cun kan hmunkhat ah kan um lan lai” tiah ka thinlung dihlakin ka chim ve.

Ka ttangah a bek i, a caan ah a hung ka hnamh pah tawn, kan kut cu fek tein an i tlai i, an I rem hringhran. “Zing na thawhka in ca na ka kuat lai, cun zaan na ih lai zongah, cu lawng hmanh a za lo, rawl na ei lai, Class na kal lai, Class na ban hnu, hawi he nan vah lai, zei na tuah lai paoh ah na hung ka chimh hmasak lai, zei na tuah paoh ah khawi na kal paoh ah theih ve peng ka duh, Suimilam pakhat chung hmanh nangmah kong thei lo cun ka um kho lai lo, cu cu na tuah lain a chim hnu lawngah lungdam in kan thlah khoh lai” tiah a hung chim than. Cubantukin ka tuah lai nak kong cu ka chimh ve.

Suimilam 12 a rin ah khin ka ttin tak. Ka lawi hnu ihkun cung ka ih hnu zongah cun ka khuaruah a fah tuk caah kai hngilh kho thai lo, Zingni a hung chuak i, Zingnichuak ai dawhlo bik ni a si hrim ko, Champhai khua ai dawh bik le ka sianlo bik ni zong. Motor cung kan cuan i kan kal hlan tiang a um ve a unau le hawikawm rual he.

Thlakhat chung lawng Amii he khan caan kan hmangtti kho nain zungzalin an hmun lan cang lai, nain kan I dawtnak nih Van a phanh ka ti cang bang khan Khuazing nih a kan thik maw si hnga kan caah a tha deuhin khua a khan hnga dek, Aizawl ka phak than hnu in Ka Phoen cu thlau kaw,a thar cawknak ngei colh fawn he Thlahnih chung cu Amii he kan i chonh kho lo, Phone thar ka hun i cawk khoh hnu ah sile Facebook le adang Number hna zong zeihmanh ka ngei kho ti fawn lo, Test le Sianghleiruun thil tete ah kan buai ve pah fawn lengmang caah i chonhbiak nolh a um thai kho tilo. Ka Phone a rawh hnu ah Ka roommate Phone in voikhat cu kan i chawn than nain, Kan room an kan thial caah Roomkhat ah kan um fawn tilo he, Department ai khah lo fawn he, Amii he kan I pehtlaihnak cu a cat ti khoh a si ko.

Cu cu kum 2013 nih tuanbia a ka chiah mi cu a si. Hi kong vialte pakhat hnu pakhat ka ruah than hnu ah,  Phone in Amii cu ka hei chonh than, sau hmanh a rin hlanah a hun lak colh hngap. Aizawl ka phak hnu in thil a can ning vialte le keimah palh a si nak vialte hna cu ka hei chimh than, Kum 2019 cu si fawn cang kaw Kum 6 nak a si cang. Ka Phone Number cu ka Roommate hlun sin in a rak ngeihnak kong cu a ka chimh. Kan konglam hna kan i hal, NEHU ah University tiang a peh ve than i 2018 ah khan Post Graduate a si ve nak kong hna, tu ah cun Aizawl office pakhat ah a ttuan ve cang kong hna a hung ka chimh, kha kum ruk chung vialte ah khan zaankhat hmanh keimah kong ruat loin ai hngilh ballo nak kong hna, nitin keimah hngalhchuak loin a um ballo nak kong han zong. Nupi ngei cang ding in le fa hna zong ngei cang in chungkhar ngei cang dingah a ka ruah cang nak kong hna cu a chim.

“Nain tuah cun Van nih khin caah tuanbia dang a ttial cang, tu cun kei zong lamdang ka pial cang i ka konglam tlingtein ka chimh dih hnu zongah a ka cohlang kho tu, kan philh kho lo ti a hngalh ko bu ah a ka daw chih kho tu ka ton i, Engage kan si cang caah zeitikah thitumhnak kan tuah lai kai fiang rih lo nain, hihi ka Pasal dingah Pathian ruat a si ko rua tiah ka ruah” ti a ka chimh mi nih chikhat cun namte in a ka chunh nain, a tuarnak a chim mi vialte ka theih hnu cun kei cu hrem phu ka si kati i , lawmhpi dah tilo zeidah tuah khawhmi ka neih ti.

A thaizingah Aizawl panh in kal hnawh ninglaw ka sinah a kir than colh lai ti cu a biachim in ka tlaih ko, Dawtnak nih a vuak i a nun a thlen mi zumhnak ngei kho tilo tiangin a tuah mi sinah ka kir ah cun a ka cohlan than ko lai, nain tu cun cu a hranak le a tuarchung vialte ah theihthiamnak he a hnemtu pa a ngei ko, vai rawlh ve nolh kha a fair lo tukin ka hngalh caah , kan lawmhpi ti dah lo.

Cuticun Tuanbia hlun hna cu ca lawngin tial than khoh an si.

Salai C. Vanramdinmawi

(Tengalm)

Lawngtlai, Lairam