EASTER RISING

Kum 1916 ah khan Ireland cu England uknak tangah a um rih, Dublin khawpi cu English (United Kingdom) khuapi hna bantuk in daite le ralmuang te in a um rih ko, United Kingdom thantar Union Jack zong cozah inn hna le General Post Office inn par hna ah cun an dir ko rih i thli nih thui lengmang in a chem rih ko hna cakuat chiahnak bawm tete hna zong a sen mi zawng an hnawih i British Ralkap pawl cu khualak ah hmuh ding an um len rih ko.

            Asinain Ireland ramchungah cun Irish nunphung le holh ah i thanghnak thlipi a hrang i Irish holh hman than duhnak le a nunphung hlam than nak nih Irish cathiam hmasa hna le mi cheukhat nun ah fakpi in hmunhma an hun la, Irih holh kan tharchuah than lai kan holh kan cawng than lai i kan thiam than lai timi bia an i tlaih hibantuk thanghnak hi The Gaelic League, The GAA le The Gaelic Revival. hna an si i, UB Yats te hna cu hi miphun nunphung thanghtharnak Cultural Revolution ah hin thazaang a chuak bik mi hna an si. Ireland ramchung mi zaapi thinlungah cun Ireland hi United Kingdom ramthen pakhat lawng si lo in, nunphung, holh le ram a dang te in a ngei ve mi kan si ko timi lungput an hung ngei. cu a si caah mi tam deuh nih cun United Kingdom ramchung i kan um ko bu zongah hin mahte in khuakhan lairelnak le phunglam i ser khoh nak kan ngeih awk a si ko timi ruahnak a hong chuak.

            Cucu Mirang holh in Home Rule an ti i mah te in khuakhan lairel khohnak phunglam a si, Home Rule Bill cu British Parliament ah Irish MP pawl nih voihnih tiang an chuahpi cang nain hlawt piak lengmang an si i a voithumnak an chuah pi mi Home Rule Bills bel cu Parliamnet ah a tam deuh nih an cohlan piak hna caah 1914 ah hman ding in timhtuah piak an si.

            Irish MP pawl nih an bomh mi British Parliament nih cun Ralpi pakhatnak a dih le cangka in Home Rule cu tuahpiak hrim hrim dingin biakamnak an tuah Irish Parliament Party le an hruaitu Jonh Redmond nih cun Irish tlangval tampi cu Bristh Army ah lut dingin le Ralpi pakhatnak ah German kap dingin an forhfial hna i hihi a ruang cu United Kingdom nih teinak a hmuh ah cun  Ireland nih Home Rule ngeih an ngeih khoh lai timi ruahchannak an ngeih caah a si.

            Europe ah cun kum 1916 ah khan Ralpi pakhatnak kha kum 2 chung cu a kal cuahmah rko rih, Irish tlangval thawng tam ngai zong hi raltuknak hmunah hin an i tel ve, British Army ah cun an lut i Mahte in khuakhan lairelnak an ngeih khohnak ding caah le an chungkhat le hna himnak ding a si dingah an ruah Mi tampi an thi i German Kaiser William ralkap kutah an nunnak a liam.

            Cubantukin Irish mipi tam deuh nih mahtein khuakhan lairelnak an i ruahchan lio ah cun Ireland North East ah a um mi hna nih cun hi mahte in khuakhan lairelnak ding Home Rule Bill hi duhlonak nganpi an ngei i dohkalhnak an ngei ve, United Kingdom Ramthen pakhat si peng rih ko i United Kingdom Parliament, Westminster uknak tang i um cu an duh rih an mah hlawknak kelven nak ding le Hoem Rule dohkalhnak dingah cun Ulster Volunteer Force timi ralkap an i tuah i Meithal hna zong i cawk in UVF hna cu trainning zong felte in an tuah, hi thil a cang mi lehrul dingah hin Irish Volunteer timi cu Eoin Mac Neill hruainak in dirh ve a si i hi hna nih an timh bik mi cu Ralpi pakhatnak a dih le cangka Mah tein khuakhan lairelnak ngeih khohnak ding caah a si, hi hna zong nih hin trainning felfaite in an ngeih ve pinah Meithal hna zong an i cawk ve.

            Kum 1916 ah cun Irish Republican Brotherhood (IRB) timi ralkap phu cu ngan deuh le fek deuh in an hong dir ve than i Irish Volunteer hna le Gaelic Revival he ai pehtlai mi phuntanh pawl hna zong hi nih hin an hun chilhkhuh deuh hna, Fenians he i pehtlai in an dir i hi hna nih an timh bik mi cu Home Rule lawngah cun an lung a tling loh i a tling mi Rampi zalonnak le United Kingdom in chuahnak kha an timh bik mi cu a si, Britain ram Ralpi pakhatnak i ai tel lio te cu an caan tha ah ruat in "British can chiat lio cu Irish can that lio a si" timi ruahnak an i dirpi.

            Ralthawhnak tuah ding in i timhtuahnak cu hram an awt i German ramin meithal hmuh khoh ding zongin an i ruahchan Ramchung hmunkipah ralthawhnak ni dingah ah cun Irish Volunteer pawl hna nih cun Ester Sunday ah tlun ter dingin timhtuahnak an ngei i hi a caan le a hmun ding hna cu IRB hruaitu lu deuh lawng nih an hngalh.

            The Ulster Volunteer timi hna nih cun Home Rule mahte khuakhan lairelnak an dohkalh khoh nak hnga le an hlawknak le an sinak humhimnak dingah cun hlawhtling te in Meithal 25000 leng cu Ireland ah an i luh pi khoh i Larne, Bangor le Donaghadee hna ah  April thla kum  1914 ah khan Lawngin an hun luhpi hna. cu lio ah cun Irish Volunteer hna bel nih cun Home Rule an ngeih khohnak ding i ral an tuk nak ding caah Rifle a hlun pah cang mi 1000 lawng Ireland ramah an luhpi khoh.

            IRB hruaitu hna nih cun meithla tam deuh kan herh timi cu fiangte in an hngalh, British le Germany ral an i tuk lio a si caah IRB hruaitu hna nih cun German pawl cu a thli te in an chonh hna i Meithal le ralthuam dang hna zong German ramin Ireland ah luh pi dingin timhtuahnak an ngei. Dublin in German ramah Roger Casement cu German ah a va kal i Irish pawl nih cun German ramin meithal pinah German ralkap pawl cu Ireland ramah British ralkap doh dingin an hong lai timi ruahchannak an ngei.

            Irish pawl nih cun Zallonnak an hmuh nak ding caah German pawl nih ralkap thazaang in siseh meithal lei in siseh an bawmh te hna lai ti an i ruah chan, Roger Casement nih Meithal 20000 hrawng le a mu tam ngai in a va hmuh khoh i asinain hi lawng hi IRB hruaitu pawl nih bawmhnak an hmuh dingin an i ruahchan mi a si lo. cunak in a tam deuh mi meithal le ralthuam dang hna zong an duh pinah German Ralkap thazaang zong an herh nain an i ruahchan bantuk tluk cun German nih a bawm hna lo.

            Ralthuam hna cu German Tilawng Aud timi hin an hon phurh hna i German Captain Karl Splinder le a tang mi nih Ireland ah hun luhpi an i tim Culio ah cun Roger Casement cu German U-Boat in khual a tlawn lio zong a si ve. Aud le a phurh mi Ralhriam hna nih cun April ni 23 ah Ireland phan dingin khuakhan a si nain British ralkap pawl nih Aud Tilawng cu April 21 ah a chung i a cuang mi vialte he an tlaih dih hna. Cu lawng cu IRB pawl nih rili chungah an pil ter i hi an tuahnak a ruang cun meithal le a mu vialte hna Bristish ralkap kutah a phan sual lai i British kah nak dingah an ti mi cu an mah kahnak ah an hman than sual lai ti an phan caah a si, Lawng a pil nak dingah riantuantu Roger Casement le a thihruai hna cu an thih phah ve dengmang nain Banna Stran rili kam ah nungdam in an chuak kho, a sinain Bristish ralkap pawl nih an tlaih hna i, Roger Casement cu England ram thawng inn ah an thlak i a hnu ah leirawitu le British lak i raltho mi sinak dan tat piak in August thla kum 1916 ah an thah.

            Roger Casement a thi timi an theih tiikah an sung zatlaknak le an thazaang der nak vialte cu philh in Irish Pasaltha hna cu lungcan an i pe i, a thinak cu a sawsawh si lo in Ireland tlangval hna thinlungah rian a tuan i Phun dawtnak le British uknak tangin chuah duhnak lungthin an hun ngei chin chin, Roger cu phunglam ning tein lairel piak a si loh an ti i, an thinlung nih British lairel ning cu an cohlang kho hrim hrim lo.

            Hi ralthawhnak timhtuah lio hrawngah hin Ireland ah a um mi Police pawl cu Royal Irish Constabulary (RIC) an ti i mi 10,000 hrawng an um i Meithal keng mi an si lo, Dublin khuapi chungah cun Police 1000 hrawng an um i, mipi hna sin ah Ralthawhnak thawngppang le cubantukin a tuah tim mi an um ah cun British force pawl hmunhma Royal Castle ah theihter colh dingin an nawl hna.

            Ralthawh timin Irish tlangval pawl a thlithup in timhtuahnak an ngeih lio ah hin Ireland ramchungah British Force pawl hi tamtuk an um lem lo a ruang cu Ralpi pahnihnak ah British hi ai tel ve caah a ralkap tam deuh cu Raltuknak hmun ah a chiah hna caah a si. Ralthawhnak a chuah tak tak lio lebang ah cun Irish Pasaltha pawl mi 1400 kap ding ah mi 400 hrawng deuhlawng an um, British ralkap nih a uknak tangah Ireland a hum khohnak lam hmasa bik cu hmundang in Ralkap kuat chap le Raltho pawl an thazaang hngalh le thawngpang i thanh colh lengmang khoh kha a si.

            Hi ralthawhnak tuah dingin a thlithup in timhtuahnak kalpi a si lio ah hin Dublin khuapi chung um mi Royal Castle ah cun nawlngeitu pawl cu an lungmaw le khuaruah thiam har ngai in an um, Royala Castle i mi ngiathlai phu nih cun Roger Casement an tlaih hnu in zeithil maw dek a hong cang ding an um theu lai timi ruahnak an ngei, April ni 23 ah cun Wimborne nih Nathan sinah nawl chuah dingin le Republican hruaitu a min an hngalh mi mi 60 in mi 100 kar hrawng tlaihnak ding ca chuah dingin nawl a pek, a sinain Nathan nih cun Wimborne sinah cubantuk in nawl chuah a herh lo nak kong le British mingiathlai phu nih an theih ningah cun Ralthawhnak rikhiahni cu Raltho pawl hruaitu pakhat Eoin Mac Neill nih a cancel nak kong a chimh.

            Mi tlawmte lawng nih Ralthawhnak a um lai timi cu an zumh i British Ralkap tam deuh lebang cu Fairy House i ran tlik zuamnak hmun ah an kal, Nathan nih a zumh ningah cun Ralthawhnak a chuah a si hmanh ah mi tlawmte lawng an si theu lai pinah meithal chiahru tete he hruaitu le training felfai tein a ngei lo mi an si lai caah fawite in tei khoh an si ko lai timi a zumh.

            Culio ah cun IRB pawl cu Ester Sunday ah raldohnak thawk cang dingin a thlithup in timhtuahnak an rak ngei cuahmah lio ve i, a sinain a ni a phak lai te Zarhteni ah IRB hruaitu hna nih an mah chung mi tangin Padraig Pearse le hruaitu dang hna nih ralthawhnak hram thawk an timh cang timi thawng cu an theih i hi pinah hin German ram in meithal tam ngaih hun luh pi ai tim mi Roger Statement cu an tlaih i an meithal phurhnak lawngpi zong ti ah a pil timi an theih le cangka in IRB Hruaitu pawl cu an lu a lin cang.

            Ralthawhnak cu kan thawk thiam thiam ko lai maw caan dang kan hngak rih lai dah timi kongah bia al nak fakpi in a chuak, cheukhat nih kan i tim cang i a ni le a caan zong kan Tlangval pawl kan chimh dih cang hna Ireland ramchung vialte ah timhcia an si cang cu caah zei a si zongah kan thawk hrim hrim awk a si a timi an um lio ah cheukhat nih cun caan dang kan hngah awk a si ko kan tei lo ding mi raldohnak cu a sawsawh in thihnak a si an ti ve, cutikah Ralthawhnak cu Easter Sunday ah thawk lo dingin le a hohmanh cawlcang lo tein um rih ding in Eoin Mac Neil min in ca an kuat hna.

            A sinain Padraig Pearse le mi cheukhat nih Ralthawhnak cu thawk an timh thiam thiam timi a theih tik ah le Roger sunghnak a theih fian tuk caah a inn chung tangin ca a tial i hmun kip ah a um mi Commander pawl sinah a pek ter hna a sinain Dublin khawleng hna ah cun bia a tam tuk caah a rak thawk tawk cu an um thiam thiam i khaw hnih thum lawngah a caan an thial mi cu an zulh. IRB pawl nih cun an ralthawhnak ni le caan cu suimilam 24 chung an a caan an hlat i Easter Monday April thla kum 1916 ah an ralthawhnak tuah dingin an i tim.

            April thla ni 24 kum 1916 chun suimilam 12:04 a hong phan i, Zing ni chuak cu zingdang tawn bantuk kelin ai dawh hringhran Dublin khua mipi hna zong an mah le an rian cio an tuah than hna i an hmailei ah zeidah a cang lai timi hrim thei lo in an tlawng ko hna, khua a hong tlai deuh deuh i ning dang ah an hmuh bal lo mi thil tete an hong um len cang, Irish Citizen Army,  IRB,  Irish Volunteers le Cumann hna cu hmunkhat te ah a hruang in le rumra ngei ngai in lam an hrawng ti hna i mi 1000 leng khi an si. General Post Office hmai an phak ah khin a chung ah an lut i a hnu ah mi pakhat a hong chuak than, cu pa cu Padraig Pearse a si, General Post Office hmai ah dirin British ram in an chuahnak cathanh cu a rel thluahmah, cheukhat a rak hmutu hna nih cun an nehsawh salam ko i "Na inn ah kir than ko law" ti hna in an rak auhnawh i, cheukhat cu an khuaruah a har caah rianrangin an lawi. cheukhat hna nih cun cathanh a rel thlu le cangka an fuh i "zeitin dah hi ralthawhnak ah hin kan in bawmh ve khoh hna lai" an ti , GPO chungah lut dingin le nawl an hmuh hlan lo cu um dingin an rak chimh hna.

            Royal Castle nih cu thawngpang an theih le cangka in cu hna cu tlai dingin nawl an hmuh nain Police tam deuh cu rang tlik zuamnak hmun i an um caah le mi tlawmte lawng duty in a um mi a si caah le hmundang in an mah bawmtu an hong thiam thiam ko lai timi an hngalh caah RIC mitlawmte lawng zeidah a cang timi zoh dingin an fial hna.

            Asinain hmundang tang in Royal Castle i a um mi hna nih cun cakuat an dengkhawng ngai an don thluahmah colh, cu an cakuat ah cun Cozah hmun pawimawh hna Raltho pawl nih an lak cang nak le GPO zong an lak cang nak kong an hun thanh hna i, British Thantar Union Jack cu hlawnh in Thantar pahnih an tar cang nak kong a si, Thantar pakhat cu a hring mi a si i Irish Republic timi ai tial a dang pakhat cu a zawng pathum ngei in a hring, a rang le serthlum zawng hna an si. GPO vengtu 7 le a chung um mi RIC hna cu an tlaih hna i meithal keng mi mi tam ngai kuttangah a um cang e timi kong hna na si.

            Cu le cangka in Ralkap a tam khoh chung nih GPO cu Irish raltho pawl kut tangin lak than an i zuam i, GPO chung a um mi IRB pawl nih cun lenglei i a um mi an hawi le sinah bia an thlah i, British ralkap tam ngai nih an kah hna nak kong le an mah zong nih an kah ve hna nak kong pinah an mah lak zongah a thi mi le hliamhma a pu mi an um nak kong an chimh hna i an hnulei in rak kan kah piak hna uh tiah an thanh hna.

            Lenglei ah a um mi IRB pawl nih cun GPO chungah a um mi an hawi le pawl cu ca an hei thlah hnawh ve than hna i, British ralkap zeizat dah an hon chap timi an theih lo nak kong le tam ngai nih an kal hnawh hna timi pinah cu GPO cu chuahtak rih dingin an hun chimh hna, an hawi le nih cun The Four Courts, St Stephen’s Green, Boland’s Mill, Jacob’s Factory, South Dublin Union, Liberty Hall and Mount Street bridge. hna cu an kut ah an chiah dih cang timi zong an hon chim chih.

            Cawnnihnihni

            Cawnni hnihni khawdei ka te a General Lowe le a hruai mi British ralkap 4000 hna cu Dublin khua an hung phan i General Lowe nih cun Dublin British ralkap cu a hruai colh hna i cu hnu hmanh ah cun Belfast khua in mi 1000 nih an hon chap than te hna lai, cu a si tikah British Ralkap cu Irish Raltho pawl nak in a let 5 in an tam deuh cang.

            Cawnnihnihni April ni 25 ah cun St Stephen’s Green ah aum mi IRB pawl nih cun an hawi le sinah ca an hun kuat hna i, an umnak hmun cu British ralkap tam ngai nih an tuk hna nak kong le an mah zong nih an si khoh tawk in an leh hna nak kong a si i, Bristish Ralkap cu an tam tuk caah le meithal mu hna an ngeih tlawm cang caah College of Surgeons hmun ah an i thial cang nak ding kong an hon thanh hna i bawmhchanhnak a pe ding in an nawl hna nak kong a si.

            Cawnnihnih ah cun lam le tual ah Police ai chawkvak mi an um lo tikah Dublin khua mi hna nih Dawr kip cu an bauh i an duh mi cio an lak IRB hotu pawl nih cun cubantuk thil cu tuah lo dingin an nawl len hna nain Dublin khuapi chung um mi hna cu mi rethei tete an si tikah le an rawl a tam cang tikah dah cawk an si ti lo.

           

            Cawnnithumni

           

            Cawnnithumni a hong phak tikah cun General Lowe le British Ralkap pawl nih cun a ran khohnak in Irist raltho pawl cu thiau dih ding in le Raltho pawl umnak cu hrawh dih dingin timhtuahnak an ngei, Liberty Hall ah tanhmun a khuar mi Irish pawl cu Bomb le meithal puakrang in an kah hna i caan sau ngai an kahchih hna hnu ah cun Irish pawl nih cun an chuaktak i mi tamngai an thih pinah hliamhma a pu mi zong an tam lengluang i cheukhat a nungin an tlaih mi azong an um len, Liberty Hall inn nganpi zong cu zohtlak lo bakin a rawk ve.

           

            Dublin khawpi chungah ah cun i tuknak fak ngai a um rih ko i Irish pawl an tanhmun Four Courts,  College of Surgeons,  South Dublin Union (St. James’ Hospital) le Mount Street Bridge hna ah cun fak ngai in i tuknak a um i British ralkap pawl nih Bomb he meithal puak rang he an denchih thluahmah ko hna, cu lio ah cun British ralkap dang cu an hong phan chap thluamah hawi i cheukhat cu Kingstown an an phan cu Kingstown a hong phan mi Sherwood Forester pawl cu ruah lo pi in dongtu le rak lawmtu an ngei ti cun Dublin khuachung lei ah an kal thluahmah, cu ti i an kal thluahmah lio ah cun Mount Street Bridge pawng inn hna tangin Irish ralkap pawl nih an hun kah chih ciammam hna i an i ralrin lo kar le ruahlo tukin an hon kah hna caah an thi thluahmah ve an hotu le pawl lah nih le hnukhirh lo dingin le hmainor chin dingin an ti hna caah mitam ngai an thi chap i hliamhma a pu mi zong tampi an um cang.

           

            GPO chungah a um mi Irish Pasaltha pawl zong cu hliamhma a pu mi le a thi mi zong an um len cang nain an umnak hmun cu British Ralkap kutin an hum khoh ko rih i lenglei ah a um mi an hawile he hna zong an i chonbia kho in i pehtlaihnak an tuah lengmang kho ko rih, lenglei ah cun i kahnak fakpi cu a um rih ko i Bomb hna zongin an den thluahmah rih ko hna nain an thinlungah British kutin chuah an duhnak lungthin cu a niam kho rih lo.

            Cawnnilini

            Sackville Street cu meithal mu lengvak nih a zelh rih ko i British Ralkap lah nih le an hon tlun chap thluahmah fawn hawi caah Irish Ralkap nakin British ralkap cu a let 20 in an tam cang, Irish Raltho hruaitu pakhat James Connolly cu an kah khenh i nain GPO chungah a hliamhma he cun a himte in a lut kho than, GPO pawngah a um mi Tiahlh kho chiahnak cu meithal mu nih a khenh i fak ngai in a alh i thildang tampi zong a hrawh chih cutikah Mipi caah cun um awk hngalh a harh ngai ngai cang Irish Raltho pawl le British Ralkap pawl meithal mu nih le a sur in a sur.

            Cawnni ngani

            General Sir John Maxwell cu Dublin ah ralkap tampi he zanlei suimilam 2:00pm ah a hong phan than hawi Irish ramchung British ralkap luttlai sinak cu a kutah an chiah colh i a hlan nak fakin Raltho pawl cu an den than hna Cawnningani 28 zanlei ah cun GPO cu tanhmun hun khuar nak taktak dingah cun a tha ti lo.

             Zarhteni

            ‘At 12:45 pm ni 29th Apri thla ah cun Irish nurse pakhat  Elizabeth O’ Farrell, Irish phuntanh buu pakhat Cumann na nBan, chungtel a si mi cu British ralkap sinah an fial i Surrender an duhnak kong an hei chim ter, a sinain British Genral Lowe nih cun zeihmanh tiamkam um lo in surrender nan tuah lawng lawng ah kan in cohlan hna lai tiin a khirh than. ‘ 2:30pm  ah cun Padraig Pearse le Elizabeth O’ Farrell nih an hruaimi hna cu Moore Street ah a um mi Genral Lowe British Ralkap kutah surrender nak tuah. Irish raltho hruaitu Pearse le Connolly nih cun Elizabeth O’Farrell cu raltho pawl umnak hmunkipah an fial i British Ralkap sinah an i surrender cang nak kong cu an theihter hna. Zanlei suimilam 3:45pm ah cun Ralthawhnak cu a dai dih cang.

            British uknak tangin Ireland chuahpi ai tim tu hna le Zalonnak hmuh a duh mi Irish Pasaltha pawl nih ralthawhnak tuah dingin an i timhtuahnak le an hruaitu pawl hna hi mizei mi dah an si i, zeitindah rian an tuan i, cu ralthawhnak cu a hlawhtling maw? timi cu tuhnu kum tam a liam hnu zongah hin mi tampi nih an chim than lengmang mi le Ireland hmailei caan ah lamsialtu a hong si.