James Connolly & Thomas Clarke

Ralthawhnak hram ai thawh ka hrawng deuh te ah Kuakzial dawr fate pakhat cu Parnell Street no 75 ah a um cu dawr a min cu TS O Cleiric a si i a ngeitu cu Thomas Clarke 10916 Ireland Zalonnak phuannak catlap i min a tialtu lakah a upa bik a si. Lam kip ah Thomas Clarke hi Easter Rising a tlun khoh nak hnga lam sialtu le riantuantu a si i, cu khua an khannak hmun cu hi a dawr fate ah hin a si i Ralthawhnak hrihram a hong si. Thomas Clarke hi i tel hlah sehlaw 1916 ralthawhnak hi a tlung bal lai lo dah tiah mi tampi nih an chim theu Thomas Clarke min tel lo in Easter rising kong chim cu Abraham Lincolh tello in American Civil War kong chim le Lenin min tello in Bolshevik Revolution kong chim bantuk deuh khi a si hnga. Cheukhat nih cun Revolution a chuah khoh nak ding i an thluak dur bik a si tiah an chim tawn.

Thomas Clarke hi Ireland ah a chuakkek mite cu a si ve lo a chuahkehnak cu Hurst Castle, Milford-on-Sea, Hampshire, England ramah a si i a pa Irish fahrin James Clarke le nupi ah a thit ka te Mary Palmer hna nih an fa hmasa bik si ding in 18 March 1858 ah khan a hong chuak i a min ah  Thomas James Clarke tiah an sak. A pa cu cu an umnak hmun ah an chiah mi British ralkap a si i asinain Thomas Clarke  kumkhat lawng a si rih lio ah Africa ramah thial an si. cu hmunah cun kum 6 chung hrawng an um i kum 7 a si ah Dungannon, County Tyrone, Ireland, ah thial an si than i cu hmunah cun          Thomas Clarke  cu a thang cu hmun cu Irish phuntanh pawl an tamnak hmun le cubantukin cawnpiaknak a tam nak khua le ram a si i, cu a si tikah Thomas Clarke  zong cu cu a pawngkam sining le a mit in a hmuh mi le a hna in a theih mi nih duhsah in Irish phun tanhnak lungthin a put ter.

Cu lio hrawngah cun Bristish nih Ireland a uk ning hi a tha lo ngai i Irish mipi pawl cu retheihnak le harnak phun phun nih a tlunh hna i anmahtein khuakhan lairelnak nawl an ngeih lo pinah an holh le an ca hna zong an thlau chin thluahmah lio chan a si. Thomas Clarke  cu a hong upat deuh tikah an khua Dunganon i a um mi Irish Republican Brotherhood ah ai tel ve, kum 1879 ah IRB i National Organizer John Daily cu Dungannon khua ah a va tlawng hna i, John Daily biachimnak cun Thomas Clarke  zong a vai tel ve, John Daily biachim a ngaih hnu chinchin ah cun Thomas Clarke  cu IRB ah a fek chinchin i a nunchung ah a nunlam hruaitu le a a nun hnawhchan mi ah a hong cang.

IRB cu British uknak tang in Ireland chuah a duhtu a thlithup in a dir mi Buu an si i, hriamnam hmangin Ireland zalonnak hmuh an i tim, Dungannon ah cun Tualchung mi hna le Police hna karlak ah buainak a chuak i Clark nih cun Rifle ai ken i Police pawl cu a kah hna cuticun mipi nih Police umnak lei cu an panh i an zuan hnawh thluahmah colh hna Police pawl meithal cu an chuh hna i cu a si tikah nawlngeitu pawl nih an hon hngalh ngai ngai tikah cu hmun cu chuahtak in a nunak a himnak hnga tiin Thomas cu a zam.

A hawikawm tha pawl nih America ramah a kal khoh nak hnga lam an sial piak i a hawikawm cheukhat a va fonh hna, Thomas cu kum 1880 ah New York khuapi a phan i cu ah cun kum 22 mi lawng a si rih, cu hmunah cun Hotel pakhat ah thilri chek rian a hmuh i a tuan colh, a sinain a thinlung a um bik mi cu Ireland a si thiam thiam i America ramah a um mi Irish pawl funtomnak buu Fenian Brotherhood a kawl hna i Clan na nGael timi buu ah ai fonh ve, Clan na nGael cu Ireland nih zalonnak a hmuh khoh nak ding i riantuantu buu  pakhat an si i hi hna buu hi Ireland ramah a um mi hna bantuk tein an miphun le ram zawn a ruat i a tanh mi an si hna i Ireland nak in America ram i an za a lon deuh tikah Zallonak aupi nak le chimphuannak lei zongah an thawng i hmual a ngei tak tak mi an si. an tum an hlawhtlin khohnak hnga tangka hna thawhkhawm in rian an tuan. cu lio hrawngah Ireland i zalonnak ding i cawlcanghnak a um mi paoh cu Clan na nGael nih hnulei in a dirpi mi deuh lawngte an rak si.

England ramah Bomb puah in thil a cang mi zong kha Clan na nGael nih an hohhat bmi thil a si. Ireland zalonnak ding i an i timhtuahnak le an riantuannak hna a tlawlh in an sungh than lengmang tawn caah Ireland cu British Politics i zoh bik le ruah bik a si khohnak dingah khuakhannak an ngei, cu thil tuah dingah cun Clark cu England ramah Bomb puah in zalonnak rianhma a domh dingin an kirter, London khuachung hmun thumah Bomb puah dingin timhtuahnak an ngei a sinain an i timhtuahnak vialte cu England Police nih a thli in an rak hngal dih i amah Thomas Clarke  hrimhrim zong a thli in a hnu nah an zulh peng. an mah chung ah rawiphiartu an rak um i Thomas Clarke  cu pheu a si.

Thomas Clarke  cu London khuapi ah June thla kum 1883 ah Henry Wilson timi min deu i bunh in a lut asinain England Police nih an rak tlaih i England Siangpahrang rawiphiartu ah puh in a damchung Thawngtla dingin le a herh mi rian paoh tuan dingin bia an khiah piak. Asinain Thomas Clarke  hi mi men lo cu si kaw British thawnginn chiahru ngai mi le a har bik anti mi thawngin ah kum 15 le cheu hrawng an thlak hnu ah chuah than a si, cu kum 15 le cheu hrawng a tan chungah cun a taksa le a thluak ah thazaang ngei kho ti lo ding le dirchuak kho tilo dingin tuk le velh a si pinah hro le rak nitin a si, amah nih a chim ningah cun "Nifatin keimah an ka tuk i an ka vuak lo hmanh ah ka hawile pakhat chang chang cu kan theih ding le kan tih ding hrim hrim ah vuak le den an si, zan zongah hngilh kho loin an kan tuah i kan hawi le an vuak thawng le an au thawng nih hngilh kho loin an kan tuah camcin tawn" ati.

Ni a chuak zan a tlung i Thomas Clarke cu lungcan i pe in hihi ka tuarchuah hrim hrim awk a si kan ram le kan miphun nih a ka herh i hi thawnginn chungah hin ka thih ding a si lai lo, nikhat khat ah cun hi thawnginn chung hin ka chuak te lai i Kan ram le miphun zalonnak ding caah ka unau le ka hawikawm hna nih hi bantukin an miphun ruang i an tuar ve nak hnga lo rian ka tuan tha te lai tiah ruahchhannak nganpi he chunni a tla i zingah a thawhpi than lengmang.

Kum zeimaw zat thawnginn a um hnu ah cun nikhat cu ruahlopi in Jonh Daly zong a tannak thawnginn ah cun Ar luh bangin an hon luh ve, John Daly cu IRB chungah a luh tu zong a si, Thomas Clarke  le John Daly cu thawnginn khaan ai chan mi ah chiah an si i cu ni thawk cun Thawnginn vampang kik in i chonhbiaknak Code an ngei i holh lo ring lo in an i chonbia kho, cuticun pakhat le pakhat thazaang an i pe i ruahchannak thar an hong ngei, a sinain John Daly cu rawl a ulh caah an chuah i Thomas Clarke  cu amahlawng a tang than hawi cu ah cun khuahar le thlavaikiang ngai in chunni a tla than.

Kum 15 thawnginn khaan mui tuk mi le thlalang awng bite in nika caan tawite lawng a hmuh khohnak hmun i chiah a si hnu ah ruahlopi in Thomas Clarke chuahnak nawl a hong chuak, Thawnginn in a chuah lio ah cun a kumkhua hna a tam ve pah cang i rawl thitha pek lo le tuk den lengmang zong a si tikah a upa ngai cang mi zong a lo, a thinlungah cun English pawl huatnak ai tuh i a thluak ah phuhlam duhnak nih hmun a khuar, kum 15 chung thawng thlak a si hnu ah Portland thawnginn in Thomas Clarke  cu Khuasik thla kum 1898 ah chuah a si.

Thal a hong chuahka deuh te ah khin Limrich khua a hawipa John Daly sinah a va tlawng i thal caan dongh tiang a va um cu ah cun John Daly tu nu te Kathleen he an va i tong i duhdawtnak thladem tangah an i din, cu an thawngpang cu Daly le Clark chungkhar hn nnih an theih tikah an khuaruah zong a har, a ruang cu Clark cu kum 40 ral a kai cang lio ah Kathlen cu kum 20 hrawng lawng a si rih, asinain Kathleen nih cun Thomas Clarke  cu a tlaihchan ngai, Ireland hmailei kong dingah an ruahnak zong a rak i khah ve hrimhrim ca zongah a si kho men. cuticun an pahnih cun an i duh i dawtnak karhlang ti dingin an pahnih linghna a tla, asinain Thomas Clarke  nih rian a hmuh hlan lo cu thitumhnak tuah rih lo dingin an lung a tling i biakamnak an ngei.

Thomas Clarke  nih cun rian a hmuh khoh lo caah kum 1889 ah America ramah a kal than i cu hmun a phak i rian a ngeih hnu lawngah Kathleen he cun thitumhnak an tuah, sau a um manh hlan ah Clan na nGael hruaitu lu bik Jonh Davoy kutke bikah a hong cang colh cu nih cun America ram um Irish phuntanh hna lakah hruaitu minlang mi pakhat ah a hon chuah, kum 1905 ah America rammi sinak a lak i cu kum thiam thiam ah cun hmun hnih ah inn le lo ai cawk, asinain kum 1907 ah America ram i a ngeih mi thilri vialte cu a kaltak i Ireland ramah a kir than.

Kum 1907 i Ireland ram i a kir nolh than ah cun an chungkhar dihlakin Dublin khuapi chungah umhmun an khuar cu ah cun Kuak zuarnak dawr hmete a tuah i Irish miphun cu kuak a duh ngai mi an si tikah cu a dawr ah cun kuak caw le zu in mi an hong lengkai pah lengmang, a ngai ngai tiah cun hi a dawr hi Revolution tuah nak ding caah hram a thawknak hmun le a thli thup in an i tonnak hmun zongah a hong cang colh, a hawikawm thar pahnih Sean MacDermott le Hobson hna nih an hong chap i hi hna he hin then khawh lo in an hong tuanti hna i IRB hram an thawk than i mithar tete zong an hong i chap thluahmah.

Sean MacDermott, cu Clarke nih Ireland ram i IRB a hon tharchuah hnu ah a lut hma bik hna lak i pakhat a si i, a thazaang dihlak le a ruahnak vialte Ireland zalonnak ding caah a pek i, Ireland khuate le hmunkip ah kal in IRB nih an i tumtah mi le timhlamhnak hna chimphuannak le sawmnak a ngei i, cu a riantuannak le ai pumpeknak thawng cun mi tampi nih IRB cu ah an hong lut i Ireland zalonnak ding caah ruahchannak thar zong an hong ngei than hna.

Thomas Clarke nih cun khua fakpi in a ruah hnu ah IRB chungah mipi hmai i biachim a thiam mi le mi lung a tei kho lakin bia a chim kho mi kan um a herh timi ruahnak a ngei i mi a dotthlat hnu ah Patrick Pearce timi pa Gaelic Leauge i hruaitu minlang ngai pakhat hi a tha ko lai dah timi ruahchannak a ngei, asinain Patrick Pearce cu Home Rule a duh mi hruaitu pakhat he hawitha ngai an si caah an i tumtah mi ai khat sual lai lo i an bia a zut sual lai ti zong a phang ngai. Patrick Pearce cu biachim thiam le catial thiam ngai mi zong a si i Irish mipi zong nih an uar ngai mi le mi minlang pakhat a si ve. a sinain Republican Irish zalonnak duh pawl nih cun a khuaruah a pin tuk an ti i an uar tuk lemlo. asinain Thomas Calrke nih cun IRB ca le kan miphun nih a herh mi a si ti kha fiangte in a hmuh, cu caah an sin ai tel khoh nak hnga bia a ruah i ticun an sinah ai tel ve.

Thomas Clarke le midang hna nih Patrick Pearce kong i ruahnak an ngeih mi pakhat cu Ireland nih home rule an ngeih khoh nak ding i tualpumh an ngeih lio ah Irish Parliament Party lutlai John Redmon pawngah a um i a hnu in domh tu a rak si lawng si lo in Home Rule ngeih nak ding i tlangautu pakhat a rak si ve, asinain Thomas Clarke le midang caah cun John Redmon cu Ireland leirawitu a si i Home Rule cu Irish mipi zeirellonak a si. Jonh Redmon Ireland ram hruaitu a si chung le Ireland cu England tangah Home Rule in uk a si ko ah cun Irland cu fek chin in England tangah a um thai sual lai timi zong an phang.

Kum 1913 ah cun Dublin khuapi chungah Mipi le police karah buainak a chuak i Police nih mipi tam ngai zong an tlaih i nunnak tiang a liam mi zong an rak um cu nih cun Citizenship Army timi Irish Pasaltha hna nih ralkapbu an ser cu ah an hruaitu bik cu James Connoly a si, cu lio ah cun Ireland thlanglei ah Home Rule an ngeih khohnak ding le Home Rule cu a feh chinchin nak hnga caah Ulster Volunteer timi ralkapbuu an ni ser ve ralthuam tlingte an ngei i zeipaoh tlung sehlaw zeithil paoh an hmai ah um sehlaw Home rule an ngeih nak ding le humhimnak ding caah an dir. cu hna cu England ramthen pakhat si a duh i Zalonnak tling a duh lo mi hna an si, cubantuk thawngpang cu Thomasa Clarke nih a theih tikah Ireland zalonnak duhtu hna hrangah zochun ding i thanghnak tha ngai a si in a hngalh i cubantukin thil an canter ve ding a si timi zong fiante in a hmuh. cuticun Ralkapbuu dirh dingin le hmailei Ireland zalonnak ding caah rianhma domh tu an si nak hnga hramthawk colh a duh.

Ulster Volunteer pawl eptu dingah le an i tumtahmi puitlinh nak dingah Ralkapbuu National Volunteer Force an dirh i an si khoh chungin meithal ngeih khohnak ding lam zong an kawl colh, November 1913 i Irish Volunteer an dirh tikah cun i an hruaitu lu Provisional Committe mi 30 hna lak i 12 cu IRB chung mi an si, an buu hruainak a that deuh nak ding le sullam ngei le felfai deuhin an i hruai khoh nak hnga tiah Eoin MacNeill timi pa University College Dublin ah Professor rian a tuan lio mi cu Chief of Staff ah an chiah.

July 1914 ah cun Irish Volunteer pawl nih meithal tam ngai Ireland ramah an luhpi khoh

James Connolly

Retheihnak fak ngai a rak pal ve bal cang mi James Connolly hi Ireland zalonnak lamthluan ah a min a cuang lan cang ding le Irish mi sifak le rethei hna caah zochuntlak si ding in 5 June 1868 ah khan Irish chungkhar John Connolly le Mary McGinn hna i an fapa pathumnak si dingin Edinburgh khua Irish mipem le mi rethei hna umnak hmun ah a hong chuak. a nu le pa cu County Monaghan in Scotland ramah a rak pem mi an si i Cowgate hmunah an um cu hmun cu Irish mi pem rethei tete khuasaknak hmun a si i, cu hmunah cun a nu le pa nih an ngeih i rethei ngai in khua an sa i a thannak hmun zong a si caah a thihtiangah khan Irish holh in a holh paoh ah Scotland awcawi in a holh thai.

Mirethei fa a si caah Kum 10 a si tiang lawng sianginn a phan kho i Catholic Khrihfabuu nih tuahmi sianginn ah a kai tawn, a sinain kum 10 a hun si tikah cun a nu le pa riantuan mi lawng cu an chungkhar nih an i zat tilo tikah hngakchia te si buin rian tuan hram ai thawk i khawlak i Satil ek ruh le hmunphiah hna in ei a kawl tawn. Retheih le harsatnak nih an chungkhar cu chuahtak zai an rel lo tikah kum 14 lawng a si ah British Ralkap ah a lut, hi Ralkap a luh lio ah hin a kum cu cu nak tam deuh in a chim a ruang cu kum 14 caah ralkap tlak khoh a rak si lo.

James Connolly British Ralkap a tuannak kong hi tamtuk theih khoh mi a um lo a ruang cu amah hrimhrim nih tam a chim bal lo i mi nih a ralkap tlak kong an hal tik zongah a chim duh bal hna lo, a sinain kum 1880 ah khan 2nd Battalion of the Royal Scots Regiment ah a um i Ireland ramah British ralkap a um mi lakah ai tel ve timi bel hngalh khoh a si, cu lio hrawngah cun Ireland khuate pawl ah buainak a rak um pah len tawn i England cozah cung i lungtlinlonak a si bik. Ram kongkau ah an buai i Ireland khuate hna nih an ngeih mi ram le hmunhma hna cu England ralkap nih hram hram in an chuh hna i Irish mipi nih an ram cu an i cuza kho tilo.

Ireland ram i British Ralkap rian a tuan chungah cun English pawl nih Phung ninglo le hramhram in Irish pawl an tuahto ning vialte hna le zei ah an rel hna lo zia kha fiang tukin a hmuh i a lung zong a fak hringhran, a miphun hawi hna tuarnak le harnak vialte a hon hmuhpiak hna i namneh mi miphun an sinak hna le an dirhmun niam zia hna a hun hmuh tikah England nih Ireland a uk ning a chiatkhat zia kha ai fiang chin lengmang i English a huatnak hram zong a hong si i a lungtakin England ralkap ah cun a tuan kho ti lo, a lungthli tein teirul cham duhnak le cu harnak chan chia le uknak chia chungin Ireland le Irish mipi chuahter cu a rak duh ziar.

Kum 7 chung Ireland ram i chiah mi British ralkap rian a tuan hnu ah cun an Battalion cu India ramah thial an si, asinain James Connolly nih cun British a huat tuk ruangah cun Ireland bantukin British nih ramdang a uk nak ah bawmtu si hrimhrim ai tim ti lo cu caah ah British Ralkap in a zam i India ramah cun a kal ve lo, James Connolly India ram a kal lo nak a ruang hi British a huat tuk ruang lawng zongah si lo in lungthli in a ven mi nungak pakhat ai tel ve, a min cu Lillie Reynolds a si Irish nungak no te a si. Ralkap in a chuah hnu ah cun Lillie le James cu Scotland ramah an kal i kum 1890 April thla ah thitumhnak thiang an tuah i Pathian le an minung hawi hna hmai ah Nupi Pasal an hong si i chungkhar dirh dingin hram an i awt.

Eidinburg khuapi i an um chungah cun Scottish Socialist Federation buu chungah a si khoh tawk in ai hmang i mi rethei hna thanchohnak ding caah le dirchuah khohnak hnga rian a tuan, a sinain an chungkhar pawcawmtu a si tikah riantuan lo ngai ngai cun a um kho ve lo i kum 1895 ah Kedanh thitnak dawr hmete a tuah, a sinain cu a dawr zong cu a thiamnak nih a phak ngai ngai lo caah sau a tuah kho lo i a donghnak ah cun a tam khoh chung in Socialist riantuannak ah ai tel mawih than. Scottish Socialist Federation ah Secretary rian a tuan hibantukin Secretary rian a tlaih khoh nak a ruang hi a u pa Jonh Connoly cu Socialist lam zawhnak ah Nikhat ah suimilam pariat chung lawng hlawhfa hna nih rian an tuan cang ding a si timi kong a chim i a tanh caah a riantuannak Eidinburg Corporation tangin an chuah i riandang kawl in chawhvah a duh caah a si. Hi lio caan hrawng thiam thiam ah hin kum 1893 ah Independent Labour Party timi cu  Keir Hardie nih a hun dirpi i cu Party chung zongah cun ai tel ve Independent Labour Party cu British ramah Communist Party pakhat a si.

Kum 1892 ah Scottish Socialist Federation  i ai tlemawih kha a si i, Kum 1895 i Secretary rian a tlaih hnu a fanu pathumnak a chuah hnu thlahnih ah Dublin Socialist Club nih Secretary ding an kawl nak kong le thlahlawh zong pek a si lai nak ding kong kha an hong thanh i cu Dublin Socialist Club ah Secretary riantuan ding cun Dublin khuapi Ireland ah a kir than. Irish Socialist Republican Party (ISRP) ah an hong lut duahmah hna i James Connoly zong ai hmang bikah a hong tang than hawi, IRSP cu Ireland ramah Socialist hrihram a tuhtu le Ireland zalonnak ding caah hmadomh tu hna lak i pakhat tiah chim lengmang an si tawn.

James Connoly cu The Socialist timi cazual Editor  hmasa bik le Socialist Labour Party dirhtu hna lakah ai telk than i, Socialist Labour Party cu Social Democratic Federation in kum 1903 ah a chuak mi an si. cu hnu ah Boer War timi British cozah le Africa ram pakhat raldohnak a si i cu thil a cang mi duhlahnak langhter in Maud Gonne le Arthur Griffith he Dublin khuapi chungah fak ngai an rak cawlcang i an rak aupi. Eikawlnak lei ah Ireland ramchung khuasak cu a harsat chin lengmang tikah America ramah kum September 1903 ah New York panh in ai thawh, a nupi le fanau hna caah nunning le khuasak sak deuh a si kho hnga maw tiah ruahchannak ngan pi he.

Amreica i pem an timh lio ah hin Tangka an i cutzat lo tikah amah lawng kal hmasa ding le a hnu ah a chungle dang nih hun zulh than te dingin khua an khan cuticun a Nupi le a fale America ram i an pa an va ton ni ding i caan khiah mi cu a hong phan i Ellis Tikulh ah hngahhlang ngai in a rak hngah ko hna, a sinain a nupi le fale muihmai hrim a leng tilo i an thawngpang a theih khoh tilo caah lungsivang ngai in a um, a thaizingah an hong phan hnga maw tiah ruahchannak nganpi he a va kal than i cu ni zongah cun an hong phan hlei lo, cuticun zarhkhat chung cu nifatinte a nupi le fale dong dingin Ellis Tikulh tilawng dinhmun ah cun a va kal i chunni a tla tawn, i tong ding i a ni khiah mi cu zarhkhat in a liam cang caah a lung a tha lo ngai i an thawngpang zong zeihmanh hngalh ding a um lo tikah zeithil pawipang hna an tong sual hnga maw tiah lungrethei ngai in a um i, zan a mui i Lawng a phan ding an um tilo tiang khin a hngah hna i zeituah awk a that lo caah lungdong ngai in a kir than tawn. Cuticun nitin a dawngle dong dingin Tilawng dinhhmun i kal cu a ngol hlei lo i nikhat cu ruahlopi in  an hong lang, asinain an sinah a fanu Mona ai tel ve tilo ai. cu hnu lawngah cun a dawngle nih accident an ton mi le Dublin chuahtak timin an i timhtuah ni ah Mona nih cun titlawk ai toih sual i a tisa a kangh dih caah a hnu nikhat ah a thih caah a si. cu thawngpang a theih ah cun a ngaih a chia hringhran i tah lawng ai sek ko, America ram kal a duhnak ruang hmanh a fale nih nunnuam deuh le khuasak sang deuh an ngeih ve khohnak hnga ruahchannak a si lio ah ruahlopi in a fanute a nunnak a liam ko mi cu a ngaih a chia i pawi a ti hringhran ai ruahchan mi le a saduhthah vialte cu cikhatte ah an tlau dih.

America ramah kum 7 a um chung zongah cun Socialist Labor Party of America  ah kum 1906 ah khan a lut i, a hnu ah  Socialist Party of America  timi ah kum 1909 ah ai tel than, hi pinah hin Industrial Workers of the World ah chungtel a si i. Irish le Italian pawl deuh umnak buu chungah a um mi Italian pawl sin i bia a chim khoh nak hnga Italian holh zong a cawng i an hmai ah palh lo te in holh khohnak ding tiang a thiam, Miphun kip huap Riantuantu buu ah mi langsar ngai a si nain a thinlungah Ireland zawn a ruahnak cu a dai ballo. Irish Socialist Federation in New York, timi cu kum  1907 ah Irish riantuantu hlawhfa pawl bawmchantu ding le an ai awh i a dir dingah an thawk i Ireland ah a um mi Socialist Party pawl he hna zong pehtlaihnak fek ngai an ngei kho. a ruahnak ah Ireland kir nolh cu a um than, America ramah hin cun kan miphun caah keimah nih ka tuah khoh mi bantuk a tuah khotu an tampi ko nain kan ram ah cun ka miphun hawi hna hrangah keimah nih ka tuan tlukin a tuan kho mi an um lo. timi ruahnak a ngei i Ireland ah kir than dingin saduh a that zungzal.

Kum zeimaw zat America ram i a um hnu ah cun July ni 14 zanlei ah Canvanagh Restaurant ah James Connolly thlahnak zanriah an tuahpiak i kum 1910 ah Ireland ramah an miphun nih retheihnak le hranak hna le England uknak chiakha lakin zalonnak a hmuh khoh nak hnga a kir than, Ireland i a kir hnu zongah cun Irish Transport and General Workers Union ah James Larkin nih a chawrchem bik mi ah a hung um kho i, James Larkin cu hngakchiate a si lio ah retheih harsat ruang i riantuan ve mi a si caah Connoly he zong an i theihthiam i an ruahnak ai khat i an hon tuanti tikah cun a hlan nak in an riantuannak zong a thangcho i an buu zong an hong thawng chin thluahmah . Cu lio hrawng ah cun Ireland pumpi cu retheihnak nih a khuh i Dublin khuapi chung hmanh ah inn le lo ngeilo in khualakah a it mi an tam tuk i ei ding ngeilo in a thi mi tiang in an rak um. Henry Street timi hoi hna ah cun Inn 15 lawng a um i cu inn 15 ah cun mi Zariat khua an sa, cu kong hna an hon theih i a mit nih a hon hmuh tikah James Connolly thinlung a fak ngai ngai.

Irish Labour Party timi cu Irish Trade Union Congress Political wing si ding in kum 1912 ah an dirh i National Executive ah chungtel zong a si. hi lio caan hrawngah hin Maria Winifred Carney timi nu he Belfast khua ah an i tong i a secretary ah a hman i a hnu Easter Rising a tlun tiang zongah a hnuzultu le a riantuan piaktu a si. Dublin City Council ah Wood Quay bial ah voihnih a dir ve bal cang nain teinak a hmu kho tawn lo.

Kum 1903 a hung phak tikah cun Irish Transport and Generals Workers Union ( ITGWU) chungtel a si mi cheukhat hna cu an riantuannak hmun in chuah an tong i chuah a si lo mi hna zong ITGWU chungtel silo dingin biakamnak an tuah ter hna caah rianttuantu tampi nih duhlonak an langhter i  Riantuantu le Police kar buainak ruangah mi tampi cu tuk le den an si i tha lo ngai ngai in Police pawl nih mipi cu an tuk den hna, Larkin le Connoly zong an tlaih ve hna i thawngah an thlak hna, mitampi an tlaih hna i, cheukhat an tuk an den hna i an nunnak hna an hlauh hna, James Connoly cu August thla ah tlaih a si i thlathum chung thawnginn ah a um, Zarhkhat chung rawlhulhnak a ngeih hnu lawngah an chuah than. Larkin cu Thawnginn ah a um peng rih caah James Connoly cu Liberty Hall i an hruaitu bikah ah a hong cang cuticun Irish riantuantu pawl kilveng dingah ralkap kan um ve a herh tiah khua an khang i cuticun hram an hon awt cubantukin thil a can tikah James Connoly le British Ralkap hlun a si ve mi Jack White nih Irish Citizenship Army timi cu 23 November 1913 ah an dirh i, Mipi le Police kar buainak a chuah tik i Mipi chanhtu dingah an ti, mi tlawmte an si nain trainning fel te in an ngei i meithal zong tlingte in an i hunh ve.

James Connoly biachim langsar ngai pakhat cu "British cozah dah tilo hi cu hi ram nih hin ral a ngeih ka hngal lo" tiah a rak chim bal mi hi a si. Kum 1914 kan zoh than tikah James Connoly caah thil ngan ngai pathum a tlung, a pakhatnak cu Dublin i cozah dohkalhnak an ngeih mi cu an hlawh a tling lo, a pahnih nak cu Irland caah zalonnak an i ruahchan ngai lio ah zalonnak si lo in a a chiakha tuk mi England cozah nih Ireland ram hmun hnih ah thencheu timhnak a si. a pathumnak cu Vawlei ralpi pakhatnak a chuak i Socialist pawl i timhtuahnak vialte cu zeihmanh lo ah a cang than.

Ralpi pakhatnak ah England ai tel ve caah ralkap tampi a herh i ralkap ah fawite in luh khoh a si tikah Ireland ram i mi harsa tete hna nih cun hlawh a that fawn caah British ralkap ah cun an lut thluahmah hna, cu thil a can tikah pawi a ti ngai fawn a ruang cu Irish thisen hmangin England Siangpahrang thutdanh a feh chin lengmang nak lai ding kong kha a hmuh thiam tuk. Cu lawng hmanh silo in an mah Ireland ram hruaitu cheukhat pawl sin hrimhrim in British ralkap ah lut ding in an tlangval pawl forhfialnak bia le hla hna a hong um hawi, cu nih cun an i timhtuahnak le an i ruahchan mi vialte cu hnulei ah a tolh ter ziahmah ti kha a hngalh, an mah le an ramchung te ah zalonnak aupi ding a um rih lio ah an ral dirhmun fehnak le thawnnak ding i an ralkap i an hun luh than thluahmah mi nih a ngaih a chiat ter tuk.

England Ralpi pahnih nak i a luh lio te cu Ireland caah caan tha a si in a hmuh i Raalthawh a duh nain a hawi le cu an i biatak lo ngai in a hngalh a hmuh ningah cun Ireland ram ka daw ai timi pawl cu chim lawng an cak nain a taktak i hun colcangh an tim lo in a hmuh hna cucaah Ireland Citizenship Army mi mipi thazaang pek nak tello zongin Ireland caah ral a kap kho ko tiah a chim tawn. asinain ICA chungtel cu zahnih hrawng lawng an si. Kum 1915 khuasik thla ah cun James Connolly cu ralthawhnak hram domh dingin a hna a tla i ICA pawl cu hruai in British ralkap do dingin ai timtuah.

Cu lio ah cun Irish Brotherhood timi thlithup phuntanh buu an rak um ve i cu hna zong nih cun a thli tein timhtuahnak an rak ngeih ve lio a si, IRB hruaitu pawl nih James Connoly timhtuahnak an rak hngalh tikah an i manh hlan i ral thawhnak a um ah cun an i timhtuahnak vialte cu zeihmanh lo ah a cang sual lai ti an phang ngai ngai cu caah James Connolly cu ton an duh 19 Dongkhar kum 1916 ah cun lam a kal lio ah IRB chungtel pahnih nih an hon kham i IRB Millitary council ah an hruai cuticun a zulh ve ko hna. cu hmunah cun IRB hruaitu Tom Clarke, Joseph Plunker le  Patrick Pearse, hna nih an rak hngah ko. IRB hruaitu pawl nih cu British sin i ralthawhnak ni ding rikhiah a si cang nak le Irish tlangval pawl zong mi thawng nga hrawng timhcia in an um cang nak le meithal zong German ram in an cah lio mi a hong phanh deng cang hna nak hna, cu an rikhiah mi ni hlanah ICA pawl nih thil nan tuah ah cun an i timhtuahnak vialte zeihmanh lo i a can lai nak ding kong hna cu an chimh.

James Connoly nih cun IRB ah ai tel mi le hruaitu pawl hna lakah a mi theihhngalh mi an um pah len cu hna cu kum 1913 buainak lio i Workers union pawl tuk le den an si lio ah a rak aukanh tu le a rak bawmchantu hna an rak si hna i Mirethei le harsa hna caah zawnruahnak an ngeih zia zong a hngal i nain Socialist an si lo timi zong a theihfian ko. cu caah Socialist cawlcanghnak cu hramthawk ter an tim lo si in a hngalh. James Connoly nih cun "Mipi harsatnak le retheihnak hi ka hngalh an mahtein ram ngeitu an si khohnak hnga le an dirhchuah khohnak ding lawngah rian ka tuan lai" tiah a leh hna, IRB hruaitu pawl nih anti ve mi cu "Hi ram nih zalonnak a hmuh lawngah mipi nih an mahte in khuakhan lairelnal le hi ram hi an mah ta a si kho lai" an ti ve. James Connoly nih ruahnak ah cun hi ram mipi harsatnak hi England kut in kan chuah ah cun thil ngan ngai pakhat ai thawk khoh nak lam a si ko lai, hi ram mi hna ca lawngah silo in vawlei cung mi rethei le harsa hna vialte ca zongah ngan le cak deuhin riantuannak a si kho men ko hnga a ti" cuticun an sinah ai tuanti dingin a hna a tla.

Cuticun Connoly cu Board Member ah an chiah colh i a hnu lebangah cun Millitary Council chungtel ah an chiah cuticun Ralthawhnak ding ni ah 23 April 1916 cu rikhiah a si i Liberty Hall cu ralthawhnak ding caikhannak hmun bikaha ahong cang colh ve i Cirizenship Army chungtel pawl nih zingzan in an ven, Connolly cu IRB he an tuanti i Irish zalonnak ngei kho dingin riantuannak ah ai tel ko nain a Socialist thinlung bel a kal tak lo, Citizenship Army chungtel hna sinah cun hitihin bia a cah hna "Kan ram zalennak ding ca lawngah ral kan do ah ruat hlah uh, retheih harsatnak lakin kan zalen khoh nak hnga ding ca zongah kan tuan timi hi nan philh awk a si lo" tiin.

Liberty Hall ah cun Ireland zalonnakding phuannak cathluan cu an nam i cu Cathluan a nam tu hna cu ICA chungtel chungin an hruaitu pathum Michael Mallin, Liam O'Briain le Christopher hna an si, cu an thil print mi tha te in an fun i ram kip ah phawt dingin an timhtuah cu lio te ah cun telegram a hong phan i James Connolly an hun hmuh ter tikah Telegram catlap cu tuangah a hlonh i hrang ngai in a zai i Macc Oneil hi ka kah lai a ti, a ti. cu catlap ah ai tial mi cu a Ralthawhnak ni dingah Millitary council nih an timhtuahmi cu an hotu dingah an ruat mi O Mac Neil nih cancel a si nak le thawn a si nak kong a hun thanh hna nak a si.

Millitary Council ah cung i elhnialnak fak ngai a chuak i sau pi an i caih hnu ah an hotupa bik biakhiahnak cun an zulh i nikhat in a ni an thawn i Easter Sunday an raltho dingin an i timhtuahnak cu Ester Monday ah an thial. Easter Monday cu a hong phan. Connolly cu Dublin khuapi dihlak ah Raltho pawl nawlpetu bik a si i, Ireland khuapi bik Dublin i an nawlpetu bik a si caah Ireland pumpi nawlpetu si colh ko, nain cu ralthawhnak cu khuapi lenglei ah cun hmun tlawmte lawngah a tlung, Connolly nih cun ralkap umtuning a hngalh i zeithil dah a tlung lai timi zong fiangte in a hngalh cia i a hnuzul hna zong nih an upat i a nawl an ngaih. Sunday ni ah thawk dingin an i timhtuahnak cu Monday i thial a si caah lam tampi ah an hlawhcham lai timi zong a hngalh cia ko nain cu an thil tuah mi cu hlawhcham hmanhselaw hihnu hmailei caah Irish ca i zalonnak hramthgawk a si kho ve ko i cu lawng hmanh silo in British nih a uk mi India, Africa le hmundang mi hna zong nih an hnu an hong zulh ve te lai timi ai ruahchan.

Connolly nih a hruai hna tikah raltuknak ah theihhngalh a ngei cang mi cu sikaw a thil tuaktan ning zong a tha i a thil tuah mi zong ningcang te in a kal kho, khuapi chung i an lak rih lo mi British hmunhma pawl la dingin mi a fial hna i an lak thluahmah hna, British nih ralkap a hun thlah chap lai i i kahnak fak tuk nih a zulh than lai timi zong a hmuh cia i an lak cia mi le a tanhmun hna ah fek tein an rak kham khoh hna nak hnga timhtuahnak zong a ngei cia, a sinain British ralkap nih Bomb in an den duh hna lai i Dublin khuapi cu khang dih an duh te lai timi bel a ruat lo. asinain British cozah nih Bomb in a hun den hna tikah a lau hringhran

Thursday ah cun GPO cu a chuahtak i British ralkap nih umhmun khuarnak ah an hman mi Building dang pawl chim than dingin timhtuahnak a ngei Building pakhat chimh than dingin a duh mi cu a hlan ah William Martin Murphy timi pa he Irish hlawhfa bawl nih buainak an rak ngeih hna nak hmun le mi tampi tlaih le tukden nak a chuahter tu nih a ngeih mi Inn a si. cu hmun cu British ralkap tam ngai nih an ven i an hon chim tikah James Connolly cu fak ngai in an hliam i a kerek ah meithal mu nih a khenh i a ruh a tongh caah dir kho lo in le thisen tam ngai a chuahter. zanlei suimilam pali hrawngah GPO ah an kirpi than i cu hmunah cun Doctor pakhat nih a rak zohkhenh.

GPO cu Bristish ralkap nih lak than dingin fak tuk in an hong bawh i Bomh he minung he an hong chim a hliam le hma he Connolly cu a um ko bu zongah raltha ngai in a nau le a forh hna i khua a khang thiam thiam rih ko, Irish tlangval pawl nunnak cu tam ngai a liam cang i GPO cu an nunnak a dih tiangin kilven an timh ve, a hliamhma ruangah GPO chuahtak dingin an fial hna ina duh lo, kan nau le sinah a dongh tiang in ka um ve lai kan chuahtak ding a si hmanh ah a hnu bikah ah ka chuak lai a ti.

Asinain hmukipah an sung cang caah le teinak hmu kho dirhmun i an dir lo tikah Surender nak an tuah i amah Connolly nih a mit a tial, cuticun Bristish ralkapkutah an um i Connolly cu Dublin Castle ah a hma zohkhenh ding in an kalpi Damdawi inn ah a hliamhma he dir kho lo le fak tuar in a um ko lio ah cun May 12 ah thah dingin dan an tat piak, a nupi le fanau hna nih an kah hlan ni ah damdawiinn ah cun an va zoh i hitihin bia arak ruah hna, "Zarkhat chung hngilh lo in ka um hnu ah nizan cu kai hngilh ve i, zan suimilam hleikhat ah kai thang i khua ka ruat, zing ni a hong chuah tikah kei cu meithal in kah i thah ding ka si cang, nan tah ding awk a si lo hi ka nun donghnak ding hi ai dawh tuk ko e, ngaihnuam tuk a si ko lai e, Irish socialist pawl nih hibantukin ka thil tuahmi hi an theithiam kho men lai lo nain Irish cu kasi ve fawm cu teh" a rak ti hna. cucu a dong le nih an hmuh hnuhnun bik nak ah a cang.

Cawnningani May 12 kum 1916 ah Kilmainham Gaol hmun i mi thah nak hmun ah an hruai i amah in a kal khoh lo caah an zonh i amah in a dir khoh lo caah thutdanh ah an thutter i an tem, a thihlai ah thlacampiaktu dingin Father Aloysius Travers cu a hong dir i asinain James Connolly nih cun keimah nih thla ka cam ko lai, "A ka kap tu ding ralkap vialte hna caah in thla ka cam lai an tuah ding mi an rian an tuah i a si ko" a ti. cuticun an kah i a nunnak cu lak piak a si. cuticun Irish hruaitu dang ruak an chiah nak hmun thlankhur pakhat ah an thlak ve i hmunkhat ah an phum hna.

James Connolly thawngpang Irish mipi nih an theih tikah an lung a fak hringhran i, cu Easter Rising ah ai tello mi le thazaang a pe lo mi hna zong nih an lung an fahpi ve i Bristish cozah huatnak in an khat i Irish mipi thinlungah a thar in zalonnak duhnak nih hmunhma a khuar i mi tam deuh nih zalonnak i colcanghnak cu thazaang an hun pek.