Minmei zaam hna an ttian tikah Lungduh lennak ka phan ve lai

Minmei zaam hna an ttian tikah Lungduh lennak ka phan ve lai

A hmanthlak khi hun zoh ah *Ziah hen, Zaanmang talah ton awk na that lo* tiin hun chuahchalh ka duh tawn.. Ni le thla hna an Liam, Kum no te in hong Ka liamtak ko hmanhsehlaw ka thinlungah a Hlun hringhran, Pathian  nih a si kho hrim hrim ding  thilpek pakhat in ka duh mi ka hal sehlaw *amah te kha* tiin ruat cungcang hau loin ka leh colh ko hnga. Kum caan tawituk lengti manh in rei lo tuk in i theihngal hmanh usihlaw​, Vawleicung nu ka hngalh mi vialte lakah a ka theithiam biktu le ka tlaihchan bik mi pakhat a si. Caan hi khirh than khawh sisehlaw, Joshua bangin caan hi tlai kho be usihlaw , Kan lenti caan ah Khan ka khirh hnga I, Kan nunti lio kha ka tlaih hnga.

Mi nih na nunchung ah zeithla nai lunghmuih bik caan tiin ka hal hna sehlaw, "a tang cungah hnangam tein ka bek lio kha" tiin I chuang ngai in ka chim Lai.. I phuhrung loin. Nu cheukhat *Dawtnak lamthlurpi* hi ka hrawn pi ve cang hna, a sungkhun in Duhdawtnak bia zong Kan phai, saduh zong Kan that tawn ko, ka ngaihchiat lungretheih caan zongah an hei umpi ve tawn.. Nain nang he *Dawtnak lamhruang* Kan hrawn ti tlukin sunglawi hi ka tong rih lo. ho thla na first an kati ah ka thinhlung nih a hlam tthan i ka thin a tur tthan tawn. ka philh khoh lo zia kai fiang. A mah ah Philh timi a um ve lo zia zong. 

Tanghra ka cawn lio ah First Term ah English Subject ah 97 Hmu bu le a dang ah 80 viar hmu bu in Mathematics Subject ah Zero ka rak hmuh lio, Second Term zongah cu bantuk thiam thiam. Cuticun ka mangah ka hmuh i "Math ah khan rak ttang deuh awh.. na failed sual lah Board exam ah" ka mangah a rak kati i ka mang hmanh i ka hmuh hnuhnun bik a si nak kum.. cu tlukin ngakchia hmanh ning dawtnak ka theihthiam ka in Dawt tir a si mi cu a hmanthlak lawng ka can a si cang.

Nang ngaih lunglen le ttah caan hna hi ni le thla bang an liam kho tawn lo , kha tluk a tam cang mi kum le caan ni le thla hna nih khan nang a ka philh ter kho lo. Tlangcung Chokhlei pardawh bang zeizong te i kan zeizong vialte na si kha. zahan nai te hlah maw tiin kan hram tthan tawn e. Lungduh liamcia zuun ngaih a fak khun ko, ruun hlumtu nang tello cun nun zia ka thiam lo, riaklang va bang ka len caan lawng a sau ko.

Hringnun parbang a enn caan tawite darbang kan lenti lio le sambang tthen khoh a si hmanh kan ruah bal lo lio ah caan sinah na ciam ve ko dah ngai, na hmanthlak hna cu Movie zoh dawh bik bang kan cuanh tawn lilen caan ah nun kan vai kan ttap tawn nang zuun ngaih ah. minmei hna an zaam caan vaurawng hna an enn caan ah nunhlun le nehtthing hna an thar tawn tuar a har ko, ka cantawk khuarel ah hin. Ton tthan caan chuak seh tiin ka mang ah tal seh ti hmanh ah zaan nih hngilh khoh a si lo nang ngaih ah. 

Harnak vawlei ramah hin  nang tello cun nuamh caan le lawmh caan an tlam a tling thiam lo, a kan hnemtu dingah Pathian kan sawm theu tawn, tuarnak le lawmhnak caan hmanh ah Pathian sin lawmhbia na chim tawn kha ka thinlung ah an caam zungzal ko, A pamhmai mi lakah pamhmai cem, chungtling len lio caan hna kan ngai tawn darkhing bang ton tthan caan um seh mu. Na damchung caan tawite ah khan diknak, rinumnak, miphun ttanh nak le carel huam dingin na kan cawnpiak mi kha kan upa deuh deuh a sunlawi zia kan i fiang deuh deuh. Ni le caan hna hung liam tawn hmanh seh nang ngaih ka bang kho lo kan nehnang hna an thar tthan tawn. Pathian khuakhan tthennak caan cu kham khawh a si lo, Pualva kal khamtu cu Phuncawng par anti nain nang na kal kan kham kho lo. Tluangdang ka tlawn lio ah sunghno  a liam an ka thanh ni, mi fa nau pa nih a theihthiam lo zia le ai zumh lo zia kha na hmuh ko kha vancung in. 

Fahnak, harnak le nganfah um lo nak ruun nuam ah cun kan i tong than te lai timi ruahchannak hi ka thinlung ah a dai ballo cu caah kan zungzal vawlei pinlei ram khi ka ngai tawn. Vanram kawtka hi pakhat lawng si lo in Vanram kutka hi pahnih a um i, Mifel le mi ttha mi hna lawng luhnak pakhat lawng si lo in Vanram kutka pahnih kan nih misual mifello hna zong luhnak vanram kutka pahnih a um ah cun na sin kan phan ve te lai ti ka ruah ah ka zungzal ram ding khi ka ngai tawn.

Hi ka khualtlawnnak vawlei ah minung ka si chung hi caan tawite hrang lawng a si, Ni le caan ai thlen bal ti lo nak Khuapi thar ka phanh nak ding i kai timhtuah nak  hmun ding ah ka um chung nak ding lawng asi, Cu ram sunglawi khuapi dawh cu a rawk bal ve lo, cu khuapi dawh, ai dawh zia chimfian thiam lo ding mi khuapi ah cun dawtmi le a kan dawtu hna lawmhnak dong tilo in an leng i hi vawlei nun hi an ngai ti lo, Cu khuapi sunglawi ai dawh zia hrilhfiah khawh lo ding mi khua ah cun zungzal zungzal in kai dinh lan thai ding nak Khuapi a si.

Cu khuapi cu Dawtnak khuapi a si i, zungzal in kai din ve te lai, cu ka ah cun ni le caan hna ai thleng ti lai lo, ttah caan a chuah i, nih caan a chuah nak vawlei bantuk hi a si ti lai lo, ni le thla hna hi ai thleng ti lai lo, zungzal in a sunglawinak nih an cerh cang lai i caan ai thleng ti lai lo, hi vawlei ah cun a caan ah ruah a sur i , a caan ah ni a tlang tawn, cu khualipi ah cun nithla ai thleng ti lai lo i har caan hna an um lai lo, cu khualipi ah ka len ve tikah cun hi vawlei nun hi ka ngai ti lai lo, zungzal zungzal tiang caan ai thlen tilo nak Zion khuathiang ah ka um lan cang lai caah.

Hi vawlei ni le caan hna an liam lengmang bantukin hi vawlei ah ka tthat lio caan ttha hna zong hi nifatin zungzal ram ni le thla ai thlen lo nak hmun panh in an liam ve cuahmah.  Cu ram ah cun liamcia dawtmi hna nih an rak ka nghah ko, cuka ah cun Vanmi hna le Serafim hna he Tufano Bawi an thangtthat, an thangthatnak aw dawh cu khuapi ah cun a thang i, cu khawpi cu dawtnak in a khat i dawtnak ram ti zong in an auh tawn, cu hmun cu phanh tuan ka duh in ka hngahhlang ko, Hi vawlei hringnun hi ka ngai ti lai lo, Dawtnak Zion ram ka phak tik cun.

Hi vawlei minung kan hringnun hi cu tuanbia bangin an dong than tawn, sertthan a si nak hnga le nun thar a um nak hnga, caan sau a nguh lo, an ciam zau tawn Pangpar chikhat an par i an vuai tthan bantukin Hi vawlei ah cun ttah caan a tam tlukin nih caan a tam lo, chikhat kan i nuam kan ti nain a deu in kan i nuamh caan a tam deuh tawn. aw vawlei nun ngai hi hun ti ttualmal zongah zei santlai hnangamnak tling a um tawn lo. 

 cu van in khuapi ah Vanmi hna sinah ka lungduh hna hla an sak lio ka hei hmuh hna, an mui ai dawh zia cu ka chimthiam lo, an hnangam zia an lawmhnak a tlin zia ka hei hmuh ko hna, Van khuapi tualcer ah cun an duh a tling an hna a ngam ko ka hmuh hna. Khua ka ruah ah hi vawlei i chun ni tlak ding ka ruat ngam lo an sin phanh zawkzawk ka duh. Vawlei pinlei ram tthen tilo nak ding ram ah cun, cu hmun cu phak ka duh ko cang, cu hmun ka phak tik cun an rak ka dawn ve te lai ka lungduh liamcia mi hna nih van hauhnar ah. 

Cu khuapi zuun ngai in ka ttah caan a sau cang, ni le thla ka rel a tam cang, ngaihchia in vawlei ni le thla ka rel a tam cang, cu cungvansang khua ka ruah ah pangpar phunkip an par cung vansang ah, ka kumkhua hna sau in ni le thla hna liam zawkzawk sehlaw ti ka duh tawn. Cu ram ah cun ni le thla, kum le khua hna rel in caan hna an um ti lai lo, ngaihchiat ttah ai hramnak hna zong, Vanmi hna sinah sertu  thangthat ka duh ve cang. 

Khua ka ruah ah lunglen a zual chin i a ciam kho lo ka ngaih zuunleng, cung vansang Jerusalem khuapi thar cu, minung nunnak hringnun lawng nih a ka kham rih.  Ka ngaih a zual tawn ka zungzal ram ding ka ruah zawn hrim ah cu hmun ah cun ngaihchiat vansan a um ti lai lo cu khuapi dawh ah vanmi hna he lawmhnak hla sain kan lennak ram ah cun ka cuanh zawn ah phanh tuan ka duh tawn, cu khuapi ka phanh tik cun lungduh kan tling cang lai zungzal zungzal in Hosana le Amen tiin kan thangthat ni ding cu, aw... ka hngahhlang tuk Van Khuapi dawh cu.

Hi vawlei ah hin cun Thlarau thiang sinah hong ka hruai dingin ka nawl len ko bu zongah ka tlu tthan tawn, hi vawlei ngeitu sualnak hi ka tei kho tawn lo i ka sual in ka tlu tthan tawn i ngaihchia vansangin ka um tthan tawn, ka khualtlawnnak vawlei ram ah hin ka tlau in ka tlu tthan tawn, a ttha tiah ka hngalh ko mi hmanh ka tuah kho tawn lo i, a ttha lo tiah ka hngalh ko mi hmanh ka hrial kho tawn lo. Bawmh herh mi hmanh ka bawm kho tawn hna lo, keimah bantuk mirethei sifak ka hmuh hna i bawmchan kho loin ka um hrim ah hin ka celh tawn lo. 

Hi vawlei ka nunchung ni le thla hna hi cu buainak in a khat mi men khi an si, Zion khuapi khi ka ngai tawn, cu khua hauhnar khua chuah hauka ah cun bawmchan kho tu nih an ka don tikah ah cun ni le thla rel ding an um ti lai lo, tar le ngakchia an um tilo, sifak santlailo an um ti lo an ti, kan khualtlawnnak vawlei ah hin hnangam dinnak hrim a um lo, kan thinlung le pumsa saltannak kan thlarau tihalnak ram sawsawh a si. Buainak minmei zam le khuadawm pinlei ram khi ka ngai tawn, cu ram ah a leng thawngpang dawh cu ka hna nih a theih ko, hnathlam in. 

Mithiang mi hna lennak khuapi cu zumhnak mitin ka cuan theu tawn, ngaihchiat vansan a um bal lai lo, Bawipa umnak khuapi ah cun, Harnak le sungzatlaknak hna zong an um ti lai lo cu khuapi dawh ah cun. He vawlei harnak ramah hin ka cam chungah harsat sungzatlakanak le sualnak phunkip nih an kan uk i thazaang der in kan tlu tthan tawn. Harnak tuarin kan um nak a sau lai lo vawlei ah hin, kan nih biakam fa hna cu kan panh lio kan van inn  khi. Ka ngai tawn hringnun pinlei ram varal ram khi, khi ram cuan in ka ttap tthan tawn kan inn ka ngaih zawn ah hin. A har ko. 

Hi vawlei nun hi ka ruat tthan tawn, ka ruah a tam paoh ah ka van inn khi ka ngai tthan tawn. Lungduh dawtmi liamcia mi hna kha an nih cu nifatin in an sinah tufano bawi he a leng an ti. an sin phak ka duh ko cang. 

Harnak vawlei hi a rawh tikah, buainak minmei hna an tlau te lai i cu tikah cun ka chuahtak te lai hi vawlei hi ka khualtlawnnak lawng a si caah, Vanzuang va bantukin thla ka ngeih cang lai caah ka bawipa sinah ka zuang diam te ko lai, hringnun khuahar in ka len tawn caah le lungleng sivangin ka um caah cu ram nuam dawh cu ka phanh tikah hi vawlei ka nun sual hna hi ka ngai ti lai lo, buainak zong an tlau lan lai, Tufano kiangah cun. dinhnak ramnuam ka phanh hlan cu hmun khuahar ah hin ka hnangam kho hngin lo ka kawl tawn ko ka vai in ka thlavai a kiang tawn ko. 

Minmei zamnak pinlei ramin ka Bawipa nih a ka auh "Kafa ka sinah ra, hnangam lungdai in nai din la" a kati, cu hmunah cun keimah bantuk misual khuaruahhar tampi hna zong an i din ve anti, "hi sualnak vawlei hi na zungzal ram ding a si lo, na zungzal ram ding cu ka lim cang ka sinah i din ve te mu" a ti. phanh tuan ka duh tawn kei cu. Hi vawlei lawmhnak ni hna hi pangpar bantukin an ciam tawn ai dawhnak le a rimhmui hna cu vansang va bantuk an zuang diam tawn. 

Zan a si kan Vawlei hi cu, ka kalnak paoh ah muihnak nih a ka phak kalnak lam ka hmu lo,  Sualnak a tam i thliarhran ka thiam lo hrial zia ka thiam lo. Ni an liam i muihnak nih ka damchung hi a liampi tikah na sin um ve ka duh. Kan zungzal khua ah ka hrang i khua a dei te lai ding khi ka ruah zawn ah kai ngaih tuk, ka nghahlang hrinhran, na sin ka phak ka duh VAN Jeruslem mizaw hna damnak le misual hna felnak, mitcaw hna nih khua an hmuhnak ah khin ka damchung hna nibang an liam tikah phanh ve ka duh na sinah, na zinah zungzal tufanobawi thangthat ve ka duh. 

Zohhmanh Jesuh Kalvari tlang i ngaihchia in na um lio ah khan na ral hna cu an ni khah mu, Kei zong hi vawlei ka ngaihchiat lio ah hin ka ral hna nih an ka nihsawh ve. Thihnak varal ram i ka phak tikah na sinah ka dinhter ve sawh ko mu. cu hmun ah cun ka lungduh hna zong an leng ve an ti i an sinah nangmah thangthat ka duh ve. 

Ngaihchiat harnak ka ton caan ko ah hin ka ngai tawn. 

Salai C. Vanramdinmawi

(Tenglam)

Dated :Lawngtlai 

2:00 Am - 4:30 AM  (04 - July- 2019)