"Na thlacamnak kha ka theih i na mitthli kha ka hmuh; Zohhmanh kan damter lai"

"Na thlacamnak kha ka theih i na mitthli kha ka hmuh; Zohhmanh kan damter lai"

( 2 Siangpahrang 20: 5)

Pumsa a ngandam lo mi kan um maw? Thlarau in a damlo mi kan um? Lungthin a damlo mi kan um? Lung hnangam kho lo in khua a ruat mi kan um maw? Dawtnak nih fahnak a pek mi le zuunkhung a tuar mi kan um maw? Na zawtnak cu Vawlei thiamnak nih a damh khoh lo mi le Leicung Damdawi hna nih a damh khoh lo mi an si ti? Na lungthin cu a zaw i ruahchannak zong na ngei tilo maw? Na hnabeiseinak hna cu na lunghdonghtertu an cang i, na ruahchannak cu lungchirnak an cang.

Minung si hi a caan ah cun a har tuk, Chuah nolh than hmanh huam lo ding tiangin a um tawn, Vawlei hi a zia a chia i hmuh a nuam tawn lo, Hringnun hi hman thiam a har i lung a caw tawn.

A hlan ah Judah Siangpahrang Hezekiah a rak um, nikhat cu fak ngai in a zaw i a thi dengmang cang A zawtnak cu Vawlei thiamsannak nih a damh kho tilo i, Judah ramchung vialte Doctor hna zong an Siangpahrang zawtnak ah cun an lung a dong cang, Cutikah Profet Isaiah kha Siangpahrang Hezekiah sinah cun a vung kal i, Pathian bia kha a va chimh, "Hi bangin Bawipa nih, 'Na innchungkhar kha a ningcang tein chia tuah; zeicatiah na thi ko Lai, na dam than lai lo' tiah a ti" tiin Pathian bia cu a va chimh.

Profet Isaiah nih a chim duh mi a sullam cu "Na thih ko cang lai caah khan nangmah an changtu ding Siangpahrang ding kha na fa le lakah thim hna, Cun na fapa le dang zong kha an covo ding cio kha pe hna law, na inchhungkhar kha fel tein chia ta law , Robia hei chim ta hna, na thi deng ko cang i, na thih hnu hna ah buaibai tukin an um sual Lai" a ti duhnak kha a si ko. Na zawtnak hi na thih pi la na dam ti la loh, a tinak a si ko.

Cutikah Hezekiah cu a ngaih a chia tuk i a inchungkhar zong an tap dih , cutikah Hezekiah cu vampang lei ah ai mer i Pathian sinah thla a cam, a lung a dong hringhran cang a ram cu ral a ngei lio mi a si fawn a fale hna si le ngakchia tete an si rih cu kong a ruah hrim hrim ah a ram le miphun thlavaikiang tukin an um ding kha a ruat ngam lo, cuticun lungtak tein Pathian sinah thla a cam. "Mawi Bawipa zeitindah nangmah hmai ah zumhawktlak le lung cheu bang loin ka kal tawn i nangmah mithmuh ah a tha mi ka tuah kha na cinken nak hnga kan nawl" tiah a ti, cun Hezekiah cu a tap thluahmah ko. Pathian kha a thinlung dihlak in a biak i zaangfah a hal. A thlacamnak cu a tawi ngamsam.

Cun Isaiah cu Siangpahrang inn a chuahtak taktak hlan ah khan a sinah Pathian bia a hong phan than, "I let law ka mi hna Bawi Hezekiah sinah cun, hibangin Bawipa, na pu David Pathian nih, ' Na thlacamnak kha ka theih i na mitthli kha ka hmuh, zohhmanh kan damter than lai; a nithumnak ni ah Bawipa inn ah khan na hung kal lai. Cun na nunnak ah hin kum hleinga (15) kan chap lai. Nangmah le hi khua hi Assiria Siangpahrang kut chungin kan chuah hna lai i keimah ruang le ka sal David ruangah hi khua cu ka humhak lai" a ti tiah va chim" tiah Isaihah sinah cun Pathian bia cu a phan.

Pathian khuakhannak khuaruahhar tuk a si i minung ruahnak nih cun a hngalthiam tawn lo, Pathian nih cun Hezekiah zawtnak hmangin Judah ram pumpi kha a khamh i Vawlei rallian Assiria Siangpahrang sin zongin a khamh hna, cu lawng hmanh silo Hezekiah nunnak cu kum 15 in a chap piak.

Pumpak cio in harsatnak kan ton tawn, cheukhat nih cun sunghzatlaknak kan ton i, cheukhat cu kan chuahka in retheinak nih an kan don i, mirum chungkhar chuak kan si lo, Cheukhat cu an nu le pa nih an lungfim hnu pi ah an thih tak hna i, cheukhat cu Nu le Pa hngalh manh loin an tthang. Cheukhat cu Exam an passed kho lo i, Cheukhat cu Sianginn hmanh an phan ballo, cheukhat cu kedanhpum bunh ding an ngei lo i, cheukhat cu Ke hrim hrim zong an ngei lo. Cheukhat Lungfim upat hnu ah a hrut mi an um i, cheukhat cu an chuahka in a hrut mi an um ve. Vawlei hi cu khuaruah a har ko, cunak in khuaruah a har deuh mi cu hi vawlei a sertu Pathian hi a si.

Jesuh Vawlei a rat lio ah mitcaw le kebai a damter hna, mitcaw nih khua an hmuh nak le kebei an ke in an kal khoh thannak cu Jesuh a si. Mithi a thawhter hna i Mizaw tampi a damter hna, Mithi an nun thannak le Mizaw an dam thannak cu Jesuh a si.

Nutung pakhat cu Zemabawk Cancer Hospital ah a it ko, a kiangah a fanu siangiin kai lio mi nih a thuthnawh i "Chicken Soup for Cancer Soul" timi cauk kha a relpiak, Cu nutling cu a mit ai chim nain ai hngilh lo, a fanu nih Cauk chungah a rel mi tuanbia tete cu pakhat hnu pakhat in a ngai hna, Tuanbia pa 15 nak a fanu nih a rel lio ah khin, ( 2 Siangpahrang 20: 5) "Na thlacamnak kha ka theih i na mitthli kha ka hmuh; Zohhmanh kan damter lai" timi zawn te hi a hun relchih, cu Tuanbia a theih ah cun a nu mitthli, a nu biang cungah a luang.

A fanu cu a ngaih a chia i, "Nu ziah hen na ttah?" Tiah ttahaw in a hei hal. A nu nih cun "Kafa ka dam cang, Jesuh thawngin ka dam cang" a ti. "Kanu, na dam rih loh teh, Chemo zong thlai ding a tam rih si, Chemo hna kan thlai dih cun a dam zong na dam tak reng ko la" a hei ti. A nu nih cun "Silo kafa na theihthiam lo, Ka pumsa cu a dam rih lo nain, ka thinlung cu a dam i ka hna a ngam tuk hringhran, na thei maw nan ngakchiat lio ah ka chim tawn mi Jesuh lawng lawng hi bochantlak le damnak cu a si' kati tawn kha?, keimah hrim hrim nih pei ka rak zulh khoh lo hi, tucun kai fiang cang Ka pumsa cu dam tilo hmanh seh, ka thlarau cu ai lawm ko" a ti. A fanu nih cun ttah bu in a nu cu a kuh i "Kanu ka theihthiam ko" a ti.

A nu zawtnak cu a zualhma ngai ngai i a dam than ti lai lo ti cu an hngalcia cang mi a si, a hnukcah lawng an hngah cang mi zong a si, nain thazaang an pek i an forh peng nikhat tal a nunnak kan sauh ter kho hnga maw tiah an i zuam, cutikah cu zanlei i anu nih "Ka pumsa cu dam than tilo hmanseh, ka thlarau cu ai lawm ko" a ti tikah a kal deng cang timi kha an zumh.

An nu cu thlakhat hnu ah a kal i, a pumsa cu a dam than tilo in a thinlung cu a dam ko i, a thlarau cu ai nuam ko.

America ramah hlasakthiam tlangval Garth Brooks timi pa hi a rak um, High School a kal lio ah duh tuk mi nungak pakhat a rak ngei, nain cu nungak nih cun a rak duh ve lo, a duhlo lawng hmanh silo in mithmai tha zong a pe bal lo, ruahchan ding bia ka khat hmanhin a chawn bal lo, nain Garth Brooks nih cun a duhlo tu nungak cu ai thihpi dengmang, Pathian sinah High School a kal chung vialte ah thildang zeihmanh a hal ballo, cu nungaknu nih a duh ve khoh nak ding lawng lawng kha Pathian sinah a hal tawn, nain High School a kal chung vialte le a chuah hnu hmanhah a thlacamnak cu leh a si lo.

Cuticun khua a hung sau i kum tam an liam hnu ah Garth Brooks zong cu nupi a ngei ve cang, voikhat cu a nupi he an khua Football chuih zoh ah an kal, cu an kal nak ah cun High School an kal lio ah a rak duh tawn mi nungak cu a hmuh than, a nih zong nutung a rak si ve cang a fale he changchia ngai in a rak um ve cang. Garth Brooks thinlung cu cikhat te an thar than nain a kiangah an nu a thu mi cu a zoh than tikah "Pathian nih High School ka kal lio vialte ah a sin ka thlacamnak zantin ka nolh than mi a ka leh ning hi khuaruahhar hrim hrim a si ko, Kha chung vialte i ka thlacamnak kha tu kan nu hi a lehnak cu a rak si" a ti. High school a kal lio lungthin damlonak le hlawt a sinak in a damtertu cu Pathian a si i, a damter lawng hmanh silo in Kum tamtuk lawmhnak a pek chap, hi an nu hi zu le sa he sawn lengmang in inn a panh lio zongah dawtnak in a rak cohlangtu le rak domh tu a si. Zu a din ruangah riantuan kho lo le tangka ngeilo dirhmun a phak lio zongah a kaltak lo tu le dirkamhtu a si. Pathian nih High School a kal lio a thlacamnak kha tu a nupi hmang hin a leh piak.

Pathian nih Garth Brooks thinlung cu a hmuh dih a thinlung zawtnak zong a hmuh dih i, a damter kho tu zeidah a si timi zong a hngalh, cun a damter lawng silo in kum tampi a nuamter khotu ding hi zeithla a si ti zong a hngalh, Garth nih cun High School i a duh mi ngaknu kha hlah maw a si nain a rak i palh cikcek , Pathian nih a ti mi cu tu a nupi kha a rak si. Aw Pathian hi cu khuaruah a har ko.

Pathian nih kan thlacamnak vialte hi a ngaih dih kan zawtnak le kan damlo nak vialte zong hi a hngalh dih, a kan damter khotu ding le kan hrang tha zong a hngalh dih cu caah kan duh mi silo in kan hrang tha khan a kan leh, kan i ruahchan ning silo in kan herh ningin a kan leh. Kan duh ning silo in kan herh ningin a kan damter.

Pumsa a ngandam lo mi kan um maw? Thlarau in a damlo mi kan um maw? Lungthin a damlo mi kan um maw? Lung hnangam kho lo in khua a ruat mi kan um maw? Dawtnak nih fahnak a pek mi le zuunkhung a tuar mi kan um maw? Na zawtnak cu Vawlei thiamnak nih a damh khoh lo mi le Leicung Damdawi hna nih a damh khoh lo mi an si ti? Na lungthin cu a zaw i ruahchannak zong na ngei tilo maw? Na hnabeiseinak hna cu na lunghdonghtertu an cang i, na ruahchannak cu lungchirnak an cang maw?.

"Na thlacamnak kha ka theih i na mitthli kha ka hmuh; Zohhmanh kan damter lai"

( 2 Siangpahrang 20: 5)

Salai C. Vanramdinmawi 

( Tenglam)