Khuaruahhar Vel (Amazing Grace)

Khuaruahhar Vel (Amazing Grace)

Kum 1772 Dipa thla donghlei a si cang kumthar zong a phan than deng cang i Khrihfabuu i timhtuahnak zong sau ngai a kal cang, London in meng 60 hrawng a hlatnak khua pakhat ah kum 47 a si  mi Pastor Newton cu  kumthar  lawmhnak sermon  chim dingin timhtuahnak a ngeih cuahmah lio a si, cu pinah cun an khrihfabuu nih an sak dingah hla pakhat tial ding zongin khua fakpi in a ruat, cu a hla tuah ding mi cu Sabbathni a liam in rian an tuan than hnu zongah an harnak le thabatnak vialte a chawng kho tu ding hla si kho sehlaw ti a duh, cu hla cu an thlarau nun a thang kho tu ding le an nunlam ah ruahchannak a pe kho tu ding hla si kho sehlaw ti ah saduh a that. 

Pastor Jonh Newton nih cun a sermon tik i a chimding le Baibal ca a rel ding mi cu a thim cia cang, cu a Baibal ca rel ding mi cu Chanrelnak a pakhatnak Bung 17 cang 16 nak "Khi tikah David cu a lut i Bawipa hmai ah khan a thu i "Maw Bawipa Pathian keimah cu a hodah kasi i ka innchungkhar zong hi zeidah an si, hi tiang nangmah nih na ka hruai hi ?" timi Baibal cang te kha a sermon nak dingah ai thim mi a si fawn. Siangpahrang David nih a caan liamcia vialte a zoh than tikah harsatnak le a ral vialte hna a zoh than hna tikah amah lawng in cun a pah khoh lo mi le a phi a chuah khoh lo mi an si hna kha a hmu i, hitihin Pathian sinah thla arak cam. 

Hi Baibal chirchan hin kum 1773 Kumthar ni January ni 1 cawnningani ah cun a khrihfabuu chungtel hna sinah cun Pathian thawntha bia chimnak a ngei, Pathian nih hin kan hngalh lo in Thluachuahnak tampi a kan pek, asinain hi thluachuahnak a kan pek mi kan ngeih chun hna hi kan cohlan thiam lo i kan pawm khawh lo ah cun kan caah nun nih hin sullam an ngei kho lai lo, Siangpahrang David nih Siangpahrang thutdanh sangin a caan liamcia vialte a zoh than tikah khan, a ral nih rawlei ding ngei lo in an kulh caan, a hawi le nih an rawi caan hna le Saul tih in a zam lio vialte hna a ruah than tik ah "Maw Bawipa Pathian keimah cu a hodah kasi i ka innchungkhar zong hi zeidah an si, hi tiang nangmah nih na ka hruai hi ?"  tiah Pathian a thangthat, Siangpahrang David kong cu za rih sehlaw unau hna Pathian nih an hmuh hlan hna le Pathian dawtnak nan cohlan hlan ah khan zei dirhmun ah khan dah nan rak um i Pathian nan cohlan hnu le nan hmuh hnu ah le an hmuh hna hnu ah hin zei dirhmun ah dah nan um i nan phanh cang ruat hnik hmanh uh, kei cu Pathian ka rak cohlan i Pathian ka rak hmuh hlan ah cun Ttemttawn mi ka rak si chuak kho lo in ka rak tang a ti.

Thawngthabia a chim dih in cun Khrihfabuu mino hna nih hla an hong i thawh i cu hla cu amah nih a tial mi a si i, a hla hramthawknak cu "Vel" ti a si, Vel ti lawng hmanh si lo in "Khuaruahhar Vel (Amazing Grace)" ti a si. Pastor Jonh Newton cu Nu le Pa nawl a ngai tuk mi a rak si i a nu nih a cawnpiaknak hna cu tha te in thiam ai zuam. Bible rel zong hngakchia te in a thiam khawh pinah catial zong a thiam phah, nain ngakchia te a si ah a nu nih a thihtak i a nu a thih lio ah hin a pa cu Tilawng zulin hmun hlapi ah a um lio a si fawn hawi, a nu a thih hnu thla zeimaw zat a liam hnu ah cun a Pa cu a hong kir than nain a nu a thih nak in sau hmanh a rauh hlan ah a pa cu nupi dang a ngei i, a Nu- ei le a pa nih fa dang hna an hung ngeih hnu lebang in cun Newton cu an hnawn cang an fa hmanh ah an rel chih ti lo. 

Ngakchiate a si nain a dirhmun nih hawi a lawh lo caah Tilawng khal pawl a zul hna i Africa ram hna ah Sal an va tlai in Sal pawl cu Europe ramah an hung chiah tawn hna a Pa cu Tilawng khalh thiam a si caah a pa tilawng kongah hin thil tampi cu a rak cawnpiak cang caah khan tilawng sining kong zong a hngalh ve ngai nain a zulh mi Tilawng Captain nih sal bantukin a zohkhenh caah khan an va tlaih mi African sal pawl he dirhmun khat ah an um caan hi a tlawm tawn lo, cincik he an tem i Sal bantuk tak tak in an zohkhenh ve tawn, a rak tuar ve hringhran ko. Sierra Leone rilikam hna ah lebang cun sal chawr tak tak in rian an tuan ter i Mirang a si ve nain African minak pawl hna bantukin sal rian an tuan ter ve ko. cu hmun cun chuah than a si i an ram ah kum khat deng sal rian a tuan hnu ah  kir than dingin Tilawng ah cun an khin than.  cu hnu ah cun Lawng a zul than i hotu lei ah a hung phan pah ve than cang. 

March 21 kum 1748 ah cun an ram lei ah Sal tampi phur i kir than dingin timhtuahnak an ngei i Rilipi ah hnangam ngai in khual an tlawn ko lio ah cun kum 22 lawng a si rih mi Jonh Newton cu Thlichia le Tiso nih an hun thangh i an lawng cu a pil ding dirhmun ah a um cang, a hawi le nih cun dar an tum i hao paoh nih an mah le an rianhma cio ah an tli hna i Thli cu a fah caah le ruahpi cu atuk hringhran pinah tiso cu a sang hringharn fawn caah khan an Tilawng cu ai let deng deng tawn i minung zong a hlawnh len tawn hna. Cu lawngah cun John Newton cu hotu chang a si fawn caah rianrang in a umhnun lei ah a tli colh ve, culio ah cun an Lawng Captain cu lawng ai thui len mi nih Rili ah a hlonh i hmuh than khoh a si ti lo, cutikah an hotu chang John Newton cu Lawng khalhnak a tlai tu ding cu a si cang, an Captain a um ti lo ti a theih le cangka Lawng khalhnak cu a tlaih i, nain tiso cu a san caah le ruahpi le thlitu cu a fah caah zeihmanh san a tlai hlei lo. 

Cu lio te ah cun Jonh Newton nih cun nidangah a chim bal lo mi le a chim te lai i hi biafang hi a hman ve te lai ti hmanh a ruah bal lo mi "Bawipa Pathian kan zaangfah ko sawh" timi cu vawi tam ngai a chim len, cun lawng khalhnak cu a kut in a thlah lo, Thli le tiso nih cun suimilam hleikhat chung bak an den nain a lawng khalhnak cu a thlah lo i Pathian sinah "Kan zaangfah ko sawh law " tiah thla a cam pah lengmang fawn, cuticun suimilam 11 chung Thli le tiso nih an den hnu ah Thlitu zong cu a hong dai i khua a hong thiang ziahmah tikah an lawng zong cu a hlan bantukin khalh khoh a si than i an lawng cu rawk lo te in le him tein an Ram an phan kho than. 

An ram ah ah kum 1754 i a phak hnu cun kum 29 a si ve cang i  Pathian zaangfahnak kha a hngalh peng i Bible hna zong kum tampi hnu ah a hong rel than i Hebrew le Greek holh zong kha a hon cawn than hna i Pathian bia kha thuk deuh le fiang deuhdeuh in theih a hong i zuam,  zuumtu dang hna zong hawikawm ah a von ser hna, cu hna lakah cun cu lio ah thawngtha chim minthang George Whitfield le Jonh Wesley hna zong kha an i tel ve, a umnak kiangkap Khrihfabuu upa hna nih Rili cung i a thil ton mi kong kha an theih tikah an Biakinn ah biachimnak ngei dingin an sawm tawn, bia a von chim tikah mi lung a lak khoh ngai i Pathian dawtnak vel kha fiang pup in a chimh tawn hna tikah mi tampi ruahnak ah mi sawsawh silo in Pastor rian tuan dingin duh piaktu tampi zong a hong ngei. 

Cu lio ah an ram i Khrihfabuu ngan bik le thawng bik a si mi England Church ah Pator si dinin halnak a tuah nain an rak cohlan piak lo, nain khrihfabuu dang pakhat nih an cohlan piak i Pastor rian tuan hram cu ai thawk, Pastor rian a tuan pah in cu "Thoughts in African Slave Trade" timi cauk cu a chuah i mi tampi nih an rel i an duhtuk tikah Holh phun phun in an leh fawn hawi i German, Frenchs le Dutch holh hna pinah holh dang zongin leh a si. Cu cauk chungah cun Sal rian a tuannak in Lawng Captain rian a phanhnak le a thil ton mi le Lawng in khual an tlawn lio ah a hmuhton mi hna kha a langhter chih hna, Sal tlaih le zuar ning cu a duh lo ngai ngai i Sal ngeih khoh nak phunglam cu hlawnh dingin a aupi tawn. a hawi tha William Wilberforce he tangti in Sal chuah an si khohnak hnga ding le Sal tlaih le khih pinah minung a si ve ko mi saram bantukin zohkhen kha an duh loh i an doh tawn. 

William cu a lung a dong tawn i Politician rian kaltak in British Parliament in chuah ai tim tawn a sinain Newton nih cun a lungtlinpi loh i hiti hin forhfialnak bia a chimh tawn, "Politics hi na chuahtak ding a si lo Pathian nih a riantuan dingin an chiahnak hmun a si, a mi hna caah rian na tuannak ding hmun a si, Kan Prime Minister William Pitt hi hawitha ah ser law Sal ngeih khohnak phunglam hi hlawnh dingin riantuan deuh ko, Biakam hlun ah Esther kong hna hi i tlaih peng law, Esther Bung 4 cang 14 ah "Hi bantuk caan caah hin dahkaw pennak chung i na phak hi a hei si ko hnga, a ho nih dah a hngalh? tiah a ti" ti mi bia hna hin a forhfial tawn, cutikah kum hnih a liam hnu ah Wilberforce nih cun Sal ngeih khohnak nawl cu hlawnh dingin a riantuannak cu Parliament ah tlam a tlin ter khoh. William Wilberforce nih Sal chuah dingin a riantuannak cu England tuanbia ah a sunglawi ngai mi zong a si tikah khan cu a tuanbia he chuankhan cun "Amazing Grace" timi muicawl zong an tuah i mitampi nih an zoh duh mi le tangka tam ngai la luttu Muicawl a si kho. 

Zarhpini Tho thla ni 28 kum 1780 ah cun Newton le Wilberforce cu hmunkhat ah an um i Wilberforce nih cun a diary a tial cuahmah cu a diary chungah cun hitihin ca a tial "Pathian nih ka hmai ah thil ngan ngai pahnih a ka chiah piak Sal chuah an si nak le ka miphun hawi hna an lung ai thlen i kan nunphung kan thlennak kha a si ati, cu zanlei ah cun Newton le Wilberforce cu hmunkhat te ah an um i Pathian velngeihnak kong kha an i ruah. 

Newton cu a kumkhua zong a hong upa ve cang i a khuahmuh zong a fiang tilo i a lung zong a lo pah ve cang a hawikawm rualchan le amah tlaichan tu hna cu a ihkhun pawngah a donghnak bik biaruah dingin an hong thluahmah cang cu hna lakah cun a hawitha ngai a si mi William cu a hong ve than hawi i a sinah cun hitihin Newron nih cu biaro a vuih ta "Ka lung an lo i la khuahmuh zong a fiang ti lo, nain thil pahnih bel kai cinken peng ko rih, cu cu zeidang a si lo, lkei cu Misual tuk ka si timi le Pathian cu a ka khamtu khuaruahhar a si timi hi a si. tiah a rak chimh cuticun kum 1807 ah kum 82 mi si in a nunnak a liam i, a thih hlanah cun England ramah sal ngeih khohnak phunglam hnawn a si mi cu a hmuh manh ve. 

A thih hnu ah cun a hla phuah mi Amazing Grace cu a hung lar ngai ngai i vawlei pumpi cul hram a hun i thawk, nain England ramah cun an sa tuk lem lo, America ram ah a lu hmasa than i Sal an um rihnak le Sal ngeih khohnak phunglam an hman rih nak ram a si ca zong ah a si men lai, cu hnu ah cun Vawlei pumpi a hong cul i Martin Luther King nih "I have a dream" timi tlangtar in bia a chim lai zongah sak a si i, Africa ram zalonnak an pa Nelson Mandella thawnginn in chuah a si lio zongah African mipi nih an i lomhnak langhter dingah "Amazing Grace " timi hla hi an sak ve fawn. Berlin Wall timi an hrawh ka i ram pakhat vampang nih a then mi hna an hon i hmuh i Vampang hrawh a si ka zongah hi hla hi an i lomhnak langhter dingah mipi nih an sak than hawi i, cu lawng zong si lo in 9/11 timi Ralhrang nih America innsang pahnih an suk i an sunnak hla zongah hi hla thiam thiam hi an rak sak. Vawleicung holh phun tampi in leh a si i, mah holh cio in kan rak sakpi ve tawn. 

John Newton, Olney Hymns, 1779

Amazing grace! (how sweet the sound)

   That sav'd a wretch like me!

I once was lost, but now am found,

   Was blind, but now I see.

 Khuaruahhar vel a va thlum dah, 

Kei santlai lo a khamh, 

Ka rak tlau nain a ka hmuh,

 Ka mit a deiter than.

Minung kan nunlam hi a caan ah cun a har tawn ko nain har lengmang ti a um lo, mi cheukhat cu mirum chungkharah chuak in harsatnak le buaibainak ngei lo te in an nunlam an hrawng kho zong a si ko lai nain mi cheukhat hawi cu harsatnak le retheihnak a phun phun nih a kan tlunh i Hi vawlei ah hin kan nunnah nuamhnak caan a tlawm tawn, Mi cheukhat cu har lengmang le Pathian thei bu tein riantuan in hlawhtlinnak hmun an phan tawn cu tikah an nun liamcia le an caan vialte hna an zoh than tikah kan nih Khrihfa mi hna nih cun Pathian Dawtnak le velngeihnak a thuh i a san zia hi kan hmuh tawn, Santlailo bik le a sual bik zong kan si ko lai nain a dawtnak vel nih a kan khamh i, Mitlau bantukin a mah thei lo in kan vakvai tawn ko nain a velngeihnak nih a kan kawl i a kan hmuh than. Mitcaw bantukin Pathian cu kan hmu kho tawn lo i a velngeihnak thawngin hmuh khohnak a kan pek. 

'Twas grace that taught my heart to fear,

   And grace my fears reliev'd;

How precious did that grace appear

   The hour I first believ'd!

Cu ral nih ka phannak a hloh, 

Tihnak vialte an lo,

 Zumhnak ka ngeih hnu in ka hngalh, 

Cu vel a sunlawi zia.

Hringnun kan ti mi ah hin a rum he a rethei he harsatnak le tihphannak hna hi chikhatte cu ton cio le pah cio a si, Pathian ai bochan mi le Pathian a au mi hna cu, cu Tihphannak chungin a khamh hna i, ttihnak an ngei ti lo i raltha in hmai an nor kho tawn. Newton zong hi Rilipi ah Tilawng khalh in thihnak par ah a dir ve cang, Cathiang chung kan zoh tikah Jesuh nih Peter kha ti chungin a khamh ti kan hmuh bal theu lai, Neton zong hi Rili cungah ttihnak le thihnak nih an zelh cuahmah lio le a kut ah nunnak tampi a um lio ah khan Pathian kha a auh i chikhatte ah Pathian nih a von chanh. cu cu Pathian kha biatak tein zumh hram a hong i thawknak le harnak le sunghzatlaknak vialte a pah hnu ah a sin i Pathian zaangfahnak le velngeihnak a hong langh cu a si. 

Thro' many dangers, toils, and snares,

   I have already come;

'Tis grace hath brought me safe thus far,

   And grace will lead me home.

Tihphan awk le harnak phun kip, 

Ton bu in ka ra cang,

 Cu vel nih cun ka hna ngamter, 

Inn ah a ka hruai lai.

Newton hi a hngakchiat te ah a nu nih a thihtak i a pa cu Tilawng khalh in hmun hla tuk ah a um fawn, a pa a ngai thlavaikiang tukin a um tawn, a pa hon tlun lai cu ai ruahchan tuk tawn, nain a pa a hong kir hnu ah cun a pa sinah a ruahchan mi vialte cu zeihmanhlo an cang, Nupi dang a ngaih tak i a hnawn lawng hmanh silo in Ngaktah buangro in a chiah, ngakchia tein Tilawng a zul i , Sal dirhmun in kum khat leng cu cikcin a kut ah khih piak in Sal rian a tuan, cu hnu ah cun chuah than a si i an ram lei ah kir ai timh cuahmah lio ah an lawng cu Thlichia le tiso nih an hon den than tikah Newton ruahchan vialte le a nunnak cu a dih dengmang, cucu kum tamtuk a liam cang mi thil an si, tu ah cun Pathian nih a riantuan dingin a thim i kha bantuk harsatnak hna kha a tong tuk lem tilo, cu vialte a ruah ah cun Harsatnak a ton mi vialte hna chungin a khamtu hi Pathian a si kha a hngalh, a velngeihnak hi tiang tiang a ka hruai cang" a ti i, zungzal hmun Vanram nuam zongah khin a ka phak pi than lai e... a ti. 

The Lord has promis'd good to me,

   His word my hope secures;

He will my shield and portion be

   As long as life endures.

Pathian dawtnak vel a hngalh i Jesuh hnu a zulh hnu lebangah cun tam chin le thuk chin in Pathian kha a thangthat i a zumh Cathiang chungah ai tial mi Pathian bia vialte hna cu a cohlan hna i a pawm hna, a ruahchannak an si i, a hnabeiseinak nuntertu an si. cu tikah a nunnak a nguh chung le hringnun a cam chung paoh cu a Pathian nih khan a huhphenh lai i lam a hruai lai timi zong kha a zumh fawn. 

Yes, when this flesh and heart shall fail,

   And mortal life shall cease;

I shall possess, within the veil,

   A life of joy and peace.

Zungzal hmun nuam kan um hnu cun,

 Ni bangin kan ceu lai, 

Pathian kan thangthat zungzal lai, 

Thabat a um lai lo.

A kum hna an hong tam i a cuar hna an hun sawn ve pah cang tikah le a nunnak cu a chuhnu ruangmang ve tik ding zong kha fiangte in a hmuh ve i, "Ka tisa le ka thintur hna nih an ka bantak tik, zungzal nunnak in thlen piak ka hong si tik ah cun, Vancung ramnuam ah khin bawi luchin khumhter ka si ve lai i, cu hmun ah cun harsatnak le sungzatlaknak hna nih an ka phan ti lai lo, lawm le nuam in ka leng ve cang lai" a ti. 

The earth shall soon dissolve like snow,

   The sun forbear to shine;

But God, who call'd me here below,

   Will be forever mine.

Newton nih hin Hi vawlei hi zungzal a hmun ding an si lo zia kha fiangte in a hngalh ve. Hi vawlei cu hawhra bantukin a zawp lai ding zong kha a hngalh, Vawlei a dongh tikah cun Ni hna khi an mui lai i ceunak an chuah kho ti lai lo, cutik zongah cun amah a au tu a Pathian cu a ta a si zungzal lai nak kha hi hla hmang hin a ka chimh. 

Salai. C. Vanramdinmawi

(Tenglam)