Ka Zungzal Vawlei pinlei ram khi ka ngai tawn.

Vawlei pinlei ram khi ka ngai tawn.

Na thazaang a der maw? Na thinlung a zaw maw?

Na hawikawm tha bik na sinah biatak a chim ti lo tikah.

Na lungre a thei maw?Ruahchannak a dong maw?

Na tuah mi thil vialte zeihmanhlo a caan dih tikah.

Na tuahcia sualnak hna na nunnah thlalang bang an lang i. 

Cu nun nih Misual bik na si anti lio caan le.

Na thinlung nih a hngalh  thil tha lo a si ti

Si hmanhseh caan tampi tuahlo ding tuahin na caan a liam tikah.

Ka zungzal vawlei pinlei ram khi ka ngai tawn, nitinin tukforhnak nih hna ka hnawh tawn hmanhseh, hi ka pumsa hi baa in tlu tawn hmanhseh ka chung i nung mi thiang thlarau cu ka thawnnak a si, Khi hmun ah cun ni a tla bal lo anti, tlanh cia mi khuapi dawh ah cun ka lawi lai, a ruang cu lei hi kan ram a si bal lo, a hnu ah cu hmun dawh ah cun ka leng cang la. Khi ka hmun vawlei pin ram ka phak tikah cun a dawtnak dong tilo in khamhtu a tang cungah lunglawm thanuam in pardawh phunkip lakah dawtnak ramah khin lunglawmin kei ka leng cang la. 

Kan nih Khrihfami hna kan i cawnpiaknak ah cun hi vawlei harnak,  retheih thabatnak le lungretheihnak hmun in kan i dinh te nak ding hmun a um timi cawnpiaknak kan ngei, cu kan i dinh te nak ding hmun ah cun ttahnak hna, fahnak hna le lungretheih nak hna pawngah a um mi harnak, retheihnak le sunghzatlaknak hna hi an um ti lai lo tiah cawnpiak kan si, a caan ah hin hi vawlei ah hin chikhat ca lawngah khual a tlawng sawsawh mi kan si ti hna zong in an kan chimh. Cu kan i dinhte nak ding hmun cu hi vawlei ah hin a um loh i hi vawlei harnak pinlei varal ah khin a um i Vanram a si tiah kan i cawnpiak. 

Cu vanram cu a nuamh caah le khrih zultu hna caah i dinhnak hmun ding kan inn a si caah hi kan khualtlawnnak hmun hin kan tlung lai i kan thabatnak le lungretheihnak vialte hna kaltak in kan inn i kan tlun tikah cun kan Pa Pathian le kan dawtmi a kal cang mi hna nih an rak kan dawn te lai. Cu kan inn cu cheukhat nih felnak le that nak in luh an i tim tawn, cheukhat cu thilpek le thiltuahnak zongin luh an i tim ko, nain kan nih misual hna zong kha cu hmun kan phak lai ding kha Pathian fapa Jesuh nih a kan chimh, a nih cu mifel le mitha hna caah lawngah silo in kan nih misual hna ca zongah a rat nak kong le cu hmun cu a dawtmi hna caah a ser mi a si kha cathiang ah kan hmuh. 

Cu hmun zungzal kan inn ding cu ka ruah zawn ah nifatin angai in ka lungleng i, tthenlonak ram khi ka ngai tawn, zanlei ni a hong nem ruangmang i vankam ah Ni zong a tlak cuahmah lio hun hmuh ko ah khin inn lei ah lawi a cu cang si mu tiin ruahnak kan hun ngeih caan hrim ah hin Cunglei ah lawi khoh cang hi ka duh tawn, cu hmun cu ka inn tak umnak a si tiin a lang than tawn. 

Khrih zuultu hna nih hi vawlei hi har lengmang le chun zaan i ttah buin kan pah caan a tampi i, aw.. a har tuk Bawipa tiin kan Inn kan hlam caan zong a tam ko, kan nih Misual zuding ca hrim hrim ah hin hi vawlei hi chuahtak i lawmhnak le hnangamnak in a khat mi kan inn Vanram phanh lai khi kan hngahhlang tuk tawn, cu hmun ah cun khuahar lilennak hna an um ti lai lo timi kha kan i fiang tuk. minung sinak hi kaltak in kan thlarau nih kan inn Vanram a phak tik lai ding khi zumhnak mit in kan zoh i ruahchannak in kan cuanh tawn. 

Vansan chimpit ton caan ah thlacamnak ngei in kan ttap nain kan thlacamnak nih kan inn Vanram le kan Pa Pathian sin a phan kho tawn lo, Hi vawlei cu sualnak le fihhnawm in a khah caah kan nih zong cu hnawmtam cu kan i neh ve cang. Lazaruh a thih lio i kan Bawipa a ttah lio bang khan kan nun a thih cuahmah lio kan hmuh ah hin kan ttap tawn, nain Lazaruh cu thihnak in thawh a si bangin kan nun a thi cuahmah mi cu thawh than a si ve lo tikah kan taksa cu a nung nain kan hringnun cu a thi ko, cucaah kan Inn Vanram khi kan ngai i vawlei pinlei ram khi kan zoh tawn. 

Vawlei pinlei ramah khin ramnuam kanaan ram a um i cu ramah cun Zion Tlang dawh ngai a um fawn cu hmun cu kan inn taktak cu a si i, hi vawlei hi cu chikhat lawng caah kan khualtlawnnak a si, zawtfahnak nih kan taksa cu a hrawh cuahmah i, kum le caan nih kan pumsa cu a hlun ter cuahmah fawn ko, cu chung vialte hmanh ah cun thisa ngandamnak lei lawng silo in thinlung fahnak hna nih a kan nam than tikah hin kan nun nih a tuar cawk tawn lo, Mi ram ah khualtlawng kan si nak hi a lang than tawn. 

Hi vawlei ah cun kan zumh bik mi le kan hawittha hna nih a kan rawi tawn i a kan hlen tthan tawn, biakamnak hna cu lungfahnak an cang i, dawtnak bia hna zong kha thinlung khuaitu an si than tawn, hi vawlei ah cun zungzal timi nih hin kumkhat a phan kho lo i, nangmah lawng timi zong nih hin pakhat lawng a sawh tawn lo, cu caah hi kan nih hi leiram mi a silo mi hrangah cun tuar khoh a si tawn lo. Dawtu tak pakhat lawng kan ngei i cu cu Jesuh a si, a nih cu Vawlei pinlei ramah khin a um. 

Cu vawlei pinlei ram kan phak tikah cun kan lungfahnak hna le kan harnak le sungzatlaknak ton mi vialte hna hi i hnoh ngai in kan Pa Pathian sinah kan phuan ve te lai i, dawtnak bianem he a ttang chungah a ka pawm ve tik lai ding ka ruah ah cu kan inn Vanram cu ka ngai tawn. Kan nih misual hna zong Misual siti loin Mifel min kan put ve tik ding ka ruah ko ah hin cu hmun phak lai cu kai hngahhlang tuk tawn. Cu hmunah cun lei zu ri tilo in van zu kan ri cang lai. khuaharnak , lunglennak, ngaihchiatnak, lungretheihnak le sunghzatlaknak hna kaltak in hnangamnak tling kan co ve cang lai. 

Achambau mi ka nunnak nih tlamtling dawtnak ka kawl lio ah le a derthawm mi ka nunnak nih thazaang petu ka kawl lio ah, Tuu bangin ka tlau i, luatnak ka hmuh khoh lo lio, ka lamhnak hna an muih i ho tal nan um lo maw tiin ka au lio ah, Van in authawng a thang i kafa rak kir cang, ka fa rak kir cang tiin. a hmun lo mi kan vawlei ah hin hrawh khoh lomi pakhat hmanh an um lo i, a tling lo mi kan vawlei ah hin lawmhnak tling zong a um lo, cu caah kan nun hi a caan ah cun a rawk in hrawh zong a si ve ko lai, kan tlu lai i kan tho tthan kho tilo zong a si men ko hnga. kan tluknak hmunah kan bawk thai zong a si kho men ve ko. nain Vawlei pinlei ramah cun kan dir lai i a zuan hmanh kan zuang lai. Lawmhnak a tling lai i hrawh khoh kan si ti lai lo caah kan rawk ti lai lo. 

Hawi nih Bawipa a ttha an ti, Lawmhbia chim in an inthangthat.

Siseh kei ka nunah cu lawmhnak a leng ve lo.

Hawi cu an thlacam hlawh a tling.

Tha chin relin zaanlei ni an liam, Siseh kei ka nunnah hlawhtlinnak a um ve lo.

A caan ah harnak a sur lai, a caan ah lawmhnak ni a tlang lai.

Siseh zeithil hmanh zungzal a hmun lai lo.

Hawi dang zong harnak an phan i lei harnak an luat ve hlei lo.

Kan khualtlawnnak vawlei cu duhtlinlonak a si caah. 

Ka ruahchannak a donghtiang rawhnak tong hmanh ning.

Ka thazaaang nih a celh lo tiang tuar hmanh ning

Ka ca zumhtlak Bawi na si nak ai thlenglo.

Ka ca hawitha bik na si nak a zor hlei lo.

Na biakam bang zungzal na um caah.

Kan biatiam le dawtnak aanka hna nih kan lung a fah ter i lunghnalo in a kan tuaitam caan hna zong an liam lai an ciam lai, nun hlun le nehnang hna nih lunglen an phurhnak vawlei hi kan kaltak tik, Zungzal timi hi zungzal taktak a si i, nangmah lawng timi nih thil pakhat lawng a sawh nak hmun Vawlei pinlei ram, aw.. cu hmun cu ka ngai. Hi hmunah cun Taksa ram thil le Thlarau ram thil hna hi ka chungah ral an cang tawn i, Cross thihnak hriamtha hman ka thiam tawn loh i cu caah chunglei ral ka sung theu tawn. 

Hi vawlei ngaihchiatnak hi ka kaltak cang lai, miphunkip nuam sai mai in kan lennak ding cu kei santlailole thatnak ngei lo mi hi kei khamnhtu a dawtnak nih cun a ka hngah ko. Kan nunchung caan hi ni bangin an liam tawn fahnak le ngaihchiatnak lawng hi kan ton tawn. Bawipa biakhiahnak hohmanh nih kan hrial kho lo, Pathian chiatserhmi vawlei ah leng mi kan si. 

Thihnak Varal kan kai hlan ah cun ngaihchiatnak hi vawlei ah hin mitthli tla hmanhseh Vansang ruun nuam ah kan phak tikah cun thihnak ngaihchiatnak vialte a dih cang lai, Kan nun thawn nak le kum le caan hna liam hmanhseh Van ah inn ka ngei sunparnak ram ah khin hawidawt a kal cia mi he lunglawm tein kan leng te lai, khi hmun khi ka cuan Thihnak varal ramnuam khi Hawitha Jesuh nih a ka kamh mi ram a si. 

Nitinin ka nunnak ah Thluachuah petu maw Pathian.

Ka tonmi thil hna hi, Minung sinak in cun ka tuar kho hrim lo.

Chun le zaan in Bawipa ttah len ka ser ruangmang.

Mitthli he na sinah bawmhnak kan hal tawn.

Vansan chimpit ton caan ah thlacamnak ka ngei nain

Hmanhseh kan halnak cu Pathian sin a phan lo

Ka lung a fak tuk e, Sihmanhseh maw Bawipa 

Na lianngan sunparnak lkanghter na duh caah Bawipa kai lawm ko.

Lazaruh a thih lio ah Bawipa Jesuh kha an hlam

Nili liam hnu lawngah Bawipa Jesuh a sin a phan

A caan a luan tuk cang, Lung a dongh cang hnu ah 

Khuaruahhar Pathian cu ai phuang i Lazaruh a thawhter e.

Thlacam bal lo mi an dam Pathian theilo mi an rum

Miding mitha hna bel, an nunkhua a tawi tuk Micheukhat hna cu

Zawtfahnak a phun phun tuar hnu ah mual an liam

Bawipa khuakhannak hi theihthiam a har e.

Sihmanhse mu Bawipa kan hngah lio caan te ah

Na ka leh lo caa lungdong in ka um

A caan a zat rih lo kha ka theithiam lo e.

A tlai ballo Pathian tik le caan a zat cun thluachuahnak na ka pek

Bawipa kai lawm tuk. 

Salai C. Vanramdinmawi

(Tenglam)