Lawngtlai ruahpi sur lio ka ttial mi Daisy tuanbia

Lawngtlai ruahpi sur lio ka ttial mi Daisy tuanbia

Hringnun kan ti camcin mi ah hin cun Cikhat kan rak i nuamhnak hna, caan khat i kan thinlung lawmhnak hna le, hi caan te hi cu liam ti hlah sehlaw, tlaih khoh si sehlaw tlaih thai ka duh tiah kan ti mi caan te hna zong khi kumtam an liam i ni tam nih a kan liam phuat cang tik ah khin ngaihchihnak a kan phanhpi tu le ton than dingah kan duh tilo mi hna khi an rak si kho ve tawn. Cu lio ah thenkhat hi cu Vanram phak hnu hmanh ah kan hung hlam than ding thil hna zong hi an um ve ko, Hringnun ah cun zeihmanh hi a chia thlu lo i, zeihmanh hi a tha thlu ve fawn lo, That caan an um ve chiat caan an um ve, Fur caan a um i Tthal caan a chuah than bantukin Nuamh caan le ttah caan zong an chuak ve tawn ko. 

Nikhat cu tithlang lei in ka hawittha Lawngtlai a hong tlawng i sau a cam lai lo caah zaankhat te tal cu ka riak ve ta ko kati i, a tlun lai zaan a ka riak a umhar lai tiin Laptop ka hunh i biaruah pah in Coffee kan ding, Laptop chung hmanthlak pawl cu a zoh i Sianghleiruun hmunkhat a kai tti kan si tikah Graduation day kan hmaanthlak ti mi pawl hna a zoh, a caan ah kan ni nunhlun kan hlam pah, kan i hmuh lo nak zong a sau i kan bia a tam pah, Hmanthlak pakhat hnu pakhat a zoh lengmang lio ah cun "Hihi ho hme si?" a hong ti, ka hei zohpi i, ka lau, hi hmanthlak hi ka rak neih hmanh kai hngalh ti tung lo, "Ka hawi pakhat a si ko khah" ka hei ti salam ko, ka thutnak ah ka kir than. 

Zankhua zong a tlai pah cang i ihnak kan tuah i mah phone veve dekin kan it ve ve cang, nain kei cu ka mit a ku kho ti lo cu hmaanthlak le a hnulei ah a um mi tuanbia hna ka ruat than, cu hmanthlak cu Bus chungah lak mi hmanthlak a si i, Keimah le nu pakhat, Ka ttang ah a bek i puan pakhat i zawh in hnangam ngai in ai hngilh lio kei zong kai hngilh ve. kan hawi le nih an rak kan lak piak mi a si. Cu caan te ruat cun ka khuaruahnak cu a liamcia kum 5 ah a kir than. Ka hawipa sinah "Ka hawi pakhat a si ko khah" kati ko nain, a hlan ah cun hawi pakhat sawsawh cu a rak si lo, Midang caah cun minung pakhat sawsawh a si lai nain ka hrangah cun Vawleipumpi lawng hmanh silo in ka vanram le ka hremhmun zong a rak si chih. Aw ka nun tawh tlaitu pei a rak si ve cu. 

Sianghleiruun a kum thumnak kan chuah kum ding a si cang Fresher le Senior kan si lio ah kan thut ngam bal lo nak Platform hmanh ah kan thu ngam ve cang, cu ah cun ka hawi le he thu in kan Sianghleiruun ah a hong lut thar mi pawl cu kan rak zoh hna, "A ttawk a fa deuh, a ttawk cu a ttha bak, a naurawl peknak tthat ning hei tibantuk hna cu kan hawi rual a kan nilen tertu an rak si ve. capo le nuamsai nak ah lawngah kan rak hman tawn mi kha nikhat cu ka Vawlei thleng dih tu ding ka tonnak ah a cang. 

Asam cu hnulei ah pirh nawn khin a ttem i, Rang mei pirh bantukin a pirh, a ngo lawng si lo a no chih, a hnar thlungah khuazing hmaichunh fa te a si tung i fiah nawn te khi a um i cu nih cun a dawh ter chin hlahmaw ti ding khi a si, a sang lo nain mi niam cu a si lo. a nu lo nain nuhrat lo cu a si fawn lo, Voikhat hmuhnak in duh colh timi bantuk khi a si nain cutiang tiang cun ka thinlung a nem lo. Ka hawi le sinah cun kei cu khikhi ka duh ka heiti hna, ka pawngah a thu mi pakhat nih cun "Kan Department mi kan fresher a si, na ka chonh that le that lo"a hei kati, a liam hnu cun nih lengmang kan rian than. 

Caan a hong liam deuh cang i Students Union Election zong kan phan than cang, kei zong hawi le kawm bawmhnak le dawtnak thawngin Magazine Editor ah Uncontest in ka rak tling, Keimah ka opponent ding cu ka Asst ah a rak ttang beh, Magazine Department cangtu kanti cu, Department khualtlawn le, Department Picnic heiti bantuk, Department Sport hna zongah sawm le auh ve lengmang kan si, keimah ka kal lo hmanh ah Assistant tal kal ve lengmang a si, Kan sianghleiruun ah Department 22 le Club pali an um i chuahvah a tam ngamsam. Keimah hrimhrim zong Department pa 5 le Club pahnih picnic le khual tlawn ah ka rak telpi ve khoh hna.

Sianghleiruun ka phak fatinte a thli in Fresher nu te cu ka ngiat pah lengmang tawn, ka hmuh i a rem ah cun a a thli in a hman ka thlak tawn, nain va chonh biak taktak ding khi ka ngamh tawn lo, ka ralthatnak vialte ka chuah i cunglei bochan bu hmanh in ka zumhnak a derthawm ruang maw si hnga ka ngamh kho hlei lo. A thli in hman ka thlak mi cu ka khawn i a thatnak paoh khi Folder pakhat ah ka chiah tawn. Campus Bulletin ah College Miss top 10 pawl vawikhat hmanh a lang lo mi an um lio ah a nih cu Thlakhat voikhat a lang peng, ka hawi le nih capo nak ah an hun ka hman pah cang, "lamhrawn nikhua cozah dawh nikhua ah na pawr thlathlak he hi hnu hmai ah cun cangcawl hmanh na tluk ne lo" an kati tawn. a si tak reng ko, Cozah dawhnak lamhrawn ah ka hmai ah Police 400 hmanh um hna sehlaw ka pah ngam hna lai nain hi nu pakhat te hi um sehlaw a a hnu bik i ka um lo hmanh ah kai khirh hnga. 

Ni khua hna an hung liam i Semester exam zong kan phan than cang ,Nikhat cu kan campus chung MULCO dawr ah kan i din hna, cu lio ah cun cu Frseher nu le a hawi le pahnih zong an hong ve, lengah thingkung tang i thut a si caah a nuam i MULCO dawr thil pawl cu a kik mi lawngte an si fawn caah dinh a nuam hringhran, Kan Asst Magazine Editor cu Political Science Department mi a si ve caah le Department khat an si caah a hei auh hna i kan cabuai cu an hong kan hrawm ve,  Kan Asst Editor nih cun "Nan duh mi paoh cah uh, kan mah nih kan liam la" a hei ti hna. ticun theihternak hna an hong kan tuah i, a min cu Daisy a si timi ka hung hngalh cun, Kei cu an rak ka hngalh cang nak le "U Salai" tiah an ka theih nak kong kha an hei chim ve. 

Kan hmai an thut lio ah cun a ka zoh lo kar ah khin a mui ah fiangte in ka zoh tawn, cun bia a chim paoh ah a mitah fekte in ka zoh tawn, a ningzak pah ti ka hmuh, Kan hmai thla ah Inter- Sport kan neih cang lai nak kong le kan College ai awh ding pawl cu kiptuh ah Trial ngeih a si lai nak kong hna cu ka hei chim, cu lio ah cun Daisy hawinu pakhat nih cun "Daisy zong hi Table Tennis a thiam ve, la ve u law" a hei ti. cu cu caantha ah la in, Na no ka pe tuah Trial caan cu kan von chimh te lai, ka hei ti hngap. a phone number cu a ka pek i ka phone number zong cu a lak ve. Mizoram ah WhatsApp a hung lar ka deuh te kha a si fawn. 

Trial ngeih ni ding cu kan hung phan i Tuikhuahtlang Indoor ah Trial cu ngeih ding a si, zanlei suimilam pahnih ah cun Daisy cu ka hei chonh i Phone a la kho lo, WhatsApp in ca a hung ka kuat i, "Class ah ka um le kan sir chuah ka hal ngam loh" tiin. ticun rianrang in an classroom ah cun ka va kal i, an Lecturer sinah cun ka va hal piak i, Tuikhuahtlangah cun ka kai pi. an von i celh hna i pakhat lawng tei lo mi a ngei cu hmanh cu kum hmasa i kan Inter- Player a si cang mi champion lio mi a si. ti cun kan College ai awh Tabble Tennis celh ding cun an lak ve. 

Cu ni thawk cun keimah ah zumhnak le ruahchannak le tlaihchannak a hung ngei ve ziahmah i, an i practice nak tibantukah ka telpi peng fawn caah kal lei le lawi lei tiin ka kalpi peng tawn. Cu chung vialte cu Class kal lo zong a tam bak ve ka caan vialte a hrangah ka pek ve, Inter College cu kan hun phan tak tak cang i, a caan ah MZU ah an i celh chel, cheukhat Tuikual ah, cheukhat Kulikawn ah tiin kan buai ve ngai tawn. nain Diasy Tabble Tennis a celh zoh le thapek cu ka hrelh bal lo, Khuang he aurinnak he thazaang kan pek peng tawn. 

Gold Medal pathum kan lak cang i Table Tennis ah kan lak than ah cun kan College cu Champion ding khi kan si cang, Group in celh a si tikah tan a fak hringhran fawn. Final ah MZU le kan College cu an i tong ko ai, Kan College Player a rak si tawn mi a chuah hnu ah MZU ah a lut mi he Daisy cu ai celh ding an si cang, an hun i celh ciammam i Point khat heiti bantuk lengmang in an i tei, a donghnak taktak ah cun Daisy nih cun a tei kho lo, a tei ah cun Gold kan lak lai i kan College cu Overall Champion ding khi kan si cang nain a tei lo tikah Champion kan si kho ti lo. 

A lungfah tukah a ttap, kan lawi pah zong cun a ttap than, ka hnemh lengmang nain ka ttan i hngauh i ttah cu a dai hlei lo, ka ningzak tuk a ti, ningzah ding a um lo nak le a celhpi mi cu Senior Player a si cang nak hna, kan college a luh lio zongah kan Collge Champion pi tu a si cang nak le, a nih cu a hngakchiat deuh rih ko caah kumthar ah cun kan College Champion pi tu a si ve khoh ko lai nak hna cu ka thiam tawk tein ka hei chimh ve. cu zaan ah cun Dicipline hranghrangah kan Collge Player vialte cu zanriah kan tuah piak hna i, Campus chungah rawl kan ei hna. rawlei khim cun an inn tiang va chia than ding ka si.

An inn kan phak cun "Na hung lut la maw?" a ti, "Tuzan cu hung lut lo ko ning zaan hna a tlai pah cang ttung i, Hostel tlai tuk i ka phanh ah cun kan Monitor hmai ka khap sual lai lo, ka tiang hi si ko seh aw" ka hei ti ve, kal kai timh lio ah cun "Dir ta hmanh, " ati kai mer i ka hei zoh. "U-Salai, kan i practice chung vialte le, kan i celh chung vialte zongah na ka kal pi, na ka hruai i, thazaang na ka pek peng caah kai lawm tuk mu, cun tukum ah Kan College champion pi kho lo hmanh ninglaw, kumthar ah kai celh nolh tikah cun Champion dingin kai celh cang lai i, kan College na chuahtak hnu a si zongah zaangfahnakin kai celh lio na hung ka zoh than kho la maw?" a ti. A kut cu ka tlaih i, a sam a hmai ah uai hniang in a tla mi te cu ka tuah piak, a hnkhaw hnu ah ka chiah, a mitau piang rilrel te nih cun cu chung vialte cu a ka zoh peng ko, a hnakhaw hnulei a sam chiah pah cun a lu cu ka lei ah ka kawih i a hmur sen virmar te ah cun dinte in ka hei hnamh, cu khawh cun a mitah ka zoh, a hun ka zoh ve, sau kan i zoh lo, a kehlei in a ken mi a bag cu a thlak i a hon ka kuh pah in kan i hnamh than, kan hmur cu a thaw bik mi ice-cream bantukin an i dawp. 

Hostel ka phak hnu ih pah cun kai hngilh kho ti lo, Mihrut lawmh lo in an ni anti mi bantukin hohmanh nih capo an saih lo nain ka ihkhun cungah keimah pi lawng ka ha ka hmuh kho ti lo, ka ihkhun ka hei hnek chel, ihkhun cungin ka hei zuan chel, kai nuam hringhran. Chikhat cu ka hrut tak ko kha zaan kha cu.

Minung nih hin kan hmailei ah zeidah kan ton te lai timi hi zeihmanh kan hngal loh i, a ruah hmanh khi kan ruat chung thiam lo, khuakhan chung nak cu kan ngei ve tawn ko nain a tlam a tling kho tawn lo, kan i nuam cuahmah ko lio hlah maw kan ti lio ah khin ngaihchiatnak nih a kan phak tawn i, sunghzatlaknak nih a kan khuh lio zongah lawmhnak ni a ceu ve than tawn ko. Chunmang hna cu zanmang chia ah an cang i, khuakhannak hna cu dawnkhantu an hung si. 

Dawtnak kong hi ka ruat tawn nain a phi ka chuah kho tawn lo, Mithianghlim Pawl nih Korin khuami hna sin a cakuat ah hiti hin dawtnak kong hi a rak tial bal, "Dawtnak cu thlachiat a ruat i mi cungah zaangfahnak a ngei, Dawtnak cu a nah a chuak lo, a lung a puam lo i aa phorhlaw lo. Dawtnak cu tla bulbal in khua a sa lo i amah zawn lawng a ruat lo; a thin a tawi lo, palhnak kha ai cinken peng lo. Dawtnak cu midang sualnak cungah khan diriamin a um lo, biatak tu ah khan ai lawm . Dawtnak nih a in khawh lo mi zeihmanh a um lo, zumhnak a ngeih mi le ruahchannak a ngeih mi le in khawhnak a ngeih mi cu donghnak an ngei lo" a rak ti. Hi vialte ka ruah ah hin Daisy he kan hrawnti lio mi hi dawtnak an si ko rua tiah ka ruah i ka pawm tawn. 

Semester ai khat lo le Department ai khat lo hrat cu i hmuh le i ton caan a tlawm kho ngai nain caan kan ngeih ve vek ah cun kan i za tawn lo, Vawleipi nih caan a rel ning hi a tawi deuh tuk tawn kan ti, Suimilam pakhat i Minute 60 a um mi hi a tlawm tuk kan ti, Nikhat ah Suimilam 24 lawng a um mi hi kan lung a tling lo Suimilam 48 deuh si sehlaw kan duh. Zarhkhat ah hin ni 7 si lo in ni 14 um sehlaw, Kum khat ah hin thla 12 um lo in Thla 24 sisehlaw kan nih cu kan lunga tling tuk hnga. 4th Sem tiang Political Science ka lak ve caah a cacawnnak lei zongah ka bawmh khoh ngai i, Library ah cauk kan zoh ti chel, ca lawng zoh loin hla kan ngaih tti chel tibantukin kan caan ngeih chun cu kan i za tawn lo, Vawk hmanh nih kawawm sawlh lawng thla tam a ei ah cun a simh tawn anti, nain kan nih cu kan damchung hmanh hmunkhatah lengti ninglaw kan i ngaih a zual chin chin ding bantuk khin kan rak um. 

Nain tu hnu ka ruah than zongah ka khuaruah a har tertu le mak kati than lengmang mi cu, cutlukin kan i duh kan i daw, kan zawn kan i ruat i kan i tlaihchan ko bu le hmunkhat ah kan pahnih lawngin kan umti caan a tam ko nain horduhcuainak mit in voikhat hmanh ka zoh bal lo, aw thir lengmang le aw chuah diklo tiangin kan i zutmuai caan kan i hnamh caan hmanh ah a zahumnak khiah piak tiang cu kan phan lo, ka ngamh lo hmanh si lo in le ka cak lo hmanh silo in a donghnak kan phan lo khi a si ko. 

Ni le thla hna an hong liam lengmang ve, nikhat zarhteni cu Political Science Department Picnic ni ding a si i kan nih zong an kan sawm ve caah khan ka va telpi ve hna, Cu ni cu ruah a sur ngai i, Swimming Pool ah ai lio na, Cerhcet lak ah Pumpululh a chuih na tiin kan si, cheukhat kil khat ah artlang tein nungak tlangval biaruah zong an rak um ve, Pa deuh pawl cu Club pali ah kan i then i, Fresher, Senior, Senior Most le Magazine Team tiin Team khat ah panga cio tiin Thawl hnih kan chuah Champion Team nih i lak ding a si, kan ttang ngai hna, a voikhatnak ah Magazine team nih Senior cu kan tei hna, mual tlangah Daisy le a hawi le pawl zong an rak ttang ngai, Final kan i celh tikah Fresher kan tei hna lo i Thawl hnih cu kan sung. Cerhcet le tilu lak Pumpululh chuih cu a nuam ngai. kan chuih chung vialte cu Daisy le a hawi le nih mah semester cio tiin thazaang an rak pek ve hna. 

Pumpululh kan chuih hnu cun kan i ttawl hna i kan i khawlh khawh in Swimming Pool ah kan zuang lulh hna voi hnih thum hrawng kai leuh hnu cun Pool kotlang ah a thu mi Daisy pawngah cun ka hei tthu ve, Ruah cu a sur thluahmah ko rih nain Ti cu a lum tuk ko, "Ziah ruah sur lo nak ah na rak thut lo" ka hei ti, "A nuam ve hme cu, kei cu ruah lak i um hi nuam tuk kati, nain ka dawng le nih cun an ka siang lo" a hei ti ve. "Hong i roter usihlaw angki lum deuh hna i hruk usih " kati, "Um rih, tawite um rih usih" a ti. holh lo cun ka thu ko, "Awi a nuam tuk " a ti i, vansang le khi a zoh. ruah cu siam siam in tuk ttung loin a sue cuahmah rih ko, ruah sur cu a kik nain kan ke kan chiah nak Pool ti cu a lum tuk rih. a ke awrhlei cu ka el cungah a hun hlan i ka awrhlei ke cu a suk pah lengmang. cun a hun holh than "Vanram ah khin ruah a sur ve tawn hnga maw?" tiah ruahlopi in a hung ka hal. "Sur hnga hme maw, Vanram ah cun Ni a tla bal ti lai loh anti kha" ka hei ti, ka ni, nain a ni ve lo. "Vanram ah cun ruahsur ve sehlaw kati" a hun ti than. "Ziah hme?" tiin khuaruahhar ngai in. Nidang khom a lo loh, nidangah cun a hlim kho peng zeihmanh hi biatak tukin a la bal lo, nain nihin a biachim cu ai biatak tuk. 

Ka biahalnak let lo cun, "hong i roter cang usih" a ti i kan tho, "Ka pua" a kati i, ka hnulei ah a hung kai, thilri chiahnak tiang cun ka hei puak. kan kal pah cun "Na hngal maw, kanu le kapa nih an ka puang lio hi ka hawi le sin i kai uang bik lio a si, cun a pahnihnak ah nangmah na ka puak hin kai uang tuk ve" a ti. "Kan i tthitumh tik zongah kan puak pah tawn te lah" ka hei ti ve. kan ni pah lengmang. 

Khua zong tlai pah cang i ruahsur zong han in zanlei ninem zong a hong lang cang. Rawl kan ei hna i rawlei khim cun inn lei panhin lawi kan zal Bus pahnih an ken mi lakah a hmai deuh ah kan cuang, Puan ai ken mi kan i zawnh i a phone mi hla kan ngai Earphone kan i hrawm, a kehlei kutin ka awrhlei kut ai tlaih i ka liang ai hngauh "Ka mitku tuk" a ti hnu cun ka chawn ti lo. kei zong ka rak i hngilh ve, cu lio te ah cun hmaan an rak kan thlak, cu hmaanthlak cu Kum 5 hnu ah ka hawipa nih a hmuh than, cu hmanthlak cu kan Asst Editor nih an rak kan thlak mi a si. 

Kum 5 a liam cang kha zaan Sihhmui pin Picnic Spot in Aizawl panh i kan tlik lio kha ka philh kho lo, Kai hngilh lio cu mi nih an hung ka nek sual i kai tthang, Daisy cu Bus Thlalang pawngah thu in a ka hngauh i hnangam tein ai hngilh rih ko, ka kuh i ka ttangah ka beh ter law law, Van cu a thiang hringhran i thlapa nih a ceu tuk fawn thlalangawng in a thingkur kar in caan ah a hung lut mi Thlapa ceu nih note cu a hung ceuh tawn, hnangam lungdai tein ai hngilh i a mang ramah nuam tein a leng ti khi ruah khoh a si, Kum 16 a donghnak lei a hmang ve lio, mirang nih sweet sixteen an ti mi caan lio te khi a si, a hmur cu zeihmanh thuh lo zongah a sen kho peng, duh a nunnak hi hawikawm tha a hngal mi nih cun na phu loh tiin an ka capo phah theu. 

Bus chung cu a mui dih i Thlapa vang nih a hmai a hung ceuh caan ah cun a mui hi fiang tukin hmuh khoh a si tawn, a hei ka bochan ve zia hna le a ka upat thiam ve zia hna, mirum fanu nih kei khuatefa a hei ka duh ve ko mi hna ka ruah ah ka vanthat zia kai hngal i Pathian sinah lawmhnak bia ka chim. Motor nih lamchia a zawh lio ah khin a hung i hnin deuh i Daisy zong a hung i hlau ve, duhsahin a thutnak a hun i remh i "Kan phan deng cang maw?" tiah a von ti, "Phan rih lo, i hngilh rih koh kan phanh tikah kan thangh te lai" kati i fek deuh in ka kuh tthan. Fak deuhin a hung ka kuh ve i tanglei in a van a van cau i a ka zoh, mirh simsiam tein a ni, cu khawh cun ka biangah dintein a hung ka hnamh. a phone a ka chuh i hla kan ngaih mi palylist cu a thlen Hoobastank - The Reason hla a chuah, a cang khat nak kan ngaih hnu khin a kut ah fek tein ka tlaih i "a hla a tha tuk" kati. a hun ka zoh i mirh simsiam tein a hung ka zoh than, cu lio te ah cun a hmur sen virmar te ah cun lungsi ngai in ka dawp. a hun ka leh ve i `Vawlei vanram ` an ti mi cu chikhat kan teh ve. 

Aizawl kan phak cun an inn tiang ka va chiah than Hostel ka phak cun zaan a tlai cang caah thu thlurh in kai hngilh. Zarhpini kan hmang cu ni zongah cun a za tawk cun kan i chawn ko, "Ka taksa a nuam deuh lo i ka it ko" Cawnnikhatni (Monday) ah kan Department khual a tlawng ding kan si nak kong le kan khual tlawnnak ah cun signal a um lai lo ding caah kan i chonh khawh rihlo nak kong hna kha ka hei chimh, "Kal ve lo koh nang cuh" a hong ti, nain Kan Separtment HOD nih a sian lai lo nak kong le kan Paper hrang i Mark a keng chih mi a si caah ka kal hrim hrim a herh nak kha ka chimh tikah a hna a tla than ve. 

Cawnnikhatni cu a hung chuak i Champhai District lei ah a hlan kan pupa hna sulhnu hna cawng dingin kan Department Sixth Sem cu kan pawk hna, Signal a um nak paoh ah phone in ka chong peng cun a cakuat tete ka don peng. nain Farkawn hrawng kan phak ah cun Signal a tlau cang ka Sim hman mi kha cu ka hrawngah cun hman khawh a rak si lo. Zarhkhat le ni 4 kan cam i Aizawl cu kan phan than, kan tlun pah cun Signal umnak kan phak ah khin Daisy Missed Called 35 a um, chonh ve ka timh lengmang nain Switch Off ai ti lengmang. Zaanttim ah Hostel kan phan tthan, ka hei Call nolh than zongah switch off ai ti lengmang. a thaizing Cawnningani (Friday) cu Holiday a si caah Class kan kal lo.

Cawnnikhatni kan phan than cang Daisy he kan i chonh lo nak le Hmuh lo nak zong zarhhnih fai a si cang ka hrangah cun kumhnih tluk a si, Class kal lai cu kai ngaih tuk First Perion kan ngei lo buin tuan te ah ka kai Bil Kung tangah ka thu ka ngiat len nain Daisy muihmai hrim hrim a leng ti lo, a phone i ka hei call zongah Switch Off ai ti lengmang rih ko, ka thin a phang pah cang a ka chon duh loh maw si hnga, a phone a rawk maw si hnga, a si lo ah mi nih hin lih hna an rak chimh hi si hnga maw? tiin ka khuaruah a har in ka si a vang hringhran ko. 

Class kan ngei i zanlei Last Period lawng a um cang tiah khin kan nih cu Period kan ngeih tilo caah kan ttin pah cang hna, cu lio ah cun Daisy hawinu Irene Gate a chuah lai te khi ka hei hmuh ka hei dawi i ka auh, Daisy kong cu ka hal "Na hngal loh maw?" tiin a khuaruah a har hringhran, Daisy kong zeihmanh ka hngal ti lo nak zarhhnih a si cang nak le ka lungsivan nak hna cu ka hei chimh, hong ka chim tuah a thin maw a har a ka chon duh loh maw ka hei ti, a khuaruah a har chin chin a hmai cu muih in a mui "Kan chim ngam loh U-Salai" a ti, ka chim koh tiin ka hneksak than lengmah tikah "Ka hin cun ka chim ngam loh" a ti than, cuticun SU Office lei ah ka kalpi i ka cu ah cun tanglei zoh bu in hitin a chim...

Vawleicungah theih ding i ka duh lo bik mi bia le ka nunnak a thleng dih tu ding bia hna an si. Daisy cu Department picnic zaan ah khan a khuasik a sang ngai i,Department khual tlawn kan kal ni Cawnnikhatni ah khan Damdawi inn ah an rak luh pi, a khuasik cu a sang ngai ngai i a holhvai pah lengmang tawn, cu bantuk cun ruah a do le ti a deh rei tuk ah cun a hngakchiat lio te in cu zawtnak cu a rak ngeih cang mi a rak si, cu caah a dawng le nih ruah do le reituk ti tawngh an rak siang tawn lo, Damdawi inn ah cun a khuasik nih cun a chuahtak bal lo. chikhat a hun that deuh chung cu chonh tlakin a um tawn nain nikhat ah a tam deuh cu a khuasik a sang tuk lengmang tawn. A taksa nih a celh ve ti loh i Zarhpini ah hi vawlei hi a chuah tak.

"U- Salai, a um ti loh teh, a nih cu Vanram ah a um cang" tiah Irene nih a chim mi cu kai zumh lo, na ka hlen kati, zumh khoh ding ruam a si lo, zarhnolh khi ka chuahcam a si caah ka lungchung te cun surprise an ka timh si la ka hei ti, "Tha tein chim tuah, khawithla a um tu ah" ka hei ti than, Irene cu a ttap i, "A si tak tak ko, lih kan chim lo, na rak hngalh cang dingah pei kan ruah cu" a ti, cu hnu zongah cun kai zumh lo, "Hi bantukin mi i dai zongah an i dai bal loh2 kati thiam thiam rih, cu lio hrawngah cun kan SU General Secretary cu kawtka hramah a rak dir ko, a hung ka naih i, "Tthu tuah" a ka ti i, biatak ngai khin bia a hun chim "Irene chim mi kha biahman a si, i chim cang ding kan si nain kan in chim ngam lo, hong kan ngaithiam khual na tlawn kar a si, chonh khoh nan si tung loh i thawng thanh khawh nan si lo, na hun tlun hnu ah cun khawhar hmanh an thu ti lo, nain a ruak zong a thlan tiang kan mah nih kan zonh ko, tlamtling tein kan vui" a ti. Aw.. Pathian. 

Van ka zoh ah a sang, Lei ka zoh ah le a pit ka zoh duh ve ve hna lo, ka mit kai chim i zeihmanh ka hngal in ka thei kho ti lo. 

Kum 2016 a si cang, Daisy nih mual a liam ti ka hngalh hnu khan nikhat rilo in ka um bal ti lo, Vawlei hi lungfim in pah ka ngamh lo, hawi rual hmanh ah ka rak Graduate kho lo. Aizawl ah 6th Semester exam dingin ka kir than, nikhat cu Pangkhua ka hawipa nih kan College Inter College celhnak ah hong ve a kati i, kan inn ah a hung ka sawm, cu pinah SU hlun pawl nih kal dih hna usih kan college caah au than hna usih anti caah kei zong kal kai thawh ve cu a si. MZU ah cun Table Tennis celh cu kan zoh than. 

Khuang le aurinnak he Daisy thazaang pe in ka au lennak ah khan midang Table Tennis an i celh ko, kum hmasa ah Daisy nih "kumthar ah kai celh nolh tikah cun Champion dingin kai celh cang lai i, kan College na chuahtak hnu a si zongah zaangfahnakin kai celh lio na hung ka zoh than kho la maw?" a kati lio kha a thar in ka hnatlam ah an thang tthan. ka ttah a chuak hun ttah ah le midang an au len lio ah rak ttah cu ai dawhcah fawn lo, ka mitthlam ah Daisy ai celh lio ka hmuh. kan College ai awh in ai celh mi cu Daisy bantukin ka hmuh a hun ka zoh pah tawn hlah maw kati tawn. ruahlopi in ka tho i, khuang a tu lio mi cu ka chuh i, keimah nih ka tuk, a ka hngal rihtu vialte an au, Daisy le keimah kong a thei bal mi cheukhat an mitthli a tla. cu ni ah cun kan Collge cu an champion i Overall zongah Champion an si. 

Vanram ah khin Ruah a sur ve hnga maw? Vanram ah khin Tabble Tennis teh an i celh ve hnga maw? ka hngal lo nain Vanram ah khin ruahsur sehlaw, Tabble Tennis zong i celh ve hna sehlaw ti ka duh. 

Kum 5 a liam cang. "Vanram ah khin Ruahsur ve sehlaw, Tabble Tennis zong i celh ve hna sehlaw" ti hi ka saduhthah an si zungzal rih ko. 

Hi ca ka ttial lio ah Ruahpi tuk ngai in a sur, keimah lawng ka um i ka khua a har. Ka lung a leng pah i tuanbia ttial ah a tha hnga kati i, hi tuanbia hi ka hong ttial. True story he ai cawh nain, hi catial hi a dihlakin True Story cu a si lo. 

Salai C. Vanramdinmawi

(Tenglam)