Jesuh kan Hawittha bik a si lai (What a friend we have in Jesus)

Jesuh kan Hawittha bik a si lai (What a friend we have in Jesus)

Hi Vawlei kan nunchungah hin hawitha tampi kan ngei hna, kan lungretheih caan ah a ka ngaihchiatpi tu, Kan i lawmh caan zongah a kan lawmhpitu hawitha hi minung pakhat a si mi nih cun ngeih cio a si ko, nain a caan ah cun hi vawlei kan hawi le nih hin a kan dirpi peng tawn bantukin cheukhat nih a kan pheu caan zong a um ve ko, Hawi he i ti thiam lo caan le i dawt cukmak caan zong a um ding an rak si ko, a caan ah cun kan kiangah zungzalin kan hawi le hi an um kho tawn lo, kan herh tlukin kan sinah an um kho tawn lo, cu tikah cun Vawlei i kan i hawikawmhnak hi a za tawn lo, minung nih ngaihchiat vansan kan ton caan le harnak le sunghzatlaknak kan ton caan ah kan hawi le nih a kan hnemh in a kan umpi tawn ko nain a donhnak taktak ah kan hnangamnak le kan lungtlinnak cu Pathian hi a si tawn. 

Ireland ramah cun tthal a chuahka te khi a si i Ireland tlangbo tete hna cu hring dildel tein an um ko rih, van ah minmei te te zong zodawh ngai in thli hran nak hawih paoh ah an choi ve, Irish Tlangval chuak ka Joseph Scriven caah cun a hmailei cu ruahchannak le hnabeisinak duhnung lawngte in a khat, Joseph Scriven cu London khuapi ah a um mi Trinity  Coollege in Degree a lak hnu ah an khua ah atlung i Sianginn pakhat ah cawnpiaktu rian a tuan, Mirumfa a si caah an chungkhar khuasak zong a num i cu lio Ireland ramah cun mi um khaw pawl an rak si, a pa zong Ralkap Captain a rak tuan bal cang mi a si caah hawi hngar in an rak um lo. 

An khua a tlun hnu ah cun a ngakchiat te in a ngaihzawn he thitumhnak tuah dingin timhtuahnak an ngei i, thitumhnak ni ding zong rikhiah a si cang i an khua mi hna nih cun an lawmhpi cio hna i timhlamhnak zong a kal thluahmah, Nu lei le Pa lei zong an tha a tho i nungak le tlangval hna cu Nupi Pasal si cang dingin saduh an thah pi hna. An tthitumh hlan ni tlawmte lawng a um cang tiah cun Joseph Scriven  le a Nupi ding cu an khaw pawng Tiva kam ah i tong dingin an i tim, a nupi ding nih Rangcung cuan bu in Tiva a tan cuahmah lio ah a cuannak rang nih zeidek ai lamh sual i a per len, cu tikah Rang nih cun a hlawn i a lu cu lungah ai tauh hnu ah Tiva ah cun a pam, cu thil a cannak cu Joseph Scriven  a phanh hlan deuh te tak tak ah a si. 

A nupi ding ruak cu ti in an chuah i Joseph Scriven  nih cun a pawm i piang ko in a zoh nunnak thaw a ngei ti lo, lak a si cang. thaizing kiptuh i a nupi si ding in a ruah mi cu a pawm i a mui a zoh peng ko, a hnu ah Joseph Scriven  nih a chim than ningah cun ka Khawvel cu cikhat te ah an lo dih, Ireland ram khawika hmun paoh ka hmuh ah ka hrang i ni sunglawi bik a si dingah kai ruahchan mi ka phanh khoh lo le ka dawttuk mi kha ka hngalh than peng i fahnak nih a ka kal tak bal lo" a ti. A dawttuk mi nih a thihtak hnu ah cun Pathian naih chinnak ah a hman i a lamhruaitu le a ruahchhan nak ah Pathian cu  a cang, Ireland ram nih a dawtmi a hngalh ter lengmang than caah khan Ireland cu chuahtak dingin ai tim i, kum 1845 ah Ontario khua Canada ram a phan i cu hmunah cun a hi vawlei ah caan a ngeih mi vialte a hmang lan. 

Joseph Scriven  cu Port Hope pawng khua pakhat ah khua a sa i cu hmunah cun Jesuh Tlangcung cawnpiaknak midang bawmh duhnak  kha biatak tein nunpi ai zuam i, a umnak khua nuhmei le mi zaw hna pinah bawmh a herh mi paoh cu el lo tein a bawmh lengmang hna, Thing ceh piak a hau mi a ceh piak hna i, man ngei lo in thing zong a tan piak hna i an inn te ah a chiah piak tawn hna, an khau mirum nih cun an rian tuanpiak dingin hlawhfa chawr an duh tawn ko nain ho hmanh nih an chawr kho lo, hlawhfa man phalh ding a ngei lo mi Nuhmei le tar hna pinah mizaw hna rian lawng lawng kha man ngei lo in a tuah piak tawn hna. a ruang cu Jesuh tlangcung cawnpiaknak kha a takin nunpi a duh i mi bawmhchanh duhnak kha a thinlungin a thi kho lo. cu bantukin a tuah i Port Hope khua Samari mithapa tiah theihhngalh a si. 

Joseph Scriven  cu cathiam a si caah khan a paw cawmnak ding rian cu dong lo in a ngei ve ko, British Tilawng Captain hlun Robert Pengelly fa le cu Tution a pek tawn hna i cu hna inn ah cun Tution pe in caan a hmang tawn, Cu inn ah a um ve mi Robert tunu Eliza Roche he an i tong i duhdawtnak lamthluan ah hringnun hi an pah tti, an i dawtnak cu a karh chinchin i nikhat hnu nikhat an i tlaihchannak a a ngan chin thluahmah i nupa si dingin tthitumhnak tiang tuah an tim. an i tthitumhnak ni dingah cun kum 1854 Tthal chuahka deuhte ah sisehlaw anti. a dawt hmasa cu mual a liam cang i kumtam zong a si cang cuti lengmang i ngaihchiat le a tuarnak cu a za remruam cang Mithi cu auh than khoh a si lo caah a minung hawi he hringnun harnak le nuamhnak teh ti kha lungcan i pe in hmai nor ai zuam.

Hohmanh nih harnak le Thihnak hna hi kan duh mi a si lai lo, kan cungah chiatnak a tlung dingin thla kan cam bal fawn lai lo, nain harnak le chiatnak hna hi kan nunnah an tlung theu tawn, theihthiam a har ko.  Joseph Scriven le Eliza Roche  an i thitumhni ding cu zarhkhat lawng a bau cang, timhtuahnak zong tam u cu a kal cang. Thihnak nih cun a voihnihnak si dingin Joseph Scriven nun cu a hung den than hawi i a nupi ding Eliza cu Pneumonia zawtnak in a zaw i Joseph nih cun a si khawh tawk in a zohkhenh ve ko nain kum 23 lawng a si lio ah a nunnak thaw nih a chuahtak.

A voihnihnak si dingin Joseph Scriven cu a thinlung a kekkuai than i, a dawtmi Eliza nih a loh tak than hawi, a ruahchannak le a hnabeiseinak hna cu chikhat te ah an tlau ai. cun a voihnihnak si dingin Pathian sinah thazaang thar a la than i, Bawipa Pathian cu a hawitha bik a hong si hawi. angaihchiat caan le a hnabeidongh caan ah a ruahchannak le a lungdong caan a lungrawh caan hna ah hnemtu Jesuh Khrih a ngeih zia kha a thar in a hong lang than. cuticun pa ngeilo hna caah pa le nu ngei lo hna caah nu, pum tlamtling lo le nuhmei hna caah le Tarnu Tarpa hna caah hawitha si dingin a nun cu a tthawnter i Pathian riantuan kha a peh than. 

Joseph Scriven cu mi bawmhnak in a caan hmang ko hmanhsehlaw khuaharnak le lunglennak nih a kal tak bal lo, a mahtelawng in a innchungah khua a ruat i a caan ah cun a hnbei a dongin Vawlei i um peng zong hi a huam tawn lo, midang nih an hngal piak lo mi khuaharnak le lunglennak hna cu a thlithip in a tuar pah lengmang ve. a caan ah cun tangka zong a ngei cawk ve tawn lo i retheih tak tak zongin khua a sa ve tawn, Bawmtu cu bawmh herh in a um caan a tlawm lo i, hnemtu cu hnem hau in a um caan a um ve ko, Thlamuantu nih cun thlamuantu a herh ve tawn, nain a kiangah hohmanh an um tawn lo caan ah khin cun lileng , lungsivang le thlavai kiangin a um ve ko. 

A nupi ding Eliza a thih hnu in kum 10 ah Ireland ramin cakuat a hong phan i a nu kha a zawfak ngai ngai nak kong kha an hong thanh, Joseph Scriven  nih cun thilri zeihmanh kuat ding a ngeih lo caah khan ka cakuat tal in thazaang pe ko ning a ti i, a nu cu ca a kuat tawn i, Pathian bia hna a tial piak pinah Cathiang chung i a duhnak zawn tete hna kha a tial chih tawn i, Ireland ramah a um mi a nu thazaang a hei pek tawn. a caan ah Biazai hna a tial i a nu cu a kuat pah lengmang. 

Joseph Scriven cu a zaw ve i ihkhun ah a it ko, nikhat cu a hawile an inn ah an va leng i a ihkhun pawng cabuai ah catlap i ca ai tial mi te kha an hei hmuh cu cu a Ireland ram ah a um mi a Nu sinah kuat dingin a tial mi kha a si, cu catial tawite an hmuh tikah a hawi le nih cun "Hibantukin a tha mi hi zeitin dah na tial khoh, a bia a tha i mi lung a suk tuk hringhran hi anti" cu catial cu Bizai bantukin tial mi a si i, a nunlam tuanbia le hringnun a pah nak kong hna kha an si, Cutikah Joseph Scriven  nih cun "Pathian he kan tial tti mi a si, keimah lawng si loin Pathian le keimah kar in a chuak mi an si e" a ti hna. 

Charles C. Converse (1834-1918) nih What a Friend We Have in Jesus. timi cu a aw a bunh. Cu hla cu tuni tiang ah zuun in a zawmi, a ngaihchiami, a tap ahrammi, a lunglengmi minung tampi hnemhnak le thazaang thar ape tthantu hla ah a cang. Joseph M. Scriven cu a thi cang nain, Jesuh a hawitha asimi a zumhnak le aa pekchannak cu a nung peng rih. Cun, a hla zong a nung i minung tampi kan nunnak ah rian a ttuan. Joseph Scriven  a thihnak kong ruah tikah ngaih a chia hringhran zawtnak in a thi lo, zeitin a thih timi zong hngalh a si lo, amah nih ai that maw mi nih an thah timi zong tutiangah hngalh a si thai lo, cheukhat nih cun Depression a ngeih ruangah amah le amah ai that a si men lai anti nain cu zong cu mi tampi nih an pawm kho lo.

A thih lai hrawngah hin Depression a ngei pah ko tiah a hawi le nih an chim i, a mah a naihniam ngai mi pakhat nih cun hiti hin a chim "Zanttim a phanh lai te ah kan chuahtak, kai hngilh kho lo i Joseph Scriven zawtnak cu ka ruatpah, a khan chung ka va luh tthan ah cun a rak um ti lo, kan kawl len nain kan hmu kho lo, nain nikhat zanleisangah a ruak cu tikam ah kan hmuh, a pumsa cu kik dimdiam te in a um i a nunnak thaw nih a chuahtak cang " a ti. Joseph Scriven cu August 10, 1886 ah a Hawittha Jesuh sinah i din dingin hi vawlei hi a chuahtak. 

Joseph Scriven thih hnuah hin Joseph nih port Hope, Ontario,Canada i a rak khuasakpi mi hna nihcun amah philh lonak caah tiin monument an tuah piak i, harsatnak, sungzatlaknak,  retheih le ngaihchiatnak  tampi a rak tuarnak caan chung vialte ah hawitha Jesuh khrih a ngeihmi cu ai fiangtuk i a bochan ngam mi Bawipa ah a hngat ngam mi a si nak kha le Cu a bochanmi Pathian he harsatnak tampi tlanglakin a pah khawh mi hna kha philh khoh ding mi an si lo. Amah cu thi cang hmah sehlaw hi hla kan sak chung paoh ahcun kan thinlung ah a nung peng rih ko lai.

Jesuh kan Hawittha bik a si lai (What a friend we have in Jesus)

-Joseph Scriven-

What a friend we have in Jesus

All our sins and griefs to bear!

What a privilege to carry

Everything to God in prayer!

Oh what peace we often forfeit

Oh what needless pain we bear

All because we do not carry

Everything to God in prayer

Kannih kan sual sifah ingtu Kham Bawi Jesuh asi lai

Pathian sinah kan herh vialte hal ahcun a ttha dah ngai

Hnangamnak tampi hmu loin harnak ngaihchiatnak kan huah

Kan duh vialte Pathian sinah hal loin kan um caah

Hi Hla phuahtu nih hin Jesuh Khrih cu kan hawittha bik a si nak kong le kan sualnak le tuarnak vialte phortu a si nak kong kha chimh a kan duh, hi vawlei ah hin harnak le sungzatlaknak hna nih hong kan tlun hnawh tawn ko hmanhselaw kan dawt bik mi nih mual hong kan liamtak in thlavaikiang ngai in um tawn hmanh ning Pathian sinah kan herh mi vialte kan chim ah cun a tha dih te ko lai, a that rih lo ah cun a donghnak a si rih lo tinak a si ko. 

Hnangmanak kan kawl cuahmah lio zongah harnak le ngaihchiatnak kan i huah sual tawn, nuam kan duh hlim kan duh, kan kawl i kan hmu kho tawn lo, kan khuaharnak le kan tahhramnak hna nih a kan chuahtak tawn lo, a kan cam hnawh ko, kan duh mi vialte Pathian sin hal loin kan rak um sual tawn caah a si. Pathian sinah khin thlacam kan rak hngal tawn lo. Kan hawitha Jesuh khi kan rak chimh philh tawn.

Have we trials and temptations?

Is there trouble anywhere?

We should never be discouraged

Take it to the Lord in prayer

Can we find a friend so faithful

Who will all our sorrows share?

Jesus knows our every weakness

Take it to the Lord in prayer

Fahnak tukforh kan tuar maw, hnahnawhnak in kan um dah

Kan lung belte rawk hin hlah seh, Pathian sinah thlacam uh

Sifah huahnak kha an kan chantu hawi khaw zei ah na hmu maw

Na ngaihchiatnak kha Jesuh'n hngalh Jesuh sinah thlacam uh

That kan duh i thil tha tuah kan duh ko zongah tuah kho lo le fel kho lo in hnahnawhnak a phun phun kan ton tawn, kan pawngkam mi hna an thangcho kan hmuh kan nih bel kan dirhmun ngai ah kan um ko, hawi cu an hlawh a tling i kan nih bel hlawhcham in kan um theu tawn. Hi hla nih hin cubantuk harnak kan ton tik zongah kan lung bel rawk lo dingin le Pathian sin tu ah Thlacam dingin a kan duh.

Ho hmanh nih kan harsatnak le kan lungthin dihlak phuan ngam nak ding Hawi kan ngei lo, zeipaoh ka chimh ngam mi na si kan ti mi hna sin zongah khin thuh mi pakhat khat cu kan ngei theu, kan chim thlu ngam tawn lo, Kan nu le pa sin tak tak hmanh ah chim ngamlo mi a tam tuk, Minung cu pei kan si cu. Nain Jesuh nih cun kan thadernak le kan caklonak vialte kha a hngalh dih a sinah zeihmanh thuh khawh a si lo, kan ngaihchiatnak vialte zong kha tling khitkhet tein a hngalh dih.  cu caah hi hla phuahtu nih hin Pathian sinah cu thil hna cu chim ding le Thlacam dingin a kan fial. 

Are we weak and heavy laden,

Cumbered with a load of care?

Precious Savior, still our refuge

Take it to the Lord in prayer

Do thy friends despise, forsake thee?

Take it to the Lord in prayer!

In his arms he'll take and shield thee

Thou wilt find a solace there

Zaang ngei lomi kan si cio maw, kan thil kha arit tuk dah?

A sungmi kan khamtu Jesuh a ngaihlai kan hal tikah

Kan hawi nih an kan hlawt ahcun Pathian hawi sinah chim uh

Akut in an laak an pom lai, Hnangamnak kan hmuh ko lai

A caan ah cun hringnun ah hin kan pah khoh lo mi le kan tuar khoh lo mi fahnak hna hi kan ton tawn ko, tukforhnak kan tei khoh lo caan zong a tampi ko, kan celh tawn lo, Kan dawtbik mi hna mual an liam tik, midang a kan helh tak tik, Nupi Pasal an ngeih tik hna le kan hawitha bik nih lih a kan chimh tik hna ah zongah khin cu kan tuar khoh lo mi hna sin in a ka chanh kho tu cu Jesuh lawng lawng a si zia kha hi hla ah hin kan hmuh khoh. 

Kan hawi le nih an kan hlawt caan hna, kan thinlung ngeitu nih a kan hlawt caan hna zongah siseh, kan duh bik mi kan ngeih khoh lo caan hna zongah Pathian sinah kan chim ding a rak si, cu tikah cun a kutin a kan pawm lai i hnangamnak kha kan hmuh lai. 

Salai C. Vanramdinmawi

(Tenglam)