I have decided to follow Jesus

8/21/2019 03:08:00 pm

I have decided to follow Jesus

Primary ka rak cawn lio ah cun Roman Catholic cawnpiaknak in a kal mi Don Bosco sianginn ah ka rak kai, cu hmun ah cun zingfatin te Devotion kan rak ngei i Mirang hla a kan cawnpiakmi kan rak sa tawn, Zarhteni zing paoh ah Mirang hla an rak kan cawn piak tawn i cu mirang hla an kan cawnpiak mi lak ah cun "I Have Decided To Follow Jesus" timi hla hi ka rak duh bik mi pakhat le kan rak sak bik mi zong a si pinah thiam kan i foih bik mi zong a rak si, nain ho nih dah a phuah i zeitin dah a rak phuah zei dah a rak ton mi a si ti hi ka rak ruat bal lem lo, kum 18 leng a liam hnu ah hi hla hi fiang chin in ka hung theih i, a hnulei tuanbia ka hung theih hnu lebang ah hin cun a hlannak in sak nuam kati i ngaihnuam katinak a zual chin i ai phundang deuh ngai ngai.

Hi hla a tuanbia cu hitihin a si, Kum zabu 18/19 nak hrawng ah hin Wales ramah thangphawknak (Revival) ngan ngai ngai a rak tlung, Wales ram pumpi cu hi Revival nih hin a rak culh dih, an mino le cathiam vialte hna cu Pathian riantuannak lei ah karhlan duhin an lung an thlen Pathian riantuannak cu a ngan ngai ngai i Khirhfabuu zong an thangcho ngai ngai, cu a si caah an Mino cathiam pawl hna cu Pathian riantuan dingin le Vawlei cung khuaza kipah Thawngtha phuang dingin an hun i pumpe thluahmah hna, BA, MA le Ph D a ngei mi hna zong nih vawlei lei fimnak cu kaltak in Pathian riantuannak lei ah kar an hung hlang hna, Wales ram nih cun a tam khoh chung Missionary fial an i tim i Vawleicung pumpuluk hi Thawngtha chimnak in cul an timh.

Cu hna lakah cun Wales miphun tlangval note pakhat cathiam ngai mi zong vawlei lei fimcawnnak le thiamnak kaltak in Jesuh thawngtha phuang dingin India ram North-East a hung phan, a hong phanh ka i hmunhma a khuar nak cu Assam ram tu Meghalaya State chung Garo miphun umnak khua pakhat ah a si, Wales Missionary pa nih cun a si khoh tawkin a cawnpiak hna i Jesuh thawngtha kong cu a chimh hna nain zei san a tlai hlei lo, Garo nih an pupa chan in an rak biak cang mi an Pathian cu an kaltak kho lo, Missionary pa zong nih cun harnak le zawtfahnak a phun phun a tuar i tukvelh le khua in thawldawi tiang hna a tong ve tawn. nain lungdong lo tein Pathian thawngtha cu Garo miphun hna sinah cun a phuan than lengmang ko nain kum tamtuk hnu zongah Jesuh zuumtu cu an um hlei lo. Garo miphun cu khuakhat le khuakhat i tuk in lu lak a hmang ve mi an si caah le miphundang a remlo mi an si caah Mirang pa nih a chim mi Jesuh tuanbia cu an zuum kho lo.

Nikhat cu Nokseng timi pa Garo miphun chungin zuumtu thar a hung chuak i Nokseng lawng silo in an chungkhar dihlak, Nokseng le a nupi pinah an fale Pahnih hna zong Jesuh zuumtu ah an hung cang, Nokseng le a chungkhar nih cun Jesuh cu fiangtuk fiangtukin an hmuh i an theih mi thawngtha cu an mah lawng theih dingin a sunglawi tuk caah le midang hna zong nih an theih ve i khamhnak thawngtha kha an mah lawng co ding cun a sunlawi tuk caah an Garo miphun hawi khuadang mi hna zong cu thawngtha cu an chimh ve hna i Jesuh zuum ve dingin le Khirhfaa zumhnak ah lut ve dingin an sawm hna i Jesuh nih vawlei a khamhnak tuanbia kha an chimh ve hna, Nokseng Khrihfaa zumhnak i a luh an hung theih tikah khuabawi (Chief) le khuami vialte hna cu an thin a har hringhran cang i, Nokseng le a chungkhar hna cu an Pupa hna zumhnak a kaltak lawng silo in an miphun leirawitu ah an puh cang hna. Khuabawi fialnak in mipi nih Nokseng te chungkhar cu an auh hna i khualai ah an chuahpi hna.

Khuabawipa nih cun Nokseng sinah cun "Na zumhmi Jesuh hi na hlawt i kan Pupa hna zumhnak ah na kir ah cun na sual vialte hi kan ngaihthiam lai i, na palhnak vialte zong hi chimh than a si ti lai lo, nain na Jesuh hi na hlawt duh lo in kan Pupa hna zumhnak i na hung kir than lo ah cun nan chungkhar dihlak tein kan thah hna lai " a ti. Nokseng nih cun, ka hung kir lai lo" tiin a leh ve. Khuabawipa nih cun "Na zulh mi Jesuh hi na hlawt lo ah cun, na fapa le pahnih hi ka thah hna lai hih" tiin a pasaltha pawl cu Li le thal he, fei hi a fale pahnih cu a hmuah ter hna, nain Nokseng nih cun, Hi hla hramthawknak hla in an Khuabawipa bia cu a leh ." Jesuh zul dingin bia ka khiah cang" (I have decided to follow Jesus) tiin. cutikah Garo Pasatha hna nih cun an thalfang cu an thlah i Nokseng fale pahnih cu thal ko in an kah hna i Fei in an sawh chih hna caah an nunnak cu a liam i an zumh mi Jesuh sinah an i din.

Garo khuabawipa nih cun Nokseng sinah cun "Voikhat caan kan pek than lai, Jesuh hi na hlawt ah cun nan nupa in nan nunnak kan zuah hna lai, nain na hlawt duh lo thiam thiam a si ah cun na nupi hi ka thah than lai" a ti. Nokseng nih cun a zumh mi Jesuh cu hlawt a tim nemmam lo, hi vawlei ah hin harnak phunzakip tongin a nunnak tiang liam hmanhsehlaw vancung khua ah Jesuh nih a rak don lai timi kha fiang tukin a hngalh caah hi vawlei nunnak chan tawite nak cun zungzal ram ah chungtlingin lennak hmun a um ti kha ai fian tuk caah " Ho hmanh nih na kan telpi lo zongah, ka zulh thiam thiam ko lai" ("Though no one join me, still I will follow.") tiin an khuabawipa cu a leh than, an khuabawipa cu a thin a hung tuk i a hmai zong a sen dih i a thinhar tukah a thir in a thir dih, cuticun Nokseng nupi cu a thahter than hna.

Khuabawipa nih cun Nokseng sinah cun "Hrut tuah hlah unau, nang cu ka mitheih mi na si, na nunchungah sualnak le minchiatnak ngei mi zong na si lo, hnuhmei le sifak dawtu na si, kan khua le miphun himnak caah a si khoh tawkin a tuan mi le kan in bochan mi na si, na nunnak hi ka lakter sawh hlah hen, Jesuh cu hlaw ko, hibantuk sualnak hi cu tuah hlah na nunnak hi ka lak ter tuah hlah hen, hibantukin Jesuh hnu zulin Mirang hna zumhnak i na luh ah cun kan miphun hi kan loral lai peiti Jesuh cu hlaw koh" tiin Nokseng cu a doongnak ah a lem than, nain Nokseng nih cun "Vawlei cu ka hnu lei ah a um i, ka hmai ah Vailamtah cu a um, ka khirh than ti lai lo. (The world behind me, The cross before me, No turning back, no turning back.) tiin a leh than lio ah Khuabawipa nih cun a nam a zuh i Nokseng hngawng ah a zei i Garo miphun lakah zuumtu hmasa Nokseng cu a zumhmi Jesuh bangin thah a si ve i, caan hnuhnung i Jesuh a rat tikah Mithiang mi dang hna he thawh than a si ve lai.

Hi kong hi khuadang nih an hun theih tikah an khuaruah a har i Nokseng nih a zumh mi Jesuh cu ho set dah a si hnga timi kha an hung ruah cio tikah Khrihfaa zumhnak ah pakhat hnu pakhat an hung lut ziahmah hna i Martar thisen nih cun mitampi an mit a au ter hna, hi kong hi Indian Missionary Sadhu Sundar Singh nih a rak theih tikah a lung a tongh ngai ngai i hla ah a canter i a aw zai zong India awcawi te bakin a hramthawknak ah cun sak le tum a rak si. Simon Marak, Jorhat, Assam i khuasa nih hi hla hi a hung cawilar deuh ngai ngai hnu ah, Amerca ram um Pathian Thangthatnak hla khomhsuattu le chuahtu William Jensen Reynolds nih a hla hi a remh hnu ah 1959 Assembly Songbook ah telh a hung si hnu lebang ah cun mitam deuh nih an hun theihhngalh i Vawlei pumpi nih kan hung sak pi ve hna. Cu lawng silo in Vawlei cung Thawngtha chim thiam minthang Billy Graham nih thawngtha a chimnak paoh ah sak a si hnu chin chin lebang ah cun Vawleicung hla tha bik hna lakah a hung cang.

A hlabia hi cang tam ngai ngei le biafang tamngai fonh cu a si lo, Nokseng nih a thih lai ah a chimmi Biathluan thum li te hrawng lawng kha a si ko, Sadhu Sundar Singh nih tlawmte a chap hnu ah William Jensen Reynolds nih a remh chap mi telawng a si ko. Nokseng nih a thih lai i a chim mi bia te kha nolh than lengmang in hla tha ngai ah a chuak. mi kip nih an mah le duh hoih cio in hlabia an chap i an sak cio tikah zei kha dah a hla dik bik le hman bik ding ti zong hngalh fian a har cang. nain hika zawnah hin Sadhu Sundar Singh nih a bunh mi hlabia a si ko rua tiah ka zumh mi ka hun tar.

I have decided to follow Jesus;