Phongpi Dingdi Zuunthar

"Ka hawi, ruahlopi in kan ton zawnah Thintur a rang

Ka lungthlibia kan chimh ruah duh mi a tam tawn

Caan le sining nih a kan pek lo hrat cu, Damtein Mangtha"

Ti bang luang lan loin, a caam lan cang ding mi hna cu

Nehbang thar than hau loin,  An hmun zungzal ko

Minmei zaam nih a phenh mi Nika bantuk 

Minmei zaam a tian tikah an pau than tawn

Nang zuunngaih le Ruun tipi nih Kir than an zaal ti lo

Bawinu le Tio bangin ton than um lo hmanhseh

Nibang a thar than tawn zungzal, zungzalin

Thinlung catlap ah khenchih cang mi 

Mitthli in car chih kumhlun cang mi

Phongtlang nih lungrawn a hngah bang

Dawtnak luahlo ruun rak hngak ko ning 

Hi vawlei ah midang ta si in, Thlangkhun dim hmanh law

An chim vawlei pinlei ram nunthannak ah cun

Ka ta si zungzal mu, Zungzal in Zungzal tiang

Thlangkhun na dim hnu ah zeitlukin Zuu Rili ah kai ciah innpa nih an hngalh. Sawn lengmang in inn ka hlam caan ah nu le pa mitthli tla in an um caan a tam, Kum tam sakhmel ton lo hnu ah ruahlopi in kan i tong than, nang cu Nungak mui zong na keng tilo, Na hnuk hna cu an uai in na ttawk hna cu khal tilo in na paw hna zong thau in an khat cang, nain ai thleng lo na mui kan hmuh in ka thintur a rang thiamthiam rih ko a hlan bantukin. 

Caan le sining nih a kan pe tilo sau biaruah loin lungduh bia le duhlo bia hna hmanh chim thlu manh loin kan ttian than, Nang philh duh ah kum zeizat rengruang hme zuu hmun sa hmun ah mualpho in sawn lengmang in ka vah tawn, Taw le lu hmanh thei loin ka rit tawn mu, kum a hung chunhnu deuh deuh, ka zudin nih ka thluak a hong hrawh deuhdeuh hnu cun chikhat kan philh caan hna zong a um ve tawn dahkaw, Cung Khuazing nih khin a ka hrem duh maw a si hnga tlawmte cun ka lung a dam ve pah ko cang ka ti ah ka lung hna cu a hun thar ter than hi.

Timh ciammam in kan i ton mi a si lo, ruahpaklo tukin kan i ton mi a si ko. Nain kum tamtuk a liam cang mi nunhlun a hliphlau tertu an si,  Ka lawi hnu in ka Phone ka kau kum 3 leng Cakuat ka hmuh tilo mi sinin cakuat tawite tak tak khi a hung phan "Ka hawi, ruahlopi in na mui ka hmuh ah thin a tur, ka lau tuk, Biaruah in chimh kan duh mi a tam tuk tawn, Mangtha rih ne mu.." 

Kha kum 13 chung na zuun ah zaw in ka fah chung vialte hna ka ruah than zongah hi cakuat tawite ka don zaan tlukin ka lungfah hi a um rih lo, Ka kekkuai dih cikcek, Ka lungfah celhlo ah Vengthlang lei Duh Cung nu te inn lei theu cu ka panh than hawi, nain zandang ve lo bang cu zaan cu ka ri kho lo, ka ruahnak in na chuak kho lo, na minsak pakhat te nih zuu no tamtuk a tei, ka zeituah awk theih lo ah kha kum 3 hrawng liamcia ah ca kan rak i kuat mi vialte hna pakhat hnu pakhat ka rel than, ka nolh than tawn. 

Zeibia cu dah a ka ruah duh mi cu a si hnga, zei lei pang dah a si hnga tiin zankhua a ka dei ter than, Dawtnak bia cu a si kho ti lo, si kho ding zongin ka duh lo, a nih cun Thlangkhun dim in Pathian thlachuah fanau he a si cang, kei cu kai lungsak ko cang, ka cungah a tlung mi Pathian khuakhannak le Biakhiah zeipaoh hi ka caah a tha ding mi le thachin relnak a si timi ka cohlan thiam cang, nain thluak a ngei ve mi fam cu ka philh khoh lo lawng hi a si ko, cu philh ka duh ruangah ka zuu rit zong cu a si ko. 

Salai,  cu Tleirawl sual ngei loin a tthang an ka ti tawn, mi an fim i ka tling lo na bu in an ka fak tawn, kha kha keimah fel ruang le nunzia that ruangah a si lo, nang kan co khohnak dingah le na lung ka tlin khoh nak dingah ka fello tuk buin that kai zuam, ca ka thiam lo tuk buin fakpi in kai zuam, Kan co kho thai lo ti ka hngalh hnu in ka nun a rawh zia hi khuapi nih an theih, kha lio ah khan Thlapa ka duh rak ka ti law, Asrtonaut si hmanh ka rak i tim ve hnga i tu ah cun a si zong ka hei si ve cang hnga, nain tu ah cun Nuhmeinu zuu inn ah an zaangfahnak ka hngak. 

Nang cu Pasal tha le Pathian thluachuah fanau ngei in ruun inn nuam le khuasak sangin um hmanhlaw hitluk an rak dawtu le ai pumpe mi na lungkil ah ai tap ve peng cang ding mi kan ruah piak ah hin a pawi kati. Kei zong chikhat cu kai nuam chikhat cu nun hi a sunglawi kati tawn, nain a sau lo nai tel ve lo nak nun cu nun a si lo, i nai tel ve lo nak nuamhnak le hlawhtlinnak hna cu pakpalawng men khi an si. 

Salai C. Vanramdinmawi

(Tenglam)