Ka nu a tah ter tu ka pa (The man who made my mama cry)

Ka nu a tah ter tu ka pa (The man who made my mama cry)

Lee Ann Womack

    Zanriah kan ei lio ah mileng khan lei ah kan chiah mi phone cu a hong ring ziahmah, rawlei lio ah phone chonh hi kanu nih a duh tawn setsai lo caah lak kan tim lem lo, nain a hung ring than lengmang caah "Na nute hna a si sual hnga maw, zeidek herh mi a um si la2 tiin a hei lak. Rawl bar pah cun kanu cu ka hei zoh tawn, voi dang a phone chonh a thang ngai tawn nain tu zanlei cu a aw a dinh ngai, Phone a hung chawn tu nih cun ka nu nih a theih duhlo mi zei bia dek a chim rua, ka nu muihmel a panh lo ngai, a tang ai domh i a mitau hna zong a sen dih, a hun ka zoh than tawn, a mitthli hna zong ai hrol dih. Phone a chiah hnu ah cun kanu cun "Kanu zei thil dah cang? tiin ka rak hal colh hngap nain, a ka lehnak cu a tawi ngamsam. “ Kafa, caan tawite tak tak keimah tein um ka duh, rak ka theihthiam ta rih mu" a ti i, a room chungah a lut colh, cun a hrenh colh fawn. Zei tuah awk bak ka hngal lo, ka khuaruah a har tuk, ka rawleika zong a thaw ti lo, khengbel hna ka fim ve colh i ka fim thlu hnu ah cun kanu room kawtka pawngah thu in a hun chuah cu ka hngah ko, nain a ik thawng dah tilo zeihmanh kanu sin in theih ding mi dang a um lo.  

Pa tello in a thang mi ka si i, Ka nu zei paoh ah a ka domh in a ka zohkhenhtu cu zanlei bantukin a ngaihchiat ka hmu bal lo, zei paoh thil sual ka tuah caan hmanh ah, a duh lo ning deuh in ka um sual caan hmanh ah tha te in a ka sik i nuntha a ka cawnpiak tawn, Tangka kan chambau caan le School fee pek ding kan ngeih lo caan i a lungretheih tuk caan hmanah ka hmai ah a langhter duh bal lo

Nain tuzanl ah khan zeiruangah dah i sum kho lo in ka hmai ah a mitthli tiangin a tlak tung hnga, Ka nu cu a lung a fak tuk ti ka theihthiam, kei zong cu a rak fak ve colh top. "Kanu, kawtka hung ka onh tuah" tiin a room kawtka hngauh in ka thu ko. Ka nu nih cun i sum ai tim tuk ve ti ka hngalh nain a fak tuk caah maw a si hnga a ik thawng cu lenglei hmanh in ka rak theih khoh. Kum 15 a liamcia mi chungah khan hi tlukin a lungfah le a tah hi ka hngal bal lo, a thli in a tah hi cu ka hngalh pah tawn nain hi bantukin a langhter hi ka hngal bal lo. Kanu ka dawt tuk mi le ka pa a si chih mi cu i sum kho lo in a tap cuahmah lio cu a si fawn tung i, thil sining cu ka theithiam lo hringhran. 

Kanu nih hin a tleirawl chuah ka ah duhthim a rak i palh sual ve i, cu pa he cun dawtnak timi hi rak hruhpi ve in fa a rak pawi ter hnu ah a ngei duh than tung loh i, kanu nih cun soisel thangchiat tuar in khawlak zongah chuak ngam loin a hung um, Ka nu pa cu khirhfaa upa a rak si ve hawi fawn he, a dawng le nih cun a hlawnh phah. cubantukin ka nu an hlawnh le inn tangin chuah ai huah hnu zongah cun fa a pawi ter tu nih cun hun ngaihsak le kenkawi cu chim lo, fa a pawi mi cu an chungkhar upatnak hmunter duh ruang men ah ti tla dingin a hung ti chinchap. Nain ka nu nih cun a fa pawi mi cu ti tlak a duh ve lo, Zeipaoh tong ding si usihlaw, zei dirhmun ah hmanh dir usih ka nau pawi mi hi ka hrin hrim hrim ding a si, ka sual ruangah ka palh cia cang mi vialte hna cu Pathian nih a ka ngaihthiam lai i, hi ngakchia nih hin ka minchiat cang nak vialte kha a hun khuh than dih lai tiin naute cu a hung ngeih, cu ngakchia hrisel lo ngai in a chuak mi ka nu vang men ah vawlei khuaceu a hun hmu kho ve mi cu keimah hi ka hung si. 

Kanu nih a ka pawi lio ah hin, mi inn ah hlawhfa nak kawl in ai chawk tam ngai i, mi thilri suk piak, fang khei piak tibantuk hna in rian tampi tuanpiak in ai hlawhfa tawn, a caan ah sa a sat i, a caan ah Bazar ah meh a zuar tawn, nau a vei chung le nausem a pawm chungah ai zohkhenh nak ding daih ding cu a sual ngaithiamtu Pathian bawmhnak thawngin a hlawh chuah manh ve ko. cubantukin rawl thitha eilo le dinh caan ngei lo in riantuan kanti cu a pawchung naute nih a rak tuar diam i, ka chuah hnu ngakchia kal kho rual ka si hnu hmanh ah ka ke in ka kal kho ve ti lo, Midang bia chim duh ningah cun pum tlamtlinglo (Piangsual) ka hung si hawi ai. Nain kanu sinah cun vuivainak ding pakhat hmanh ka ngei lo, lawmhbia chimh hi ka bat a si i, cuti bu zong cun ka nu nih a ka cohlan thlipthlep i, ka chiatnak lei nak cun ka thatnak lei deuh kha a zoh i, zeitikah cun mi pakhat na si lai ti hi a ka chim bang tawn lo. 

Cu lio ah cun kanu hi kum 21 lawng a rak si rih i, a mui ai dawh i a vunhawng hna ai dawh tuk rih caah le a tungtai a that ngai fawn tung i, a ngaizawng tu le lengtu zong a ngei ve thup tawn ko nain ka zawn a ruah ruangah le a dawt mi nih faktukin a lung a rak hliamh cang caah Dawtmi dang ngeih tha le Pasal ngeih than ding cu a ruah a ruat ngam tawn lo, nun nuam deuh le dirhmun tha deuh a mitthla caan hmanh ah keimah a langh chih tawn caah amah hun lengtu hna zong a rak khirh tha lengmang tawn hna. 

Kan retheih tuk ruangah cun tlawmin ka hung upat deuh hnu hmanah Wheel Chair cawknak ding zong cu kan ngei kho ve lo, Lengah chuah i ngakchia dang sinah tlawn ka duhnak hi kanu sinah ka chim tawn nain rian he cun kanu nih a ka chuahpi lengmang kho tawn lo, tlawmin ka hung rih deuh hnu zongah kanu nih cun Zarhpini zanlei paoh ah hin a ka chuahpi tawn i khawlakah a ka vahpi tawn i, har ngai in a ka puak tawn, cubantukin kan chuahvah a kan hmuh tawn caah cun mi cheukhat an kan zaangfahtu an rak um i Phongpi Foundation nih Wheel Chair an hung kan cawkpiak, cu hnu ah Sianginn zongah keimah te in ka kal kho ve cang i puak ka hau ti lo, kanu zong catangsang a si caah kan sianginn ah cun cawnpaiktu rian a tuan ve colh i cuhlan tlukin cun harsa tukin kan um ti hraw lo, kan khimnak ding in a za tawk ei din tirawl cu Pathian dawtnak thawngin kan ngei ve lengmang. 

Tuah ding hranpa ka ngeih lo caah le tuah ding hmanh ngei ning law ka tuah khoh a tlawm caah ca zoh le ca rel kha ka tuah bik mi cu an si ko i, kan class zongah pakhatnak hna cu ka hei si ve tawn, cubantukin pakhatnak ka si caan ah cun kanu hi ai lawm tuk tawn i a si kho na lo in a ka lawmhpiak tawn, Tanghra exam hawi hna ah cun tha tukin ka passed hi Pathian nih kan sifah nak hna kha a hmuh i a philh lo caah le kanu nih a pah mi harsatnak vialte hna kha a philh lo caah a si lai cu, Top 10 lakah ka mi hna a hung lang kho ve, Lawmhpitu tam tuk te ka ngei i thilpek zong ka dong tam hringhran. Top 10 i ka langh ruangah cun ka ngakchiat lio ah Sianginn ka kai khohnak ding i Wheel Chair a ka cawkpiaktu Phongpi Foundation thiamthiam nih cun BA/B.Sc ka cawn chuah tiang ka cawnnak ding senso vialte cu an ka liam piak lai timi an hung kan thanh i, kan i lawm hringhran kan i lawmh tuk caah ka nu he cun kan i kup i , a tah zong kan tap, Pathian nih hin a kan philh lo, a caan te ah a hung lang tawn kan Pathian nih khan zungzalin a kan umpi ko. Ka hawinu Hmate he Sianginn pakhat ah kan kal ti kho ve cang lai ti ka hun hngalh hnu lebang ah cun kai lawmhnak a zual. Pathian nih a kan philh lo zia a thar in ka hngalh i, kanu tuarnak le har le phak in rian a tuan tawnnak vialte hna kha Pathian nih cun a rak hngalh piak ko ti ka hngalh ah cun a sinah lawmhbia chim kan bang loh. 

Kanu nih a ka zohkhenh i harnak phunphun a ka pah pi chung vialte le kum 16 chung ah khan ka pa cu voikhat hmanh ka hmu bal loh i, vikhat te hmanh a ka zoh ding zongin a hong bal lo, van hon cu chim lo phone chonh hmanh kan tong bal lo, mah pa le hmanh hngal lo in ka thang i, Midang an pa le kong an chim lio ah Pa ngeih ka rak duh ve tawn zia hna kha, a hmanthlak ah cun ka hmuh cang, ka zoh than lengmang tawn ka cim tawn lo, midang cu an pa le nih an puak hna hi an liang ah an i khinh tawn hna, kanu sinah hin "Pa ngeih ve ka duh" tiin ka ngakchiat lungfim lo ka si lio ah cun Pa ka rak hauh tawn. 

    All you`ve ever been is a call every now and then

    From some old pay phone After you`d hang up

    Lord, she`d take it rough and want to be alone

    I know you from the picture of you and her together

    Taken at a fair in `68

    You`ve gotta lot of nerve to think

    You can walk rigth in and take her place

Kha kum 15 liamcia chung vialte chungah khan khawi hen na um? Pa ngeih cak tuk in ka caan an liam tawn na hngal lo maw? Ziah hen voikhat te tal hmanh van ka hmu dingin na hon lo, tu hnu ah na von kan chonh ding a si tho ko tungah cun ziah hen a hlan te ah khan, kan in herh tuk lio ah le ka nu nih amah lawngin a ka kenkawi i harnak phunkip a ton lio hna ah khan van chonh ding pei na si cu, kha tlukin na hlawt le na zamtak hnu hmanh ah khan kei le kanu nih cun kan in dawt tuk rih ko i, kan hrangah na hung langh te lai ding hi ruahchannak he nithla kan rel tawn, na thawng hal kan dai bal lo. Phone nan chiah hnu ah khan kanu lungfah zia le lunglen ning cu ka mithmuh ah a voikhat nak si dingin a tap haih Kapa. Kanu sinah hin pa ngeih ve ka duhnak hi ka chimh tawn i, chim awk a hngalh lo caah "Vanram ah a um ko" tiin a ka chimh tawn. nain hi vawlei ah hin na kan rawinak thinlung he na rak tlawngleng sawsawh ko maw? kanu he hman nan thlak ti tawn mi hi ka zoh tawn i, Van lei khi ka zoh tawn, nain hi vawlei kan umnak ah hin nungdam in na banh phanhnak hmun ah ka rak um ko tung. Ziah hen voikhat hmanh a ka hmu dingin an hon lo, ka chuahcam hmanh voi 15 nak tiang kan lawmh cang si.  

Ruat khiarmar in lungfimnak caan a tam tuk, na ruahnak thluak zong a tha i, ruahnak ngeilo zong na si lo, kan nunah hing rung lut ve in ka nu rian hi na chawn khoh mi a tam tuk ko, caan tha tampi na ngei i, kan in herh tuk lai timi zong na hngalh lai, ziah hen Pa na si bantukin na tuah ding kha na tuah ko lo, Kanu hi ka pa a si chih i, Pa na si bantukin na tuah ve ding vialte zong ka nu nih a kemh chih dih tawn. Pa dawtnak co lo in ka than chung vialte hna ah khan ka nu nih hin ka pa can a can i, ka nu sin in Pa dawtnak le Nu dawtnak ka hmuh in ka co tawn. na tuah ding hna rak tuah ve tawn law a tha dih ko ding mi a si, ka ruah khiarmar ah hin nangmah ngaihthiam hi a har tuk in ka hngalh, zeitin hen nangmah an daw in an bochan tuk ve mi nu kha hi bantukin hnu na chit tak khoh?

    To me you`re just a man who made my mama cry

    Someone who broke a lots of promises in his time

    All i know about you is how to live without you

    And i can see i have your eyes

    But all you`ve ever been

    Is the man who made my mama cry

    Tu ah cun ka hung thanglian ve ngai cang, ngakchia chiahru tuk zong kasi ve ti lo, ka tuah ding le tuah lo ding hna zong ka thleidan thiam ve cang. ngeih ka duh bik mi thil kha ka duh lo bik mi ah a cang cang ko hih, "Kanu tahnak petu" na si dah tilo cu ka hrang ah sinak na ngei lo, Mah biakam hmanh a dirpi ngam lo mi le mah chimh mi bia hmanh a tuah than ngam tung lo mi maw na rak si. zei lungput dah na rak ngeih i kanu kha a that lio bik caan le an herh bik lio caan ah rak pheu kho hi nasi ti ka ruat theu. Soisel le thangchiatnak phunkip a tuar lio ah khan nang nih cun dawtnak he zei a si ah dirpi peng ding na rak si kha, cu chim lo kei hi ka fa a si loh tiin na rak ka hlawt a si lo maw? nangmah tel lo in nun hi nangmah kan hngalh ve ning cu a si i, nang lo in kha kum chung vialte kha kan ram um ve cang i, ka ngeih rih mi caan hna zongah hin nangmah lo in kan hman khoh rih ko lai, kum 15 leng kan tuar cang i, harnak le retheihnak, thlavaikian nak hna hi ka khual an si bal lo, a tuar zia kan thiam cang. 

Kan mitau zong ai khat, na mui zong a tha tuk ti ka hngalh, nain kum 15 liamcia chungah ka hrang i na tuah khooh ve mi um chun cu kanu hi na tah ter lengmang ti zong hi ka hngalh chih ve, muisam ah nangmah he i khat ko hmanh ninglaw thil dang ah cun nangmah bantuk si ve timhnak zeihmanh ka ngei lo, Ka hrangah cun ka nu lawng zong hi a za ko, Ka hrangah pa a si chih bantukin Nu vialte lakah nu tha bik zong a si fawn. Vawleicung ngakchia vialte nih hin ka nu bantuk hi ngei dih hna sehlaw nangmah bantuk hi pakhat hmanh an chuak hnga lo. Sualnak hna hi an um lai lo i, zumhtlaklo hna hi an um hnga lo. 

    When she took off my trainning wheels

    Held a job and cooked the meals

    Where were you.?

    Don`t even start

    She did her part

    And yours too

    Now you`re back to play the part

    That was missin` in my heart

    When i was growin` up

    Well you`re little late

    I don`t have the time to waste on catchin` up

   

Keimah zawn lawng ruat in le ka hmailei hrang dingah lungrethei in ka nu a colcangh lio hna ah khan aw... Rianhrang tuan in, ruahpi sur le nilin tangah thlanhripi puakin rian a tuan tawn i, Kanu nih cun ka rawltam tihal lai phang in, hruk puan ka ngeih lo sual phangin rian a tuan tawn. na tuah ve ding vialte zong a tuan chih dih a si ko, Mi inn ah fang a khei, mi thilri a suk piak hna, Nungak dawh le tungtai rem tlangval zong nih an uar tuk tawn mi kha mitang ah toidor te in ai hlawhfa tawn haih, eidin thaw bik bik a ka tuah piak i, a ei ai hmanh a ka ei ter deuh caan a tlawm lo, kha chung vialte ah khan khawi ah hen na um, Kapa? Wheel Chair in a ka cawithlir le a ka thial mi hmanh hi nu pakhat hrang lawngah cun thil awlbai a si tung lo. 

Nang nih cun hung ka zohkhenh duhnak lungput fate hmanh na ngei rua lo, hung kan zohkhenh cu chim lo ka fa a si loh na ka ti  khoh mi kha ka khuaruah hmanh khi a har lo lei a si. Ka nu nih cun Nu a si bantukin a tuah ding vialte a ka tuah piak dih i, Pa na si bantukin na tuah ve ding vialte zong a kemh chih tawn. Tu rilmal ah na hung i langhter i Pa na si bantukin na tuah ve ding cu tuah than ve dingin na hong ve maw, Ziah hen kha kum 15 chung vialte ah khan Pa ngeih ka duh ve tuk lio ah khan, ka nun ah a tling lo mi a um lio ah khan na hawn deuh lo, tu ah cun khua na tlai tuk cang. Ka thanglian ve cang i, na sin i caan hmang dingin cun ka caan hna hi ka siang ti lo, Nu ka ngeih ve rih i ka caan vialte hna hi ka nu hrang lawngah pekchanh ka duh rih, Ka nu hi ka hrangah cun Pa a si ko. 

Suimilam caan cheu hrawng a room chung i a tah hnu ah cun ka nu cu a hung chuak than im a mitthli hna cu a hnawh dih i, a hung ka kuh i, ka hei kuh ve i, thil umtuning zeihmanh hngal lo bu cun ka tah hnawh thluahmah i "Kanu zeidah cang, Kan inn hi an kan chuh taktak cang lai maw?" tiin ka hal i, "Si lo, ka fa. Ka dawt, lih kan rak chimh tawn caah ka ngaithiam mu, nain na lungfah nak hnga lo ding caah kan chim duh tawn lo, Tunai i phone in a ka chawn tu kha na pa a si, a pawngah um dingin le sianginn tha deuh ah kal ter dingin a van kan chonh" tiah ruah lo pi in a von chim. Khuaruahharnak in ka khat, ka mang maw ka cang chikhat kai fiang lo, a tak a si hnga maw tiah ka nu cu ka zoh than, a mitau ah cun lih pakhat hmanh ai tel lo, sianlonak, zawnruahnak, zaangfahnak, dawtnak le ngaihchiatnak mitau an si. 

Lawmh ding maw tah ding timi hmanh ka thleidang thiam ti lo, chikhat cu ka ngong, cohlan zia ka thiam lo, Pa ka ngei ko, a dam zong a dam rih ko timi ka hung hngalh kai lawmh ngai lio ah ka pa cu ka huatnak khuaruah ah a lut. ka nu cu ka zoh i, "Ka nu kapa sinah cun na kal ve lai maw?" tiin ka hal i, "Ka nu nih cun zeihmanh a chim kho lo, a lu a lei. "Ka nu na hon ve lo ding cun ka duh ve lo" kati.  kanu nih cun "ka dawt, kei cu a pawngah ka um kho ve ti loh teh, nupi a ngei cang teh, nain ka dawt nang cu na duh ah cun na pa pawngah cun um ko mu, Khuapi ah inn nganpi an ngei i, na duh mi paoh na ei khoh lai, motor in sianginn  zongah an inn chiah lai, nain na pa sin um na duh lo i, ka sin um na duh deuh ko zongah a pawi lo, nangmah telawng hna hi cu kan cawm khoh ve ko lai, nain na pa sin na um tlukin cun nai nuam kho lai lo " a ti i, kei zong nih cun ka nu sin um thai cu ka thim deuh caah. ka nu nih cun a ka fial ve lo. cu zaan ah cun ka nuh nih ka pa he an konglam vialte cu a ka chim dih i, ka nu cu ka zaangfah hringhran a hlan nak in ka zohsannak zong a sang chin chin.

A thaizing nikhua a hong ceu than hawi i, Nidang ah a kan zohkhenh bantukin nihin zongah Pathian nih a kan zohkhenh than hawi ko lai timi ruahchannak nganpi he, English School Uniform thar te i hruk in, kan school lei ah ka hawinu hmate nih a ka nawr ziahmah i, ka nu nih cun lampial kan liam lai tiang a kan cuanh ko, lampial kan liam lai te ah cun chikhat kan dir ta i, hnulei ka hei zoh than, "Ka nu kan dawt tuk, kai lawm tuk mu" tiin ka hei auh than i, ka kut ka zo hnawh, ka mitthli cu a dor te te an tla, ka nu zong ai lawmhnak mitthli a luang. cun vanlei khi ka zoh i, Ka nu nih a ka chimh tawn bangin "Ka pa, vanram i a um mi sinah" kum 15 chung kan nufa in a kan zohkenh caah lunglawmhbia ka chim. 

Salai C. Vanramdinmawi

(Tenglam)

30. April.. 2015