Jesuh ka chimh lai ( I must tell Jesus all of my trials)

Nothing is permanent in this wicked world - not even our troubles....

----- Charlie Chaplin

"Hi a chiakha mi vawlei ah hin a hmun mi zeihmanh a um lo, Harnak kan ton mi hna zong hi an hmun ve lo" tiah Vawleicung Capo saih minthang Charlie Chaplin nih a rak ti, hi bia hi a dik ngai mi le minung hringnun hrilhfiahtu tha ngai a si in ka hmuh, Kei zong kum no te ka si rih nain ka caan liamcia ka ruah than zawnah hin mipakhat lawng nih a phurh khoh lo ding mi harnak tete ka ton mi hna an um len ve tawn, khua ka ruah ah hin keimah kum ngakchiate a si rih mi hmanh nih kha tluk harnak phun phun ka ton manh a si ah cun ka nu le pa hna nih khan zeitluk harnak le lungretheihnak tam dah an rak ton in an rak pal ve cang hnga ti a ka ruahter tawn. 

Harnak ka ton caan paoh ah hin ka ton mi harnak hna cu zeitlukin a ngan mi an si ah keimah lawngin phurh khoh lomi an si caan zongah kai hnemh tawnnak bia cu "Hi zong hi a dih ve ko lai" timi bia te hi a si i, hihi ka nunnak hringnun lamhrawnnak ah Motto bantukin kai tlaih ve mi a si. Sianginn ka kai lio ah cun harnak hi ka rak tong tuk lem lo nain Sianghleiruun ka hun phanh hnu in pakhat hnu pakhat in harnak cu an hun i zuul pah lengmang cang. A caan ah cun a har tuk tawn ah hin minung si ka duh lo caan tiang hna zong a rak um bal nain "Hi zong hi a dih ve ko lai" timi nih hin ruahchannak thar a ka pek zungzal tawn.

Harnak nih a kan phak i kan nun ah sunghzatlaknak nih a hun kan tlunhnawh taktak cang ah cun zan hngilh nih merem thiam a si loh i rawlei nih chung a pil kho fawn lo capo bia tha tak tak an hun chim hmanh ah khin hawi rual ah nih ve lo cu tiin mui cu a mirh nain thinlung cu a ttap thiam thiam ko.

Hringnun lamthluan hi a tluang peng timi a um lo, Minung nih kan cawh mi Motor lampi ngai ngai hmanh hi a phei lawng cun a si kho lo, cheukhat ah a chuk deuh i cheukhat ah a cho deuh i cheukhat ah cun a phei ngai ngai ve tawn ko, Motor Lampi bantukin kan hringnun lamthluan zong hi a tha in a tluang peng kho ve lo, a caan ah cun nuamhnak le lawmhnak lamthluan zuul in hlawhtlinnak kan co lai a caan ah cun tahnak le sunghzatlaknak hmunah harnak nih a kan hruai lai. kan nun ah hin a caan ah harnak ruah a sur lai i a caan ah cun lawmhnak ni a tlang tawn ko lai, zeihmanh hi a zungzalin a  hmun mi tak tak an um lo, an hong i an kal than tawn, an kal i an ra than tawn an caam lan peng tawn lo. kan mah bantukin hawi dang zong nih harnak hi an rak ton ve cio ko bantukin lawmhnak zong an ton ve cio ko kan ton mi le ton ning bel ai khat tawn lo. 

Harnak kan ton mi hi ai khat cio hna lo a caan ah cun harnak kan ton mi cheukhat hi cu kan minung pi hawi ho sin hmanh ah kan chim ngam lo ding mi thil hna an um tawn, rawhnak le sunghzatlaknak lawng silo in ningzak a si caan hna zong a um tawn, thlavaikiang tak tak in nun a si tawn a fawi tawn lo. mah lawngin hun tuar ding ah le a si kho fawn lo mahlawngin in cun phurh khoh dingmi an si fawn lo, cutikah cun cunglei khi ruahchannak in kan hlam tawn.

Sianginn ah ca ka cawng ve tawn timi vialte hmanh philh dih in lo ka thlawh caan a um i, Ruahsur le nilin lakah thosi le thlanhripi he lo ka thlo tawn tim vialte philh in ca ka cawn caan zong ka nun ah an um tawn, harnak kan ton mi hna hi lawmhnak kan co tikah cun kan philh te hna lai i, harnak le sungzatlaknak nih an kan tlun hnawh tikah cun kan rak i nuamhnak le hlawhtlinnak hna kha zeihmanh lo ah an can tik a um ve ko lai, zeihmanh hi an hmun zungzal mi an um lo, kan nunnak ah hin harnak le nuamhnak hna hi an caam lan ballo chikhat an hong i chikhatte ah an ciam than tawn. 

"Hi a chiakha mi vawlei ah hin a hmun mi zeihmanh a um lo, Harnak kan ton mi hna zong hi an hmun ve lo" tiah Charlie Chaplin nih a rak chim mi a dik mi a si i harnak kan ton caan ah siseh sunghzatlaknak le rawhnak kan phanh tik zongah kan philh lo ding mi le "Hi zong hi a dih ve ko lai" a kan titer kho zungzaltu si sehlaw. 

Vawleicung mi minthang le Vawlei theih in hlawhtlinnak a co mi hna nun kan zoh ah hohmanh harnak a luat mi an um lo cheukhat hawi hna harnak tamtuk nih a sur hnawh hna i an hlawhtlinnak he ai phu zo deuh lo ti khoh ding tiangin harnak rel cawk lo an rak ton hna, Hlawhtlinnak an co i Vawleipi nih an min kan hngalh hnu hna hmanh ah hin harnak chungin an luat kho hlei lo harnak nih cun chikhat cu a den than thiam thiam ko hna, hi a chiakha mi vawlei ah hin harnak in ka luat cang ti kho hohmanh an um lo. 

Cutikah harnak kan ton tikah, Sunghzatlaknak le rawhnak nih kan nun cu a hun den tikah "Hi zong hi a dih ve ko lai" timi biatung dirpi in ruahchannak ngeih peng hi a rak biapi tuk, hi vawlei ah cun harnak in kan luat cang timi a um lo caah le hi vawlei cu harnak vawlei a si caah khan hi minung nunnak kaltakin kan khualtlawnnak vawlei in kan pa sin kan phak tik tu ah khin hi vawlei kan caam chung i harnak kan ton mi hna hi kan Pa Pathian sinah kan chimh ve te ding kha kan hngahhlang.

Lai Khrihfa Hlabu (ZBC) No. 398 nak "Jesuh ka chimh lai" timi hla a mirang hla in "I must tell Jesus all of my trials" timi hi American Pastor Elisha A. Hoffman nih harnak phun phun a ton hnu le a nupi hmasa Susan M. Orwig.  nih a rak thih tak hnu le Pastor si buin retheihnak le sunghzatlaknak phun phun a ton hnu Pastor rian kum 44 leng a tuan chung ah rawhralnak le lungretheihnak tete a rak ton mi chungin kum 1893 ah a rak tial mi a si. 

Hi vawlei hi cu harnak vawlei a si bantukin harnak nih a sur lengmang caah khan hi vawlei ah harnak kan ton tawn mi tete hna hi kan mah lawng in kan tuar khoh lomi harnak hna zong kan ton tawn caah hi vawlei chuahtakin Jesuh sin kan phak tikah Jesuh sinah harnak ka ton mi hna hi ka chimh te lai a rak ti duhnak hla in a phuah mi a si. Pastor Elisha A. Hoffman cu a riantuan piakmi Jesuh sinah kum 1929 kum ah a rak i din cang, a dam lio zongah khan harnak a ton mi thil hna kha a mah lawng nih a phurh khoh mi a si tawn lo caah Jesuh sinah thlacamnak in a chimh tawn i, cu harnak le teminnak sinin a tuarpi kho tu harnak a phurhpi khotu si kha fiang tuk in a rak hngalh.


Salai C. Vanramdinmawi
(Tenglam)

Lawngtlai 3:30 - 06:00 am

"Jesuh ka chimh lai" ( I must tell Jesus all of my trials)

Phuahtu : Elisha A. Hoffman

I must tell Jesus all of my trials;

( Ka harnak vialte Jesuh ka chimh lai)

I cannot bear these burdens alone;

(Ka thilrit kei lawng ka phur kho lo)

In my distress He kindly will help me;

(Ka lung retheih lioah a ka bawmh lai) 

He ever loves and cares for His own.

( A ka dawt i a ka ruah zungzal)

(Chorus)

I must tell Jesus! I must tell Jesus!

I cannot bear my burdens alone;

I must tell Jesus! I must tell Jesus!

Jesus can help me, Jesus alone.

(Jesuh ka chimh lai, Jesuh ka chimh lai, 

Ka thilrit kei lawng ka phor kho lo. 

Jesuh ka chimh lai! Jesuh ka chimh lai 

Jesuh lawng bawm kho tu cu a si.)

(Cang 2 nak)

I must tell Jesus all of my troubles;

(Ka temh innak cu Jesuh ka chimh lai,)

He is a kind, compassionate friend;

(Amah cu zawn ruah nak he a khat, )

If I but ask Him, He will deliver,

( Bawmhnak ka hal ah cun a ka khamh lai)

Make of my troubles quickly an end.

( Ka temh innak cu a donghter lai.)

Cang 3 nak

Tempted and tried, I need a great Savior;

( Hneksaknak chungin Khamhu Bawi ka herh,)

One who can help my burdens to bear;

(Ka thilrit vialte chawng kho tu cu,)

I must tell Jesus, I must tell Jesus;

( Jesuh ka chimh lai, Jesuh ka chimh lai, )

He all my cares and sorrows will share.

( Ngaihchiatnak vialte a ka chan lai.)

Cang 4 nak

O how the world to evil allures me!

( Vawlei nuamhnak nih an ka lem lengmang,)

O how my heart is tempted to sin!

(Sualnak tuah dingin an ka lem tawn)

I must tell Jesus, and He will help me

( Jesuh ka chimh lai i, a ka hruai lai, )

Over the world the victory to win.

( Vawlei vialte ka tei khawh nakhnga)