Zeitin a si khoh : How Can It Be

Khuaruahhar dawtnak 

Nu le Pa hmunkhat ah an um ti caan a tam i an i chonhbiak a tam hrat cu, ruahlo karah tlaihchannak nih an thinlungah hmunhma kau tuk a rak lak cang, inn lei ah a Pasal nih a rak chonh that deuh lo caan hawi hna lebangah cun a hawitha bantukin a zoh mi pa cu aa bochan deuh caan hna zong a um tawn, cubantukin nikhua a hung liam lengmang hnu lebang ah cun a tha loh ti a hngalh tuk ko bu in cu a bochan mi pa he cun Uire nak lamthluan an zawh ti cang, Pasal ngeih bu in pa dang hun duh ko cu zaan a ih caan hna zongah hngilh lo in khua a ruah caan a tlawm ve lo, a tha lo, mi nih an kan theih ah cun kan mual a pho tuk lai, ningzak tuk a si lai ti a hngalh peng ko bu cun, cu pa he cun caan an hmang ti theu tawn, an i thup an i duhp ve ngawntaw ko nain vampang hna zong nih hnakhaw an ngeih anti bang, an i thup cawk ve lo, nikhat cu nupa sinak an tuah lio ah an va paoh hna. 

Judami hna nih phunglam an ngeih mi ningah cun cu nu cu lung in a thih tiang cheh ding a si cang, a rak phan cia bantuk tein an hun theih hna tikah cun a mual a pho cikcek ningzahnak le mihmaikhah lo he, lung in an cheh lai ti a hung i theih hnu lebang ah cun tihphannak he a khat, nain a tuah mi cu thil tha lo a si hngal ko buin a tuah mi a si caah ho sin hmanh ah bawmhnak hal ngam ding a si ti lo, hei hal ta reng hmanhsehlaw a minung hawi lakah a chanh kho ding hrim an um ti lo, Pathian a um ti cu a hngalh nain a sualnak cu a ngan tukin a hngalh caah bawmh cu chim lo thlacamnakin ngaihthiam hal hmanh a ngam lo.

A sualnak cu a hngalh i, ai huah mi dantatnak hmu dingin lung in an chehnak hmun lei cu tah thluahmah bu in a panh, a ngaihchiat lungsivan tukah kal kho lo tiangin a tah caan hmanah Juda tlangbawi pawl nih cun a samphur in an hnuhchih len tawn, a nu hawi hnalakah hun chanh ngam cu chim lo, a hawitha bik hna hmanh a ral ah an cang dih cang i cil an chak chel an volhpamh chel a dirhmun cu hun zoh ah ruahchannak hrim a um ti lo, minung lei ruahnak in cun a pih in a pit. Ngakchia mitpur hna zong nih an nu le bia i lak zau in hlasak in an sak i a hnu in thangchiatnak bia he an dawi,  Juda tlangbawi pawl hna cu uangthlar le rumra ngei ngang in hmai an suang.  

I am guilty

Ashamed of what I've done, what I've become

These hands are dirty

I dare not lift them up to the Holy one

Liamcia caan ah kan rak tuah mi sualnak hna kan hngalh peng tluk le kan nunthing hna kan i cinken peng tluk hin Jesuh nih cun a rak kan hngalh peng piak lem lo, kan mah nih kan sualnak hna cu hngal camcin hmanh ning, midang nih kan sualnak hna cu hong kan hngalh piak peng tawn hmanhseh, Juda tlangbawi hna nih Nucung pa duh nu Jesuh sin i an va hruai, Jesuh a hun hmuh lebang ah cun minu cu khua a hoi ngam lo, bawkkhup in vawlei a zoh i, cunglei hrim a zoh ngam lo, Ningzahnak, tihphannak, tlau duhnak leh thih zawkzawk duhnak in a khat.

A sinain Jesuh nih cun a thawh i,  “Minu sual an phawtu hna kha khawzei ah dah an um dih? Ahohmanh nih thiamlo an in coter lo maw?” tiah a ti. a hung i hliphlau i  a upat tuk le a hmai a kha lo tuk mi cu Jesuh cu a hun zoh i, i phuhrung le ningzak bu te in "Coter lo, Bawipa” tiah a leh. Jesuh nih, “Keizong nih thiamlo kan coter lo, kal law va sual ti hlah,” tiah a ti. Minu cu a khuaruah a har tuk, kha tlukin kum 1000 leng sualnak a rak si i lungcheh an i huah tawn mi sualnak a tuah lio ah zeitin hen ngaihthiam a si khoh nak a theithiam lo, chikhat cu a ngong ai zumh lo, Jesuh dawtnak khuaruahhar cu  mak a ti  tuk. cubantuk dawtnak cu a a rak hngalh bal mi a si lo.

A sualnak hna cu ngaithiam si in, a nunthing hna cu philh piak a si, nunthar pek a si i, Jesuh nih cun kan sual nak kha thatnak in thlen a si khohnak hnga, kan nunhlun cu kaltak in nunthar kan ngeih khoh nak hnga a nunnak tiang a pek. Kan sualnak rel cawk lo vialte hna cu kan hngalh peng nak hnga lo cu sualnak sin cun a kan chuah i zalonnak a kan pek, hi Uire nu kong ka ruah ah hin Jesuh dawtnak hi khuaruahhar tuk a si nak ka hung i fiang i, zeitin hen a si khoh hnga ti a ka ruah ter tawn.

ou plead my cause

You right my wrongs

You break my chains

You overcome

You gave Your life

To give me mine

You say that I am free

How can it be

How can it be

Peter cu Jesuh nih thawngtha a chim thawkkain Jesuh zuultu le khuaruahhar a tuah mi vialte hna zong a hmu tu a si nain Jesuh an tlaih i an hun tukvelh tak tak tikah cun, nang hi Jesuh zuultu kha na si ve lo mai an hun ti hmanh ah "nan chim mi pa hi ka hngalh mi a si lo" tiin a hlawt, Jesuh nih a rak chimh chung bantukin "Peter arkhuan hlanah voithum tiang na ka hlawt lai" a rak timi kha a voithumnak a hlawt hnu ar a hung khuan te bakin a hung i fiang ai, nain khua a tlai tuk cang, a Bawipa cu a minung hawi hna hmai ah a hlawt cang caah Arkhuan thawng a theih hnu lebang ah cun lo diam a kal i, ngaihchihnak lungchirnak he a khat.

Jesuh an tuk an velh i Vailam an tah lio hmanh a zoh ngam lo, a sualnak kha a ngan tukin a hmuh i, amah le amah ai ngaihthiam khoh lo lawng si lo in, Pathian sinah cun ngaihthiam a hal ngam lo, Jesuh zuultu hna lakah hotu bik can a cang tawn nain Jesuh Vailamah an thlai i thlanchung i an phum hnu zongah a thlan zoh dingin a kal ngam lo, a thli tein a ningzahnak hna cu a tuar i, phuhrunnak nih a ruahnak cu minmei zaam bang a khuh dih. 

Jesuh a hlawt hnu ah cun a riantuan tlakah ai ruat ti lo i, ngaihthiam khoh minungah ai ruah ti lo caah cun Jesuh a rak hngalh hlanah ah a rak tuan tawn mi Nga tlaih rian ah khan kir than i a nunthing cu zulh than ai tim, Jesuh he an rak tlawnlennak hmunhma hrim hrim zong hmuh a ngamh ti lo, Jesuh min an hung chim i a hna nih a theih caan hmanah a lau, a ning a zak, ai phuhrung tuk tawn, Voi thum tiang a rak hlawt cang timi kha ho nih an chim na loin a hnathlamah thang tukin a theih tawn. 

I've been hiding

Afraid I've let You down, inside I doubt

That You could love me

But in Your eyes there's only grace now

Jesuh a hlawt ruangah a ningzah tuk le Jesuh hmai a khah lo tuk hnu ah Peter cu Jesuh he an rak tlawnlen tawn nak hmunhma hna hmanh sul khirh than ngam lo in an khua a kir than, nikhat cu khua a ruah hnu ah sur vorh i nga tlaih than dah a that lai tiah Sur vorh ding cun ai thawh cun a hawi le nih an hei zulh ve, Sur a hun vorh i tipi cung a um ah cun a ruahnak ah ai uam tuk mi a ningzahnak le lungsivannak hna cu chikhat a hun philh tawn, nain  sur vorh a von ngawl deuh caan ah cun a ruahnak ah a hung lang than theu tawn Jesuh a hlawt lio kha.

Minung palhnak a cinken piak peng tawn lo tu Jesuh nih cun Peter cu a hun fuhpanh than i, Peter sinah cun "Ka tuu kha zohkhenh hna" a va ti than thiam thiam, Voithum tiang a hlawt hnu ah leh a vailam an tah lio hmanh ah a pawng a ngam lo lio ah Jesuh nih a tuu hna zohkhenh dingin a zumh khoh rih ko mi a ruah ah Peter cu a ngaih a chia, a khuaruah a har, Jesuh dawtnak lianngan zia le kauh zia kha fiang tukin a hmuh. 

ou plead my cause

You right my wrongs

You break my chains

You overcome

You gave Your life

To give me mine

You say that I am free

How can it be

How can it be

Misual si kan i hngalhnak nih hin Jesuh sin kan phak nak ding lam a kan donh tawn, Kan sualnak a phun phun hna kan ruah than, cheukhat cu ngaihthiam khoh tilo ding tiangin a fihhnawm mi sualnak hna kan rak tuah theu caah kan minung ruahnak in kan ruah khiarmar ah cu kan sualnak vialte he cun Jesuh lei panh kan ngamh tawn lo, kan duh lo ruangah silo in kan ningzah le kan i phuhrun ruangah cu kan sualnak le palhnak ruang i harnak ngan ngai kan ton caan hmanh ah Pathian sinah bawmhnak hal cu chim lo ngaihthiam hal in thlacam hmanh kan ngamh tawn lo.

Sualnak in kan buar cang mi taksa he hin Jesuh Biakinn thiangah luh kan ning a zak, Sual tuahnak ah kan hman mi kut i van lei ah phar in Pathian thangthat kan i phuhrung. Kan nunthing vialte hna ruah ah Jesuh hmai chuahpi dingah ningzak a si tawn, Kan thinlung nih duh hmanh seh kan ruahnak nih a ngamh tawn lo. Nunhlun hna hi hlawnh khoh mi um sehlaw hlonh ding tamtuk ngeih hnu, hun ruah nolh sual caan hmanh ah ruah thai ngam lo ding nunhlun kan ngei cio ko hna lai dah, nunhlun ah kir than khoh sisehlaw tuah nolh dingah kan duh lo mi sualnak hna kha kan philh khoh lo mi le cu sualnak hlun cu nunpi in Misual kan si kan i hngalh caah Jesuh sin kan phak nak ding ah lam a kan kham tu an si theu tawn. 

Nain cu sualnak kan tuah mi vialte hna le fihnung thil kan rak tuah mi vialte cang mi hna nih ningzahnak le phuhrunnak thawngin ah kan nun a chiah hnu, nunthing cu philh kho lo in, kan hngalh peng lio caan hna zongah, minung cu kan si rih nain kan nun a thih cang hnu zongah cu sualnak nih a nenh peng mi nun in zalonnak a kan pe than kho tu le a kan chuah kho tu cu Jesuh lawng lawng hi a si, amah nih cun kan sualnak hna kha a hngalhpiak peng loh i, a velngeihnak nih cun zaangfahnak he a kan cohlan thiam thiam rih ko.

Hi thil ka ruah ah hin ka khuaruah a har tawn, hi tluk dawtnak ngan dawtnak thlum hi a um khoh ka zuum lo, zeitin a si khoh zeitin a um khoh, nain a tak a si zia ka hmuh ah ka khuaruah a har, asunglawi tuk. 

Though I fall, You can make me new

From this death I will rise with You

Oh the grace reaching out for me

How can it be

How can it be

Uirena a ngaithiam khotu, Lainawng le Mifir hna zong dawtnak in a cohlang tu, zei bantuk sualnak kan tuah paoh ah a kan hlaw bal lo tu, kan mah nih kan sual zia i hngal in kan ningzah le phurhrun ruangah kan panh ngam lo caan hmanh ah kan herh zia hngal in a kan panh i dawtnak in a kan umpi tawntu Jesuh nih cun, kan sualnak hna kha a kan ngaihthiam i, kan palhnak hna kha kan remh piak cang, kan tluknak hmun in a kan thawh lai i, kan bawhnak hmun in a kan cawi lai, kan i thuhnak hmun in a kan chuah lai i, kan tlaknak khur in zalonnak a kan pek lai. Hi kan nunhlun hi kaltak in nunnak thar cu a kan pek, kan sualnak vialte ruangah le zungzal nunnak kan ngeih ve khoh nak hnga a nunnak tiang a pek, hi bantuk thil vialte a tuah kho tu Jesuh dawtnak hi khuaruahhar a va si hringhran dah.

You plead my cause

You right my wrongs

You break my chains

You overcome

You gave Your life

To give me mine

You say that I am free

How can it be

How can it be

Salai C. Vanramdinmawi

(Tenglam)