Pathian nih an zohkhenh lai ( God will take care of you)

Pathian nih an zohkhenh lai ( God will take care of you)

Khrihfabbu Chungtel hna nih hin kan khrihfabuu upa le kan Pastorte hna nih chungkhar harnak le relremlonak zeidah an ton timi hi kan theih thlu pi lem dih hna lo, a caan ah cun chungkhar ah ngandamlonak le zawtfahnak a um caan zongah Pathian le a khirhfabuu caah tiin lungsiaherh bu te in voi zeizat remruam hen dah chungkhar an chuahtak caan hi a um ve tawn hnga? 

Civilla Durfee Martin le Walter Stillman Martin nupa tuanbia hun zoh zongah hin tampi cu hmuh khoh in a um, Walter Stillman Martin cu Baptist Pastor rian a tuan lio mi a rak si i, an nu cu sianginn ah cawnpiaktu le ringawn lei ah a thiam ngai mi zong a si. Martin le a chungkhar hna cu  Practical Bible Training School at Lestershire, New York ah khualtha in an um lio a si i, Reverend W. Stillman Martin nih a tuah cuahmah lio mi Hla buu tuah bawm in Martin zong a buai ngai ve tawn. 

Kum 1904 ah a si. Zarhpini zing khat cu Martin kha an umnak Bible sianginn in a hlat ngai nak hmun pakhat ah thawngtha chim dingin an sawm, cu zing ngelcel ah cun an nu Civilla cu fak ngai in a zawt caah an pa cu a thawngtha chimnak ah zul kho ding a si ve ti lo, an nu cu a zawtfah ngai caah Martin nih cun a thawngtha chim ding zong cu chim lo ah maw a tha hnga, kan nu hi hitihin a si tung i kaltak awk a tha hnga maw" tiin a khuaruah a buai ngai. An nu a zawtfah ngai lio ah hmun hla pi i kaltak cu a sia a rem tuk lo, cubantukin khuaruahhar ngai in khua a ruah lio ah cun an fapa kum 9 lawng a si rih mi te nih cun a pa lungretheihnak kha a hmuh piak ko, an fapa te cu a nu zawtnak pawngah a thu ko mi a pa sinah cun a hong i, "Kapa, Pathian nih hi ni ah hin thawngtha chim dingin an duh tak tak a si ah cun, na um lo karah ka nu hi a rak zohkhenh ko hnga lo maw?" tiah a hong ti. Martin cu lungcan a hung i pe i, an nu sinah cun "Pathian nih an zohkhenh ko lai, na thachia la cih" tiin Thawngtha chim ding cun ai tim. 

Cuticun Martin zong cu siaherh ngai bu in Thawngtha chim ding cun ai thawh i an nu cu a kal tak, a kal pah cun khua a ruat, ka kal karah kan nu nih zeimaw dek hna rak tong sehlaw ka um lo ah cun a thlavai a kiang tuk sual hnga maw? tiin ai ruat pah lengmang, nain a fapa nih , Pathian nih hi ni ah hin thawngtha chim dingin an duh tak tak a si ah cun, na um lo karah ka nu hi a rak zohkhenh ko hnga lo maw?"  tiah a chim mi bia te kha a philh loh i, Pathian nih ka nupi le fanau hna cu a rak zohkhenh ko hna lai" timi ruahchannak he Thawngtha cu a va chimh hna. 

Thawngtha a chim khoh Pumh an dih hnu ah cun khoika hmanh ah tang ta lo in Martin cu an inn lei ah a lawi colh, a kal ning hmanh ni dang nak cun a khul a rang ngai ngai, Inn a va phak ah cun an nu cu zingka nak khan a rak harh deuh ngai ngai i a thawh hmanh a rak tho kho cang, Martin pumh a kal karah ah khan an nu Civilli nih cun an fapa te biachim mi kha a ruah lengmang tikah a thinlungah hi hla "Pathian nih an zoh lai" ( God Will Take Care of You) a hung lang i, hi hla hi cu Sunday chunah tial mi cu a si. 

Cu zanlei ah cun Sianginn a tuanpi hawi hna ni a damlo ti an hngal caah Civilli cu an hong leng Ringawn lei ah a thiam mi le hlasak a huam ngai mi an si ve caah cu hla cu an sak hna i, a zarh nolh ah sianginn ah an sak colh fawn i cu hnu ah cun midang nih an hung theihhngalh cio mi hla ah a cang lan. 

Hi hla hi zawtfahnak he ihkhun ah a it mi Pastor Martin nupi hrang lawngah si lo in Khrih a zuumtu vialte hna caah hla tha ngai pakhat a si nak cu, zawtfah harnak kan ton caan le tluangdang ram i kan tlawn caan zongah dawtmi chungkhar hna kaltak a herh caan i siaherh ngai le ruah hau ngai in an um caan zongah Pathian ah hngahchan in "Pathian nih an zohkhenh ko hna lia" timi nih hin hna ngam ter ngai ngai. 

Pathian nih an zoh lai (God will take care of you)

Civilla Durfee Martin (1866-1948)

1. Sifah innak ca thinphang hlah, Pathian nih an zoh lai,

 Amah dawtnak thla tang um tuah, Pathian nih an zoh lai.

Be not dismayed whate’er betide, God will take care of you;

beneath his wings of love abide, God will take care of you

Thinphang le ngaihchia in um hlah, na cungah zei a tlung hraw lai lo dahkaw, a hlan ah siseh, tu ah siseh, hi hnu hmai lei zongah Pathian dawtnak velngeihnak nih an rak zohkhenh lengmang cang bantukin hmailei na pah dingmi lam zongah hin a dawtnak dongh ni ngei lo nih cun an zohkhenh than ko lai, Pathian nih an zohkhenh peng ko lai.

CHO: Pathian nih an zoh lai, Nifa kalnak khuallam ah khan,

 Amah nih an zohkhenh, Pathian nih an zoh lai (an zoh lai)

God will take care of you, through every day, o’er all the way;

he will take care of you, God will take care of you.

Zei na tuah paoh ah, lamcho na kai ah siseh, Lamchuk na tumah siseh na kalnak paoh ah, zei na tuah paoh ah a hlan i an rak zohkhenh lengmang cang bantukin an zohkhenh than ko lai, na tuah mi thil hna an hlawhtlin lo caan le na lam hna cu an har tuk caan zongah, kal nak lam hngal lo tiangin le tuah hngallo hnabeidong lungsivangin na um a si zongah Pathian nih an zohkhenh thiam thiam ko lai.

2. A fakpi rian na tuan tikah, Pathian nih an zoh lai, 

Na kalnak lam phannak um lo, Pathian nih an zoh lai.

Through days of toil when heart doth fail,

God will take care of you;

When dangers fierce your path assail,

God will take care of you

Na rian hna an tlamtlin lo tik le, ngaihchiat lungsifahnak hna nih tilet bangin an phanh tikah, a fak bik mi lungfahnak nih an den i mitthli he hringnun lamthluan na hrawn caan a um zongah, Tihnung thil hna na ton i, na harnak ton mi cu nangmah lawngin pah ngam lo ding thil hna an si tik zongah siseh, na tuar mi harnak hna cu nangmah lawngin na phurh khoh lo tik zongah, Pathian nih cun an zohkhenh camcin lai.

3. Na herh vialte kha an pek lai, Pathian nih an zoh lai, 

Pek lo in zei hmanh um lai lo, Pathian nih an zoh lai.

All you may need He will provide, God will take care of you;

Nothing you ask will be denied, God will take care of you.

Chambau in na um tikah le riltam tihalin na um tik zongah, na herh mi thil hna chambau in tlamtling lo ngai in na um caan ah siseh, hoihngar in an chia lai lo, na herh mi thil hna cu pakhat hmanh bau lo tein an pek lai i, zawnruahnak thinlung he pei an zohkhenh lai cu, na herh mi thil hna cu na hal lai i, Pathian nih cun an leh lai i a caan a zat ah cun an pek ko lai, Na chambau lai lo, Pathian nih an zohkhenh lai caah.

4. Tukforhnak kha na hmuh tikah, Pathian nih an zoh lai, 

Amah tangchung ah va um tuah, Pathian nih an zoh lai.

No matter what may be the test, God will take care of you;

Lean, weary one, upon His breast, God will take care of you.

Tukforhnak horkuang chungah na luh sual i, nangmah zumhnak thawnnak lawngin na doh khoh lo tik ah khan, amah sinah khan thlacamin i pechan law an leh ko lai, na thlacamnak hna cu a rak ngaih lai i an bawmh ko lai, an rak zohkhenh tawn bantukin tu ah siseh, hmailei ah siseh an zohkhenh lai caah Tukforhnak a fak ngai mi chung zongin an chuah lai i, na tlu lai lo, na tluk hmanh ah an thawh than lai, na tho than lai i vanva bangin na zuang than lai, Pathian zohkhenh mi na si caah.

Salai C. Vanramdinmawi

(Tenglam)