A leh lo mi kan thlacamnak

A leh lo mi kan thlacamnak

Marilyn Monroe cu, Vawleicung muidawh bik minthang a si. Albert Einstein cu, Vawlei cung mifim scientist minthang, physics in nobel prize zong a hmu mi pa a si ve.

A cung lei minthang pahnih Marilyn Monroe le Albert Einstein nih, bia kaa hnih te an i ruahmi hi, tuchun ni tiang in phungthlukbia bantuk in an chim lengmang theu mi bia a si.

An tuanbia tawite cu hi ti hin aiawt; voikhat zanleiah, zanriah dumtinak party ah Albert Einstein le Marilyn Monroe cu aa chang in an rak tthuti. Champagne timi zu thaw ngaimi tlawmte an van din hnuah.

Marilyn Monroe nih, Einstein hnakhaw hram te ah a hei thawh i, “tuzan hin, muisam ah keimah bantukin ai dawh mi, thluak ah nangmah bantuk a si dingmi, fapa ngeihpiak kan duhko cu cu a tling taktak mi fapa asi ko hnga” tiah, a hei ti.

Albert Einstein zong nih cun, Marilyn Monroe hnakhaw hram teah a hmur a hei hmuah hnu ah, “asinain, muisam ah keimah bantuk, thluak ah nangmah bantuk, va si sual sehlaw teh” tiah, a hei leh ve, cuticun midang nih an hun chonh hna i an bia an peh kho tilo.

Mihrut chung zongin mifim chuah khawh asi bantuk in, muichia chung zongin muidawh cuah khawh a si thiamthiam ko. Vawleicung ahcun mah duh bang in thil a si thlu khawh lo bang, duhlo ning zong in a si kho thlu dih hlei lo, ti hi a si.

Minung nih cun; a sikho ti ballaloh, kan ti hnu zongah an si kho than ko. A rawk kho ti bal la loh, a ziam kho ti bal la loh kan ti mi hna zong an rawk i ciam caan an ser ttheu ko. Zeicatiah nunnak kan timi cu, minung nawl si lo in, Bawipa ser mi le a duh ning in a kalmi kan si caah a si.

Khuadawmnak phen zongah; Vandum dawhte a rak um ko.

Thingrop cung zongin; Aidawhtuk mi mansung thingkeppar, a par kho ve ko.

Mi holha le holhrel thiam lo Moses zong hruaitu ah a ser ko.

Vawlei cung khua min thanglo Nazereth, khuate vangnau, chumtang khuasa Bethlehem zong in; Vawlei cung mi khamhtu Jesuh Khrih a chuak in a thang ve ko.

Nunnak hmanh a nei lomi Moses tthiangthunh te hmanh, Israel mi thongza, rilisen in chanhcuah khotu ah Bawpa nih a hman ve ko.

Mipem siathlai Ruth hrinsor chung zongin; David siangpahrang, mi lianngan an chuak kho ve ko.

A unau le nih khur chungah an hlonh i salah a zuar mi Joseph zong Siangpahrang chanhtu ah a cang ko. 

Ngatlai Peter zong Vamram tawhfung zohkhenhtu ah a hman ko.

Zeica kan ti ahcun? Hi vanrangtawi a um mi zeizong te hna hi kan Pathian duhning le khuakhannak tang lawng te ah a um mi a si zungzal tawn ko ti hi a si. Minung nih hin cun hringnun ah khuakhannak ngei in timhlamnak ngei ve tawn ko hmanh ning a donghnak tak tak ah nawl ngeitu le tlamtlin ter kho tu cu kan biak mi Kan Pathian nawlngeihnak le lungtlinnak lawng lawng khi a si. Hohmanh nih ruahnak kan cheu kho lo i a duhning le a khuakhannak kan phelh piak kho fawn lo.

Mirang hlasakthiam ngai pakhat Garth Brooks timi pa hi a um, voikhat cu a nupi he an khua High School Football chuih zoh dingin an kal, cu ah cun a tleirawl chuahka ah a thli tein a rak duh tuk mi le voi tampi a helh cang nain a ngeih khoh lo mi nungak pakhat hi cu ni ah cun a ton than, a nupi le a tleirawl chuahka a Star ( Crush) cu theihternak a tuah hna.

Garth Brooks nih cu nu a hmuh cun a tleirawl lio ah a kir than mi bantukin a thinlung cu an tur than, chikhat cu a hei zoh than tawn kan tleirawl lio i ai dawh bantuk tein pei ai dawh rih ko hi a ti, Garth Brooks nih a rak duh tak tak lio ah hin a rak hruhpi dengmang Pathian sin zongah voitampi cu nungak a ngeih khoh nak hnga zanfatin thlacamin a hal tawn, "Bawipa hi Ka thlacamnak na Ka leh i hi nungak na Ka pek ah cun zeihmanh kan hal chap lai lo" ti tiang hna in a hal tawn, nain cu nu nih cun a duh hlei lo, Pathian nih a thlacamnak a let lo ti a hmuh tikah Pathian a ruahchannak zong a zor pah tawn, cutlukin a rak duh tawn mi cu kum tam hnu ah a ton than nain nupi pasal an ngei ve ve cang, zei tuah awk a tha tilo a pawngah a thu i High School Football celh a cuan cuahmah ko mi a nupi cu a zoh i a lung a hung piang Pathian sinah a thlacamnak a rak leh piak lo caah khan lunglawmhbia a chim i a nupi cu a kuh i a hnamh.

An lawi hnu ah Mirang hla lak i ai tha bik hna lak i ai tel ve ding mi Billboard Country Song chart 1991 ah a pakhatnak a si ding mi "Unanswered Prayers" ( Lehlomi thlacamnak) timi cu a phuah.

Hi hla nih a langhter duh bik mi cu ; a caan ah cun kan thlacamnak Pathian nih a kan leh lo ah hin kan hrangah a rak tha deuh tawn, Kan thlacamnak cu a ngaih dih ko, a kan leh lo ruang belte ah cun a kan ruahpiak lo ( ngaihtuahpiak loh) tinak a si lo. Pathian nih a kan pek mi lakah mansung bik bik cheukhat hi cu kan thlacamnak cheukhat a kan leh i a kan tihlawhtlinpiak lo mi an rak si, Pathian nih hin kan hrangah a tha ding le tha lo ding cu a hngalh i, a kan duh piak mi le a kan pek duh mi hi kan rak hngal tawn lo hi a rak si.

Zeipaoh hi Pathian nih tuah khoh lo mi a ngei lo, kan hal mi thil vialte hi a kan pek khoh dih ko, nain kan duh mi thil vialte le thlacamnak i Pathian sinah kan rak hal mi thil vialte hi kan hrangah a tha mi an rak si dih theng lo, kan rawhnak ding le lam kan pial sual nak ding Pathian nih a kan tinh piak mi kan phanh khoh lo nak ding thil hna an rak si deuh tawn. Cu caah kan hal mi vialte a kan pek lo nak le kan thlacamnak vialte a kan leh lo nak hi a rak si. Garth Brooks thiam thiam nih cun "Ka nupi hi um hlah sehlaw, hi tiang tiang hi Ka phan lai lo, harsat caan le hnabeidongh caan vialte hna ah khan kan nu hi kan nu rak si hlah sehlaw keimah lawng in cun ka pah kho lai lo" a ti rih.

Mi nih an chim hi ka theih pah tawn "Nan fale hi nan dawt tak tak hna a si ah cun nan tuah piak i nan cawk piak khoh hna zongah an duh mi le an hauh mi paoh hi tuah piak in cawk piak hlah uh, a nun nan hrawh dih hna lai nan sualter hna lai" timi hi ka theih a tlawm tilo.

Cu caah kan nih cu Vancung ah a um mi kan Pa nih khin a kan dawt i, kan nun a rawh dih kha a sian lo caah le kan herh mi thil kha a hngalh dih cikcek caah minung khuaruah in khua a ruat lo i, Kan thlacamnak dihlak in a kan let lo kan hal mi vialte a kan tuahpiak fawn lo.

Minung nih cun cheukhat nih muithatnak hi rawhnak ah kan hman i, thiamnak le fimnak hi hruhnak ah kan hman tawn, Chawva rumnak cu nun retheih nakah kan hman i, Larnak cu tlaunak ah kan hman tawn, dirhmun sang cu nun niamnak ah kan hman i minung cu kan i palh theu.

A caan ah cun Muichiatnak hi nun dawhnak ah kan hman i, kan catang niamnak le theihhngalh tlawmnak hi fimnak ah kan hman tawn, Chawva harnak cu nun rumnak ah kan hman i, mi theihhngalh lo kan si nak cu Pathian a kan hmuh tertu a rak si kho tawn.

Kan nu maw kan pa dek an thi dengmang ti kan hngalh ah kan ngaih a chia hringhran i Pathian sinah kan nu le kan pa an nunnak tiang tiang in cun hong kan lak piak lo dingin kan hal i thla kan cam tawn, Vawlei ah kan ngeihchun le kan ruahchannak dihlak an si caah zeitlukin kan sual i kan that lo ko zongah hohmanh nih nu le pa mitthli tlak lio cu kan zoh kho cio lo, kan sual ruang i an lungfah an tah hmanh kan zoh khoh lo mi Pathian sin i kan nawl len cuahmah lio ah nunnak thaw nih a chuahtak hna lio hun hmuh i an hnukcah lio hun domh cu minung nunnak ah hin a har bik mi le hohmanh nih ton dingah an duh lo mi a si, Kan nu le kan pa hna nih hin cun kan tar thih tiang kan Sam a par i kan vun a sawn tiang hmanh hong kan dampi hnasehlaw kan duh cio ko hna lai nain. Pathian nih a caan lo tukah kan ruah lio, cheukhat cu nausem lawng an si rih lio hna, kum 3 le kum 10 lawng si rih lio hna, Hlawhhlam an hun ngeihka kanu le Kapa ka cawm ve khoh cang hna tiah ruahchannak an ngeih cuahmah lio a si zongah Pathian nih cun a lak ko hna. Vawlei mithmuh in cun Ngaktah buangro in a chiah ko hna, Hi bel cu theihthiam har kati in lungtlin hnangam har kati tawn. Nain minung hi kan Zia hi ai dang cio i Pathian khuaruah le khuakhan ning zong kan hngal fawn lo. Nain an nu le pa can tak tak ah dirin vawlei harnak hi a mah Pathian hrimhrim nih a pah pi hna lai timi ruahchannak ka ngei.

Pathian cu minung khuaruah bantukin khua a ruat lo, Minung ruahnak nih a phanh mi pinlei in khuaruattu a si. Nain hihi cu kai fiang hringhran kan herh tak tak mi le kan nun nih a herh tak tak mi cu Biathluan thluan khat te lawng in voikhat lawng kan hal hmanh ah a kan pek ko. Vawleicung kan nu le pa sin hmanh ah kan herh tak tak mi kan hal hna ah cun halnak catial ( Application) in kan hal bal hna lo, "Kapa cu cu ka herh, kanu cu cu ka herh" kan ti hna i, kan herh ti an hmuh i an ngeih ah cun an kan pek colh ko, Vancung ah um mi kan Pa sin chin chin ah cun kan herh tak tak mi cheukhat hi cu hal lo hmanh in a kan pek caan a tam tuk. Kan herh tak tak mi hal ding hin cun formal tuk hmanh in hal a hau "Kapa na ka hngalh dih ka herh tuk hong ka pe hram ko" ti lawng hmanh hi a leh ko.

Salai C. Vanramdinmawi

( Tenglam)