KUM 5, MINUTE-5 CAWNPIAKNAK

KUM 5, MINUTE-5 CAWNPIAKNAK

Vaupi, 08, 2019 : Lawngtlai

China ramah hin Rua phunkhat Mau a tthang duh ngai mi hi a um, Zarkhat ah Ft 90 in a tthang kho i, cu mau cu a cang i a sauh tuk fawn caah China ram chawlehnak bik pakhat zong a si i, China ram mi tam ngai cu hi Mau cin le lehthal in ei a kawl mi zong tampi an um. Hi Mau hmang hin thil phun phun tuah khoh a si i, Puan, Inn vam, Sahbawn, Furniture a phun phun, pinah hi Mau hmangin thil phun tam tuk te an ser khoh.

Hi Mau a tuanbia thuk deuhin kan hun zoh tikah Minung nunlam ah thil pakhat cawnpiak nak ttha ngai kan hmuh khoh, Hi Mau hi lei in a keuh hlan ah kum 5 chung bak cu lei tangah a um ti a si. An cin hramthawk in kum 5 chung bak Leitang i a um chungah hin a ngeitu hna nih kum 5 chung cu a hmunhma an thlawhpiak i ti an pek i , an zohkhenh lengmang ko, nain kum 5 a rauh hnu ah cun zarkhat chungah ft 90 a phan kho i, Vawleicung Mau tha bik phun ah a hung cang.

Hi Mau nih hin zeidah an kan cawnpiak kanti ah cun, Mi tampi cu kan riantuannak le kan thil tuahnak, ei kan kawl nak le kan sumdawnnak hna ah kan hlawhtling lo i kan thanchoh a nuar tuk tawn, Mi tampi nih cun China ram i Mau hi Zarhkhat lawng ah ft 90 ah a tthang kan ti men hnga, nain a si lo, kum 5 chung a tthang deuh kha a rak si, nain a lang lo, Zarhkhat ah ft 90 tiang a than khoh nak ding caah Leitang ah kum 5 chung bak a hram a thlak i timhtuahnak a ngei cia, Zarhkhat ah ft 90 in a tthan khoh nak ding caah hin kum 5 chung ai thup i ni zong nih an hmu in an hngalh lo in leitangah a um ko.

Ka rian ah ka hlawhtling kho lo, Ka sumdawnnak a par a chuah kho lo, ka hlawhcham ko cang lai hih, mi zei ah kai chuah la loh so hi, kan ti tawn , kan lung a dong i kan tha a der tawn, nain China Mau nih cun kum 5 chung hi a lang lo, nain a hung langh tikah cun Zarhkhat ah ft 90 in a tthang i Vawleicung Mau tha bik ah ai chuah.

Minung pakhat khat nih hin kan nunlam ah tumtah mi le tinh mi kan ngei cio hna, Kan thazaang dihlak kan chuah i ,kan tlamtlinh i kan hlawhtlin khoh nak hnga rian kan ttuan, kan thinlung dihlak le kan ngeihchiah tangka kan pek i, kan caan vialte zong a liam, nain kum a liam i, ni tam a liam hnu zongah cu kan i tinh mi cu kan khen kho lo i, ka tumtah mi cu a hlawhtling kho lo, a par a chuak lo, cheukhat cu kan papek lo caah a tlawl tawn, cheukhat cu kan ttuan len zong ah a si kho tawn lo. Nain cheukhat cu a caan a chuak rih lo i a rak si, a caan a chuah i a ni a tlin tikah cun kan i tumtah mi le tinh mi hi Zarhkhat ah ft 90 in a tthang caan a phan ve te lai, hngah deuh rih tu hi a rak hau.

China ram Mau hi a zohkhenh tu nih kum 5 chung a hmunhma a thlawh piak i ti a toih, a kum 2-3 nak hrawngah an thi dih ko hih tiin lungdong ko sehlaw thlawhpiak in ti toih ti hlah sehlaw a kum 4 nak le kum 5 nak ah cun belh le thing nih an keuh hnawh lai i an tthan kanh lai caah Mau cu an thih lo hmanh ah an tthang kho bal lai lo, Kan nih zong nih hin kan i tumtah mi le tinh mi hi kum fatin te kan thlawhpiak i ti kan toih ve a hau ko, cheukhat cu a kum hnihnak le kum 3 nak ah an beidong i an i tumtah mi le tinh mi cu belh le Thing nih a keuh hnawh caah cheukhat cu an thi i ,cheukhat cu an tthang ve ko nain a si ning ding in an phan kho lo. Cu caah nifatin in kan i tumtah mi thil hi a hmunhma kan thlawhpiak i ti kan toih a hau, tu ah keu in a par chuah rih lo hmanh seh kum 5 maw a nak tam a liam hnu ah cun Zarhkhat ah ft 90 le a cunglei ah a tthang hrim hrim lai.

Hindu Puithiam pakhat chim mi YouTube ah ka zoh mi hi ka lung ah a riak peng tawn i, a dik ngai zongin ka hmuh, a chim ningah cun minung a thangcho le hlawhtling ding tahnak hi phunthum a um a ti, minung hi phun thum ah a then. Cu hna cu Minute 5 chung bia va ruah hna law na hngalh khoh hna la a ti.

Phunkhat nak cu : A thangcho lio mi a hlawhtling ding.

Phunghnihnak cu : A thangcho ti lo ding, a dir mi.

Phunthumnak cu : Hnulei ah a tolh mi.

A pakhatnak hngalh dan a chim ningah cun hitin a ti, na hawikawm a si lo ah, mipakhat khat he bia nan i ruah tikah, nan i ruah khoh hnu i na kal hnu ah, "a .. Kan biaruah a ttha, biaruah a nuam ngai" tiah na ruah mi cu , a tthangcho lio mi, a hlawhtling ding a si" a ti.

A phun hnih nak hngalh dan a chim ningah cun "Mi he bia nan i ruah i, na kal tak hnu ah nan biaruah hlan nak i nai chap lo ah maw, biaruah pi a nuamh ning a laiva a si ko ah cun, cu pa cu a thanchoh a dong cang" a ti.

A phun thumnak hngalh dan a chim ningah cun " Mi he bia nan i p ruah tikah na kal tak hnu i na ruahnak ah, nuam lo na ti i na nin ah cun cu cu hnulei ah a tolh mi a si" a ti.

A chim duh nak cu Pumpululh ( Soccer ) a huam ngai tawn Mipa he bia nan I ruah tikah Cim lo ngai in bia nan i ruah khoh ah cun Pumpululh kongah hmailei anpanh ko rih, a thancho lio a ti nak a si, Pumpululuh Kong nan chim nain nan biaruah a thawt lem lo i, mithmai ven ruang i an chimpi ve sawsawh a si ah cun, a thangcho ti lo Pumpululh Kong a hngalhnak a dir tinak a si i, Pumpululh Kong a huam ngai tawn mi he bia nan i ruah i, pumpulh Kong a chim huam huaha lo ah cun Hnulei ah a kal cang Pumpululh a huam tilo a ti duhnak a si.

Minung hi a hohmanh thleidannak lungput a ngei lo mi kan um lo, nain Nika ( Sun) le Ti ( Water) nih cun thleidan mi an ngei lo, Ni cu a ceu tikah misual cung zongah a ceu i, Tualthat le Pastor cung zongah a ceu, Ti zong a si ve, a sur tik zongah Misual cung zongah a sur i mi tha cung zong a sur thiamthiam ko. Ni le Ti hi Vawlei ah nunnak a um khoh nak hnga caah riantuantu bik an si i, an Pahnih in an um lo ah cun nunnak a um kho lo. Thing Le Mau zong an kheu kho lo. Ni le caan relnak zongah kan hman hna i, Fur le Thal, khuasik le Khuakik timi zong kan ngei. Cubantukin minung nunnak ah hin Har caan le lawmh caan, Beidongnak le Beiseinak, Sunghzatlaknak le Hlawhtlinnak hna hi an um ve an dihlak in kan nun sullam ngeihter tu, hmailei panh kho ding i kan nun a tat tu lungtat an si ve, an Pahnih khatlei khatlei hin um hna hlahsehlaw Hlawhtlinnak le lawmhnak hna hi a um kho lai lo.

Rev EF. Sang Cem nih cun "Economics Development timi cu Ti hman thiamnak in ai thawk, Ti hman a thiam lo i tle tle buabua in a um mi hrangah Economically in thanchoh khoh a si lo" a ti.

"Cu ve bantukin Caan hi a sullam kan tlaih lo ah cun Parchuah khoh a si lo."

Salai C. Vanramdinmawi

( Tenglam)