ZU CU TI AH CAN TER A SI ("WINE INTO WATER" - T. Graham Brown)

"WINE INTO WATER"     - T. Graham Brown

Mi tampi nih cun Jesuh ni Kain khua Nupi thitumhnak ah Ti cu zu ah a canter nak kong hi kan theih dih ngawt ko la khrihfa mi hna nih cun nain kum tam a liam hnu ah Zu cu ti ah canter a si than nak kong bel kan thei tuk lem lo. 

English Country Music a ngai bal mi nih cun T. Graham Brown a hngal lo mi kan um hnga lo, American Country Music ah cun Zuungngaih hla he Thangthatnak hla he a pahnih in hlasak in a min a thang ngai ngai mi a si i, Album 13 hrawng a ngeih pinah a pak in a chuah mi pawl zong 20 cu Billboard Topchart ah sawmhnih a lang kho fawn. cu tlukin a minthang in hlasak lei ah a lung a phun ko nain Zu sal ah a tang i, zu din sawsawh hmanh si lo in OD tiang a phanh caan zong a um tawn.

T Graham Brown te chungkhar cu lothlo chungkhar an si, Gorgia ah lo kau pi an ngei i an pupa chan in chan sarih chung cu hi an loram hi zohkhenh in lo an rak thlo cang, a nih zong lothlo fapa a si caah Tractor khalh hna zong a thiam i a si khoh tawkin a dawng le a bawmh ve tawn hna, T Graham Brown te an chuah hnu pi ah hin a pa cu University of Gorgia tangah sianginn a kai than i, cu pah cun chunah Cakuat phawt rian a tuan i zaan paoh ah sianginn a kai tawn, T Graham Brown te cu hngakchia an si rih caah a nu nih cun an pa sianginn kai chung vialte chungkhar a rak zohkhenh i kum li chung bak amahin chungkhar a zohkhenh pinah a hnulei kumhnih lebang cu Full time in kal a herh cang caah kum hnih chung bak cu an nu cu Chungkhar cawmtu bik a si. an pa College a kai ter i a fale zong sianginn a kai ter hna pinah an lo zohkhenhtu zong a si fawn.

Cuticun T Graham Brown pa cu a hung Graduate i an chungkhar an phun lakah College Graduate hmasa bik zong a hong si, ti cun Gorgia in Meng 80 i a hlatnak Arabi khua ah an pem i cu hmun ah cun Seh an cawk i Inzuat satil ei ding vawk rawl, ui rawl le ar rawl tibantuk pawl sernak an tuah. cuticun an fale zong an hon tleirawl ve cang tikah High School kal nak tha hna an hon duh piak hna i cuticun Athen khuapi ah an thilri vialte an zuar hnu in an pem than, T Graham Brown nih hin unau pa pakhat a ngei i an pahnih cun University of Gorgia tangah ca an cawng.

Cuticun Pathian nih a nakruh caah a khaukhih mi Sheila he an i tong i, Vawlei harnak vialte pah ti ding in lungkhat in kar an hlang. an nu cu Master degree tiang a ngeih hnu ah Doctorate degree a cawng than i, Veterian si dingin a cawng cuahmah. cu lio hrawng zongah cun T Graham Brown cu hla a sa cang nain a min a thang rih lo, a hlasak a ngai bal mi nih cun na thiam tuk i zuam lengmang tiin an forhfial tawn ko nain Hlawhtling tak tak ding le hlasak in eipaw cawmnak ding tiang cun a ruat lo.

Nikhat cu an nu Sheila cu an inn Farm chiahru te ah cun a hong lawi i Georgia University Pickup hlun pah nawn mi te hi a hun khalh, Sheila nih cun Nashville, Tennessee ah kan i thial lai a ti, Brown nih zeitin dah na cawnnak hi a si lai a ti tika, kei cu ka hong than lengmang kho ko hi hnu ah nai ngaihchih lo nak hnga ka bia hi ngai ko, hi hnu kum tam a liam ah cun nangmah nai ngaithiam kho lai lo, cu caah kan kal ko lai tiah a forhfial. T Graham Brown nih hin Nashville, Tennessee ah kal i Hlasak i ei kawl hi a duh tuk tawn ko nain an nu Ca a cawn rih caah le harnak te te a um tawn caah kal tak tak hi a si kho tawn lo.

Nashville, Tennessee ah cun hla sak hram a hung i thawk i Bar le hlasaknak hmun cheukhat hna zongah hlasak hram a hung i thawk cu ah cun mi tam deuh nih an hung theihhngalh i a aw le a hla cu an hung uar pah ngai ngai cang, nain tangka tam cu a hlawh kho rih hlei lo, voikhat cu Chicago in mipakhat hi Nashville, Tennessee ah a hong i T Graham Brown hlasak lio cu a hong hmuh cuticun cu pa nih cun lam a kawl piak i McDonald’s,  Hardee’s,  Burger King, KFC le Taco Bell ti bantuk nih tangka tampi hlawh in an hun hlan tawn cang, TV zongah a hla cu an hun chuah ve cang i a min a hong thang ngai ngai cang.

T. Graham Brown hi zuumtu a si i, Tipil (B aptist) Khrihfabuu tangah a thang mi a si pinah a nu nih a cawnpiak hna nak le Pathian bia a chimh lengmang tawn mi hna pinah thlacam a cam piak tawn mi hna cu ai cinken dih i, Jesuh kong cu a hngakchiat lio vialte le a tlangval hnu zongah cawnpiak a si i, zeitlukin zu a rit ko bu zongah zaan ih lai le rawl ei lai thlacam a philh bal lo. nain zing a hong chuak i a thoh le cangka hah nawh hlan in zu hraikhat din cu a thinh kho hlei lo, cu cu a hrangah a thil tha lo thinh a hau mi a si ti a hngalh ko nain a thinh kho lo.

Concert an ngeih caan ah siseh hlasa in mi hmai a dir caan zongah a rit tuk ruang i hlasa kho lo in a bawh caan a tampi cang, nain inn a lawi pah in zu palang a si lo Budweisers lang 6 a si lo ah lang 12 hrawng ai cawk, inn a lawi hi cu zarh donghnak (Weekend ) hi a si deuh tawn, cuticun Sunday zinga paoh ah sio thlak pah in zu a ding tawn. 

A hngalh lo karah a nupi le a fapa cu a rak hlat tuk manh cang hna i, an i hlat tuk cang ti cu a ruat thiam rih lo nain zei ah a rak rel ti lo manh hna i zu cu a rak duh deuh manh cang, nain ruahlo tukin an nu nih cun a kal tak duh lo i a zamtak bal lo, T. Graham Brown nih a chim ningah cun "Tu hnu ka umtu ning ka ruah ah hin kan nu kha rak si ning law, ka kal tak nak a sau cang hnga, ka chuahtak diam cang hnga" a ti phah.

Nikhat cu Capitol Records in an hung auh i an hotupa nih cun "Mr. Brown zu hi na kaltak khoh lo ah cun kan chuahter hrim hrim hi a hau te lai hi awh" tiah a chimhhrin. Brown nih cun "a tha ko hen cu" a ti i amah in ai bang, cuticun an inn panh in a law, Rang cungah a cuang i, a rit tuk caah rang cung in a tla, a kai than , a tla than, cuti lengmang cun inn lei a pang, a rak hmu tu paoh nih an tih i, a tlak caan paoh ah a thi ko hlah maw anti tawn. T. Graham Brown nih a chim ningah cun "a hlan pi ah khan rak thi ding hi ka si cang ko, Voi tamtuk cu OD in ka um i, thihnak he hin kan rak i naih kho ngai ngai" a ti. 

Cu tlukin zu a din lio a rit lio ko zongah cun zu thinh duhnak le zu huatnak cu a lungthli tein a rak ngei ve tawn, nain ni a liam a chuak than i a zu duhnak a chuah pi lengmang. a lungthli tein Pathian sinah a tihal nak le zu thinh a duhnak cu a zurit lio le din lio thiam thiam ah Hla in a rak phuah, hi hla a phuah lio ah hin a hawi le pahnih Bruce Burch le Ted Hewitt nih an rak bomh. a hramthawk ah cun amah hrang hrim hrim ah phuah dingin timhtuah a si lo nain hla bia an hong fonhtonh tikah cu an hla phuah mi cu a cungah a tla i, a hawi le nih harsatnaka ton mi le a lungthin hrumnak cu an hngalh piak.

T. Graham Brown nih a chim ningah cun "a hramthawk ah cun hi hla hi sak ka ngamh lo, hla sawsawh a si lo, Thlacamnak a si caah ka sa ngam lo, hi hla nih a timh mi cu Bawipa, ka tlaih mi hri ka thlah cang lai hih rak ka bawm tuah Bawipa timi he ai khat" a ti. Kum 5 chung cu sak lo in a um, a Nupi Sheila nih sa dingin a forhfial lengmang nain Brown nih "ka sak ah cun lihchim pei kasi lai cu, zu thinh khoh rih tung lo le timh nak tak tak ngeih rih tung lo in hi hla ka sak ah cun Pathian ka hlen pei a si lai cu, Pathian hi mitampi nih cun hlen khoh ah an ruah nain hlen khoh a si lo, ka hleng kho lai lo" a ti i a sa duh lo. 

Nain zankhat cu culio ah hlasakthiam a si ve mi Loretta Lynn’s te inn ah an nupa in an leng i cu ah cun a va sak, cu hnu ah cun kum tam cu a sa than ti hawi lo, nain Loretta Lynn’s nih cun a sak piak i a album zongah a khumh chih caah cu hla cu mi tampi nih an hun theihhngalh i a hung lar hringhran cang, cu hla cu Hlasakthiam tampi nih cover an hung tuah i mi tampi nih nun thlennak ah an hung hman, nain a phuahtu T. Graham Brown bel nih cun sak ai timh fatin te a tap i zu a ding than lengmang, Bawipa zu hi ka thinh kho lo e, hi hla zong hi ka sa ngam lo a ti tawn. 

Zankhat cu amah lawngin cabuai hmai ah a thu ko, hla thar tial ai tim nain a lungah zei biafang hmanh a lut kho lo, cuticun hraikhat hnu hrai khat zu a lemh than tawn, zandang bantukin a ri kho  lo i hlaphuanak ding biafang zong a char kho lo, an nu le a fapa cu thu hliahmah in an it cang, nain a khuaruah a fak hringhran a umtuning cu a dik lo ti a theih, zu a thinh khoh nak hnga a nupi le a fapa thla a camnak thawng vialte hna a ruat than, zu a din ruang i chungkhar dang an phak lo nak vialte le a fapa te zong thithruaitu pa ngei lo bantukin a umnak te hna a nupi tuarnak vialte hna na ruat i amah le mah i zaangfahnak in a khat i, a tap. 

Thlalang hmai ah a dir i fiangte in ai zoh. "Pa na si lo maw zeihen na tuah mi hi si, zeithil paoh hrawh pei nai timh hi" tiin a lungthin nih cun a chimh, cuticun Pathian sinah bawmhnak a hal i zu thinh dingin a hna a tla i timhtuahnak a ngei kho. cuticun Pathian sin bawmh a hal bangin zu sal sinak in a luat cang. 

Zu a thinh hnu ah cun a hla phuah mi "Wine into Water" a mah nih sak hram a hung i thawk i, a aw nih ai dawh i a satu ding hrim hrim hlah maw ti ding phun in a sak thiam caah le a thinlung chung in a  rak tuarnak cang vialte he a sak tikah mi thinlung ah fak khun in a tla i mi nun thlengtu a hong si, Vawleicung minthang he thang lo he mitampi ca an kuat i a hla an ngaih hnu in an nun ai thlen nak le nunthar an ngeih nak kong hi an hun chimh tawn. 

"Wine Into Water"

You've heard a multitude of prayers on my behalf

I pray one more is not too much to ask

I've tried to fight this battle by myself

But its a war that I can't win without your help

Keimah hrangah thla an camnak cu tamtuk na rak theih cang ko lai, ka hrang ah an thlacamnak hna cu na rak ngaihpiak ko hna lai tiah ka zumh i na rak cohlan ko hna lai ti zong ruahchannak ka ngei ko, voikhat cu na sin thlacam than rih ka duh ka Pathian tam tuk hal ding ka ngei lo, keimah kongah pakhat te lawng a si ko Bawipa, Hi ral hi keimah in voi tam ka doh cang ko nain keimah pumpak thawnnak lawng in cun ka thei kho lo, hi raldohnak hi nangmah bawmhnak lo in cun tei khoh ding mi a si lo. 

Tonight I'm as low

As any man can go

I'm down and I can't fall much farther

And once upon a time you turned the water into wine

Now I'm on my knees and I'm begging to you father

Would you help me turn the wine back into water.

Tuzan ah hin ngaihchia in ka um i ka lung a dong hringhran ko, hi tluk sunghzatlaknak dirhmun hi minung nih a phan kho ti hnga maw, thlavaikiang in ka um i ka lung a dong in ka zaang a ba hringhran ko, hi nak niam ah hin minung dirhmun hi a tla kho ti lai lo, ka nunnak zong nih a tlinh ti lai lo, cu caah bawipa a hlan lio ah kha Kana khua nupithitumhnak ah Ti cu zu ah na rak canter bal cang ti ka hngalh, Kapa tuzan ah hin khupbil in ka um i na sinah thlacam in kan nawl, na ka bawm kho hnga maw, Zu hi Ti ah canter than dingin, zaangfahnakin ka  zu hi ti ah na canter than kho hnga maw. 

So many times I've hurt the ones I love

I've pushed them to the edge of giving up

They've stood by me but how much can they stand

If I don't put this bottle in your hand

Vo tam tuk cu ka dawtmi ka nupi le fanau hna hi fahnak phunkip in ka fah ter cang hna, beidonghnak tlangpar ah ka chiah cang hna, zeitlukin ka rit le ka buai ko zongah ka sinah an um i ka lei an tang peng  an ka kal tak bal lo i ka hrang thlacam an dai bal lo, nain Bawipa hi zuthawl hi na kut ah ka chiah lo ah cun  an tuarchelnak nih hin zeitiang a nguh lai ka ruat ngam lo, ka beidonhg tak in ka sinin kal chin chin hna sehlaw zeitlukin ka nun cu muihnak khur chungah a luh chin chin hnga mu.

I shook my fists at heaven

For all the hell that I've been through

Now I'm begging for forgiveness

And a miracle from you

Hi vawlei harnak le sunghzatlaknak ka pah mi vialte hna ruat bu in le hngal bu in le ka sualnak le palhnak vialte ngaihchih in na sinah ka kut ka hngah i nangmah ah ruahchannak ka ngei , tu ah cun na ngaihthiamnak kan hal i khuaruahhar hong ka tuah piak dingin kan nawl fawn. zaangfahnak in hi zu hi ti ah can ter than ko.

Pathian nih Hla hmangin T. Graham Brown Thlacamnak cu a leh i tu ah cun zu zong a ding ti lo i, zu a rak duh tuk mi kha dor khat hmanh lemh ti lo in Zu ti ah thlen piak tu Pathian hnu a zul i, Pathian dawtnak thawn zia le khuaruahhara a tuah piak mi phuangtu ah a cang. 

Salai C. Vanramdinmawi

(Tenglam)