WhatsApp le Facebook Tuanbia (Kan chungah ai thup mi thil tuah khohnak)

WhatsApp le Facebook Tuanbia (Kan chungah ai thup mi thil tuah khohnak)

10 Vaupi 2019 : Lawngtlai

Jan Koum timi pa cu Ukraine ram Kiev khuate ah a rak chuak, mi rethei ngai chungkhar an si caah ei awk tha zong an hmu lo i, cu pinah sianginn a kai tik zongah cauk tlamtlingin a ngei kho lo, a nu cu Cancer zawtnak nih a tlunh fawn caah harsa ngai ngai in khua an sa, a pa cu mi inn sak in ai hlawhfa tawn mi a si i, an inn ah cun Meiceu (Current) zong an ngei lo i, zaan a hun phak tik ah semrel ngai in an van mi mei-inn cu zan a tlai hlan tein hmih a hau tawn. 

Kum 16 a si ah an ram cu a buai i cuticun America ram Mountain Hills ah an pem,  cu ah cun a nu he harnak a phun phun tong in an va um thiam thiam i retheihnak nih a zulh peng ko rih hna, cozah nih inn fate ihkun pahnih lawng umnak a pek hna i ei inn ah a cawm fawn hna, nain a pa cu an sin a phan kho ve lo, Ukraine Police nih an tlaih. Kum 18 a si ah cun a sianginn ah i vuak huam bik le a luhlul pawl ah ai tel kho peng, a sinain Computer thiam a duh tuk mi a si caah Computer cawnnak cauk cu a hlan i a rel thlu le cangka a va chiah than tawn.

Hacker phu pakhat a si mi w00w00 timi phu ah ai tel ve, cuticun Software company cheukhat hna zong hack nak ah ai tel ve tawn, cuticun San Jose State University ah a lut i, cu pah cun Ernst & Young ah a tuan pah. A pa nih kum 1997 ah a rak thihtak cang hna i,  a nu zong nih cancer zawtnak in kum 2000 ah a liamtak ve than. cuticun har ngai in amahtelawng caan a hmang. 

Culio ah cun Brian Acton timi pa hi a rak um ve, Machigan ah a chuak i, Central California a thang mi a si, Lake Howell High School ah sianginn a kai i a thiam tuk caah University of Pennsylvania ah kai kho dingin Full Scholarship a hmu i kum 1994 ah Stanford University in Graguate a hmu. kum 1992 ah khan Rockwell International, ah a rak tuan cang i, Apple company zongah an thil ser mi zohkhenhtu rian a tuan hawi cang, Adobe system ah kum 1996 ah khan a tuan than i, cu hnu ah cun Yahoo nih riantuantu a lak mi lakah a hmasa bik 44 nak a hong si than. 

Voikhat cu Brian Acton le Jan Koum  cu ruahlopi in an i tong, cuticun Jan Koum  zong kum 1998 ah Yahoo Company i a hon tuan ve than tik zongah hawitha ngai ah an i chuah i kum 9 chung bak an tuanti, asinain kum 2007 ah Jan Koum le Brian Acton cu Yahoo Company in an chuak i, South America ram pawl ah khual an tlawng ultimate frisbee timi lentecelh phunkhat i celh in an caan an hmang, an pahnih cun Facebook ah rian an hal ve ve nain Facebook nawl ngeitu hna nih an rak duh hna lo, an rak hlawt hna, cu hnu ah Twitter ah an pahnih in rian an hal ve ve than i an pahnih in hlawt an si ve than hawi. Vawleicung Social Networking ngan bik pahnih Facebook le Twitter nih an hlawt hna.

January thla ah Jan Koum   nih cun Iphone pakhat a cawk ve i, cu iphone a hmuh le cangka cun App (Application) thil ti khoh nak kha a hun ngalhchuah i, ruahnak thar a ngei, a hawi pakhat Alex Fishman cu a va leng i App pakhat tuah a duh ve nak kong a va ruah, cuticun Jan Koum   le Brian Acton cu an i bawm i, App pakhat ser hram cu an i thawk i, rei rial lo in Jan Koum   chuahcam 24, Nohawng(February) 2009 ah cun `WhatsApp.Inc` timi cu  California khuapi ah an hun phochuah. 

Cuticun mikip nih WhatsApp cu kan hun theihhngalh cio i, Vawleicung ah Cakuat  (Message ) kuatnak ngan bik ah a hung cang, tu ah cun WhatsApp ah hin Engineer lawng hman 50 an tuan i, Nikhat ah 500 Million hi Active peng in an hman i, nikhat ah 700 Million Hmanthlak (Photos) le 100 Million Muicawl (Video) lengmang pinah cakuat  Billion lengmang hi nikhat chungah WhatsApp ah hin ai chawklet. 

Facebook Company a ngei tu Jan Koum  le Brian Acton a rak hlaw i a rak duh lo tu nih cun 19 Nohawng 2014 ah cun WhatsApp cu US$19 billion in a cawk than hna cu pinah Facebook le WhatsApp ah share a thenh veve rih hna. Thlakhat ah tangka tlawmte thlahlawh pekin a rak chawr khoh ko mi Mipahnih kha a rak hlawt hna i tu ah cun an thil ser mi cu Tangka tampi in a cawk than hna i, Billioaire ah a chuah hna.

Hi tuanbia chung hin cawn ding tampi kan ngei hrim ko, Mi tampi cu hlawt le pheu kan si cio cang hna, thil pakhat khat ah cun, Politics ah, Dawtnak lamthluan ah, Rian kongkau ah, Siangiin le University ah thil pakhat khat ah cun hlawt kan si cio cang hna, Jan Koum le Brian Acton zong hi hlawt an rak si bal ve nain an nih nih cun hlawt an si nak kha thil tha chuahpi nak ah an hman.

Kala Muicawl pakhat `Tare Zameen Par` ka zoh fatinte hin ka hngakchiat lio caan hi ka hngalchuah than peng ve, hi film hi a tha tuk kati theu kha film ah khan Muitawn cawnpiaktu (Amir Khan) nih Ishan Havsahti pa sinah fale chiatserh le fale sinah Bia chim holhrel kong ah fimkhur a herh nak kong a chimh nak ah Solomon Tikulh (Island) ah thil a cang mi kong hi a chimh, Solomon Tikulh ah cun a chung um mi hna nih Thing hi hriamnam in an hau bal lo, an hau duh mi Thingkung kha Nifatinte an kal hnawh i Suimilam pakhat chung hi chiat an va serh tawn zarhkhat a rauh ah cun cu thingkung cu amahin a tlu tawn. 

Zeitindah hmuh khoh lo Holh sawsawh le Lei le dang nih cun Thing cu a thluk khoh hnga timi ruahnak kan ngei cio men hnga, asinain Bruve H. Lipton tialmi THE BIOLOGY OF BELIEF timi cauk chung kan hun zoh tikah Solomon Island i thil cang mi lawng silo in kan biachim le holhrel nih zeitlukin dah minun a thlen khoh i kan mah hrim hrim zong a kan thlen khoh timi le Kan mah pumpak le kan pawngkam mi hna sinah zeibia dah i chimh tam ah a tha bik timi kha fiang chin in kan hun hmuh khoh than.

Cu chungah cun zeitlukin dah mah i hngalhfianlonak khuaruah (Subconscious mind) nih thil a ti khoh i, mah i hngalhfiannak khuaruah  (conscious mind) nak let 100 in a thawn deuh nak kong kha a kan chimh, a caan ah cun kan nun le kan caan hman ning le kan thil tuah tawn mi ah `hihi cu a tha lo, ka pehzulh lo ah a tha lai` timi ruahnak kan ngei tawn i thlen colh kan duh tawn nain kan hlawhcham theu tawn. tahchunnak ah zaan ah tuante in ka it lai i zingah tuante in ka tho lai kan ti tawn nain a caan a phak taktak tikah cun zaan suimilam 2 kan phan i zing lei rawlei lai ah kan tho than theu tawn. hihi a ruang cu kan mah kan i hngalhfianlonak mi ruahnak nih khan fak tukin rian a rak tuan cang i, kan hngalhfiannak khuaruah nih a tuah ve mi cu santlailo men a si.

Hi nih a chim duh mi cu nangmah le nagmah nai hmuh ning le nai hngalfian ning kha a biapi bik mi a si ko e ati, nangmah le nangmah "Mi hlawhtling lo ding ka si ko hih" nai ti lengmang ah cun a hnu thlakhat maw, kumkhat hnu ah cun mi hlawhcham na si hrimhrim lai, cun cubantukin santlailo nasi tiah an chim tu na hawi le hna cu na hrial hna zongah a tha lai, Hawikawm sinak cu sunglawi in kan upat ding siko hmanhseh nangmah zong kha tlawmte tal in nai upat ve ding a si.

Capo saih thiam Cahrlie Chaplin nih hi tin a tu le sinah bia a rak chim bal, "Ngahtah inn i ka um lio zongah siseh, Khualakah kan nunnak ding ca i eiding kawl le rawltam in ka vahvai lio caan zongah keimah kai hmuh ning le kai ruah ve ningah cun Vawleicung lemcang thiam bik hmu in kai hmu i, kai ruat peng, cubantuk ruahnak cu ka ngeih hrim hrim zong a herh cu a si lo ah cun teitu silo in tei mi dirhmun ah ka phan diam cang hnga" a rak ti. 

Martin Luther King Jr ve zong nih, "Zumhnak timi cu Lamthluan dihlak hmuh lo zongah kar voikhat hlan ngamnak hi a si"  a rak ti bal.

"Lungchung Khuaruahnak (Imagination) hi zeizong vialte a si" tiah Albert Einstein nih a rak chim mi tal a tlin tertu  Major Nesmeth tuanbia hi hun zoh than rih hna usih. Major Nesmeth cu ral nih an tlaih i Dong 4 lawng a sang i, dong 4 lawng in a kau mi Thawnginn khan (Room) chungah kum 7 chung an khumh, Ft 6 a si mi pa kum 7 chung bak ft 4 in a sang i, ft 4 lawngin a kau mi ah hun um lai ko cu ruat hna hmanh usih, cu lawng a si lo Major Nesmeth cu hi Thawnginn i an thlak hlanah hin Golf celh a huam ngai mi zong a si rih.

Hi thawnginn ah kum 7 a tlak chungah hin voikhat hmanh an chuah lo, rawl chiahru tlawmte an pek i, a zawtfah caan zongah sii pek timi a um lo, hun dir dingah ai tor, hun ih ding zongah ai tor thiam thiam, ai hngilh caan zongah thutbu in ai hngilh i, a ruang hun zam awk zong a tha lo, a pumsa cu a tthawm dih ding khi a si ko. Nain Thawnginn a um chung vialte cu a lungchung khuaruahnak ah nifatin le zanfatin te in Golf ai celh lengmang tawn, a khuaruahnak ah voi tampi ai celh i voi tampi pakhatnak a co tawn. 

Thawngiin ah kum 7 a tlak hnu in chuah a si i, Golf celhnak tual ah a kir than, cu ah cun 74 points a hmuh i Pakhatnak cu a co tak tak tikah mipi an khuaruah a har i, thil si kho dingah an ruat lo, nain thawnglatu pawl nih zeidah cubantukin a tuah khohnak biathli an hun hal tikah cun "Ka ruah lungchung ah teitu ka si diam cang, kum 7 thawng ka tlak chungah khan ka khuaruahnak in Golf hi kai celh camcin ve ko, cun kai celh paoh ah teitu ka si lengmang fawn" tiah an biahalnak cu a leh hna. hihi Budha nih a rak chim mi, "Ruahnak cu a tak ah a cang" timi a tlamtlin tertu a hong si.

A cung ah kan chim mi vialte hna bantuk khin kan mah ah hin kan khuaruah le suangtuahnak tlamtlinter kho tu thawnnak a dong kho lo mi ai thup ve dih ko, nain kan hmuh thiam a herh.

Salai C. Vanramdinmawi

(Tenglam)