Kan nih cu ruah a han in kan kal than lai.

Kan nih cu ruah a han in kan kal than lai.

Voikhat cu kapa he lokal kan tlun pah ah khin Ruah nih a kan surh i kan cin dih manh hlanah sarang kan i aih, nain Rial le thlitu nih a van zulh colh caah kal chih khoh ding phun a si ti lo, Kapa nih cun lamthlang Khiang kung tangah hin i dor ko hna usih a ti, kan hawipa nih cun "ka pah chih ko la, inn phanh tuan ah a tha deuh la" a ti i, a kan kal tak, kan nih cu kan phur a rih deuh caah le rial le thlitu a hran caah kapa nih i dor a duh nak hi a si, "Kapa pah chih ve ko usih" kati nain kapa nih cun "Kan nih cu ruah a han in kan kal than lai, ruah na do cu na khua hna sik lai" a ti i, khiang kung tangah cun kan i dor.

Ruahpi sur cu a tuk chin chin i, tek le rial he thlitu he a hran ning zong a fak hringhran ko, ral khat lei i Thingkung hna cu tek nih a den hna i, a kiah lio hna zong hmuh khoh a si, thli cu a fah caah kei zong ka thin a phang ve ngai, kan i dor nak thingkung hna cu tek hna nih an tlak sual lai i thli hna nih a khiah ve sual lai ti zong ka phang ngai ngai i, ka lungthli tein thla ka cam, kapa cu a ttih ve maw ve lo tiin ka hei zoh than tawn i, zeihmanh rello bantuk khin kuak a zu i a pak thliahmah tawn. kan pawngkam a a tla mi rial hna cu ngan pipi an si i sarang kan i aih ko nain kan tak zatceu cu a cin dih cang. cangvat a um fawn rih caah a nuam lo ngai ngai fawn i a kih zong a kik ngai.

Suimilam pakhat chung hrawng ruah sur le thlichia nih a kan dan hnu ah cun ruah le thlichia zong cu an hung tian ve zuahmah i ni a hong lang than, cuticun kan nih zong inn lei panh in kan kal than ve, kan kal i vailampi kan phanh ah khin thaw a chuak i hah a dam ngai, lam kan kal lio ah cun ni cu a tla deng cang i khua zong a mui deng cang, nitla ding nih cun Tlang sang deuh pawl hna cu sen vur in a cerh hna i, ruah han ka a si fawn caah khua a thiang in thlifim a hrang mi te zong dawp a nuam hringhran Pathian kutzung dawhnak cu a lang khun i a rokual ngai ngai, kan hmailei hla nawn ah khin Chuncha a hung lang i ai dawh hringhran, nidang i chuncha nak hmanh in cu ni chuncha cu a ngan in ai dawh deuh mi a lo.

"Kapa ziah hen chuncha hi ruahsur khoh hin a langh tawn hnga?" kati i, Kapa nih cun "Ruah a sur lo ah cun a lang kho loh teh" tiin awlzang ngai in a ka leh, a ba pah le a holh huam lo ko hih kati i, bia ka hei ruah lem tilo. Inn cu kan phan i, kanu nih "nanmah kong lawng ka ruat i, ka lungre a thei tuk, thli a fak tung le zeitin thla an um hnga aw ti lawng ka ruat ko" a kan ti i, kan hah vialte zong a dam i, kan hna a ngam hringhran. Kapa zong nih ruah a sur chung le thli a hran chung vialte kha holh lo in inn lei kong lawng a ruat timi ka hngalh ko. tilum a rak kan chuan piak mi hmang cun kan i kholh i ti cun zanriah kan dum ti than hna.

Rawlei khim ah cun Chungkhar pumh kan ngei i Kapa nih Bible a rel hnu ah bia tawite a chim i Pathian sin ah thlacamnak kan ngei hna, Kapa nih bible a rel mi cu Job chungin a si i, bia a chim mi ah cun Harsatnak sunghzatlaknak a ton lio vialte chung zongah Job nih Pathian ai bochan peng nak le, Pathian ai bochan peng mi cu a donghnak ah cun Pathian nih a philh hna lo, timi le kan unau zong Pathian i bochan peng ding hna in a kan cah.

 Chungkhar pumh kan dih hnu zongah cun ka bat deuh caah le khua ai timh pah caah ka leng huam lo, ka dawng le sinah ka um i, TV Zoh pah in bia kan i ruah ko hna, a chel ah hngakchia ka hei tihram pah hna, Zaan khua a hong tlai i mah le ihkhun cio kan panh hna, nain kai hngilh kho lo, ruah le thli nih a kan dan lio i kapa nih "Kan nih cu ruah a han in kan kal than lai" a timi te kha ka hna ah a thang than lengmang, cu kong lawng cu ka ruat i thildang ka lung ah an lut kho lo, chung pumh kan ngeih lio i kapa Bible ca rel mi tete hna ka ruat chih.

Kum thum deng cu a liam ve cang ko, nain "Kan nih cu ruah a han in kan kal than lai" timi biafang hi ka hna ah a cam i, ka ruahnak in a tlau rih lo. Kha ni le caan kha ka ruat than tawn, Kha ni ruahpi sur , tek tla le thlitu hrang lakah thih le dam karlak kan um lio kha mitthlam ah hin an cuang ko rih.

Tu hnu ah hin hitin khua ka ruat, Minung kan nunnak ah hin Harnak, Sunghzatlaknak le donkhantu thil dang hna nih hin ruahpi bantukin a kan sur hnawh tawn, hmasawn kho lo le hmai nawr kho lo in kan nun hi a con tawn, a dir in a dir tawn, cheukhat cu har kan ti i kan bei a dong tawn, ruahchannak kan thlau tawn, nain a caan ah cun minung hringnun ah hin ruah a sur ve ding a rak si ko, cu ruah a sur chung cu kan nun a con in a dir ding zong hi a rak si ve ko, pah chih ah cun khuasual tonnak zong a rak si ve tawn ko. nain ruah nih cun han caan a ngei i, ruah a han tikah a kal than ding kan rak si. Ruah a sur lio Harsatnak kan ton lio, Sungzatlaknak hna le tek le rial nih an tlak lio ah cun tih a nung in tuk a sum ko lai nain, ruah a han hnu Tek le thlitu hna an daih tikah cun a hnu ah a hong zul tu Chuncha cu ai dawh tuk tawn. nidang nakin a ngan i nidang nak in ai dawh tawn.

Cu harsatnak pinlei ah cun niceu a rak um i, cu sunghzatlaknak pinlei ah cun Chungkhar nuam hi a rak um, Har cu a har ko lai nain a har thai lai lo, Nuamh caan nih dongh caan a ngeih bantukin Har caan nih donghcaan an ngei ve, Har lengmang timi a um lo i, nuamh lengmang timi zong a um kho lo, Kumkhua in ruah a sur lo i, Khuasik le thal caan nih an zulh tawn bangin, Khuasik le thal caan zong fur nih a zulh ve tawn ko.


Ruah a sur chung cu hmainor kho lo le lawi kho lo in Ruah nih hong kan dang hmanseh ruah a han in kan inn panh in kan kal than bantuk in, Harnak kan ton chung le sungzatlaknak kan nun ah a sur chung cu kan nun nih hmai a nawr kho loin le thangcho kho loin temtawn hmanhseh harnak a tian i ruah a dongh tikah cun hmailei ah kan kal than ve lai. Chikhat te cu nun hi a har in a mui tawn ko lai nain a pinlei ah a um mi kan tuarnak lawmman cu Chuncha bantukin ai dawh i tuanbia ngaihnuam ah an cang than tawn. 

Job Bung 14 cang 7 -9 ah cun "Thing caah cun ruahchannak a um, Hau a si hmanh ah, a corh than lai i a nge hna cu an dong lai lo. Vawlei chungah a hram cu a tar in vawlei ah a hmui cu thi hmanhsehlaw, Ti rim a theih cangka a corh than lai i thing langno bantukin a nge an borh than lai" a ti i, Thinkung nih a nunnak ding caah le a corh khoh nak ding caah ruahti a herh bantuk hin, Minung zong nih hin kan nun a khoh i hringnun sunglawi zia kan hngalh fian khoh nak ding caah hin Harnak hi kan rak herh i a caan ah ruah bantukin a rak kan sur hnawh tawn. Job thiam thiam hi minung nih harsatnak kan ton tam zia le cu harnak chung cun beidong ding kan si lo zia a thei fiang bik tu pa a si ko lai dah ka ti, Job bung 14 cang 1-2 thiam thiam ah, "Nu hrin mi minung pauh cu a chan a tawi i, harnak in a khat. Pangpar bangin a hung par i a uai than ko." a rak ti, hi hi harsatnak le sunghzatlaknak nih a nun ah ruahpi bantukin a sur hnawh lio i a chim mi a si i, a hnu ah cu a nih zong "Ruah a han hnu ah a kal ve i" a hnu ah cun Chuncha dawh bik hmutu hna lakah ai tel ve.

Sunday voikhat cu nidang tawn lo bang Khual an ngei i, an khualpa cu an Pastor pawng i a thut ko kha an hmuh, an Pastor nih Pathian bia a chimh hna lai ah cun an khualpa cu theihternak a ngeih hna i, hngakchia tein a mi theihhngalh cang mi a si nak kong le a hawitha bik hna lak i ai tel nak kong hna a chimh hna hnu ah cu ni ah cun an khrihfabuu chungtel hna sinah a duh mi paoh chim ve ding in Putarpa cu a sawm colh. cuti cun Putarpa cu a dir i bia chim hram a thawk.

"Voikhat cu Pafa hna le a fapa i a hawipa he tiin Pacific rili ah khual an tlawng, cu lio ah cun thlitu fak ngai nih a von den hna i, zeiti hmanh in rilikam i kir nolh nak ding lam a um ti lo, ti fawn cu a san tuk caah a pa cu Tilawng khalh thiam ngai mi a si ko nain an tilawng cu a duhning in a khalh kho tilo, cuticun lawng ai let i an pathum cun rili chungah an tla dih" a ti, cu bia a chim lio ah cun Tlangval pahnih nih deng teu in an rak zoh ko kha a hmu i, ti cun a bia cu a peh than.

"Cu le cangka cu Tilawng i Lifeline cu a doh, nain Lifeline donghnak lei cu pakhat lawng a si caah ho dah ka pek lai tiin khua a ruat, a nun ah biakhiahnak har bik zong a si ve ko, ho hngakchiapa sin ah dah Lifeline donghnak lei cu ka pek lai timi cu fak piin a ruat nain khuaruahnak dingah caan sau a ngei lo, a pa nih cun a fapa cu Christian a si ti a hngalh i, a fapa hawipa cu Christian a si loh timi zong a hngalh, cu a biakhiahnak tuah cu ti fawn pah a har tlukin a har ve.

A pa nih cun "Ka fapa kan dawt tuk, ka hrangah na sunglawi tuk ti hi hngal mu" tiin a au i, Lifeline cu a fapa hawipa sinah a hei cheh hnawh. cuticun a fapa hawipa cu lawng ai let mi lei ah cun a dawh i, culio ah cun a fapa cu rili chungah cun a pil i, a taksa cu hmuh than a si thai lo" tiah putarpa nih cun zaang uai ngai khin a chim. 

Culio ah cun Biakinn chung tlangval hna pahnih cun dai tein an thu i Putarpa nih cun zeithla a chim nolh lai timi an hngak ko.

"A PA " nih cun ruahnak pakhat a ngei, "A fapa cu zungzal in Jesuh sinah a um lai timi a zumh i nain a fapa hawipa Jesuh tello in zungzal hmun ah a um ding kha a ruat ngam lo, cu a si caah a fapa hawipa nun khamhnak dingah a fapa nunnak cu a pekchanh, Pathian dawtnak cu a liangngan in a va sunglawi hringhran dah kha pa tuah bantuk te kha a tuah ve Vancung khua i a um mi kan Pa nih cun a fapa ngeih chun kha khamh kan si nak hnga a pekchanh, cu caah a dawtnak hi nan cohlan nak lai kan nawl hna nanmah an khamhnak hna ding caah a fapa a pekchanh i nihin ah  Lifline nan sinah an chanh mi hna hi cohlang hram uh" 

Ticun Putarpa cu a bia a dongh ter i, a thutnak ah a kir than Biakinn chung cu dai dimdiam tein a um, Pastor cu hmai ah a hong chuak than i, Pathian bia a chimh hna i a donghnak ah i hlan ding i sawmnak zong a ngei nain hohmanh an mang lo, Pumh a dih hnu ah cun Tlangval pahnih hna kha Putarpa pawngah an hong i bia an hong ruah. "Na tuanbia chim mi cu ai dawh tuk" tiah polite ngai in an biahram an domh, "Nain a tak tak cun a si kho ngai hnga maw cu aw kan rak ti, a ruang cu midang Christian a si khohnak hnga caah Pa nih a fapa nunnak cu a pe siang tak tak hnga maw?" tiah an hung ti.

"Aw ka bia nan tlaih" tiah Putarpa nih cun an bia a leh, ti cun a Bible cu a muai i, mirh zemzuam pah khin Tlangval pahnih cu a zoh than hna, "A hman, a tak tak si ding cun ai dawhcah deuh lo zong a si kho ve, nain nihin ah nan sinah ka um, Pathian nih keimah khamhnak ding caah a fapa ngeihchun a pekchanh mi bantuk deng cu a si tak ko, kan chim hmanh hna la mu "A pa kha keimah ka si i, Nan Pastor hi ka fapa i a hawi cu a si" tiin a chimh hna.

Ruah a han hnu ah A Pa le a hawipa cu an kal than i, Mi tampi hrangah Pathian bia phuangtu le hnangamnak, ruahchannak thazaang petu, midang hrangah nun cawmtu an va si.

Hi vawlei ah hin harnak le sungzatlaknak hna cu tong ko hmanh ning "Kan nih cu ruah a han in kan kal than lai."

Salai C. Vanramdinmawi

(Tenglam)