A pinlei ah zeidah a um (Hrap khat ta lei)

A pinlei ah zeidah a um (Hrap khat ta lei)

A kum khua a upa ngai cang mi zuumlotu  tarpa cu Si- Inn chung, a zaw mi ihnak khan cungah a it ko, khua a ruat i zaangba ngai in lenglei cu a cuan i, a nunhlun vialte a ruah than tikah minung nunnak pinlei ah khin zeidah a um hnga timi a ruat, a that lio caan vialte cu caan sinah an liam cang i a hrangah a tang rih mi an um tilo, Minung nunnak pinlei lawng lawng lawng khi a si cang, cu a si caah Vawlei pinlei ah khin zeidah a um hnga timi cu fakpi in a ruat.

Nikhat cu a zaw mi Operation an tuahnak chungah Suimilam Pahnih chung Operation an tuah a hong i thangh hnu ah khin a pawngah Sibawi pakhat Tlangval no te hi a rak um, a rak zohfel cuahmah lio a si, a zohfel hnu in khaan (Room) dangah thial than ding a si cang, Putar nih cun Sibawi lei cu a zoh i, "Sibawi, Minung nunnak pinlei ah khin zeidah a um?" tiah a hal, Sibawi nih cun awl zaang te khin "Ka hngal lo" tiah a rak leh, Putarpa nih cun "Ziah na hngalh lo, nang cu Zumtu na si tung" tiah a hal than. 

Asinain Sibawi nih cun a let lo, Kawtka awnnak cu a tlaih i, lenglei ah cun Khaan chung luh a duh ngai mi thawng a theih, cuticun Kawtka a awn le cangka in a ui nih a hun zuanhnawh i a hnamh len, cuticun Siibawi cu a zawmi tarpa lei ah cun aa mer than i, "Ka uite hi zoh ngat hmanh, hi ka khaan chungah hin voikhat hmanh a lut bal mi zong a si lo, a chungah zeidah a um timi zong a hngal lo, kan nu nih ka um ti a chimh hnu lawngah kawtka ka awn le cangka in a hawn i hnawh colh, Thihnak varaal ah khin zeidah a um timi cu fiangte in ka hngal lo, nain ka Pathian a um ti ka hngalh i cucu ka caah a za ko" tiah a hei ti. 

Voikhat cu chungkhar pakhat i an nu bik ning rawl a chuan (Eirawng a bawl) lio ah Pafa hna hi an innleng  nitlang an to, an pa bik cazual (News Paper) a rel lio ah cun a fanu hngakchia te nih cun hna a hnawh lengmang, pehzulin ca a rel khoh lo tikah a fanu te cu dai tein umter a duh, cuticun a relcia mi tlap (page) khat kha a thleh i, a chungah Vawlei Map a um, cucu a thleh than i a fanu te sinah cun "Khah kafa hi a catlap i World Map hi dik tein hun remh tuah na thiam hnga maw?" tiah a ti, cuticun daitein Cazual cu a rel kho than, nain rau lo te ah a fanute cu a hong kir than, apa nih a fanute nih diktein World Map a remh khoh timi a hmuh ah khuaruah a har ngai ngai, "Kafanu zeitin dah tuante ah dik tein na remh khoh dih e?" tiah a hal. a fanute nih cun "Kapa a hnulei ah khan Mipa pakhat lem a um i, cu cu ka remh i diktein a chuak ko" a ti i inn tual ah a tlik tak, apa cu a khuaruah a har chin chin.

Vawleicung i kan khualtlawnnak hringnun ah hin kan ton cia mi le kan ton ding mi thil vialte ah hin lam pakhat lawng a um loh i, Hrap khat lawng a um lo, zeipaoh nih hin hrap hnih an ngei cio hna, Harsatnak kan ton i kan hmai ah harnak le dawnkhantu  a ngan ngai mi pah a herh caan ah khin Hrapkhatlei lawng zoh lo in hrap hnih in kan zoh thiam hi a herh hringhran mi a rak si.

Voikhat cu Si-inn ah hngakchiapa a zawfak ngai mi le hma ngan ngai a pu mi hi a um i, a zohkhenhtu ding Siibawi an um lo caah le Siibawipa cu lam i a hon lio a si caah a nu le apa cu lungrethei ngai ngai in an um ko, Sibawipa a phanh hlanah an fapa nunnak cu a liam sual lai an phang hringhran, an fapa ngeih chun zong a si fawn caah an siang hrim lo.

Caan zeimawzat a liam hnu ah khin Siibawipa cu hnawhhnam ngai khin a hong phan kho ve, A zaw mi a nu le pa nih Siibawipa an hmuh tikah an zaihnawh len "Ziah hi can can na rauh, kan fapa a thih deng hi na hngal lo maw, na mawhphurhnak hi na hngal lo tuk" ti in, Siibawipa nih cun mirh simsiam te khin "Si-inn i ka um lo caah tuan ah ka rak phanh kho lo, ka theih le cangka in ka rak hong colh, tu ah cun daite in um cang u law, rian kan tuan colh cang lai" tiah a leh hna. 

"Daite in um uh hna cu na hei ti, Na fapa hi thi deng in um ve sehlaw daite in na um kho ve hnga maw?" tiah thinhar ngai in a hei chalh, nain Siibawi nih cun "Ka hawi kan chim hmanh la mu, Kan Baibal cauk chungah cun, Minung cu lei in sermi kan si i, lei ah kan kir than lai, Pathian cu thangthat si ko seh, Siibawi nih cun chan a sauh ter kho lo, va kal law na fapa hrangah hin thla va cam koh, kei zong nih ka thiamnak vialte ka chuahpi ve lai" tiah mirh simsiam tein a leh than hna.

Cu hna nupa cu lungsi lo ngai khin phunzau cuahmah bu khin an kal ve, cuticun suimilam pakhat hrawng operation an tuah hnu ah khin Siibawipa cu zaangba ngai khin a hong chuak i, "Pathian cu thangthat siko seh, nan fapa nunnak cu chanh a si" tiah a chimh hna i, nupa hna an holh manh hlan ah cun hnawhsare in lnn lei ah cun a tli than. 

A zawmi a pa nih cun, "Nan siibawi cu ai uah thiam tak tak si, ka fapa cu zeidah a lawh i a dirhmun hmanh kan hal manh hlanah lawi colh hawi ko cu" tiah Nurse sinah cun a zai than. cu tikah Nurse nih cun "Nizan ah a fapa Lam ah accident a tong i a nunnak a liam, Na fapa operation tuah dingin kan auh lio ah khan Vuinak tuah dingin an i timh cuahmah lio a si" tiah a leh.

Mitampi nih cun kan mah can le kan mah hoih lawng in khua kan ruat i, kan mah dirhmun lawng zoh bu in biakhiahtnak  kan tuah tawn, midang dirhmun le midang hoih khi kan zoh chih in kan ruat chih tawn lo. Pakhat le pakhat kan dirhmun le kan sining i theih piak hmasa lo in biakhiahnak hi kan tuah theo. Minung pakhat le pakhat umti le nun ti nak ah theihthiamnak hi kan herh khun mi a rak si. nuva ai then mi cheukhat zong hi an i dawt lo ruangah a si theng dih lo, pakhat le pakhat an i theihthiam lo caah a si pah tawn. 

Salai C. Vanramdinmawi

(Tenglam)

10 Vaupi, 2019