CHAWLNO KHIAH NI ( MUIDAWH MINTHANG CHAK LE THLANG RAL CHUAH TER TU

CHAWLNO KHIAH NI ( MUIDAWH MINTHANG CHAK LE THLANG RAL CHUAH TER TU 

Tlangaupa, Thaizing khi meilamphiah ni ding ah a ni kan khiah, le khuami thawng na va thanh hna lai, fiangte le tling te in na va au lai, kan hnu hawi hna kha vengthlang lei nih tlangau kan thei loh an ti le an zai len khah tu tan cu fiangte le tling te in na va au lai mu" tiah Saizawh khuabawipa Zam Ling nih cun kuak khu hlut I Pak buin tlangaupa cu rian a von fial.

Tlangaupa a chuah hnu caan rau lo ah Khuabawipa nih cun " Khah... Za Chim nu kan zu tho ka te kha von kan hun tuah uh" tiah zupu cu a von hlam.

Saizawh khua chungah Bawi a bawmtu upa cu an tling deuh ngawt, an puithiampa nih cun " Tu Kum cu Zingnu nih kan i thawinak thlua a chuah lai I kan Buh le kan thlai hna Bawngmal a sawm lai I kan Kum a vui khun ko lai, kan lo tlang mi hmun si ke a lei a tha I a kangh lebang ah cun tukum cu dongkip lung a tling ko lai." Tiah an tlak mi Fingbek tlang lei cu a von zoh pah.

" Za Sang pa nih cun, zu a von i coh I a aw cu a von thenh, " Sihmanhselaw tukum cu kan hirha deuh cu a hau te lai kan theih cio bantuk in tu kan lo tlak mi hi cuhpitu kan ngei Khiangcawi khua pawl hi an lung cu a dam hrim hrim lo, nai tan vawk lang zawnh tiang in kan va kal hnawh tan zawngah an rak kan cohlang bak loh khah mu, tukum cu thindai le lungnuam I lo riah a har te lai hih" tiah bia cu a von peh.

Khua Bawipa cu a kuak zuk a von khon a thar in khuhsi a vun rawn mei thing thu in a von duk khuah hluahmah in a von i Pak than i, " Ka dua le, ral ngeih le do ngeih hi kan duh thim cu a si hrim lo ti cu kan dihlak theih cia a si ko khah, Sihmanhselaw Fingbektlang tluk in Buh a thar kho ding le kan Kum a vui ter ding hi an um lai lo, Fingbek tlang hi Kapa Buan Kil nih khan zuan a rak timh i perh a tar nak hi a sau cang nain keimah chan lawngah hi hmun hi kan tlak khawh hi a si.

Khiangcawi khua mi hna tham cu hi hmun kan tlak hnu pi Ka Fapa Hniang bik Hre Ling hmanh a chuah hnu pi ah dawh an von zuan ve ko cuh, an hlan pi ah hi ram le tlang hna hi kan rak tlak cang an kan cuh ah cun kan cuh hnaseh a ho dah ral a tha i a zam lo mi cu kan zoh lai," tiah fak nawn in a von i hrocer."

Sang Ling pu cu a tar ngai cang a tuak par hna von zoh ah zah phu hrim hrim a si ko, a aw zawng an ther I, a cuar zawng an sawng dih cang Sihmanhselaw mifim ngai ngai pakhat a si ve " Za Khum pa, Na pa chan in khua upa ka rak sih nan chhung duhsaknak thawngin Bawi inn hmai kan um kho lengmang Napa zawng kha ruahnak ka rak cheuh tawn, tu tan zawngah hin mi lungfim le khua ruah sau na si bantuk in ka bia hi tha tein ngai law ka ruah piak ko .. Khiangcawi khua pawl hi vong lang zonh in remnak va tuah ko hna usih " tiah a von ti.

Bawipa nih cun ka khat hmanh in a leh manh hlanah Hrang Nawn nih " Kapa Zasangpa na ruahnak cu kei ka ruahnak he aa dang nain pumpak I rem lo ruangah cun nang upa lungfim ah ka ruah piak sawh hlah, Kan Bawipa I a chim cia bantuk khan hi tlang le Ram hi kanmah nih kan tlak hmasat cun Kum hmasa i thisen tiang chuah timh i Nam a kan zo hnawh hnu hmanh ah Upa deuh can cang in Vong lang tiang kan va zonh hna I an kan khrih khah, Fapa tlangval ka ngei ve cang kha bantuk I rak i cohlan duh lo le rak i khrih kha ka vawikhat nghalhnak bak a si, I nehsawh le zei I rello dahkaw a si ko aw, kei cu ka tih bak hna lo an ngamh mi paoh ka ngamh" tiah a von ti ve.

Za Sangpu cu a hmai a sen a tha a khur " Tu nai ka biachim kha ka tih hna ruang le ka ngamh lo hna ruang I biachim cu ka si lo ti nan theih, mah phorhlawt cang hlah seh Cakei lufim le ral lu la dawh kasi ve awh... remnak hi a tha bik mi a si ti cu kan I fiangte dih kei nih cun nuhmei le ngaktah hi um ti hna hlah sehlaw ti ka duh, Daihnak tangah hnangamtein um hi a sunlawi Zia thei tu viar kan si" tiah bia a von chap

Bawipa nih cun a kut a von zo I haohmanh an holh ti lo daidap in an um. " Zasangpu le Tlaih Hup pa nan bia von in tan ta ko hna ning... Ka khua mipi hna le kan ti le vawlei himnak hi ka duh bik mi a si , cubantuk in khuami hna himnak ding ruatin Kapu le Kapa hna nih hmai an rak sat, tu kei ka chan a tlung ve Nan himnak le nan damnak hi tampi ka kutchungah a um ti hi kai fiang hringhran, a herh ah cun ka chhungkhar le ka nunnak tiang hmanh in pek ka ngamh cu cu ka mawhohurhnak zong a si in ka nghalh.

Ka bia ka von fianh lai Khiangcawi khuami hna sin I remnak Kong ah cun Vawklang zawnh in ka mual kai pho ti lai lo vawikhat a kan khirh cang kan tlangval le hna tiang in an kut kan tuar. Remnak cu ka duh bik mi a si, Daihnak hi ka saduhthah a si ko, cubantuk remnak le Daihnak kan hmuh khawh nak ding caah cun a herh a si ah ral zawng kan do ko lai te ka I chim khawh lo mi cu Meithal zawng nih a aupi lai I Namhar zawng nih teh a vahpi te ko lai" tiah rum nawn I a bia a von dongh ter.

Cu hnu biachim ngam haohmanh an um ti lo An Bawipa bia nih an lung a tei cikcek a lung dawng deuh mi zong an Bawipa bia an theih cun an ral a tha than.

Fingreicat ar a khuang i tar le upa ngei deuh chung hna in ah cun mei a de cang cheukhat chungkhar bel cu daitein an it ko rih. Culio ah Khua uk Bawipa zantim i ai hlauh hnu khan I nghilh kho ti loin khua a ruat a lung a leng ngai ngai zandang ah cubantuk cun a um bal lo nain tuzan cubantuk in a tuai ter tu cu a mang a si. A mang ah a Pa a rak hmuh cu a mangah cun a Pa nih a nun lio bantuk tein bia a rak ruah thazaang a rak pek I a rak forhfial, cun a theithiam lo mi thil pakhat hi a Pa nih cun a chimh cu thengte cu nghilh kho loin a tuah tu cu a si.

Khua a von ceu i in hmai sum suk thawng le tarnu tete arthlah thawng nih mi a hriauhrak ter ngai, Nungak ti than hna nih I nolh timin tikhur an panh lio ni a chuah rih manh hlan tung ah khin Bawipa cu a von tho ve zuahmah. Ti thawl chung ti cu a von bungh I phuk tiah a hmai a von muai ti a von i cauh dih in Tappi kamah a von to ve, nain haohmanh a chon hna lo.

" Za Chimpa tuzing cu na mui hmuh a nuam lo ngai e, na mang maw a chia na hmel a panh lo ngai" tiah Bawinu nih vawkrawl cawh pah cun a von hliah.

" Zei a si lo, Za Chimnu ka Kum nih a kan upat thuat ve cang I a si ko hih." Tiah a mang cu chim a cu rih lo tiah a von chim lo phawt.

Khua Upa hna nih an von len a hong mi paoh nih chim ngam lem loin an Bawipa zing dang khom a si lo bak le a hmel ah chim lo mi bia a um kha an hmuh khawh.

Zing ni chhuak nih Darhkhup tlang in a von mang hngakchia lentecelh thawng le innleng hna biaruah lakah Bawipa lung a fiang kho hlei lo an bia a ngai mi bantuk in a um nain a lungchung cu aa tuai tuk hringhran , a donghnak ah cun aa tuar sek ve ti lo I.

" Khar Mangpu, Kan Puithiam kha a um ko lo mei, " tiah ruahlo pi in an bialak ah a von hal hna, an biaruah lio mi he aa ralkah tuk lehpek I innchung a um mi cu an khua ruah a har dih.

Khar Mangpu cu saulak a ngang nain a von i hlau I " Bawipa a um lio te a si ko rua zahan zanlei zingah khan Venglu lei in a hon ka hmuh ko a nih hi a ni le caan fianh a har tuk i khual a tlong manh hawi hnga dek maw..? Nain zahan ah khan cun ka hmuh bak ko eh" tiah a von leh.

" Za Chimnu si ah cun , ka nau le hei fial hna law a ran khawh chung in rak hong tuah seh" tiah a ti.

Puithiampa a hon cun innka in a rak dawn " A... Hrat Chumpa biaruah duh ngai ngai mi kan ngei tuzing bak cu ka khua ruah a har ko, hih a caan zong ai rem ngai I minung zong kan tling khah lenglei ah I thial hna usih law ni tlang toh pah in ka lungchung bia cu kan ruah hnik hna lai" tiah a von ti hna.

Hrang Nawn le khua Upa pawl cu khua ruah har ngai buin an Bawipa cu an zulh.

Darkhuptlang cungah cun ni cu a um rih khua cuanh ah khin hmun niam deuh cu minmei nih a khuh rih i romei fa te tein an kai cu ni cu a thiang hringhran thli zawng a thiang I dawp a nuam lung a dai kho tuk.

An Bawipa bia theih a nghahhlang mi khua upa pawl le an Puithiampa an Bawipa zoh in an thu ko. Nungak sumsuk pah in an nih thawng lakah lung sivang ngai in a um mi an Bawipa nih a biathli thlet hram a von domh .

" Unau hna Nizan ah khan Mang ka manh zandang zawngah mang cu ka manh zungzal mi a si ko nain Nizan I ka mang manh mi bantuk in ka lung a tuai tu le khuaruah har in a ka tuah tu hi an um bak lo. Hi khua kan tlak lai Ka Pa thih hlan ah khan Hibantuk in mang ka rak manh hawi cang kha tan ka mang ah khan Nghal hriang ka rak kah i kan dawinak ah tikhur ka rak hmuh , ka von i thangh I thlamleng ka von chuah tikah Ngalhriang nganpi ni lo lak I a rak tlin ko kha ka hmuh tak tak I ka kah cun a tlik I a hliam kan dawi tikah hi hmun hi kan phan cu tikhur cu tu ah khuapi nih thal le fur ah kang lo cat loin kan tlanh mi hi a si.

Nizan I ka mang zawng kha cubantuk te bak cu a si nain theihthiam lo mi pakhat a um.

Nizan ka mangah cun Kapa ka rak hmuh a damlio I a mui bantuk te khin ka hmuh, a dam lio mi he an I Dan nak pakhat hmanh ka hngal lo, a mui zawng a tha i a hmel zong zoh a dawh, fahnak ngei lo mi bantuk te khin ka rak hmuh ko, a ka hmuh ruangah aa nuam ngai mi bantuk in a rak um. Cun Kapa nih cu forhfial nak bia a rak ka chimh I thazaang a rak ka pek, cu hnu ah a ka chim chap mi cu tu I ka lung a ka tuai ter ngai ngai tu cu a si, Kapa nih cun hitin a rak kati " Kafa, tu kan chimh ding mi hi na thih hlan hrim hrim ah a tlung ding mi an si, Nitlaknak ramin Zawng hmairang an ra lai i nan caah harnak petu an si lai, Nan lo hna ah nan dum le thlai an duh paoh in an hrawh lai i an um a sauh hnu chin chin lebang cun nan bukbau chung rosung tiang in an in lak piak hna lai, thlauh nan timh hna lai Nain nan thlauh khaw hna lai lo" tiah a rak kati. Kapa nih zawng Hmairang a hong ding mi a ti tikah hin ka khuaruah a har ngai ngai zawng Hmairang cu hmuh bal mi zawng a si lo I cu chin chap ah Nitlaknak Ram hla ngai ngai in an hong la a ti fawn mi nih hin a ka lung a tuai khun ko." Tiah zaanguai ngai in a von chimh hna tikah Khua Upa le a bia a thei tu paoh cu khuaruahhar lungsivang ngai in an um cio.

Culio ah Puithiampa a hrawm a von thenh " A... Bawipa a mak hringhran ko e na mang cu kei zawng na von ka auh ter hna hlan chung kha cu ka lung a rak i tuai tuk ve I Nizan lebang cu zaantim i kai thangh hnu kha kai hngilh kho bak ti lo tu na mang na von chim le ka lung a piang pah ngai nain ka khuaruah a har chin chin ka lung tur zawng a hman bak ti loh hih" tiah a von ti ve.

An dihlakin Puithiampa lei cu an zoh zeidah a chim nolh te lai tiin an mit hmanh an thep ti lo, an khuaruah a har a har chin chin.

Bawipa ni cun " Hrat Chumpa ka kawi zeidah a si e Nizan I hngilh kho lo I an tuah tu cu von ka chim ve ngat ka lung a piang deuh hnga maw tiah..? " A von ti.

" A..... Bawipa na mang le ka mang kha ai khat cu kati ngam lo nain a sullam cu ai khat bak ko lai, Nizan ka mang ve hawi ah cun na lo ah kan rak kal hna Thlam bahzar I kan thut ko lio le nitlak lai kan cuanh ko lio ah khin Nitlak lei in Zawng rang pipi khi tam ngai an rak ra thluahmah cubantuk zawng hrim hrim cu ka mang hmanh ah ka voikhat hmuhnak bak a si ve, Cubantukin kan cuanh ko lio hna ah cu. Na lo chung rawl le thlai vialte hi an ei dih zil hawi hna cu a nganh in an ngan lo , an eithlu tak tak lai hi teh tiin Na Fapa u Za Chim le a hawi le nih an kah len hna nain Meithal puah chung te cu tu chungah an lut nain Meithal thawng a daih in an rak lang than theu ko, ka von i hlau I ka mang a si ti ka nghalh nain kai nghilh kho bak tilo . " Tiah a von ti.

An Bawipa le an Puithiampa mang aa khat mi cu khuapi tein ceih cio le phai cio a si.